សុខភាព - អប់រំ អប់រំ

21/10/2026 - 22:20

លីវទូគិតគូរការអប់រំផ្សារភ្ជាប់ជាមួយអភិរក្សអក្សរសាស្រ្តជាតិ

ប៉ុន្មានឆ្នាំកន្លង ឃុំលីវទូ ទីក្រុងកឹងធើ តែងយកចិត្តទុកដាក់គិតគូរអប់រំសិស្សតំបន់ជនជាតិភាគតិច តាមរយៈការអនុវត្តគោលនយោបាយឧបត្ថម្ភ លើកកម្ពស់លក្ខណៈរៀនសូត្រ និងរក្សាការបង្រៀនអក្សរខ្មែរនៅតាមសាលារៀន។ ឆ្លងតាមរយៈនោះ រួមចំណែកជួយសិស្សឈានឡើងក្នុងការរៀនសូត្រ អភិរក្សភាសាកំណើត និងពង្រីកអត្តសញ្ញាណវប្បធម៌ជនជាតិ។

ម៉ោងរៀនអក្សរខ្មែរ រួមចំណែកអភិរក្សភាសានិងអក្សររបស់ជនជាតិ។

បច្ចុប្បន្ន ឃុំលីវទូ មានសាលារៀនរដ្ឋចំនួន ៣ រួមមាន៖ សាលាមត្តេយ្យ ១ សាលាបឋមសិក្សា ១ និងអនុវិទ្យាល័យ ១ ដោយមាន ១៥៣ ថ្នាក់ និងមានសិស្សសរុបចំនួន ៤.៤៤០ នាក់។ ក្នុងនោះ សិស្សជនជាតិភាគតិចមាន ៣.៥៥៦ នាក់ ស្រូបអត្រាប្រមាណ ៨០% នៃចំនួនសិស្សសរុបក្នុងទូទាំងឃុំ។ អត្រាសិស្សជនជាតិភាគតិចច្រើនយ៉ាងនេះ បានដាក់ចេញនូវតម្រូវការយកចិត្តទុកដាក់បន្ថែមទៀតលើលក្ខណៈរៀនសូត្រ ជីវភាពគ្រួសារ និងតម្រូវការជំនួយរបស់សិស្សម្នាក់ៗ។ ទន្ទឹមនឹងសកម្មភាពបង្ហាត់បង្រៀន សាលានីមួយៗបានផ្តោតសំខាន់សហការជាមួយអាណាព្យាបាលសិស្ស ក្តាប់ពីស្ថានភាពរៀនសូត្រ លើកទឹកចិត្តសិស្សជម្នះការលំបាកបានទាន់ពេល បន្ថយហានិភ័យសិស្សបោះបង់ការរៀនសូត្រពាក់កណ្តាល។

ទន្ទឹមនឹងការយកចិត្តទុកដាក់របស់សាលា បណ្តាគោលនយោបាយឧបត្ថម្ភរបស់រដ្ឋ បានចែករំលែកការលំបាកជាមួយគ្រួសារសិស្សផងដែរ។ ចាប់តាំងពីដើមឆ្នាំសិក្សាមកទល់ពេលនេះ ឃុំលីវទូ មានសិស្សចំនួន ៣.១៦១ នាក់ បានទទួលផលពីគោលនយោបាយតាមបទប្បញ្ញត្តិមានចែងក្នុងអនុក្រឹត្យនានារបស់រដ្ឋាភិបាល ដោយមានថវិកាផ្តល់ជូនសរុបជាង ១,៧៧ ពាន់លានដុង។ ប្រភពកម្លាំងនេះ រួមចំណែកឧបត្ថម្ភចំណាយលើការរៀនសូត្រ បង្កលក្ខណៈបន្ថែមដើម្បីសិស្សបន្តទៅសាលារៀន។

អ្នកស្រី វ៉ូធីញ៉ី អនុប្រធានគណៈកម្មាធិការប្រជាជនឃុំលីវទូ ឱ្យដឹង៖ “ភូមិភាគតែងយកចិត្តទុកដាក់លើការងារអប់រំ ពិសេសគឺការអប់រំសិស្សជនជាតិភាគតិច។ រយៈពេលខាងមុខ ឃុំបន្តអនុវត្តបណ្តារបប និងគោលនយោបាយតាមបទប្បញ្ញត្តិ ព្រមទាំងសហការជិតដិតជាមួយសាលា គ្រួសារ និងអង្គការសង្គមនានា ដើម្បីចលនាសិស្សឱ្យចូលសាលា យកចិត្តទុកដាក់ឧបត្ថម្ភករណីដែលមានការលំបាក រួមចំណែករក្សាការរៀនសូត្រ និងលើកកម្ពស់គុណភាពអប់រំនៅលើភូមិឋាន”។

ទន្ទឹមនឹងគិតគូរលក្ខណៈរៀនសូត្រ ការអភិរក្សភាសា អក្សរនិងអត្តសញ្ញាណវប្បធម៌ជនជាតិ ក៏បានយកចិត្តទុកដាក់ក្នុងសកម្មភាពអប់រំនៅភូមិភាគផងដែរ។ នៅអនុវិទ្យាល័យលីវទូ (សាខាសាលា) វិញ្ញាសាខ្មែរបានបង្ហាត់បង្រៀនតាមកម្មវិធីរបស់មន្ទីរអប់រំ និងបណ្តុះបណ្តាល។ ម៉ោងរៀនទាំងនោះជួយសិស្សហ្វឹកហាត់ជំនាញអាន សរសេរ ព្រមទាំងយល់ដឹងបន្ថែមអំពីភាសានិងវប្បធម៌ប្រពៃណីរបស់ជនជាតិខ្លួន។ ប្អូនស្រី គឹម ធីអាញដាវ សិស្សថ្នាក់ទី ៩A៧ ចែករំលែក៖ “ប្អូនសប្បាយចិត្តណាស់ពេលបានលោកគ្រូ អ្នកគ្រូយកចិត្តទុកដាក់ សាលាបានជំនួយសិក្ខូបករណ៍ និងបង្កលក្ខណៈឱ្យប្អូនបានចូលរៀន។ ពិសេស ការរៀនអក្សរខ្មែរបានជួយប្អូនយល់ដឹងបន្ថែមអំពីវប្បធម៌ជនជាតិ ផ្តើមពីនោះលើកកម្ពស់ស្មារតីអភិរក្ស ភាសារ អក្សរ របស់ជនជាតិខ្លួន”។

តាមអ្នកគ្រូ លី ធីសាវឿង គ្រូបង្រៀនមុខវិជ្ជាភាសាខ្មែរនៅអនុវិទ្យាល័យលីវទូ ទោះបីក្នុងមួយសប្តាហ៍មានត្រឹមតែ ៣ ម៉ោងរៀនក៏ដោយ ប៉ុន្តែសិស្សនៅតែព្យាយាមរៀនយ៉ាងល្អ។ នាឱកាសវិស្សមកាល សិស្សមួយចំនួនថែមទាំងបានទៅរៀនបន្ថែមនៅតាមវត្ត និងសាលាទាន ដើម្បីពង្រឹងចំណេះដឹង។ សាលាក៏បានចាត់តាំងបំប៉នសិស្សពូកែភាសាខ្មែរ បង្កលក្ខណៈដើម្បីប្អូនៗលើកកម្ពស់សមត្ថភាព និងចូលរួមសម័យប្រឡងថ្នាក់ទីក្រុង។ ឆ្នាំសិក្សាកន្លង សាលាក៏មានសិស្សពូកែភាសាខ្មែរថ្នាក់ទីក្រុងផងដែរ។

ការរក្សាម៉ោងរៀនអក្សរខ្មែរ ព្រមទាំងសកម្មភាពបំប៉នសិស្សពូកែ រួមចំណែកផ្តល់កម្លាំងចលកររៀនសូត្រ លើកទឹកចិត្តឱ្យប្អូនៗពង្រីកសមត្ថភាព និងចូលចិត្តចំពោះភាសាជនជាតិ។ កិច្ចសហការរវាងសាលា គ្រួសារ និងសហគមន៍ ក្នុងនោះមានវត្តអារាម និងសាលាទាន ក៏បានបង្កបរិយាកាសបន្ថែមដើម្បីសិស្សបានក្រេបជញ្ជក់ និងហ្វឹកហាត់អក្សរខ្មែរ។

ដោយមានការយកចិត្តទុកដាក់របស់រដ្ឋអំណាចភូមិភាគ ផ្នែកអប់រំ សាលានិងគ្រួសារ ឃុំលីវទូ បន្តឆ្ពោះទៅកាន់ទិសដៅលើកកម្ពស់គុណភាពអប់រំ ធានាឱកាសរៀនសូត្រដល់សិស្សជនជាតិភាគតិច។ គិគូរការរៀនសូត្រផ្សារភ្ជាប់នឹងអភិរក្សអក្សរខ្មែរ មិនត្រឹមតែរួមចំណែកលើកកម្ពស់ប្រជាបញ្ញាប៉ុណ្ណោះទេ ថែមទាំងពូនផ្តុំស្មារតីអភិរក្សវប្បធម៌ បង្កើតមូលដ្ឋានគ្រឹះរឹងមាំដើម្បីយុវវ័យជំនាន់ក្រោយអភិវឌ្ឍគ្រប់ជ្រុងជ្រោយ និងជឿជាក់លើខ្លួនឯងឈានទៅអនាគត។

ហុងទើ - លីសៀ

ចែករំលែកអត្ថបទ

ពាក្យគន្លឹះ