វប្បធម៌-សិល្បៈ វប្បធម៌

13/11/2026 - 08:17

ក្រុមសិល្បៈខ្មែរទីក្រុងកឹងធើ ត្រៀមលក្ខណៈសម្រាប់ពិធីបុណ្យអកអំបុកនិងប្រណាំងទូក-ង

ឆ្ពោះដល់ទិវាវប្បធម៌វៀតណាម និងពិធីបុណ្យអកអំបុកនិងប្រណាំងទូក-ង ទីក្រុងកឹងធើ ឆ្នាំ២០២៦ សិល្បករ-សិល្បការិនីនិងតន្ត្រីកររបស់ក្រុមសិល្បៈខ្មែរទីក្រុងកឹងធើ កំពុងមមាញឹកហាត់សមនិងកែលម្អកម្មវិធីសម្តែងនានា។ ជាមួយទឹកចិត្តស្រឡាញ់សិល្បៈ និងការប្តេជ្ញាចិត្តខ្ពស់ បណ្តាសិល្បករ-សិល្បការិនីរបស់ក្រុមសិល្បៈសង្ឃឹមថានឹងនាំមកជូនជនរួមជាតិនិងភ្ញៀវទេសចរនូវកម្មវិធីសម្តែងដ៏ទាក់ទាញ និងប្រកបដោយអត្តសញ្ញាណវប្បធម៌ខ្មែរ។

សិល្បករ-សិល្បការិនីកំពុងហាត់សមល្ខោនយូរកេររឿង “ចម្រៀងវីរភាពការពារមាតុភូមិ”។

ចាប់ពីព្រឹករហូតដល់ល្ងាច នៅលើឆាកហាត់សមតែងឮសំឡេងតន្ត្រី និងបទចម្រៀងយ៉ាងកងរំពង។ សិល្បករ-សិល្បការិនីទាំងឡាយខិតខំហាត់សមនិងកែលម្អកាយវិការពាក្យពេចន៍ក្នុងតួសម្តែងនីមួយៗយ៉ាងយកចិត្តទុកដាក់។ ចំណុចលេចធ្លោនៃរដូវបុណ្យអកអំបុកឆ្នាំនេះ គឺក្រុមបានចងក្រងរឿងយូរកេរថ្មីក្រោមចំណងជើងថា “ចម្រៀងវីរភាពការពារមាតុភូមិ” ដែលគ្រោងនឹងសម្តែងជាលើកដំបូងនៅយប់ថ្ងៃទី២៣ ខែវិច្ឆិកា នៅអគារតាំងពិព័រណ៌វប្បធម៌ខ្មែរ។ ក្នុងរយៈពេលជាងមួយខែកន្លងមកនេះ ក្រុមសិល្បករ-សិល្បការិនីបានផ្តោតការយកចិត្តទុកដាក់លើការហាត់សម ការសម្របសម្រួលរវាងការសម្តែងជាមួយតន្ត្រីនិងកាយវិការ ដើម្បីឱ្យវណ្ណកម្មថ្មីនេះបានល្អឥតខ្ចោះ។ សិល្បករ យឿងមិញចាញ់ ចែករំលែក៖ “ក្នុងរយៈពេលជាងមួយខែមកនេះ យើងខ្ញុំបានហាត់សមក្នុងមួយថ្ងៃ ៣ វេន គឺពេលព្រឹក ពេលរសៀលនិងពេលយប់។ ទោះបីមានការនឿយហត់ក៏ដោយ ប៉ុន្តែបងប្អូនសិល្បករគ្រប់រូបសុទ្ធតែខិតខំប្រឹងប្រែងដើម្បីតួសម្តែងរបស់ខ្លួនបានល្អបំផុត។ យើងខ្ញុំសង្ឃឹមថា នឹងនាំមកជូនទស្សនិកជននូវរឿងល្ខោនយូរកេរមួយដ៏ល្អប្រណីត ដើម្បីឱ្យមាមីងនិងភ្ញៀវទេសចរ កាន់តែយល់ដឹងនិងស្រឡាញ់សិល្បៈប្រពៃណីរបស់ជនរួមជាតិខ្មែរយើងកាន់តែខ្លាំងឡើង”។

ទន្ទឹមនឹងការរៀបចំសម្ដែងរឿងថ្មី ក្រុមសិល្បៈក៏កំពុងមមាញឹកត្រៀមកម្មវិធីច្រៀងនិងរាំ ដើម្បីបម្រើក្នុងពិធីបើកវគ្គ រួមមានឈុតសម្តែង របាំ “ស្ពានមេត្រីភាព” ការប្រគំតន្ត្រី “សំនៀងថ្ងៃបុណ្យ” ច្រៀង រាំ “អំណររីករាយភូមិស្រុក” និង

“រាំវង់សាមគ្គី - ពាក្យជម្រាបលា” ជាដើម។ ក្រុមតន្ត្រីករបានយកចិត្តទុកដាក់ជាពិសេសលើការសម្របសម្រួលចង្វាក់ភ្លេង ដើម្បីធានាឱ្យមានភាពស៊ីសង្វាក់គ្នារវាងតន្ត្រីនិងការសម្តែង។ នៅក្នុងកម្មវិធីបើកការប្រណាំងទូក-ង ក្រុមសិល្បៈនឹងប្រគំភ្លេងពិណពាទ្យ ក្រោមចំណងជើង “សំនៀងថ្ងៃបុណ្យ” រួមជាមួយឈុតសម្តែងច្រៀងរាំ “មាតុភូមិថ្ងៃបុណ្យ” និង “អកអំបុក” ជាដើម។ តន្ត្រីករ លោកឡឹមមិញកឿង ចែករំលែក៖ “យើងខ្ញុំកំពុងផ្តោតការយកចិត្តទុកដាក់លើការហាត់សមដើម្បីឱ្យសំឡេងតន្ត្រីពីរោះរណ្តំ និងមានភាពស៊ីសង្វាក់គ្នាជាមួយបទចម្រៀងនិងចង្វាក់រាំ។ ជាមួយគ្នានេះ ក្រុមសិល្បៈក៏កំពុងប្រមូលផ្តុំក្រុមតន្ត្រីពិណពាទ្យនៅតាមវត្តអារាមនានាឱ្យចូលរួមសម្តែង ដើម្បីរួមចំណែកបង្កបរិយាកាសសប្បាយរីករាយ និងបង្ហាញពីអត្តសញ្ញាណវប្បធម៌ខ្មែរនៅថ្ងៃបុណ្យ”។

តាមប្រសាសន៍លោក លឺវថាញហ៊ុង ប្រធានក្រុមសិល្បៈខ្មែរទីក្រុងកឹងធើ អង្គភាពកំពុងផ្ដុំកម្លាំងហាត់សម ដើម្បីធានាគុណភាពសិល្បៈនិងតាមកាលបរិច្ឆេទនៃការសម្តែងដែលបានកំណត់។ ការសម្តែងរឿងល្ខោនយូរកេរថ្មី មិនត្រឹមតែឆ្លើយតបទៅនឹងតម្រូវការកម្សាន្តនិងទស្សនារបស់ទស្សនិកជនប៉ុណ្ណោះទេ ថែមទាំងរួមចំណែកដល់ការថែរក្សា និងលើកតម្កើងតម្លៃបេតិកភណ្ឌវប្បធម៌អរូបីរបស់ជនរួមជាតិខ្មែរទៀតផង។

តាមរយៈពេលវេលានៃការហាត់សម ទឹកចិត្តស្រឡាញ់សិល្បៈនិងការលះបង់របស់សិល្បករ-សិល្បការិនី បានបង្ហាញតាមរយៈបទចម្រៀងក្បាច់ រាំនិងសូរស័ព្ទតន្ត្រី។ ការត្រៀមបម្រុងយ៉ាងយកចិត្តទុកដាក់នេះ សន្យាថានឹងនាំមកនូវផ្ទាំងទស្សនីយភាពរាត្រីសម្តែងដ៏ជក់ចិត្តនិងពោរពេញដោយមនោសញ្ចេតនា ព្រមទាំងរួមចំណែកធ្វើឱ្យសាយភាយសម្រស់វប្បធម៌ខ្មែរឱ្យកាន់តែទូលំទូលាយ និងបន្សល់ ទុកនូវអនុស្សាវរីយ៍ដ៏ជ្រាលជ្រៅក្នុងដួងចិត្តជនរួមជាតិខ្មែរ និងភ្ញៀវទេសចរមកពីគ្រប់ទិសទីដែលបានអញ្ជើញមកចូលរួមក្នុងពិធីបុណ្យនេះ៕

យ៉ីអាញ - ពេជ្រសឿន

ចែករំលែកអត្ថបទ

ពាក្យគន្លឹះ