សន្តិសុខ - ការពារប្រទេស ការពារប្រទេស

08/10/2026 - 21:05

ភាពកក់ក្តៅនៃរដូវបុណ្យសែនដូនតានៅតំបន់ព្រំដែនសមុទ្រ

ក្នុងឱកាសពិធីបុណ្យសែនដូនតា ឆ្នាំ២០២៦ នៅសង្កាត់វិញភឿក ប៉ុស្តិ៍ការពារព្រំដែនឡាយហ្វានិងសមាគមនារីនៃគណៈបញ្ជាការកងទ័ពការពារព្រំដែនទីក្រុងកឹងធើ សហការជាមួយគណៈកម្មាធិការប្រជាជន គណៈកម្មាធិការរណសិរ្សមាតុភូមិវៀតណាមសង្កាត់វិញភឿក ព្រមទាំងសប្បុរសជននានា ចាត់តាំងកម្មវិធី "ល្វែងទំនិញសូន្យដុង" សម្រាប់មាមីងជនជាតិខ្មែរមានស្ថានភាពលំបាក។ កម្មវិធីមិនត្រឹមតែជួយឱ្យមាមីងជួបការលំបាកមានក្តីរីករាយបន្ថែមប៉ុណ្ណោះទេ ថែមទាំងរួមចំណែកធ្វើឱ្យថ្ងៃបុណ្យកាន់តែមានអត្ថន័យនិងភាពកក់ក្តៅ។

នេះជាកម្មវិធី "ល្វែងទំនិញសូន្យដុងសម្រាប់អ្នកក្រ" លើកទី១៤ នៅតំបន់ព្រំដែនសមុទ្រដែលប៉ុស្តិ៍ការពារព្រំដែនឡាយហ្វាចាត់តាំងនៅលើភូមិឋាន។ ឆ្នាំនេះ កម្មវិធីជូនអំណោយចំនួន១២០ចំណែកដល់គ្រួសារមានស្ថានភាពលំបាកខ្លាំង។ ក្នុងមួយចំណែកមានតម្លៃ ៣៥០.០០០ដុង រួមមានស្បៀងអាហារនិងសម្ភារៈប្រើប្រាស់ចាំបាច់ ដោយថវិកាសរុប ៤២លានដុង។ ទន្ទឹមនឹងនោះ កម្មវិធីសហការជាមួយវេជ្ជបណ្ឌិតមន្ទីរពេទ្យភ្នែកវីស៊ីសុកត្រាំង ចាត់តាំងពិនិត្យ ប្រឹក្សាជំងឺភ្នែកនិងផ្តល់ថ្នាំដោយឥតគិតថ្លៃដល់មាមីង។ ប្រភពថវិកាទាំងអស់បានកៀរគរពីក្នុងសង្គមនិងការចូលរួមពីអង្គភាព អង្គការ បុគ្គលនានា។

កងទ័ពការពារព្រំដែនទីក្រុងកឹងធើជូនអំណោយដល់គ្រួសារក្រីក្រ។

អំណោយបានជូនដោយទឹកចិត្តស្មោះស្ម័គ្រ ទាន់ពេលវេលានិងដល់គ្រួសារនៅជួបការលំបាក។ ចំពោះមាមីងខ្មែរ រដូវបុណ្យសែនដូនតាឆ្នាំ២០២៦ កាន់តែមានភាពកក់ក្តៅ ពោរពេញដោយក្តីរីករាយ។ អ្នកមីង ថាច់ធីសាមឿន នៅមណ្ឌលត្រាវូន សង្កាត់វិញភឿក ឱ្យដឹង៖ "គ្រួសារជួបការលំបាកទទួលបានអំណោយនេះ ជួយឱ្យខ្ញុំមានលក្ខណៈធ្វើស្ពកបាយសែនជូនដូនតា បុព្វការីជន និងធ្វើចង្ហាន់ប្រគេនចំពោះព្រះសង្ឃ។ នេះជាអំណោយដ៏មានអត្ថន័យ ខ្ញុំសូមអរគុណក្មួយៗកងទ័ពការពារព្រំដែនដែលបានជួយដល់មាមីងខ្មែរក្រីក្រ ដើម្បីមានលក្ខណៈទទួលអំណរបុណ្យសែនដូនតាបានសម្បូរសប្បាយ"។

វេជ្ជបណ្ឌិតមន្ទីរពេទ្យភ្នែកវីស៊ីសុកត្រាំងពិនិត្យភ្នែកឱ្យមាមីងក្រីក្រ។

អំណោយពោរពេញដោយអត្ថន័យទាំងនេះ បានធ្វើឱ្យរូបភាពកងទ័ពការពារព្រំដែនកាន់តែស្និទ្ធស្នាលជិតដិតនឹងប្រជាជន រួមជាមួយរដ្ឋអំណាចភូមិភាគយកចិត្តទុកដាក់ចំពោះជីវភាពប្រជាជន បន្តពូនជ្រំនិងរួមចំណែកកសាងតំបន់ព្រំដែនសមុទ្រសុខសាន្ត សាមគ្គី ពោរពេញដោយមនោសញ្ចេតនា។ នេះក៏ជាវិធីធ្វើឱ្យចំណងកងទ័ព-ប្រជាជននៅតំបន់ព្រំដែនសមុទ្របានរឹតបន្តឹងកាន់តែជិតស្និទ្ធនិងជាក់ស្តែង។ លោកវរសេនីយ៍ឯក ហាហ្វីទ្រឿង ស្នងការនយោបាយរងកងទ័ពការពារព្រំដែនទីក្រុងកឹងធើ មានប្រសាសន៍៖ "ល្វែងទំនិញសូន្យដុង" ជាសកម្មភាពជាក់ស្តែងសំដៅចែករំលែកការលំបាកជាមួយមាមីងជនជាតិខ្មែរ ព្រមទាំងរួមចំណែកពង្រឹងសាមគ្គីភាពកងទ័ព-ប្រជាជននៅលើភូមិឋានតំបន់ព្រំដែនសមុទ្រ។ តាមរយៈកម្មវិធី កម្មាភិបាលកងទ័ពការពារព្រំដែនរួមជាមួយគណៈកម្មាធិការបក្ស រដ្ឋអំណាច រណសិរ្សមាតុភូមិនិងអង្គការសមាគមភូមិភាគបន្តរួមដំណើរ យកចិត្តទុកដាក់ដល់ជីវភាពប្រជាជន ដើម្បីឱ្យគ្រួសារនានាទទួលពិធីបុណ្យសែនដូនតាកាន់តែរីករាយ កក់ក្តៅ រួមចំណែកពង្រឹងទំនុកចិត្ត កសាងយុទ្ធសាស្រ្តការពារព្រំដែនទូទាំងប្រជាជនរឹងមាំ"។

លោកវរសេនីយ៍ឯក លឿងហឺវទ្រុង បញ្ជាការរងកងទ័ពការពារព្រំដែនទីក្រុងកឹងធើ សួរសុខទុក្ខ ប្រគេននិងជូនអំណោយចំពោះព្រះសង្ឃនិងគណៈកម្មការវត្តពេជ្រមង្គល។

ទន្ទឹមនឹងនេះ ក្នុងឱកាសពិធីបុណ្យសែនដូនតា ឆ្នាំ២០២៦ គណៈបញ្ជាការកងទ័ពការពារព្រំដែនទីក្រុងកឹងធើថែមទាំងចាត់តាំងក្រុមការងារទៅសួរសុខទុក្ខនិងអបអរសាទរវត្តខ្មែរចំនួន ២៣វត្ត នៅលើភូមិឋានតំបន់ព្រំដែនសមុទ្រ។ សកម្មភាពនេះមិនត្រឹមតែបង្ហាញពីការយកចិត្តទុកដាក់ ការជិតស្និទ្ធរបស់កម្មាភិបាល កងទ័ពការពារព្រំដែនចំពោះមាមីងជនជាតិខ្មែរប៉ុណ្ណោះទេ ថែមទាំងមានសុទ្ធចិត្តផ្ញើបិយវាចាអបអរសាទរដល់ព្រះសង្ឃនិងមាមីងខ្មែរ ប្រារព្ធពិធីបុណ្យសែនដូនតាកាន់តែមានភាពកក់ក្តៅនិងពោរពេញដោយមនោសញ្ចេតនា។ តាមរយៈនោះ រួមចំណែកពង្រឹងចំណងសាមគ្គីរវាងកងទ័ព-ប្រជាជន បង្កើនទំនុកចិត្តរបស់ប្រជាជនចំពោះបក្ស រដ្ឋនិងកងទ័ពការពារព្រំដែន រួមចំណែកការពាររឹងមាំនូវអធិបតេយ្យភាព សន្តិសុខព្រំដែនជាតិ៕

យ្វីអាញ - សុផន

ចែករំលែកអត្ថបទ

ពាក្យគន្លឹះ