កីឡា - ទេសចរណ៍ ទេសចរណ៍

05/09/2025 - 08:36

ស្រណោះភាពស្ងប់ស្ងាត់នៅម៉ាងឌាង

ក្នុងចំណោមអនុស្សាវរីយ៍រាប់មិនអស់សម្រាប់ដំណើរកម្សាន្តឆ្ងាយៗ យើងខ្ញុំស្រណោះបំផុតនោះ គឺរមណីយដ្ឋានទេសចរណ៍ម៉ាងឌាង។ ពីព្រោះនៅទីនោះ មានដងផ្លូវបត់បែនដ៏ស្រស់ស្អាត ខ្យល់អាកាសបរិសុទ្ធ។ល។ ពិសេស សម្រាប់អ្នកមានបំណងចង់មក “លម្ហែកាយ” បណ្តែតអារម្មណ៍ជាមួយសម្រស់ធម្មជាតិដ៏ស្រស់ស្អាត ធ្វើឱ្យអ្នកទេសចរមានអារម្មណ៍សុខសាន្ត។

 គយគន់ល្បាក់ទឹកប៉ាស៊ី។

បច្ចុប្បន្ន ឃុំម៉ាងឌាង ចំណុះខេត្តក្វាងង៉ាយ ដើម្បីទៅដល់ទីតាំងនេះ ភ្ញៀវទេសចរអាចធ្វើដំណើរតាមដងផ្លូវជាច្រើន។ ចេញដំណើរពីមជ្ឈមណ្ឌលខេត្តក្វាងង៉ាយ តាមផ្លូវជាតិលេខ ២៤ ឆ្លងកាត់ដងផ្លូវបត់បែនដ៏ស្រស់ស្អាតប្រមាណ១៤០គីឡូម៉ែត្រ គឺទៅដល់ម៉ាងឌាង។ ប្រសិនបើចេញដំណើរតាមជើងយន្តហោះ ពីទីក្រុងហូជីមិញ ទៅដល់ព្រលានយន្តប្លៃគូ រួចបន្តដំណើរតាមដងផ្លូវបត់បែនដែលទើបនឹងពង្រីក កាត់ជម្រាលភ្នំប្រមាណ ១៣២ គីឡូម៉ែត្រក៏ទៅដល់ម៉ាងឌាង។ ដងផ្លូវនេះស្រស់ស្អាតមិនអាចពណ៌នាបាន។ ប្រសិនបើចេញដំណើរតាមរថយន្តពីតំបន់ភាគខាងត្បូង ត្រូវចំណាយពេល១ថ្ងៃកន្លះ ទើបទៅដល់ទីតាំងទេសចរណ៍ម៉ាងឌាង។ ទោះបីអង្គុយរថយន្តរយៈពេលយូរក៏ដោយ ប៉ុន្តែ អ្នកទេសចរនឹងបានគយគន់ទេសភាពដ៏ស្រស់ស្អាតដូចផ្ទាំងគំនូរ។ បើចំរដូវដើមកាហ្វេចេញផ្កា សងខាងដងផ្លូវក្លិនក្រអូបសាយ ដូច្នេះ សំចតដំណើរនៅកន្លែងណា យើងក៏អាចស្រង់ “ក្លិនពិដោរ” នៃធម្មជាតិដែរ។ លោកអ្នកប្រាកដជាមានអារម្មណ៍ស្រស់ស្រាយពេលអង្គុយលើរថយន្តតាមផ្លូវបត់បែនស្រស់ស្អាតបំផុតតីង្វៀន - ជម្រាលភ្នំម៉ាងឌាង។ ជាមួយនឹងប្រវែងផ្លូវ១៣គីឡូម៉ែត្រ ជម្រាលភ្នំម៉ាងឌាងគឺជាទីតាំងប្រមាញ់ពពកដ៏អស្ចារ្យសម្រាប់អ្នកទេសចរ។ នៅកន្លែងដែលអនុញ្ញាតឱ្យយានយន្តសំចតលើដងផ្លូវជម្រាលភ្នំ អ្នកទេសចរនឹងប្រទះឃើញទិដ្ឋភាពព្រៃភ្នំធម្មជាតិលាតសន្ធឹង។ ខណៈពេលនោះ ធ្វើឱ្យលោកអ្នកមានអារម្មណ៍ស្រស់ស្រាយ បំបាត់នូវភាពកង្វល់ជាមួយនឹងសម្រស់ធម្មជាតិដ៏ស្រស់ត្រកាលនេះឯង។

ដើរជើងទទេកាត់ទឹកជ្រោះហូរធ្វើឱ្យអ្នកទេសចរមានអារម្មណ៍សុខសាន្ត។

ពេលព្រឹកព្រលឹម អាកាសធាតុត្រជាក់គ្របដណ្តប់ដោយផ្សែងអ័ព្ទលើ
ដងផ្លូវចូលទៅឃុំម៉ាងឌាង។

អ្នកទេសចរអាចចំណាយពេលពេញមួយថ្ងៃ ដើម្បីស្វែងយល់ពីសួនរូបចម្លាក់
ក្នុងរមណីយដ្ឋានទេសចរណ៍ល្បាក់ទឹកប៉ាស៊ី។

មកដល់ម៉ាងឌាង អ្នកទេសចរមិនគួររំលងល្បាក់ទឹកប៉ាស៊ី។ ប្រសិនជាមានឱកាស លោកអ្នកគួរជ្រើសរើសធ្វើដំណើរដោយម៉ូតូ ជិះឆ្លងកាត់ដងផ្លូវបត់បែននៃជម្រាលភ្នំដ៏ស្រស់ស្អាត និងឆ្លងស្ពានយោលជាទីមនោរម្យកាត់ជ្រោះជ្រលងដងអូរ ទឹកថ្លាត្រជាក់ស្រិប ពេលធ្វើដំណើរដោយថ្មើរជើង។ មកកាន់ទីនេះ ពេលព្រឹកព្រលឹម អាសធាតុត្រជាក់គ្របដណ្តប់ដោយផ្សែងអ័ព្ទ អង្គុយពិសាកាហ្វេគយគន់ល្បាក់ទឹកប៉ាស៊ី គឺមានអារម្មណ៍ស្រស់ស្រាយមិនអាចបំភ្លេចបានឡើយ ពេលភ្ញៀវទេសចរសម្របខ្លួនជាមួយធម្មជាតិ ហាក់ដូចជាបំបាត់អស់នូវភាពកង្វល់ក្នុងជីវភាព។

មណ្ឌលទេសចរណ៍ល្បាក់ទឹកប៉ាស៊ីស្ថិតនៅភូមិ Kon Tu Rang របស់ជនជាតិរ៉ឺម៉ម បានកើតចេញពីជ្រោះធំជាងគេចំនួន៣នៅម៉ាងឌាង ហេតុនោះ ត្រូវបានហៅថា ប៉ាវស៊ូ (Pau Suh) ។ តាមភាសាជនជាតិរ៉ឺម៉ម មានន័យថា ជ្រោះទាំង៣ រួមបញ្ចូលគ្នាបង្កើតលំហូរតែមួយ។ ខាងក្រោយមក ឈ្មោះល្បាក់ទឹកនេះហៅក្លាយជាប៉ាស៊ីវិញ។ ល្បាក់ទឹកស្រស់ស្អាតណាស់ ព្រោះមានភាពរហោស្ថាន អមជាមួយនឹងព្រៃស្រល់ដ៏ល្វឹងល្វើយ។ ជាគោលដៅទេសចរណ៍មិនអាចខ្វះបាន ពេលភ្ញៀវទេសចរមកកម្សាន្តនៅតំបន់ខ្ពង់រាប៕

ហាថាញ-មុនី

ចែករំលែកអត្ថបទ

ពាក្យគន្លឹះ