ដោយការយកចិត្តទុកដាក់លើការអប់រំនយោបាយនិងសតិអារម្មណ៍ ពង្រីកស្មារតីសាមគ្គីនិងការទទួលខុសត្រូវក្នុងការធ្វើជាគំរូ សាខាបក្សភូមិបឹងទ្រៀក ឃុំលីវទូ ទីក្រុងកឹងធើ បានធ្វើឱ្យជាក់លាក់នូវការរៀនសូត្រនិងធ្វើតាមឧត្តមគតិ សីលធម៌ និងឥរិយាបថហូជីមិញ ដោយការងារជាក់ស្តែងជាច្រើន។ តាមរយៈនោះ បានបំផុសកម្លាំងប្រជាជនក្នុងការកសាងជនបទថ្មី គិតគូរដល់ការងារសុខុមាលភាពសង្គម រួមចំណែកធ្វើឱ្យទិដ្ឋភាពភូមិស្រុកមានការផ្លាស់ថ្មីលើគ្រប់វិស័យ។
ផ្លូវគមនាគមន៍ជនបទនៅភូមិបឹងទ្រៀក កាន់តែធំទូលាយ ស្អាតបាត។
ភូមិបឹងទ្រៀក មានជនរួមជាតិខ្មែររស់នៅជិត ៩៩%។ ដោយយល់ច្បាស់ពីតួនាទីដ៏សំខាន់នៃផែនមហាសាមគ្គីភាពទូទាំងជនជាតិ សាខាបក្សភូមិដែលមានបក្ខជនចំនួន ២០ រូប តែងតែយកចិត្តទុកដាក់ផ្លាស់ថ្មីវិធីសាស្ត្រដឹកនាំ ដោយភ្ជាប់ការងារកសាងបក្សទៅនឹងការអនុវត្តភារកិច្ចនយោបាយនៅមូលដ្ឋាន។ ក្នុងកិច្ចប្រជុំតាមកាលកំណត់ សាខាបក្សភូមិតែងរក្សាការស្វ័យរិះគន់និងរិះគន់ លើកកម្ពស់ការយល់ដឹងផ្នែកនយោបាយ បណ្តុះស្មារតីបម្រើប្រជាជននិងលើកកម្ពស់ស្មារតីឈានមុខ ធ្វើជាគំរូរបស់បក្ខជនម្នាក់ៗ។ សមមិត្តតាំងរ៉ូវីសា លេខាសាខាបក្សភូមិបឹងទ្រៀក ឱ្យដឹង៖ "ការរៀនសូត្រនិងធ្វើតាមឧត្តមគតិ សីលធម៌និងឥរិយាបថហូជីមិញ បានសាខាបក្សកំណត់ថាជាភារកិច្ចជាប្រចាំ ផ្សារភ្ជាប់នឹងការងារកសាងបក្ស; អប់រំនយោបាយនិងសតិអារម្មណ៍ លត់ដំជំហរនយោបាយ សីលធម៌បដិវត្តន៍ដល់កងជួរកម្មាភិបាលនិងបក្ខជន។ តាមរយៈការរៀនសូត្រ បក្ខជនម្នាក់ៗមានការយល់ដឹងស៊ីជម្រៅអំពីការទទួលខុសត្រូវរបស់ខ្លួន មិនត្រឹមតែជាគំរូក្នុងការពោលពាក្យសម្តីប៉ុណ្ណោះទេ គឺគប្បីបង្ហាញឱ្យឃើញតាមរយៈសកម្មភាពជាក់ស្តែងនិងមានប្រសិទ្ធភាព ពិសេសក្នុងការអនុវត្តភារកិច្ចនៅមណ្ឌលប្រជាជនតាំងទីលំនៅ។ កម្មាភិបាលនិងបក្ខជនភាគច្រើន មានជំហរនយោបាយរឹងមាំ មានស្មារតីទទួលខុសត្រូវខ្ពស់និងសកម្មក្នុងការរៀនសូត្រនិងធ្វើតាមគំរូអ៊ំ រួមចំណែកពង្រឹងសាមគ្គីភាពនិងការឯកភាពក្នុងសាខាបក្ស"។
តាមរយៈនោះ សាខាបក្សបានចាត់បក្ខជនទទួលបន្ទុកតាមភូមិឋាននីមួយៗ ដោយសហការយ៉ាងជិតស្និទ្ធជាមួយគណៈការងាររណសិរ្សមាតុភូមិ និងអង្គការមហាជននានា ច្បាមមូលដ្ឋាន ព្រមទាំងព្យាយាមឃោសនាចលនាឱ្យប្រជាជន បរិច្ចាគដី ដំណាំ រួមចំណែកកសាងជនបទថ្មី។ ជាច្រើនឆ្នាំមកនេះ សាខាបក្សបានចលនាប្រជាជនបរិច្ចាគដី ដើម្បីពង្រីកផ្លូវសំខាន់ៗប្រវែងជាង ៣.៥០០ ម៉ែត្រ កសាងផ្លូវថ្មីក្នុងភូមិប្រវែង ៨០០ ម៉ែត្រនិងកសាងស្ពានបេតុងជាង ១០ស្ពាន។ មកដល់បច្ចុប្បន្ន ផ្លូវគមនាគមន៍ទាំងអស់ក្នុងភូមិបានចាក់បេតុងយ៉ាងរឹងមាំ ផ្ទះប្រជាជនជាង ៥៦% មានរបង គ្រួសារប្រជាជនជាង ៩៧% បានប្រើប្រាស់បណ្តាញអគ្គិសនីជាតិនិងមានទឹកស្អាតបម្រើជីវភាពប្រចាំថ្ងៃ។ ជាពិសេស ប្រជាជនបានរួមចំណែកថវិកា ៣៣ លានដុង និងកម្លាំងពលកម្ម៣០ថ្ងៃ ដើម្បីកសាងផ្លូវនៅភូមិ២ ប្រវែង ៧០ ម៉ែត្រ ជួសជុលស្ពានមួយកន្លែង និងដំឡើងអំពូលភ្លើងបំភ្លឺផ្លូវចំនួន ១០ នៅតាមផ្លូវភូមិ ៣ រួមចំណែកបង្កបរិស្ថានភ្លឺ បៃតង ជ្រះ ស្អាត។ លោកថាច់យ៉ៀង ប្រជាជននៅភូមិបឹងទ្រៀក ចែករំលែក៖ "បក្ខជនក្នុងសាខាបក្ស តែងសាមគ្គីនិងយកចិត្តទុកដាក់គិតគូរកសាងភូមិឱ្យ រីកចម្រើន ព្រមទាំងជួយដល់គ្រួសារដែលជួបការលំបាក។ សកម្មភាពទាំងនេះ តែងបានប្រជាជនយើងខ្ញុំគាំទ្រនិងព្រួតដៃចូលរួម"។
ទន្ទឹមនឹងការកែលម្អហេដ្ឋារចនាសម្ព័ន្ធ ការងារសុខុមាលភាពសង្គម និងការបន្ថយភាពក្រីក្រប្រកបដោយចីរភាព ក៏បានសាខាបក្សកំណត់ថាជាភារកិច្ចដ៏សំខាន់។ ដំណាក់កាល ២០២១-២០២៥ តាមសំណើរបស់សាខាបក្ស រដ្ឋអំណាចគ្រប់លំដាប់ថ្នាក់បានជួយឧបត្ថម្ភសាងសង់ផ្ទះ ៣០ ខ្នងជូនគ្រួសារដែលជួបការលំបាកខាងលំនៅឋាន និងជួយឱ្យអ្នកក្ររាប់រយគ្រួសារបានបង្ខិតជិតប្រភពទុនឥណទានគោលនយោបាយដើម្បីអភិវឌ្ឍសេដ្ឋកិច្ចគ្រួសារ។ ចាប់តាំងពីដើមឆ្នាំមក សាខាបក្សចលនាប្រជាជនចូលរួមវិភាគទានមូលនិធិ "ដើម្បីអ្នកក្រ" បានជាង ៥ លានដុង; ព្រមទាំងចលនាសប្បុរសជនជូនអំណោយជាង ៣០០ ចំណែកដល់គ្រួសារក្រីក្រ គ្រួសារក្បែរក្រ អ្នកងាយរងគ្រោះ សិស្សក្រីក្រ និងអ្នកពិការភាព ដោយសរុបថវិកាជាង ១៣០ លានដុង។ អ្នកស្រី ង្វៀងថាញយីវ ប្រធានការងាររណសិរ្សភូមិ ឱ្យដឹង៖ ភាពម្ចាស់ការនិងការឯកភាពគ្នារបស់កម្មាភិបាលនិងបក្ខជន បានបង្កជាទីបង្អែកដ៏រឹងមាំជួយឱ្យគ្រួសារជាច្រើនដែលជួបការលំបាកឈានឡើងក្នុងជីវភាព រឹតបន្តឹងទំនាក់ទំនងរវាបក្ខជននិងប្រជាជន។ ផ្ដើមពីនោះ បក្ខជនក្នុងសាខាបក្សបានព្រួតដៃគ្នាដើម្បីបំពេញភារកិច្ចដែលបានប្រគល់ឱ្យបានល្អប្រសើរ។
ជូនប័ណ្ណសរសើរដល់បក្ខជនក្នុងសាខាបក្ស ដែលមានស្នាដៃឆ្នើមក្នុងការអនុវត្តការងារសុខុមាលភាពសង្គមនិងការកសាងជនបទថ្មី។
ទទួលបានការឧបត្ថម្ភសាងសង់ផ្ទះរឹងមាំមួយខ្នង ពូលីហ៊ុយ ចែករំលែក៖ "គ្រួសារខ្ញុំក្រ គ្មានដីបង្កបង្កើនផល ហើយមានកូនម្នាក់មានជំងឺធ្ងន់មិនអាចទៅធ្វើការបាន ដូច្នេះប្រពន្ធនិងកូនទីពីរ ត្រូវទៅធ្វើការរកស៊ីនៅទីក្រុង។ ដោយឃើញពីស្ថានភាពលំបាកនេះ កម្មាភិបាលភូមិបានស្នើទៅរដ្ឋអំណាច ហើយជួយសាងសង់ផ្ទះថ្មរឹងមាំមួយខ្នងឱ្យខ្ញុំ។ ឥឡូវនេះ ខ្ញុំមានផ្ទះស្នាក់នៅត្រឹមត្រូវ មិនបារម្ភពីបញ្ហាភ្លៀងស្រក់ដូចមុនទៀត ប្រពន្ធនិងកូនក៏ស្ងប់អារម្មណ៍ធ្វើការងារ និងទទួលបានប្រាក់ចំណូលស្ថិរភាព ជីវភាពគ្រួសារក៏ចាប់ផ្តើមប្រសើរឡើងបន្តិចម្ដងៗ។ ខ្ញុំអរគុណយ៉ាងជ្រាលជ្រៅចំពោះទឹកចិត្តជួយឧបត្ថម្ភរបស់បក្ខជនក្នុងភូមិបឹងទ្រៀក"។
ជាមួយគ្នានេះ សាខាបក្សបានដឹកនាំអនុវត្តយ៉ាងទូលំទូលាយនូវចលនាប្រឡងប្រណាំង "ទូទាំងប្រជាជនចូលរួមកសាងជីវភាពវប្បធម៌" ថែរក្សាអត្តសញ្ញាណវប្បធម៌ជនរួមជាតិខ្មែរ ភ្ជាប់ជាមួយនឹងការបំបាត់ទម្លាប់ហួសសម័យ និងកសាងផ្នត់រស់នៅស៊ីវិល័យ។ តាមរយៈនោះ ក្នុងភូមិមានគ្រួសារចំនួន ៤៩៨/៥៩៩ គ្រួសារ សម្រេចបទដ្ឋានគ្រួសារវប្បធម៌ ស្រូបអត្រា ៨៣,១៣%; ហើយកុមារដែលស្ថិតក្នុងវ័យសិក្សាបានចូលរៀន១០០%។ ចំពោះមុខតម្រូវការនៃការផ្លាស់ប្ដូរឌីជីថល បក្ខជនបន្តបង្ហាញពីតួនាទីឈានមុខ លោកតាំងរ៉ូវីសា លេខាសាខាបក្សភូមិ បានម្ចាស់ការរៀនជំនាញកុំព្យូទ័រការិយាល័យ និងចុះជួយប្រជាជនដោយផ្ទាល់ក្នុងការដំឡើងកម្មវិធីកំណត់អត្តសញ្ញាណអេឡិចត្រូនិក VNeID បំពេញបែបបទអេឡិចត្រូនិក និងអនុវត្តបែបបទរដ្ឋបាលតាមប្រព័ន្ធអនឡាញ។
តាមរយៈការងារជាក់ស្តែងទាំងនេះ សាខាបក្សភូមិបឹងទ្រៀក កាន់តែបញ្ជាក់ឱ្យឃើញច្បាស់ពីតួនាទីជាស្នូលដឹកនាំនៅមណ្ឌលប្រជាជនតាំងទីលំនៅ។ ស្មារតីសាមគ្គីនិងការឯកភាពក្នុងសាខាបក្ស និងស្មារតីធ្វើជាគំរូរបស់បក្ខជនម្នាក់ៗ បានរួមចំណែកពង្រឹងជំនឿទុកចិត្តនិងបង្កការឯកភាពក្នុងប្រជាជន។ ឆ្នាំ ២០២៥ សាខាបក្សភូមិទទួលបានការវាយតម្លៃជាអង្គភាពអនុវត្តឆ្នើមភារកិច្ច។ នេះជាមូលដ្ឋានគ្រឹះសម្រាប់សមូហភាពបន្តលើកកម្ពស់សមត្ថភាពដឹកនាំ កសាងអង្គការបក្សឱ្យមានភាពស្អាតស្អំ រឹងមាំ ជិតដិតជាមួយប្រជាជន យកចិត្តទុកដាក់ចំពោះប្រជាជន និងបម្រើប្រជាជនដោយពិតប្រាកដ៕
យ៉ីអាញ - ពេជ្រសឿន
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ