មហាសាមគ្គីជនជាតិ គំរូក្នុងសហគមន៍

26/06/2023 - 14:44

លោកចៅកក កសិករផលិតពូកែនៅឃុំណូយតូ

លោកចៅកក។

ឆ្នាំនេះគាត់មានអាយុជិត៦០ឆ្នាំហើយ ប៉ុន្តែលោកចៅកក នៅភូមិតូធ្វឹង ឃុំណូយតូ ស្រុកទ្រីតូង ខេត្តអាងយ៉ាង នៅតែខិតខំពលកម្មផលិត។ ជាច្រើនឆ្នាំបន្តបន្ទាប់ លោកទទួលបានការស្ងើចសរសើរជាកសិករផលិតធ្វើអាជីវកម្មពូកែ។

លោកចៅកក មានដីបង្កបង្កើនផល ២ ហិកតា។ មុននេះ គាត់ធ្វើស្រែតែមួយមុខប៉ុណ្ណោះ។ លោកចៅកក បានឱ្យដឹង៖ “ការផលិតស្រូវក្នុងរវាង ៣ ឆ្នាំទើប “ស្រូវបានទិន្នផលខ្ពស់ លក់បានថ្លៃ” បាន ១ ឆ្នាំ។ ប៉ុន្តែតម្លៃជី ថ្នាំ ភ្ជួរ ច្រូតកាត់ ឆ្នាំក្រោយតែងឡើងថ្លៃជាងឆ្នាំមុន។ ការផលិតស្រូវត្រូវបានចាត់ទុកថា គ្មានប្រសិទ្ធភាពអ្វីទេ។ ព្រោះហេតុនោះ ខ្ញុំគិតថា គួរមានការផ្លាស់ប្ដូរផលិតកម្ម”។ គិតឃើញដូច្នោះ គាត់បានស្វែងយល់ពីតម្រូវការទីផ្សារ ពិសេសគឺតម្រូវការបន្លែ ផ្លែឈើជ្រះនិងសុវត្ថិភាព។ ពេល “ក្ដាប់ច្បាស់” ថា “មានច្រកចេញ” គាត់បានពិភាក្សាជាមួយនឹងប្រពន្ធ ដើម្បីបង្វែរផ្ទៃដីផលិតស្រូវ ០,៥៥ ហិកតា មកដាំឈើហូបផ្លែ។

ដំបូង គាត់ដាំដូង ២០០ ដើម ឆ្លាស់ជាមួយនឹងស្វាយ ២០០ដើម (ស្វាយថៃ ស្វាយតៃវ៉ាន់ ស្វាយកែវរមៀត។ល។) ដើម្បី “យកខ្លីចិញ្ចឹមវែង” ក្នុងចម្ការ គាត់ដាំបន្លែបង្ការគ្រប់ប្រភេទ មានដូច៖ ននោង ត្រកួន ស្ពៃហាង ជីរក្រអូបគ្រប់ប្រភេទ។ល។ “ដើម្បីជៀសវាងកកស្ទះទីផ្សារ ខ្ញុំឧស្សាហ៍មើលព័ត៌មានអំពីតម្រូវការនិងតម្លៃទីផ្សារបន្លែបង្ការគ្រប់ប្រភេទ។ ផ្អែកលើមូលដ្ឋាននោះ យោងតាមអាកាសធាតុ ខ្ញុំជ្រើសដាំនូវប្រភេទបន្លែបង្ការដែលសមស្រប” លោកចៅកក បានចែករំលែកដូច្នោះ។ មិនតែប៉ុណ្ណោះ ពិនិត្យឃើញតម្រូវការ “បន្លែជ្រះសុវត្ថិភាព” កាន់តែខ្ពស់ពីមួយថ្ងៃទៅមួយថ្ងៃ បានជាគាត់ស្វែងរក ស្រាវជ្រាវរបៀបដាំបន្លែបង្ការមិនប្រើប្រាស់ជីគីមី។ “ខ្ញុំចិញ្ចឹមគោ ហើយប្រើប្រាស់លាមកគោ ជីសរីរាង្គសម្រាប់ដាក់បន្លែ ឈើហូបផ្លែ។ អាស្រ័យហេតុនោះ មិនត្រឹមតែប្រិតសំចៃបានប្រាក់ចំណាយប៉ុណ្ណោះទេ នៅទាំងបានអ្នកជាច្រើនដឹងស្គាល់ហើយ និយមទិញហូប ម្ល៉ោះហើយបន្លែបង្ការដែលខ្ញុំដាំតែងលក់បានថ្លៃលំនឹង។ ចំណែកចម្ការឈើហូបផ្លែរបស់ខ្ញុំ ពេលណាក៏មានភាពលូតលាស់ល្អនោះដែរ” លោកចៅកក បានចែករំលែកដូច្នេះ។ ពេលដើមដូង ដើមស្វាយកាន់តែធំ គាត់បានបង្រួញផ្ទៃដីដាំបន្លែបង្ការ។ ជំនួសវិញ គឺគាត់ចិញ្ចឹមមាន់ព្រលែងក្នុងចម្ការដើម្បីបង្កើនប្រសិទ្ធភាពផលិតកម្ម។

លោកចៅកក កំពុងថែទាំចម្ការ។

លោកចៅសុខុម ប្រធានសមាគមកសិករឃុំណូយតូ ឱ្យដឹង៖ ក្រៅពីឧស្សាហ៍ព្យាយាម ភាពជោគជ័យរបស់លោកចៅកក គឺចូលចិត្តរៀនសូត្រ ស្វែងយល់និងមិនរួញរាអនុវត្តរបៀបថ្មីៗ ក្នុងផលិតកម្ម។ “ដូចជារឿងដាំស្វាយ គាត់បានស្រាវជ្រាវហើយសាកល្បងដោយជោគជ័យនូវរបៀបធ្វើឱ្យស្វាយចេញផ្លែរប៉េះរបោះ។ល។ ម្ល៉ោះហើយ ចម្ការស្វាយរបស់លោកចៅកក មានផ្លែខួបឆ្នាំ។ អាស្រ័យហេតុនោះ ស្វាយរបស់គាត់តែងលក់បានថ្លៃខ្ពស់ ហើយគ្មានដែលធ្លាក់ក្នុងស្ថានភាពកកស្ទះទំនិញ កកស្ទះទីផ្សារនោះទេ។ រឿងដាំដូងក៏ដូចគ្នាដែរ លោក “គ្រប់គ្រង” ឱ្យដូងចេញផ្លែតាមបំណង។ ជាការពិតណាស់ ដូងដែលគាត់ដាំស្ថិតក្នុងដំណាក់ការលក់បានថ្លៃខ្ពស់បង្គួរ” លោកចៅសុខុម បានឱ្យដឹងដូច្នោះ។

ផ្ដើមពីការផលិតស្រូវ ដាំចម្ការ ដាំបន្លែបង្ការ ចិញ្ចឹមសត្វ។ល។ រយៈពេលជាង ៥ ឆ្នាំមកនេះ គ្រួសារលោកចៅកក រកបានប្រាក់ចំណូលជិត ២០០ លានដុង/ឆ្នាំ។ ពេលនិយាយដល់រឿងនេះ លោកចៅកក តែងមានមោទនភាពរហូត៖ “ខ្ញុំគិតថា ខ្លួនមិនទាន់ជោគជ័យណាស់ណាទេ។ ប៉ុន្តែក្នុងស្ថានភាពតម្លៃទំនិញលំបាកដូចសព្វថ្ងៃ ប្រាក់ចំណេញផ្ដើមពីផលិតកសិកម្មបានជួយគ្រួសារខ្ញុំលំនឹងជីវភាព សេដ្ឋកិច្ចគ្រួសារបានកែលម្អ។ ពិសេស ផ្ដើមពីការធ្វើកសិកម្ម ខ្ញុំគិតគូរឱ្យកូនៗរៀនសូត្របានត្រឹមត្រូវ ហើយសព្វថ្ងៃ ពួកគេមានការងារធ្វើគិតគូរឱ្យគ្រួសាររៀងៗខ្លួន”៕

ថាញឡុង - ថាច់ធី

ចែករំលែកអត្ថបទ

ពាក្យគន្លឹះ