វប្បធម៌-សិល្បៈ វប្បធម៌

28/07/2025 - 10:02

លក្ខណៈវិសេសនៃពិធីបុណ្យប្រពៃណីរបស់ជនរួមជាតិខ្មែរ

ក្រៅពីពិធីបុណ្យសំខាន់ៗក្នុងឆ្នាំបានអភិរក្សជាច្រើនជំនាន់មក ដូច៖ បុណ្យចូលឆ្នាំថ្មី បុណ្យសែនដូនតា បុណ្យអកអំបុក - ប្រណាំងទូក-ង។ល។ ជនរួមជាតិខ្មែរនៅក្រុងកឹងធើ នៅមានពិធីបុណ្យដែលមានលក្ខណៈពិសេសដោយឡែកផ្សេងៗទៀត។ ក្នុងនោះ មានបុណ្យធាក់គង បុណ្យជ្រោយរំចេក (បុណ្យសមុទ្រ) ត្រូវបានទទួលស្គាល់ជាបេតិកភណ្ឌវប្បធម៌អរូបីថ្នាក់ជាតិ។

បុណ្យជ្រោយរំចេករបស់ជនរួមជាតិខ្មែរនៅសង្កាត់វិញចូវ។ រូប៖ លីធាន

បុណ្យជ្រោយរំចេក ត្រូវបានប្រារព្ធឡើងនៅភូមិកាឡាំងអាបៀង សង្កាត់វិញចូវ ក្រុងកឹងធើ។ តាមប្រសាសន៍ប្រជាជននៅទីនេះ បុណ្យនេះមានមកតាំងពី ៣០០ ឆ្នាំហើយ។ បុណ្យជ្រោយរំចេក បានប្រារព្ធឡើងជារៀងរាល់ឆ្នាំនៅថ្ងៃ ១៤, ១៥ កើត និងថ្ងៃ ១ រោច ខែផល្គុន មានអត្ថន័យបួងសួងសុំឱ្យភូមិស្រុកសុខសាន្ត ភ្លៀងខ្យល់ធ្លាក់ស្មើ។ នេះជាឱកាសដើម្បីប្រជាជនរំលឹកនឹកគុណចំពោះបុព្វបុរសដែលមានស្នាដៃកាប់ឆ្ការ រានទឹករានដី បង្កបង្កើតតំបន់ដីនេះ ដឹងគុណមេឃ ដី និងអាទិទេពដែលបានប្រទានឱ្យពួកគាត់មានជីវភាពសម្បូរសប្បាយ និងដឹងគុណមហាសាគរដែលផ្តល់ផលត្រី បង្គាច្រើនដល់ពួកគាត់។

លោកសើុងថល អាចារ្យវត្តសិរីក្រសាំង ឱ្យដឹង៖ “មកចូលរួមពិធីបុណ្យនេះ មាមីងសម្តែងការដឹងគុណចំពោះមហាសាគរ បួងសួងសុំឱ្យភ្លៀងខ្យល់ធ្លាក់ស្មើ ដើម្បីការផលិតដាំដុះ និងការធ្វើនេសាទបានផលកាក់កប។ ពិធីបុណ្យនេះ មាននិមន្តព្រះសង្ឃចម្រើនព្រះបរិត្ត សម្តែងធម្មទេសនា សុំសេចក្តីសុខដល់មាមីងនៅក្នុងភូមិស្រុក។ បន្ទាប់ពីបញ្ចប់ពិធីកិច្ចសាសនា មានសកម្មភាពកីឡា វប្បធម៌ និងសិល្បៈទាក់ទាញមាមីងចូលរួមយ៉ាងច្រើនកុះករ”។

បុណ្យធាក់គងរបស់ជនរួមជាតិខ្មែរនៅឃុំអាងនិញ។ រូប៖ ត្រឿងផល

ធាក់គង គឺជាពិធីបុណ្យមួយពិសេសដោយឡែករបស់ជនរួមជាតិខ្មែរ នៅភូមិអាងត្រាច់ ឃុំអាងនិញ ក្រុងកឹងធើ ហើយបានកកើតឡើងតាមរឿងព្រេងមុននេះប្រមាណ ៣០០ ឆ្នាំ។ ពិធីបុណ្យនេះ ប្រារព្ធឡើងចាប់ពីថ្ងៃ ១៥ កើតខែចេត្រ ដល់ ថ្ងៃ ២ រោច ខែចេត្រជារៀងរាល់ឆ្នាំ មានពិធីកិច្ចផ្សេងៗដូចជា៖ ពិធីរាប់បាត្រ ពិធីលើកទង់ ពិធីសែន និងសកម្មភាពវប្បធម៌ សិល្បៈ និងពិធីជូនដំណើរ។ល។ ក្នុងនោះ ពិធីបូជាស្លាធម៌ដូង ញុាំងឱ្យពិធីបុណ្យធាក់គងប្រកបដោយលក្ខណៈពិសេស មានទិដ្ឋភាពកាន់តែអស្ចារ្យដែលកម្រឃើញនៅក្នុងពិធីបុណ្យផ្សេងៗ។

បុណ្យធាក់គង ប្រកបដោយលក្ខណៈបួងសួងសុំសេចក្តីសុខរបស់ជនរួមជាតិខ្មែរ។ បុណ្យនេះ មានប្រភពពីរឿងព្រេងអំពីដីទួលផុសឡើង ពេលដើរជាន់ពីលើឮសូរលាន់ដូចគង។ ឆ្លងកាត់ដំណាក់កាលប្រវត្តិសាស្ត្រ ព្រឹត្តិការណ៍នេះមានភាពបរិសុទ្ធ បន្តិចម្តងៗ ហើយក្លាយជាជំនឿប្រជាប្រិយដិតដាមដោយស្នាក់ស្នាមរបស់អ្នកស្រុកកសិកម្ម។ អ្នកមីងឡឹមធីតប នៅភូមិអាងត្រាច់ ឃុំអាងនិញ ឱ្យដឹង៖ “មាមីងមកចូលរួមបុណ្យធាក់គងដើម្បីសុំសេចក្តីសុខ ក្នុងនោះ មានមាមីងអញ្ជើញចូលរួមពីគ្រប់មជ្ឈដ្ឋាន”។

បុណ្យជ្រោយរំចេក និងបុណ្យធាក់គង មានលក្ខណៈពិសេសដោយឡែករបស់ជនរួមជាតិខ្មែរ នៅក្រុងកឹងធើ។ ទោះបីឆ្លងកាត់ដំណាក់កាលប្រែប្រួលនៃប្រវត្តិសាស្រ្ត ប៉ុន្តែពិធីបុណ្យនេះនៅតែល្បីសុសសាយ អភិវឌ្ឍន៍និងក្លាយជាពិធីបុណ្យមួយក្នុងចំណោមពិធីបុណ្យផ្សេងៗដែលមានលក្ខណៈដ៏ពិសេស ទាក់ទាញភ្ញៀវទេសចរយ៉ាងច្រើនកុះករពីគ្រប់មជ្ឈដ្ឋាន៕

ត្រឿងផល-វិមាន

ចែករំលែកអត្ថបទ

ពាក្យគន្លឹះ