សុខភាព - អប់រំ អប់រំ

29/08/2025 - 08:45

ខ្នះខ្នែងកៀរគរសិស្សខ្មែរចូលរៀន

នៅតាមសាលារៀនដែលមានសិស្សខ្មែរច្រើន កំពុងខ្នះខ្នែងកៀរគរសិស្សចូលរៀន ដោយចាត់ទុកជាជំហានដំបូងដ៏សំខាន់ដើម្បីសម្រេចទិសដៅឆ្នាំសិក្សា ២០២៥- ២០២៦។

សាលារៀនកំពុងព្យាយាមកៀរគរសិស្សជនជាតិខ្មែរចូលរៀន។

នៅសាលាបឋមសិក្សា “B” អាងកឺ ឃុំអាងកឺ ខេត្តអាងយ៉ាង ចាងហ្វាងសាលា លីវុាំងថាម តែងត្រួតពិនិត្យមូលដ្ឋាន សម្ភារៈនិងក្រើនរលឹកគ្រូបង្រៀនសកម្មកៀរគរសិស្សចូលរៀន។ ដោយមានសិស្សជនជាតិខ្មែរជាង៨០% សាលាប្រឈមនឹងការលំបាកជាច្រើន ពិសេសគឺស្ថានភាពសិស្សឈប់រៀនបន្ទាប់ពីសម្រាកវិស្សមកាលដោយសារលក្ខណៈសេដ្ឋកិច្ចគ្រួសារ។

លោកលីវុាំងថាម ឱ្យដឹង៖ “យើងខ្ញុំបានព្យាយាមកៀរគរសិស្ស ដើម្បីអនុវត្តសម្រេចផែនការរបស់មន្ទីរអប់រំនិងបណ្ដុះបណ្ដាល។ អត្រាកៀរគរសិស្សចូលរៀនរៀងរាល់ឆ្នាំតែងសម្រេចទិសដៅ បង្កជាកម្លាំងជំរុញដើម្បីសាលារៀនសម្រេចភាគកម្រិតកៀរគរសិស្ស៣៨០នាក់ ចូលរៀនក្នុងឆ្នាំសិក្សា ២០២៥ - ២០២៦”។

ដើម្បីអនុវត្តបានចំណុចនេះ គណៈចាងហ្វាងសាលាតម្រូវឱ្យគ្រូប្រចាំថ្នាក់ម្ចាស់ការទំនាក់ទំនងជាមួយនឹងអាណាព្យាបាលសិស្ស។ ចំពោះករណីដែលជួបលំបាក គ្រូបង្រៀនត្រូវរាយការណ៍ ដើម្បីសហការជាមួយនឹងរដ្ឋអំណាចភូមិភាគ ចលនាប្អូនៗចូលរៀន។

ជាអង្គភាពមួយដែលមានសិស្សជនជាតិខ្មែរជាង ៨០% សាលាអនុវិទ្យាល័យត្រឹងដាយង៉ៀ ឃុំអាងកឺ កំពុងព្យាយាមកៀរគរសិស្សផងដែរ។ លោកង្វៀងហ្វាងហាក ចាងហ្វាងរងសាលា បានឱ្យដឹង ភូមិសាស្រ្តទទួលបន្ទុកធំទូលាយ បង្គួរ ដោយគ្របដណ្ដប់លើភូមិចំនួន ៦ ក្នុងចំណោមភូមិទាំង១៥របស់ឃុំ។

លោកង្វៀងហ្វាងហាក មានប្រសាសន៍៖ “យើងខ្ញុំបានកៀរគរគ្រូបង្រៀនគ្រប់រូបនិងអង្គការមហាជនភូមិភាគនានា ដើម្បីធានាអនុវត្តទិសដៅដាក់ចេញ។ ទិសដៅរបស់សាលាគឺកៀរគរសិស្ស៦៤២នាក់ចូលរៀនក្នុងឆ្នាំសិក្សាថ្មី”។

ទោះបីមានការខិតខំប្រឹងប្រែងក៏ពិតមែន ប៉ុន្តែស្ថានភាពសិស្សបោះបង់ការសិក្សានៅតែកើតមាន មូលហេតុចម្បងគឺប្អូនៗទៅតាមឪពុកម្ដាយធ្វើការងាររកស៊ីនៅទីឆ្ងាយ។ ជាពិសេស សិស្សថ្នាក់ទី៨ និងទី៩ តែងមាននិន្នាការឆាប់ទៅរកការងារធ្វើ។

ក្ដាប់ច្បាស់ពីស្ថានភាពនេះ សាលារៀនបានម្ចាស់ការទំនាក់ទំនង ពន្យល់និងចលនាដល់គ្រួសារ ដើម្បីឱ្យកូនៗរបស់ពួកគាត់បន្តទៅរៀន។ ទន្ទឹមនឹងនោះ សាលារៀនក៏សកម្មកៀរគរប្រភពធនធានដើម្បីឧបត្ថម្ភសិក្ខូបករណ៍និងសៀវភៅសិក្សាគោល។ ដើមឆ្នាំសិក្សានេះ សាលារៀនបានស្នើដល់គណៈកម្មាធិការប្រជាជនឃុំអាងកឺឧបត្ថម្ភកង់៥០គ្រឿងដល់សិស្សដែលមានស្ថានភាពលំបាក ផ្ទះនៅឆ្ងាយ។

ក្រៅពីនោះ សាលាអនុវិទ្យាល័យ ត្រឹងដាយង៉ៀ ក៏តម្រូវឱ្យគ្រូប្រចាំថ្នាក់ត្រួតពិនិត្យឡើងវិញ ឧបត្ថម្ភគ្រឿងឧបភោគបរិភោគជារឿយៗដល់សិស្សដែលមានស្ថានភាពលំបាកនិងផ្លាស់ថ្មីវិធានការបង្រៀនដើម្បីបង្ករបរិយាកាសរៀនសូត្រប្រកបដោយភាពរួសរាយ។

ទោះបីដូច្នោះក្ដី សាលារៀនក្នុងឃុំនៅតែត្រូវការឧបត្ថម្ភបន្ថែមអំពីមូលដ្ឋានសម្ភារៈ។ បច្ចុប្បន្ន សាលាអនុវិទ្យាល័យ ត្រឹងដាយង៉ៀ នៅខ្វះឧបករណ៍បង្រៀនតាមកម្មវិធីអប់រំចំណេះទូទៅឆ្នាំ ២០១៨ សម្រាប់ថ្នាក់ទី៧, ទី៨, ទី៩ ទោះជាមានការប្រឹងប្រែងវិនិយោគគ្រឿងបរិក្ខារនិងជួសជុលក៏ដោយ។

ដើម្បីឧបត្ថម្ភដល់សាលារៀនចំនួន ១៥ អនុវត្តសម្រេចផែនការកៀរគរសិស្សចូលរៀនឆ្នាំសិក្សា២០២៥-២០២៦ គណៈកម្មាធិការប្រជាជនឃុំអាងកឺបានសំណូមពរដល់គណៈ ផ្នែក អង្គការមហាជនសកម្មផ្សព្វផ្សាយនិងទាក់ទងជាមួយសប្បុរសជននានា ដើម្បីឧបត្ថម្ភជាអំណោយនិងសិក្ខូបករណ៍ដល់សិស្ស។

ប្រធានគណៈកម្មាធិការប្រជាជនឃុំ ង្វៀងយីផុង បញ្ជាក់៖ “យើងខ្ញុំបានសំណូមពរដល់ផ្នែកជំនាញ ម្ចាស់ការអនុវត្ត “ខែសកម្មភាពដើម្បីបុព្វហេតុអប់រំ” ជាពិសេស យកចិត្តទុកដាក់ឧបត្ថម្ភសាលារៀនដែលមានសិស្សជនជាតិខ្មែរច្រើន។ នេះជាការបង្កកម្លាំងជំរុញសម្រាប់សាលារៀន គ្រូបង្រៀន និងសិស្សានុសិស្សត្រៀមលក្ខណៈឈានចូលឆ្នាំសិក្សាថ្មី រួមចំណែកដល់បុព្វហេតុអភិវឌ្ឍអប់រំរបស់ភូមិភាគ”៕

ថាញតៀង - ថាច់ធី

ចែករំលែកអត្ថបទ

ពាក្យគន្លឹះ