សុខភាព - អប់រំ សុខភាព

04/09/2025 - 08:55

ដំណាក់សុខាភិបាលឃុំអាងនិញ ខិតខំអនុវត្តលក្ខឋានជាតិអំពីសុខាភិបាល

ជាមួយនឹងទិសដៅលើកកម្ពស់គុណភាពថែទាំសុខភាពជូនសហគមន៍ ពិសេសគឺនៅតំបន់ដែលមានជនជាតិភាគតិចរស់នៅកុះករ ដំណាក់សុខាភិបាលឃុំអាងនិញ ទីក្រុងកឹងធើ បានខិតខំអនុវត្ត ក្រមលក្ខឋានជាតិអំពីសុខាភិបាលតាមទិសដៅចីរភាព ទូលំទូលាយ និងសមស្របជាមួយនឹងលក្ខណៈពិសេសនៅភូមិភាគ។

បើកយុទ្ធនាការកម្ចាត់ដង្កូវទឹកនៅភូមិយ៉ុងចួរ A ឃុំអាងនិញ ទីក្រុងកឹងធើ។

ច្បាមខ្ជាប់សេចក្តីសម្រេចលេខ ១៣០០០/QĐ-BYT របស់ក្រសួងសុខាភិបាល ស្តីពីប្រកាសឱ្យប្រើក្រមលក្ខឋានជាតិអំពីសុខាភិបាលឃុំ ចាប់ពីដំណាក់កាលនេះរហូតដល់ឆ្នាំ ២០៣០ ដំណាក់សុខាភិបាលឃុំអាងនិញ បានរៀបចំផែនការនិងអនុវត្តព្រមៗគ្នានូវសកម្មភាព មុខជំនាញ។ ក្នុងរយៈពេល ៦ ខែដើមឆ្នាំ ២០២៥ លទ្ធផលឱ្យពិន្ទុដោយផ្ទាល់របស់ដំណាក់សម្រេច ៩៥/១០០ ពិន្ទុ ដោយមានលក្ខឋានចំនួន ១០ និងភាគកម្រិតចំនួន ៤៧ បានអនុវត្តពេញលេញ និងមានប្រសិទ្ធភាព។

បច្ចុប្បន្ន ដំណាក់សុខាភិបាល មានកម្មាភិបាល ១០ នាក់ ក្នុងនោះមានវេជ្ជបណ្ឌិត គ្រូពេទ្យ គិលានុបដ្ឋាក ឱសថការី និងសម្ភពទាំងអស់សុទ្ធតែបានបណ្តុះបណ្តាលនិងហ្វឹកហ្វឺនវិជ្ជាជីវៈតាមកាលកំណត់។ ភូមិទាំង ១០០% មានបុគ្គលិកសុខាភិបាលសហគមន៍ចូលរួមបង្ការជំងឺរាលដាល និងថែទាំសុខភាពដំបូង។ ហេដ្ឋារចនាសម្ព័ន្ធក៏ជាចំណុចលេចធ្លោនៅពេលដំណាក់សុខាភិបាលឃុំអាងនិញ ឆ្លើយតបពេញលេញ អំពីផ្ទៃដី បន្ទប់មុខងារ សំណង់បន្ទាប់បន្សំ និងលក្ខខណ្ឌអនាម័យបរិស្ថាន។ ប្រព័ន្ធផ្គត់ផ្គង់ អគ្គិសនី ទឹកស្អាត អ៊ីនធឺណែត ឃ្លាំងឱសថ និងសួនឱសថបុរាណបានវិនិយោគព្រមៗគ្នា បម្រើដល់ការងារពិនិត្យនិងព្យាបាលជំងឺប្រកបដោយប្រសិទ្ធភាព។

មិនត្រឹមតែផ្តោតសំខាន់លើការកសាងមូលដ្ឋានសម្ភារៈប៉ុណ្ណោះទេ ថែមទាំងលើកកម្ពស់គុណភាពសេវាសុខាភិបាលទៀតផង។ ក្នុងរយៈពេល ៦ ខែដើមឆ្នាំ ដំណាក់សុខាភិបាលបានអនុវត្ត ៨៧% តារាងឈ្មោះបច្ចេកទេស ពិនិត្យនិងព្យាបាលជំងឺថ្នាក់ឃុំ ក្នុងនោះ ពិនិត្យព្យាបាលគួបផ្សំនឹងឱសថបុរាណស្រូបអត្រាជាង ៣៧% ។ អត្រាគ្រប់គ្រងជំងឺមិនឆ្លង (ដូចលើសឈាម ទឹកនោមផ្អែម) ជាជំហានបានកែលម្អ អត្រាប្រជាជនបានថែទាំសុខភាពសម្រេចជាង៩២% ។ ផ្សព្វផ្សាយអនុវត្តល្អនូវវិធានការទប់ស្កាត់ជំងឺឆ្លងរាលដាលដូចជា៖ គ្រុនឈាម ជំងឺពងដៃ-ជើង-មាត់ ជំងឺរបេង។ល។ ទន្ទឹមនឹងនោះ ការចាក់វ៉ាក់សាំង ថែទាំសុខភាពមាតា-ទារក ផែនការគ្រួសារ អនាម័យបរិស្ថាន និងសុវត្ថិភាពចំណីអាហារ សុទ្ធតែសម្រេចនិងលើសផែនការដាក់ចេញ។ អាស្រ័យការត្រួតពិនិត្យយ៉ាងហ្មត់ចត់ ម្ល៉ោះហើយក្នុងឃុំគ្មានករណីពុលអាហារ។ អត្រាប្រជាជនចូលរួមធានារ៉ាប់រងសុខាភិបាលសម្រេចជាង ៩៦% មានសៀវភៅពិនិត្យសុខភាពអេឡិចត្រូនិក សម្រេចជិត ៨០% ចំនួនអ្នកមកដំណាក់ពិនិត្យជំងឺកាន់តែកើនឡើងពីមួយថ្ងៃទៅមួយថ្ងៃ។

លោក ត្រឹងឡុង នៅភូមិអាងត្រាច់ មកដំណាក់សុខាភិបាលពិនិត្យជំងឺ ចែករំលែក៖ “ខ្ញុំនិងក្រុមគ្រួសារឧស្សាហ៍មកដំណាក់សុខាភិបាល ពិនិត្យជំងឺនិងចាក់ថ្នាំបង្ការ បុគ្គលិកពេទ្យនៅទីនេះហ្មត់ចត់ហើយយកចិត្តទុកដាក់ខ្លាំងណាស់ ម៉្លោះហើយ ខ្ញុំតែងមានទំនុកចិត្តនិងជឿជាក់”។

វេជ្ជបណ្ឌិតឯកទេស I លោកត្រឹងក្វាងទ្រុង - ប្រធានដំណាក់សុខាភិបាលឃុំអាងនិញ ឱ្យដឹង៖ “យើងខ្ញុំបានកំណត់ច្បាស់ថា ការអនុវត្តល្អក្រមលក្ខឋានជាតិអំពីសុខាភិបាល មិនត្រឹមតែសម្រេចភារកិច្ចរបស់ផ្នែកប៉ុណ្ណោះទេ ថែមទាំងជាការទទួលខុសត្រូវចំពោះសុខភាពសហគមន៍ទៀតផង ថ្វីដ្បិតតែនៅមានការលំបាកច្រើន ពិសេស គឺក្រោយពីការរួមបញ្ចូល ប៉ុន្តែជាមួយនឹងការយកចិត្តទុកដាក់ពីរដ្ឋអំណាចមូលដ្ឋាន និងការស្រុះចិត្តគំនិតរបស់បុគ្គលិកសុខាភិបាលមូលដ្ឋាន យើងខ្ញុំប្ដេជ្ញាចិត្តថានឹងជម្នះបន្តិចម្តងៗ កែលម្អលក្ខឋាននីមួយៗប្រកបដោយប្រសិទ្ធភាព។ ទិសដៅដល់ចុងឆ្នាំ ២០២៥ ដំណាក់សុខាភិបាលឃុំអាងនិញ នឹងបន្តរក្សាខ្ជាប់ ក៏ដូចជាលើកកម្ពស់គុណភាពអនុវត្តក្រមលក្ខឋានជាតិ មិនទុកឱ្យកើតមានជំងឺឆ្លងរាលដាលធំ អនុវត្តជាង ៨០% បច្ចេកទេសពិនិត្យនិងព្យាបាលជំងឺថ្នាក់ឃុំ និងអនុវត្តបច្ចេកវិទ្យាព័ត៌មានក្នុងការគ្រប់គ្រងសុខភាព”៕

អត្ថបទនិងរូបថត៖ ហុងទើ

ចែករំលែកអត្ថបទ

ពាក្យគន្លឹះ