គោលនយោបាយ -ការរស់នៅ គោលនយោបាយ

30/10/2026 - 21:04

ក្តីរីករាយចាកផុតពីភាពក្រីក្រក្នុងផ្ទះថ្មី

ដោយបានរដ្ឋឧបត្ថម្ភ ៧៥ លានដុង គ្រួសារអ្នកមីង ថាច់ ធីចៀក នៅភូមិអូរក្តារ ឃុំហ៊ឹងមី ខេត្តវិញឡុង ចូលរួម បន្ថែមចំនួន ៤៥ លានដុងទៀតដើម្បីសាងសង់បានផ្ទះមួយខ្នងយ៉ាងសមរម្យ។ មានជម្រកស្នាក់នៅរឹងមាំ រួមជាមួយប្រភពចំណូលបានមកពីកូនប្រុស គ្រួសារអ្នកមីងជាជំហានបានលំនឹងជីវភាព ឈានឡើងចាកផុតពីភាពក្រីក្រ។

អ្នកមីង ថាច់ ធីចៀក រីករាយក្នុងផ្ទះថ្មីដែលទើបនឹងសាងសង់។

អ្នកមីង ថាច់ ធីចៀក (កើតនៅឆ្នាំ ១៩៦១) បានឱ្យដឹង កាលពីមុនគ្រួសារគ្មានដីបង្កបង្កើនផលទេ ជីវភាពសំខាន់គឺពឹងផ្អែកលើការធ្វើឈ្នួល។ ការងារមិនទៀងទាត់ ប្រាក់ចំណូលតិចតួច ម៉្លោះហើយប្រាក់ដែលរកបានមកគ្រាន់តែល្មមសម្រាប់ចំណាយក្នុងជីវភាពប្រចាំថ្ងៃប៉ុណ្ណោះ។ នៅពេលគ្មានការងារធ្វើ សូម្បីតែអាហារហូបចុកមួយពេលក៏ត្រូវសន្សំសំចៃដែរ។ ហេតុនេះ ថ្វីដ្បិតតែមានបំណងប្រាថ្នាចង់បានផ្ទះមួយខ្នងដើម្បីបាំងភ្លៀងបាំងក្តៅ អ្នកមីងនៅតែមិនអាចសន្សំ គ្រប់ប្រាក់សាងសង់។ ការព្រួយបារម្ភអំពីបាយម្ហូបប្រចាំថ្ងៃបានធ្វើឱ្យក្តីសុបិនចង់សង់ផ្ទះត្រូវអូសបន្លាយពីមួយឆ្នាំទៅមួយឆ្នាំ។

អាយុកាន់តែច្រើន កម្លាំងពលកម្មកាន់តែចុះខ្សោយ ការសន្សំប្រាក់ដើម្បីសាងសង់ផ្ទះរឹតតែលំបាកជាងមុន។ ដោយបានរដ្ឋឧបត្ថម្ភ ៦០ លានដុង និងជំនួយថវិកាបន្ថែម ១៥ លានដុង គ្រួសារអ្នកមីងរួមបន្ថែមចំនួន ៤៥ លានដុងទៀតទើបសាងសង់បានផ្ទះគិតជាតម្លៃសរុប ១២០ លានដុង។ ការយកចិត្តទុកដាក់ និងការជួយឧបត្ថម្ភទាន់ពេលវេលានេះ បានជួយឱ្យគ្រួសារមានលក្ខណៈបំពេញនូវបំណងប្រាថ្នាជាយូរមកហើយ។ សម្រាប់អ្នកមីងចៀក មានកន្លែងស្នាក់នៅលំនឹងនៅពេលវ័យជរាគឺជាក្តីរីករាយយ៉ាងធំធេង ជួយឱ្យអ្នកមីងបន្ថយការព្រួយបារម្ភអំពីជម្រក និងមានការស្ងប់ចិត្តជាងនៅក្នុងជីវភាព។ ពេលរំលឹកដល់ផ្ទះថ្មី អ្នកមីងចៀក រំភើបចិត្តចែករំលែក៖ កាលពីមុនគ្រួសារធ្វើការឈ្នួលបានត្រឹមតែផ្ទត់ផ្គង់ជីវភាពប្រចាំថ្ងៃប៉ុណ្នោះ គិតគូរការហូបចុកក៏លំបាកទៅហើយ ម៉្លោះហើយមិនហ៊ានគិតដល់រឿងសង់ផ្ទះឡើយ។ នៅពេលបានបក្ស និងរដ្ឋយកចិត្តទុកដាក់ជួយឧបត្ថម្ភ អ្នកមីងសប្បាយចិត្តរហូតដល់ស្រក់ទឹកភ្នែក ព្រោះបំណងប្រាថ្នាបានក្លាយជាការពិត។ អ្នកមីងអរគុណយ៉ាងជ្រាលជ្រៅចំពោះបក្ស រដ្ឋ និងអង្គការមហាជននានា ដែលបានគិតគូរដល់គ្រួសារក្រីក្រដូចជាអ្នកមីងឱ្យមានកន្លែងជ្រកកោនបាំងក្តៅ បាំងភ្លៀង។ ផ្ទះថ្មីនេះថែមទាំងជាប្រភពលើកទឹកចិត្តដើម្បីឱ្យម្តាយនិងកូនបន្តខិតខំធ្វើការ គិតគូរជីវភាពបន្តទៀត។

អ្នកមីង ថាច់ ធីចៀក (កណ្តាល) សម្តែងនូវក្តីរីករាយជាមួយកម្មាភិបាលភូមិភាគនៅពេលទទួលបានការឧបត្ថម្ភសាងសង់ផ្ទះថ្មី។

លោក ថាច់ ជោត ប្រធានគណៈប្រជាជនភូមិអូរក្តារ បានឱ្យដឹង គ្រួសារអ្នកមីងចៀក កាលពីមុនស្ថិតក្នុងក្របខណ្ឌគ្រួសារខ្មែរក្រីក្ររបស់ភូមិ គ្មានដីផលិត ប៉ុន្តែតែងខិតខំធ្វើការងារប្រកបមុខរបរ។ បច្ចុប្បន្ន អ្នកមីងកំពុងរស់នៅជាមួយកូនប្រុស កូនប្រុសក៏មានការងារធ្វើលំនឹងនៅក្រុមហ៊ុនមួយ មានចំណូលសម្រាប់ផ្គត់ផ្គង់ក្នុងជីវភាពនិងថែទាំម្តាយ។ មកទល់ពេលនេះ គ្រួសារអ្នកមីងបានចាកផុតពីភាពក្រីក្រ។ ការជួយឧបត្ថម្ភសាងសង់ផ្ទះ រួមជាមួយការខិតខំប្រឹងប្រែងពលកម្មផលិតរបស់សមាជិកក្នុងគ្រួសារ បានរួមចំណែកជួយឱ្យគ្រួសារជម្នះបានការលំបាក។

រឿងរ៉ាវរបស់អ្នកមីង ថាច់ ធីចៀក បានបង្ហាញឱ្យឃើញពីអត្ថន័យជាក់ស្តែងនៃគោលនយោបាយឧបត្ថម្ភផ្ទះសម្រាប់គ្រួសារក្រីក្រ។ មានកន្លែងស្នាក់នៅលំនឹង ប្រជាជនបន្ថយការព្រួយបារម្ភ មានលក្ខណៈបន្ថែមផ្តុំកម្លាំងលើការប្រកបមុខរបរ សន្សំសំចៃដើម្បីកែលម្អជីវភាព។ ការយកចិត្តទុកដាក់របស់រដ្ឋ រួមជាមួយស្មារតីខ្លួនទីពឹងខ្លួនរបស់គ្រួសារនីមួយៗ បានរួមចំណែកលើកកម្ពស់ប្រសិទ្ធភាពការងារកាត់បន្ថយភាពក្រីក្រនៅភូមិភាគ៕

ទីទុយ

ចែករំលែកអត្ថបទ

ពាក្យគន្លឹះ