បន្តអភិរក្សសិល្បៈល្ខោនយូរកេរ
ក្រុមសិល្បៈមហាជនខ្មែរប្រាសាទគង់ ខេត្តសុកត្រាំង បានបន្តរក្សាសកម្មភាពជាច្រើនជំនាន់មក ហើយនេះក៏ដោយសារទឹកចិត្តស្រឡាញ់អាជីពរបស់សមាជិកក្នុងក្រុម។
ឈុតសម្តែងក្នុងរឿង “នរណាជាព្រះរាជបុត្រា” របស់ក្រុមសិល្បៈមហាជនខ្មែរប្រាសាទគង់។
តាមប្រសាសន៍សិល្បករថាច់ជេន ប្រធានក្រុមសិល្បៈមហាជនខ្មែរប្រាសាទគង់ ក្នុងអំឡុងពេលរាប់សិបឆ្នាំមកនេះ ក្រុមបានដំណើរការដោយឯកជន។ រាល់សម្ភារៈភ្លេង សម្លៀកបំពាក់ និងគ្រឿងអលង្ការ។ល។ គឺក្រុមរ៉ាប់រងទាំងស្រុង។ ពិសេស ក្រុមតែងនិពន្ធចងក្រងរឿងថ្មីៗ ដើម្បីរក្សានូវលក្ខណៈប្រពៃណីតាមទម្រង់សាច់រឿងបុរាណផង និងពាំនាំនូវអត្ថន័យអប់រំល្អៗសមស្របទៅនឹងការរីកចម្រើនរបស់សង្គមក្នុងសម័យទំនើបផង ដើម្បីសម្ដែងបម្រើជូនទស្សនិកជន។ ពេលសម្តែងទើបសិល្បករ-ការិនីតន្ត្រីករ ។ល។ របស់ក្រុមមានប្រាក់ចំណូល។ ថ្ងៃធម្មតា ពួកគាត់គឺជាកសិករធ្វើស្រែចម្ការ និងធ្វើការឈ្នួលនៅភូមិភាគ ដើម្បីមានប្រាក់គិតគូរជីវភាពប្រចាំថ្ងៃ។ ពេលមាមីងអញ្ជើញក្រុមទៅសម្តែងក្នុងឱកាសបុណ្យទានរបស់ជនរួមជាតិ ឬចូលរួមមហោស្រព ពិធីប្រឡងសិល្បៈ ទើបបងប្អូនប្រមូលគ្នាទៅសម្ដែង។ សិល្បករថាច់ជេន ឱ្យដឹង៖ “ក្រុមសិល្បៈមហាជនខ្មែរប្រាសាទគង់ ប្រៀបបានដូច ”រតនសម្បត្តិ” របស់វង្សត្រកូល អាស្រ័យដូនតាបានបន្សល់ទុកមក។ ព្រោះហេតុនោះ ទោះបីលំបាកយ៉ាងណាក៏ដោយ ខ្ញុំក៏ប្តេជ្ញាចិត្តរក្សានិងបង្ហាត់ដល់កូនៗដើម្បីបន្តអភិរក្ស”។
បងស្រីលីធីថាញត្វៀង សិល្បការិនីដើរតួរបស់ក្រុម ឱ្យដឹង៖ “ខ្ញុំចូលក្រុមសិល្បៈមហាជនខ្មែរប្រាសាទគង់ដល់ពេលនេះគឺ ២២ ឆ្នាំហើយ។ ថ្ងៃធម្មតា ខ្ញុំទៅធ្វើស្រែ ប៉ុន្តែពេលសម្តែងនៅលើឆាក គឺខ្ញុំតែងដើរតួជារាជបុត្រី ព្រះអគ្គមហេសី ឬទេពធីតា។ល។ ប្រការនេះ មិនមែនអ្នកណាក៏អាចធ្វើបាននោះទេ គឺផ្តើមពីទឹកចិត្តស្រឡាញ់អាជីព ផ្សំនឹងទេពកោសល្យសិល្បៈ។ លុះសិល្បៈល្ខោនយូរកេរបានទទួលស្គាល់ជាបេតិកភណ្ឌវប្បធម៌អរូបីថ្នាក់ជាតិ យើងខ្ញុំកាន់តែប្តេជ្ញាចិត្តអភិរក្សថែមទៀត”៕
យ្វីអាញ-វិមាន
