សុខភាព - អប់រំ អប់រំ

03/09/2025 - 09:07

អនុវិទ្យាល័យជនជាតិអន្តេវាសិកតឹងថាញ់ ត្រៀមជាស្រេចសម្រាប់ឆ្នាំសិក្សាថ្មី

ឆ្នាំនេះ ដើម្បីត្រៀមលក្ខណៈសម្រាប់ឆ្នាំសិក្សាថ្មី ២០២៥-២០២៦ សាលារៀនជាច្រើននៅទី ក្រុងកឹងធើ បានជួសជុល បង្កើនកម្រិតមូលដ្ឋានសម្ភារៈ បង្កបរិស្ថានរៀនសូត្រស្អាតបាត ទំនើប ត្រៀមលក្ខណៈទទួលសិស្សចូលរៀន។

ថ្នាក់ដឹកនាំអនុវិទ្យាល័យជនជាតិអន្តេវាសិកតឹងថាញ់ ពិនិត្យបរិក្ខាររៀនសូត្ររបស់សាលា។

នៅអនុវិទ្យាល័យជនជាតិអន្តេវាសិកតឹងថាញ់ ឃុំតឹងថាញ់ ទីក្រុងកឹងធើ មូលដ្ឋាន សម្ភារៈត្រូវបានយកចិត្តទុកដាក់វិនិយោគសម្រេចជាស្ថាពរ ចាប់ពីបន្ទប់រៀន មណ្ឌលអន្តេវាសិកដ្ឋាន សួនកម្សាន្ត។ល។ ធានាបម្រើការបានល្អសម្រាប់ទទួលសិស្សចូលរៀន។ ជាក់ស្តែង សាលាមាន បន្ទប់រៀន ៨ បន្ទប់ និងបន្ទប់មុខងារផ្សេងៗដូច៖ បណ្ណាល័យ បន្ទប់ពិគ្រោះចិត្តសាស្រ្តសិស្ស បន្ទប់ឃោសនា ផ្សព្វផ្សាយសម្ព័ន្ធយុវជន - អគារពហុមុខងារ។ល។ ក្រៅពីនេះ នៅមានបន្ទប់រៀនមុខវិជ្ជា ដូច៖ បន្ទប់បច្ចេកវិទ្យា បន្ទប់បរិក្ខារប្រើរួម បន្ទប់ភាសាបរទេស បន្ទប់កុំព្យូទ័រ ។ល។

លោកគ្រូលៀងហៀងស៊ឺ នាយកអនុវិទ្យាល័យជនជាតិអន្តេវាសិកតឹងថាញ់ ឱ្យដឹង៖ “សាលាបានកសាង ជួសជុលមូលដ្ឋានសម្ភារៈសម្រេចជាស្ថាពរ ផ្លាស់ថ្មីឧបករណ៍ដែលខូចនិងបំពេញបន្ថែមឧបករណ៍ដែលនៅខ្វះក្នុងសាលា។ មានមូលដ្ឋានសម្ភារៈថ្មី ទំនើប ល្អស្អាតគឺជាកត្តាមួយក្នុងចំណោមកត្តាជាច្រើនសម្រាប់បង្កលក្ខណៈដល់សាលារៀន សកម្មផ្លាស់ថ្មីវិធីសាស្ត្របង្រៀន និងរៀន។ អាស្រ័យហេតុនោះ ក្រៅពីប្រភពថវិការបស់ភូមិភាគ សាលាក៏ម្ចាស់ការប្រើប្រាស់ប្រភពថវិកាចំណាយជាប្រចាំដើម្បីជួសជុល រួមចំណែកបង្កបរិស្ថានរៀនសូត្រល្អបំផុតសម្រាប់សិស្សានុសិស្ស”។

ចំណែកការត្រៀមបរិក្ខារ សៀវភៅសិក្សា អ្នកគ្រូលីវធីហា បុគ្គលិកបរិក្ខារនៃអនុវិទ្យាល័យជនជាតិអន្តេវាសិកតឹងថាញ់ ឱ្យដឹង៖ “មកទល់ពេលនេះ ការត្រៀមបរិក្ខាររៀនសូត្រសម្រាប់ប្អូនៗសិស្សានុសិស្សបានសម្រេចជាស្ថាពរ ត្រៀមបម្រុងជាស្រេចសម្រាប់បម្រើការពេលប្អូនៗឈានចូលបវេសនកាល។ ក្នុងរយៈពេលវិស្សមកាលបរិក្ខារបង្ហាត់បង្រៀនរបស់សាលារៀនបានពិនិត្យឡើងវិញ និងបំពេញបន្ថែមដើម្បីឆ្លើយតបជាសារវន្តការបង្ហាត់បង្រៀនដល់ប្អូនៗសិស្សានុសិស្ស”។

ព័ត៌មានពីកងជួរគ្រូបង្រៀននិងសិស្ស តាមប្រសាសន៍លោកគ្រូលៀងហៀងស៊ឺ នាយកអនុវិទ្យាល័យជនជាតិអន្តេវាសិកតឹងថាញ់ ឱ្យដឹងបន្ថែម៖ “ឆ្នាំសិក្សា២០២៥-២០២៦ សាលាមានសិស្ស ២៧៦នាក់ មាន ៤ ថ្នាក់ចាប់ពីថ្នាក់ទី ៦-៩ ប្អូនៗ បានរៀនសូត្រនិងប្រជុំជីវភាពប្រមូលផ្ដុំនៅក្នុងសាលា។ ទោះបីឆ្ងាយពីគ្រួសារក៏ពិតមែន ប៉ុន្តែជាមួយស្មារតីស្រឡាញ់រាប់អាន ជួយគ្នាទៅវិញទៅមក រួមជាមួយការយកចិត្តទុកដាក់គិតគូររបស់លោកគ្រូអ្នកគ្រូ ម្ល៉ោះហើយប្អូនៗតែងខិតខំរៀនសូត្រនិងលត់ដំជានិច្ច។ ក្រៅពីនេះ សាលារៀនថែមទាំងកសាងកងជួរកម្មាភិបាលគ្រូបង្រៀនរឹងប៉ឹងខាងសតិអារម្មណ៍នយោបាយ ពូកែខាងជំនាញវិជ្ជាជីវៈ អស់ពីចិត្តនឹងអាជីព។ មកដល់ពេលនេះ កម្មាភិបាល គ្រូបង្រៀនទាំង ១០០% តែងសម្រេចបទដ្ឋានវិជ្ជាជីវៈនិងកងជួរបុគ្គលិកថែទាំបំប៉ន តែងមានស្មារតីទទួលខុសត្រូវខ្ពស់ក្នុងការគិតគូរនិងមើលថែប្អូនៗសិស្សានុសិស្ស”។

ដោយការត្រៀមលក្ខណៈហ្មត់ចត់គ្រប់ជ្រុងជ្រោយ អនុវិទ្យាល័យជនជាតិអន្តេវាសិកតឹងថាញ់ បានត្រៀមជាស្រេចសម្រាប់ឆ្នាំសិក្សាថ្មី។ បរិស្ថានរៀនសូត្រទំនើប គឺជាមូលដ្ឋានគ្រឹះដ៏រឹងមាំដើម្បីប្អូនៗសិស្សានុសិស្សជឿជាក់លើខ្លួនឯង ប្រឹងប្រែងក្នុងដំណើរការក្រេបយកចំណេះដឹង៕

អត្ថបទនិងរូបថត៖ ត្រឿងផល - លីសៀ

ចែករំលែកអត្ថបទ

ពាក្យគន្លឹះ