គោលនយោបាយ -ការរស់នៅ ការរស់នៅ

03/09/2025 - 09:07

ជីវភាពជនរួមជាតិខ្មែរនៅតឹងថាញ់ផ្លាស់ថ្មីដោយសារគម្រោង១

ជាច្រើនឆ្នាំកន្លង ដោយបានទទួលផលពីកម្មវិធីទិសដៅជាតិអភិវឌ្ឍសេដ្ឋកិច្ច - សង្គមតំបន់ជនជាតិភាគតិច ដំណាក់កាលទី១៖ ឆ្នាំ ២០២១-២០២៥ (ហៅកាត់ថា កម្មវិធី) ឃើញថា ជីវភាព សម្ភារៈនិងស្មារតីរបស់ជនរួមជាតិខ្មែរនៅលើភូមិសាស្រ្តឃុំតឹងថាញ់ ទីក្រុងកឹងធើ បានលើកកម្ពស់ជាសន្សឹមៗ ហើយទិដ្ឋភាពជនបទក៏មានការរីកចម្រើនច្រើនដែរ។

គ្រួសារលោកចូវយឺ នៅភូមិតឹងគ្វីA ឃុំតឹងថាញ់ ទីក្រុងកឹងធើ មានសេចក្តីត្រេកអរពេលបានរដ្ឋឧបត្ថម្ភសង់ផ្ទះថ្មី។

តាមប្រសាសន៍សមមិត្ត ង្វៀងធីគីវលិញ លេខាគណៈកម្មាធិការបក្សឃុំតឹងថាញ់ តាំងពីបានបែងចែកប្រភពទុនពីកម្មវិធីទិសដៅជាតិ គណៈកម្មាធិការបក្ស រដ្ឋអំណាចឃុំបានផ្តុំកម្លាំងផ្សព្វផ្សាយអនុវត្ត បំផុតគឺគម្រោង ១ អំពីការដោះស្រាយស្ថានភាពខ្វះដីធារផ្ទះ លំនៅឋាន ដីផលិតកម្ម និងទឹកស្អាតប្រើប្រាស់ ដើម្បីជួយជនជាតិភាគតិចមានលក្ខណៈអភិវឌ្ឍសេដ្ឋកិច្ចបានទាន់ពេល ឈានឡើងលំនឹងជីវភាព។ ដំណាក់កាល ២០២១-២០២៥ ឃុំបានផ្សព្វផ្សាយអនុវត្តគម្រោង ១ ដោយសង់ផ្ទះជូនប្រជាជនបាន ៣៧ ខ្នង ឧបត្ថម្ភផ្លាស់ប្តូររបរជូន ៤៥៦ គ្រួសារ និងទឹកស្អាតប្រើប្រាស់ជូន ៤៤ គ្រួសារ សរុបថវិកាជាង ១០ ពាន់លានដុង។ លោកចូវយឺ នៅភូមិតឹងគ្វី A ឃុំតឹងថាញ់ ជាគ្រួសារបានទទួលផលពីកម្មវិធី ឱ្យដឹងដោយក្តីរីករាយ៖ “បានរដ្ឋឧបត្ថម្ភសង់ផ្ទះ ខ្ញុំមានសេចក្តីត្រេកអរក្រែលែង និងសូមថ្លែងអំណរគុណចំពោះបក្ស រដ្ឋ ពីព្រោះគ្រួសារខ្ញុំលែងរស់នៅក្នុងផ្ទះស្លឹកទ្រុឌទ្រោមដូចមុនទៀត”។ តាមដែលបានដឹង គ្រួសារលោកចូវយឺ ជាគ្រួសារក្រ គ្មានដីផលិត គាត់ធ្វើការឈ្នួលបានត្រឹមគ្រប់ផ្គត់ផ្គងជីវភាពប្រចាំថ្ងៃប៉ុណ្ណោះ ហេតុនោះការសង់ផ្ទះថ្មីចំពោះគ្រួសារគាត់គឺជារឿងលំបាកបំផុត។ ឥឡូវ បានរដ្ឋយកចិត្តទុកដាក់គិតគូរសង់ផ្ទះឱ្យគ្រួសារគាត់ស្ងប់អារម្មណ៍ពលកម្មផលិត ឈានឡើងលំនឹងជីវភាព។

ចំណែកគ្រួសារមីងលីវធីចេន នៅភូមិតឹងគ្វី A ដែរ ក៏មានស្ថានភាពលំបាក គ្មានដីផលិត ប្រភពចំណូលសំខាន់របស់គ្រួសារបានមកពីការស៊ីឈ្នួលរបស់ប្តីប្រពន្ធគាត់ ប៉ុន្មានឆ្នាំមកនេះ រាល់ការចាយវាយក្នុងគ្រួសារ គឺអ្នកមីងទទួលរ៉ាប់រងទាំងអស់ ពីព្រោះប្តីគាត់ឈឺគ្មានលទ្ធភាពពលកម្ម។ ដោយឃើញស្ថានភាពគាត់លំបាក ឆ្នាំ ២០២៣ រដ្ឋអំណាចភូមិភាគបានជ្រើសឧបត្ថម្ភ១០ លានដុងពីប្រភពទុនផ្លាស់ប្តូរមុខរបរ គាត់បានវិនិយោគចិញ្ចឹមជ្រូក។ ត្រេកអរចំពោះការឧបត្ថម្ភបានទាន់ពេល មីងចេន ឱ្យដឹង៖ “ខ្ញុំសូមថ្លែងអំណរគុណបក្ស រដ្ឋដែលបានយកចិត្តទុកដាក់ឧបត្ថម្ភគ្រួសារខ្ញុំ ខ្ញុំនឹងខិតខំថែទាំនិងបន្តចិញ្ចឹមជ្រូកដើម្បីកែលម្អជីវភាព ឈានឡើងចាកផុតពីភាពក្រីក្រ”។

សមមិត្ត តាមិញថាយ អនុប្រធានគណៈកម្មាធិការប្រជាជនឃុំតឹងថាញ់ ឱ្យដឹង៖ “តាំងពីអនុវត្តកម្មវិធីនេះ បានជួយគ្រួសារជនរួមជាតិខ្មែរជាច្រើនឈានឡើងលំនឹងជីវភាព ទិដ្ឋភាពជនបទនៅតំបន់ជនជាតិកាន់តែរីកចម្រើនពីមួយថ្ងៃទៅមួយថ្ងៃ។ គិតដល់ដើមឆ្នាំ ២០២៥ ចំនួនគ្រួសារក្រីក្ររបស់ឃុំនៅតែ ១២១ គ្រួសារ ស្រូបអត្រា ១,៨% ក្នុងនោះ គ្រួសារខ្មែរក្រីក្រ ៣៩ គ្រួសារ ស្រូបអត្រា២,៥៦%; ការបណ្តុះបណ្តាលនិងដោះស្រាយការងារធ្វើសម្រេចបានជាង៨២,៨៣% ។ល។ ស្ថានភាពសន្តិសុខនយោបាយ សណ្តាប់ធ្នាប់សុវត្ថិភាពសង្គមនៅភូមិភាគក៏បានរក្សាលំនឹង”។

ជាមួយនឹងការផ្សព្វផ្សាយអនុវត្តព្រមៗគ្នា និងមានប្រសិទ្ធភាពនូវគោលការណ៍ គោលនយោបាយរបស់បក្ស រដ្ឋ ព្រមទាំងការយកចិត្តទុកដាក់យ៉ាងដិតដល់របស់រដ្ឋអំណាចភូមិភាគ។ ឃើញថា ជីវភាពសម្ភារៈនិងស្មារតីរបស់ជនរួមជាតិខ្មែរ កាន់តែបានលើកកម្ពស់ តាមរយៈនោះ បន្តជំរុញកម្លាំងបន្ថែមដើម្បីមាមីងខិតខំពលកម្មផលិត អភិវឌ្ឍសេដ្ឋកិច្ច រួមជាមួយគណៈកម្មាធិការបក្សនិងរដ្ឋអំណាចគ្រប់លំដាប់កសាងភូមិស្រុកកាន់តែរីកចម្រើន៕

ថាញវ៉ាង-វិមាន

ចែករំលែកអត្ថបទ

ពាក្យគន្លឹះ