សុខភាព - អប់រំ អប់រំ

11/11/2026 - 13:14

អ្នកគ្រូ ស៊ើងធីឡាយ៖ អស់ពីចិត្តចំពោះបុព្វហេតុអប់រំនៅតំបន់ជនរួមជាតិខ្មែរ

នៅពេលរំលឹកដល់សាលាបឋមសិក្សាផាងវ៉ាំងណាំ (ដែលពីមុនជាសាលាបឋមសិក្សាអង្គុលី សង្កាត់ដុងថាញ់ ខេត្តវិញឡុង) មិត្តរួមការងារ និងឪពុកម្ដាយសិស្សតែងរំលឹកដល់អ្នកគ្រូវ័យក្មេង ស៊ើងធីឡាយ (កើតឆ្នាំ ១៩៩៤) ដោយក្តីរាប់អានយ៉ាងពិសេស។ បន្ទាប់ពីបញ្ចប់ការសិក្សាផ្នែកគរុកោសល្យអក្សរសាស្ត្រខ្មែរណាមបូ ជាមួយនឹងក្តីស្រឡាញ់ដ៏ជ្រាលជ្រៅចំពោះភាសា អក្សរសាស្ត្រ និងវប្បធម៌នៃជនជាតិខ្លួន អ្នកគ្រូ ស៊ើងធីឡាយ បាននិងកំពុងខិតខំប្រឹងប្រែង "រក្សាក្តីស្រឡាញ់" ដោយការបង្រៀន បណ្ដុះក្តីស្រឡាញ់នោះដល់សិស្សជំនាន់ក្រោយៗនៅតំបន់ជនរួមជាតិខ្មែរ។

អ្នកគ្រូ ស៊ើងធីឡាយ ក្នុងម៉ោងបង្រៀនមុខវិជ្ជាភាសាខ្មែរ ដោយអនុវត្តបច្ចេកវិទ្យាព័ត៌មានដើម្បីបង្កចំណង់ចំណូលចិត្តដល់សិស្ស។

កើតនិងធំឡើងនៅអនុសង្កាត់អង្គុលី សង្កាត់ដុងថាញ់ ជាទីដែលភាសា និងវប្បធម៌ខ្មែរបានក្លាយជាផ្នែកមួយដ៏ស្និទ្ធស្នាល អ្នកគ្រូឡាយ តែងតែចងចាំជានិច្ចថា ការបង្រៀនអក្សរមិនត្រឹមតែជួយឱ្យសិស្សចេះអាន ចេះសរសេរប៉ុណ្ណោះទេ ថែមទាំងជាវិធីដើម្បីឱ្យយុវវ័យជំនាន់ក្រោយកាន់តែស្រឡាញ់ និងមានមោទនភាពចំពោះអត្តសញ្ញាណជាតិផងដែរ។ ក្នុងឆ្នាំសិក្សា ២០២៥ - ២០២៦ ពេលបានចាត់ឱ្យបង្រៀនមុខវិជ្ជាភាសាខ្មែរដល់សិស្ស ៣១៥ នាក់ ចាប់ពីថ្នាក់ទី ១ ដល់ថ្នាក់ទី ៥ ព្រមទាំងទទួលបន្ទុកការងារជាលេខាធិការក្រុមប្រឹក្សាសាលា សម្ពាធនៃការងារគឺពិតជាមិនតិចឡើយ។ ដើម្បីជម្នះលើសម្ពាធទាំងនោះ អ្នកគ្រូឡាយ តែងតែរៀបចំផែនការការងារមានបែបបទវិទ្យាសាស្ត្រ។ តាមអ្នកគ្រូ គន្លឹះដ៏សំខាន់បំផុតគឺការបង្កបរិយាកាសសប្បាយរីករាយ និងចំណាប់អារម្មណ៍ដល់សិស្សជំនួសឱ្យការបង្ខិតបង្ខំសិស្សរៀនច្រើន៖ "ចំពោះសិស្សថ្នាក់ទី ១ ខ្ញុំប្រើប្រាស់រូបភាព និងល្បែងកម្សាន្តដើម្បីឱ្យប្អូនៗស្គាល់អក្សរ។ ចំពោះសិស្សថ្នាក់ខ្ពស់ជាង ខ្ញុំបង្កើនការហាត់អាន និងអនុវត្ត។ នៅពេលកុមាររៀនដោយក្តីរីករាយ និងការចូលចិត្ត ការទទួលយកចំណេះដឹងនឹងប្រព្រឹត្តទៅជាធម្មតា និងមានប្រសិទ្ធភាពជាង"។ ការយកចិត្តទុកដាក់នោះបាននាំមកនូវ "លទ្ធផល" គឺសិស្សទាំង ១០០% សម្រេចតាមកម្មវិធីសិក្សា និងមានជាង ៦៦% សម្រេចនិទ្ទេសឆ្នើមនិងល្អ ជាពិសេស មានសិស្សទទួលបានរង្វាន់លើកទឹកចិត្តក្នុងកម្មវិធីប្រឡងសរសេរអក្សរស្អាតថ្នាក់ខេត្ត។

ក្រៅពីម៉ោងបង្រៀនតាមថ្នាក់នីមួយៗ អ្នកគ្រូឡាយ ក៏ជា "អ្នកដឹកនាំស្នូល" នៃក្រុមសិល្បៈរបស់សាលា ជាអ្នកបង្ហាត់ណែនាំក្បាច់រាំប្រពៃណីខ្មែរដល់សិស្សដោយផ្ទាល់ផងដែរ។ ដំណើរការហាត់សមទាមទារភាពអត់ធ្មត់ និងភាពហ្មត់ចត់បន្តិចម្តងៗ។ ប្អូនថាច់ង៉ុកអៀងញ៉ី សិស្សថ្នាក់ទី ៥/១ បានរៀបរាប់ដោយរីករាយ៖ "មុនពេលហាត់រាំ អ្នកគ្រូបានណែនាំយើងខ្ញុំពីរបៀបបោះជំហានតាមចង្វាក់រាប់ បន្ទាប់មកបង្រៀនរបៀបកាច់ក្បាច់ និងរំលឹកឱ្យសម្រួលដៃ កុំឱ្យប្រឹងរឹងពេក ដើម្បីឱ្យកាយវិការមានភាពទន់ភ្លន់។ ហេតុដូច្នេះ ពួកប្អូនមិនមានអារម្មណ៍ថាហត់នឿយទេ គឺសប្បាយរីករាយណាស់"។ ចំណែកប្អូនគឹមង្វៀងបាវត្រឹង បានឱ្យដឹង៖ "ខណៈពេលឈរនៅលើឆាកគឺជាអនុស្សាវរីយ៍ដែលមិនអាចបំភ្លេចបានពីព្រោះបានស្លៀកពាក់ឈុតប្រពៃណីដ៏ប្រណីតឡើងសម្តែង ពួកប្អូនមានអារម្មណ៍ថាសប្បាយរីករាយ រំភើប និងមានមោទនភាពក្រៃលែងដែលបានរួមចំណែកសម្ដែងបង្ហាញក្បាច់រាំរបស់ជនជាតិខ្លួន"។

ប្អូនៗសិស្សានុសិស្សចូលរួមសម្តែងឈុតសិល្បៈដែលអ្នកគ្រូ ស៊ើងធីឡាយបានបង្ហាត់ក្នុងពិធីបូកសរុបឆ្នាំសិក្សា។

ពេលរួមបញ្ចូលទៅជាសាលាបឋមសិក្សាផាងវ៉ាំងណាំ ភាពអត់ធ្មត់ ស្មារតីទទួលខុសត្រូវ និងក្តីស្រឡាញ់ចំពោះវិជ្ជាជីវៈរបស់អ្នកគ្រូ ស៊ើងធីឡាយ បានក្លាយជាស្ពានតភ្ជាប់ដ៏សំខាន់ជួយរក្សាស្ថិរភាពរបៀបរៀបរយនៃការបង្រៀន និងរៀនចាប់តាំងពីថ្ងៃដំបូង។ ដូចអ្វីដែលអ្នកគ្រូឡាយ បានចែករំលែក៖ "ពេលខ្លះ ពាក្យលើកទឹកចិត្តមួយម៉ាត់ និងការយកចិត្តទុកដាក់របស់អ្នកគ្រូ លោកគ្រូនៅថ្ងៃនេះ អាចក្លាយជាសំពាយដ៏មានតម្លៃរួមដំណើរជាមួយសិស្សពេញមួយជីវិត"។ ជាមួយនឹង"ក្តីស្រឡាញ"ចំពោះវិជ្ជាជីវៈដ៏ជ្រាលជ្រៅ អ្នកគ្រូ ស៊ើងធីឡាយ កំពុងបន្តចារជារឿងរ៉ាវដ៏ល្អអំពីការលះបង់ ការរួមចំណែករក្សាគុណភាពអប់រំគ្រប់ជ្រុងជ្រោយនៅតំបន់ជនជាតិភាគតិច។

វាយតម្លៃអំពីអ្នកគ្រូឡាយ លោកគ្រូ ស៊ើងណាវី ចាងហ្វាងរងសាលាបឋមសិក្សាផាងវ៉ាំងណាំ បានចែករំលែក៖ "អ្នកគ្រូស៊ើងធីឡាយ ទទួលបន្ទុកចំពោះសិស្សចំនួន ៣១៥ នាក់ ចាប់ពីថ្នាក់ទី ១ ដល់ថ្នាក់ទី ៥ នេះជាចំនួនច្រើនណាស់ដែរ តម្រូវឱ្យមានការបែងចែកពេលវេលានិងមានសមត្ថភាពគ្រប់គ្រងប្រកបដោយភាពបត់បែន។ ទន្ទឹមនឹងនោះ អ្នកគ្រូក៏ជាលេខាធិការក្រុមប្រឹក្សាសាលា ដែលទាមទារភាពត្រឹមត្រូវខ្ពស់ និងភាពហ្មត់ចត់ក្នុងឯកសារនីមួយៗ។ គណៈចាងហ្វាងសាលាវាយតម្លៃខ្ពស់ចំពោះស្មារតីទទួលខុសត្រូវ និងសមត្ថភាពទទួលរ៉ាប់រងរបស់អ្នកគ្រូ ទោះបីជាមានសម្ពាធធ្ងន់ក៏ដោយ អ្នកគ្រូតែងតែរៀបចំការងារយ៉ាងមានវិទ្យាសាស្ត្រ មិនទុកឱ្យយឺតយ៉ាវឡើយ។ ខាងផ្នែកជំនាញ អ្នកគ្រូមិនត្រឹមតែតស៊ូអត់ធ្មត់ក្នុងការបង្រៀនអក្សរមួយតួៗ ជួយឱ្យសិស្សទទួលបានរង្វាន់លើកទឹកចិត្តក្នុងការប្រឡងសរសេរអក្សរស្អាតថ្នាក់ខេត្តប៉ុណ្ណោះទេ ប៉ុន្តែថែមទាំងជាអ្នកដឹកនាំស្នូល រក្សាសកម្មភាពក្រុមសិល្បៈប្រពៃណីរបស់សាលាផងដែរ។ ភាពអត់ធ្មត់ និងការលះបង់របស់អ្នកគ្រូឡាយ គឺជាចំណុចភ្លឺស្វាងដ៏រឹងមាំជួយរក្សាស្ថិរភាពរបៀបរៀបរយការបង្រៀននិងរៀន ព្រមទាំងបង្កក្តីទុកចិត្តយ៉ាងមុតមាំសម្រាប់អាណាព្យាបាលសិស្សនិងសិស្សានុសិស្ស"៕

ថាច់ ធី

ចែករំលែកអត្ថបទ

ពាក្យគន្លឹះ