វប្បធម៌-សិល្បៈ វប្បធម៌

19/09/2026 - 09:03

វត្តសេរីកណ្ដាលកន្លែងអភិរក្សបេតិកភណ្ឌ

វត្តសេរីកណ្ដាល ស្ថិតនៅសង្កាត់វិញភឿក ទីក្រុងកឹងធើ បានកសាងនៅឆ្នាំ ១៦៩៤ គិតមកដល់ ពេលនេះវត្តបានកសាង ៣៣២ ឆ្នាំ វត្តបានរក្សាសំណង់ស្ថាបត្យកម្ម និងវត្ថុបុរាណជាច្រើនមានអាយុកាលជាងមួយសតវត្សរ៍។ ទោះបីឆ្លងកាត់ពេលវេលាយូរអង្វែងក៏ដោយ ប៉ុន្តែបេតិកភណ្ឌទាំងនេះនៅតែរក្សាបានភាពស្រស់ស្អាតដូចដើម។

 វត្តបានរក្សាទុកវត្ថុបុរាណជាច្រើន។

ក្នុងចំណោមសំណង់ស្ថាបត្យកម្មទាំងនោះ មានសមណកុដិកសាងអំពីឈើ ទោះបីបានកសាង ជាង ១០០ ឆ្នាំក៏ដោយ ប៉ុន្តែសមណកុដិនេះនៅតែមានភាពរឹងមាំ និងរក្សាបានដូចដើមទាំងស្រុង ដោយសារការយកចិត្តទុកដាក់ជួសជុលរបស់វត្ត។ ទន្ទឹមនឹងនោះ វត្តក៏បានរក្សាទុកសាស្រ្តាស្លឹករឹត និងទូតម្កល់សាស្រ្តាស្លឹករឹតដែលមានអាយុកាលប្រហាក់ប្រហែលគ្នា។

សំណង់សំខាន់មួយទៀត គឺព្រះវិហារបានកសាងនៅឆ្នាំ ១៩០៥។ ដោយឆ្លងកាត់ជាងមួយសតវត្សរ៍ ប៉ុន្តែព្រះវិហារនេះនៅតែរក្សាបានទម្រង់ដើមស្ទើរតែទាំងស្រុង គ្រាន់តែផ្លាស់ដំបូលប្រក់ក្បឿងមកប្រក់ស័ង្កសីប៉ុណ្ណោះ។ ការជួសជុលសំណង់បុរាណនេះ បានកាត់បន្ថយនៅកម្រិតទាបបំផុត ពីព្រោះព្រះសង្ឃនិងគណៈកម្មការវត្តយល់ច្បាស់ពីតម្លៃរបស់សំណង់បុរាណនេះ។ ហេតុនោះ រចនាសម្ព័ន្ធសំណង់ដទៃទៀត ដូចជាសសរ ពិដាន ហោជាង គ្រោងដំបូល ទ្វារ និងបង្អួច បានរក្សាទុកដដែលនិងធ្វើអំពីឈើទាំងស្រុង។ ខាងក្នុងព្រះវិហារ ក្រៅពីផ្ទាំងគំនូរពុទ្ធប្រវត្តិនៅលើជញ្ជាំងសសរឈើនីមួយៗបានលាបពណ៌ខ្មៅ និងគូរក្បូរក្បាច់លម្អដោយទឹកមាស។ នេះ គឺជាសិល្បៈតុបតែងដ៏ពេញនិយមនិងមានតាំងពីយូរយារណាស់មកហើយនៅតាមព្រះវិហារបុរាណ។ ទន្ទឹមនឹងនោះ វត្តក៏រក្សាទុកវត្ថុបុរាណជាច្រើន បានដាក់តាំងក្នុងទូកញ្ចក់។ ក្រៅពីនោះ នៅក្នុងវត្តនេះមានទូកគែហ៊ៅ ២ គ្រឿង ក៏មានអាយុកាលជាង ១០០ឆ្នាំ វត្តបានថែរក្សានិងមានសភាពនៅល្អណាស់។

លោកដាវជា អនុប្រធានគណៈកម្មការវត្តសេរីកណ្ដាល សង្កាត់វិញភឿក ឱ្យដឹង៖ “វត្ថុបុរាណទាំងអស់បានដូនតាបន្សល់ទុកមករហូតដល់សព្វថ្ងៃ យើងខ្ញុំជំនាន់ក្រោយក៏អភិរក្សឱ្យបានល្អ ដើម្បីឱ្យកូនចៅជំនាន់ក្រោយបានស្គាល់។ ការរក្សាទុកបេតិកភណ្ឌទាំងនេះ រួមចំណែកអភិរក្សបេតិកភណ្ឌវប្បធម៌ និងអត្តសញ្ញាណជាតិ”។

អាចសង្កេតឃើញ សំណង់ស្ថាបត្យកម្មនិងវត្ថុបុរាណទាំងអស់ បានវត្តថែរក្សាយ៉ាងហ្មត់ចត់។ បេតិកភណ្ឌទាំងអស់នោះគឺជាទ្រព្យសម្បត្តិដ៏មានតម្លៃមិនអាចកាត់ថ្លៃបានរក្សាទុកដើម្បីជំនាន់ក្រោយ បានដឹងនិងព្រួតដៃគ្នាថែរក្សា។

ព្រះតេជព្រះគុណ ថាច់ហុង ព្រះចៅអធិការវត្តសេរីកណ្ដាល សង្កាត់វិញភឿក មានថេរដីកា៖ វត្ថុបុរាណដែលបានរក្សាទុកក្នុងវត្តសព្វថ្ងៃនេះ គឺដោយសារការខិតខំប្រឹងប្រែងការពារ និងថែរក្សារបស់ព្រះចៅអធិការ គណៈកម្មការវត្ត និងពុទ្ធបរិស័ទចំណុះជើងវត្តគ្រប់ជំនាន់។ ទន្ទឹមនឹងការរក្សាលក្ខណៈបុរាណ បច្ចុប្បន្ន វត្តសេរីកណ្ដាលក៏យកចិត្តទុកដាក់ក្នុងការតែងលម្អទេសភាពឱ្យកាន់តែស្អាតឡើង ដោយស្មារតីកសាងសំណង់ថ្មីផង និងអភិរក្សបេតិកភណ្ឌបុរាណផង៕

វឌ្ឍា - វិមាន

ចែករំលែកអត្ថបទ

ពាក្យគន្លឹះ