ព្រឹត្តិការណ៍ - នយោបាយ ព្រឹត្តិការណ៍

13/11/2026 - 20:55

សមភាពភេទជាទិសដៅ ជាកម្លាំងចលករដ៏សំខាន់ជំរុញការអភិវឌ្ឍសេដ្ឋកិច្ច-សង្គម

(អ.ឡ) - នៅថ្ងៃទី១៣ ខែវិច្ឆិកា គណៈកម្មាធិការប្រជាជនទីក្រុងកឹងធើចាត់តាំងពិធីបំផុសចលនាខែសកម្មភាពដើម្បីសមភាពភេទនិងបង្ការ ទប់ស្កាត់អំពើហិង្សាផ្អែកលើភេទ ឆ្នាំ២០២៦ ក្រោមប្រធានបទ "សមភាពភេទក្នុងការងារ ការផលិត - កម្លាំងជំរុញកំណើនសេដ្ឋកិច្ច ធានាវឌ្ឍនភាពនិងសមភាពសង្គម"។

លោកស្រី ហូធីកឹមដាវ អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ; លោកស្រី ម៉ាធីតឺយ សមាជិកគណៈអចិន្ត្រៃយ៍នៃគណៈកម្មាធិការបក្សទីក្រុង អនុប្រធានប្រចាំការក្រុមប្រឹក្សាប្រជាជនទីក្រុងកឹងធើ; លោកង្វៀងវ៉ាំងខើយ អនុប្រធានគណៈកម្មាធិការប្រជាជនទីក្រុងកឹងធើ; ថ្នាក់ដឹកនាំមន្ទីរ គណៈ ផ្នែក ១០៣ឃុំ សង្កាត់ និងកម្មាភិបាលគ្រប់គ្រង កម្មករ កម្មការិនីដែលធ្វើការនៅតាមអាជីវកម្មនានាចូលរួមពិធីនេះ។

លោកស្រី ហូធីកឹមដាវ អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ ចូលរួមពិធីបំផុសចលនា។

ថ្លែងក្នុងពិធីបំផុសចលនា លោកង្វៀងវ៉ាំងខើយ បញ្ជាក់៖ សមភាពភេទជាទិសដៅ ជាកម្លាំងចលករដ៏សំខាន់ជំរុញការអភិវឌ្ឍសេដ្ឋកិច្ច-សង្គមលឿននិងប្រកបដោយចីរភាព។ ក្នុងរយៈពេលកន្លង ទីក្រុងកឹងធើយកចិត្តទុកដាក់ដឹកនាំ ចង្អុលការចាត់តាំងប្រកបដោយប្រសិទ្ធភាពនូវគោលការណ៍ គោលនយោបាយអំពីសមភាពភេទ តាមនោះឋានៈរបស់នារីត្រូវបានលើកកម្ពស់កាន់តែខ្ពស់ សិទ្ធិនិងផលប្រយោជន៍ស្របច្បាប់បានការពារកាន់តែល្អ។ ទោះជាយ៉ាងណាក៏ដោយ កិច្ចការនេះនៅមានបញ្ហាប្រឈមមួយចំនួន៖ ការយល់លំអៀងខាងភេទ ការរើសអើងក្នុងការងារធ្វើ ចំណូល ឬហានិភ័យអំពើហិង្សា ការបៀតបៀននៅកន្លែងធ្វើការនិងនៅលើលំហអ៊ីនធឺណិត។

លោកង្វៀងវ៉ាំងខើយ អនុប្រធានគណៈកម្មាធិការប្រជាជនទីក្រុងកឹងធើ ថ្លែងការណ៍ក្នុងពិធីបំផុសចលនា។

អនុប្រធានគណៈកម្មាធិការប្រជាជនទីក្រុងបានសំណូមពរឱ្យគ្រប់ថ្នាក់ គ្រប់ផ្នែក ភូមិភាគនិងសហគមន៍អាជីវកម្មពង្រឹងការឃោសនា លើកកម្ពស់តួនាទី ទំនួលខុសត្រូវក្នុងការអនុវត្តសមភាពភេទ។ យកចិត្តទុកដាក់អនុវត្តបច្ចេកវិទ្យាឌីជីថល ពង្រីកប្រសិទ្ធភាពវេទិកាបណ្តាញសង្គមស្របច្បាប់និងទម្រង់រូបភាពឃោសនាផ្ទាល់ ដើម្បីសាយភាយគោលការណ៍ គោលនយោបាយរបស់បក្ស ច្បាប់របស់រដ្ឋអំពីសមភាពភេទដល់គ្រប់ស្ថាប័ន អង្គភាព អាជីវកម្ម និងសហគមន៍នីមួយៗ។ អនុវត្តឱ្យបានល្អនូវគោលនយោបាយសុខុមាលភាពសង្គម ជំនួយដល់មុខរបរចិញ្ចឹមជីវិត យកចិត្តទុកដាក់គិតគូរដល់ជីវភាពសម្ភារៈនិងស្មាតីចំពោះនារី កុមារមានស្ថានភាពលំបាក។ យកចិត្តទុកដាក់ពិនិត្យឡើងវិញ អនុវត្តឱ្យបានពេញលេញនូវគោលនយោបាយចំពោះកម្មការិនី; ប្តេជ្ញារកឱ្យឃើញ ប្រឆាំង និងដោះស្រាយយ៉ាងម៉ឺងម៉ាត់នូវអំពើល្មើសច្បាប់អំពីសមភាពភេទ អំពើហិង្សាក្នុងគ្រួសារ អំពើហិង្សាផ្អែកលើភេទនិងការរំលោភបំពានលើនារីនិងកុមារ។ ពង្រីកតួនាទីឈានមុខ ធ្វើជាគំរូរបស់កងជួរកម្មាភិបាលដឹកនាំ គ្រប់គ្រងគ្រប់ថ្នាក់ ជាពិសេសគឺបុរសក្នុងការអនុវត្តសមភាពភេទ; ម្ចាស់ការចែករំលែកទំនួលខុសត្រូវក្នុងការថែទាំគ្រួសារ គោរពនិងរួមដំណើរជាមួយនារី រួមចំណែកកសាងបរិស្ថានរស់នៅនិងធ្វើការមានសុវត្ថិភាព សមភាព មានអារ្យធម៌។

លោកស្រី ហូធីកឹមដាវ អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ ជូនអំណោយដល់កម្មការិនី។

ក្នុងពិធីនេះ តំណាងថ្នាក់ដឹកនាំមន្ទីរ គណៈ ផ្នែកបានចែករំលែកដំណោះស្រាយជាច្រើនជំរុញសមភាពភេទលើវិស័យឧស្សាហកម្ម ពាណិជ្ជកម្ម ការផលិតធ្វើអាជីវកម្ម; ជួយនារីផ្តើមអាជីព; កសាងបរិស្ថានការងារមានសុវត្ថិភាព សមភាព ធានាសិទ្ធិនិងផលប្រយោជន៍ស្របច្បាប់របស់កម្មការិនី; បង្កលក្ខណៈឱ្យនារីលើកកម្ពស់មុខជំនាញ វិជ្ជាជីវៈ កៀកជិតវិទ្យាសាស្ត្របច្ចេកវិទ្យានិងការផ្លាស់ប្តូរឌីជីថលបានស្មើគ្នា; ជាជំហានៗលុបបំបាត់ការយល់ឃើញលំអៀង ការរើសអើងខាងភេទ...

ថ្នាក់ដឹកនាំគណៈកម្មាធិការបក្ស ក្រុមប្រឹក្សាប្រជាជនទីក្រុងកឹងធើជូនអំណោយដល់កម្មការិនីនៅតាមអាជីវកម្មនានា។

លោកស្រី ហូធីកឹមដាវ អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ ជូនបាច់ផ្កា ថ្លែងអំណរគុណចំពោះអង្គភាពដែលឧបត្ថម្ភក្នុងសកម្មភាពសុខុមាលភាពសង្គមក្នុងខែសកម្មភាពដើម្បីសមភាពភេទនិងបង្ការ ទប់ស្កាត់អំពើហិង្សាផ្អែកលើភេទ ឆ្នាំ២០២៦។

ក្នុងឱកាសនេះ គណៈកម្មាធិការប្រជាជនទីក្រុងកឹងធើបានជូនអំណោយចំនួន១៥០ចំណែកដល់កម្មករ កម្មការិនីនៅតាមអាជីវកម្មនានា; ជូនបាច់ផ្កាថ្លែងអំណរគុណចំពោះអង្គភាពដែលឧបត្ថម្ភដល់សកម្មភាពសុខមាលភាពសង្គមក្នុងខែសកម្មភាពដើម្បីសមភាពភេទនិងបង្ការ ទប់ស្កាត់អំពើហិង្សាផ្អែកលើភេទ ឆ្នាំ២០២៦។

កាវហ្វាញ់ - សុផន

ចែករំលែកអត្ថបទ

ពាក្យគន្លឹះ