សុខភាព - អប់រំ សុខភាព

08/04/2020 - 14:37

ថែទាំសុខភាពជូនជនរួមជាតិ គឺជាក្តីរីករាយ

វេជ្ជបណ្ឌិត ចៅសើុងខាញ់។

បញ្ចប់បរិញ្ញាបត្រនៅសាកលវិទ្យាល័យឱសថសាស្រ្តក្រុងហូជីមិញ កាលពីឆ្នាំ២០០៣ មិនដូចមិត្តភ័ក្តិវ័យស្រករគ្នា ដែលស្វែងរកឱកាសរស់នៅទីក្រុងអ៊ូអរ រីឯវេជ្ជបណ្ឌិត ចៅសើុងខាញ់ ក៏សម្រេចចិត្តវិលត្រឡប់មកស្រុកទ្រីតូង ខេត្តអាងយ៉ាង។ ពីព្រោះ ដូចដែលគាត់ឱ្យដឹង៖ “តំបន់ខ្ញុំកើតធំដឹងក្តី មានជនរួមជាតិខ្មែរជាច្រើននៅក្រលំបាកណាស់។ ដូច្នេះ ការបម្រើ ថែទាំសុខភាពជូនជនរួមជាតិ គឺជាបំណងប្រាថ្នា ជាក្ដីរីករាយរបស់ខ្ញុំ”។

ឪពុកវេជ្ជបណ្ឌិតចៅសើុងខាញ់ គឺជាកសិករ ម្តាយជាអ្នកលក់ដូរកំប៉ិកកំប៉ុក។ បងប្អូនគាត់ទាំងអស់គ្មានអ្នកណាម្នាក់មានអាជីពខាងគ្រូពេទ្យទេ។ បងចៅសើុងខាញ់ ឱ្យដឹង៖ កាលពីកុមារភាព គាត់ឃើញដោយផ្ទាល់ភ្នែក សាច់ញាតិ មាមីងនៅជុំវិញ ពិសេសគឺជនរួមជាតិខ្មែរឈឺថ្កាត់ម្តងៗ មិនសូវខិតជិតនឹងសេវាកម្មសុខាភិបាល។ មិនតែប៉ុណ្ណោះ កាលនោះ ផ្លូវពិបាកធ្វើដំណើរទៅមក បណ្តាលឱ្យការព្យាបាលជំងឺមានពេលខ្លះមិនទាន់ពេល។ ខ្ញុំមានបំណងប្រាថ្នានឹងក្លាយជាវេជ្ជបណ្ឌិត សម្រាប់បម្រើគ្រួសារ និងជួយថែទាំសុខភាពដល់ជនរួមជាតិខ្មែរ។

ពេលប្រឡងបញ្ចប់មធ្យមសិក្សាចំណេះទូទៅ អាស្រ័យបក្ស និងរដ្ឋ មានគោលនយោបាយឧបត្ថម្ភ បងបានជម្រើសចូលរៀនមហាវិទ្យាល័យបម្រុងជនជាតិនៃមហាវិទ្យាល័យឱសថសាស្រ្តក្រុងហូជីមិញ។ ក្រោយពីបានសិក្សាមហាវិទ្យាល័យបម្រុងជនជាតិ បងក៏ប្តេជ្ញាចិត្តរៀនខាងផ្នែក វេជ្ជបណ្ឌិតតែម្តង។ វេជ្ជបណ្ឌិត ចៅសើុងខាញ់ ឱ្យដឹង៖ “ឆ្នាំ២០០៣ ពេលប្រឡងបញ្ចប់បរិញ្ញាបត្រ ទោះបីមានឱកាសនៅក្រុងហូជីមិញ ដើម្បី សាងអាជីពក៏ដោយ ប៉ុន្តែខ្ញុំប្តេជ្ញាចិត្តវិលត្រឡប់មកភូមិស្រុកវិញដើម្បីបំពេញក្តីប្រាថ្នារបស់ខ្ញុំកាលពីកុមារភាព”។

វេជ្ជបណ្ឌិតចៅសើុងខាញ់ តែងយកចិត្តទុកដាក់ដល់ការងារថែទាំសុខភាពអ្នកជំងឺនៅតាមផ្នែកឯកទេសនីមួយៗ។

បងត្រូវបានជម្រើសចូលផ្នែកឯកទេសសរីរាង្គ នៃមន្ទីរពេទ្យពហុព្យាបាលស្រុកទ្រីតូង នៅឆ្នាំ២០០៣។ ក្រោយពីច្រើនឆ្នាំបម្រើការងារមានមុខតំណែងផ្សេងៗ ឆ្នាំ២០១៥ បងត្រូវបានតែងតាំងធ្វើជានាយករងនៃមន្ទីរពេទ្យ។ លុះឆ្នាំ២០១៧ ក្រោយពីដំណាក់កាលរៀបចំរួមបញ្ចូល បងក៏បានតែងតាំងធ្វើជានាយករងមជ្ឈមណ្ឌលសុខាភិបាលស្រុកទ្រីតូង។ វេជ្ជបណ្ឌិត ចៅសើុងខាញ់ ឱ្យដឹង៖ “ក្នុងដំណាក់កាលបម្រើការងារ ខ្លួនខ្ញុំផ្ទាល់តែងម្ចាស់ការសម្រេចរាល់ភារកិច្ចដែលប្រគល់ជូន។ ពោលគឺខ្ញុំតែងកែប្រែទម្លាប់ធ្វើការ ពិសេសគឺត្រូវរៀនសូត្របង្កើនមុខជំនាញជាប្រចាំ ដើម្បីបម្រើការពិនិត្យព្យាបាលជំងឺជូនប្រជាជនកាន់តែល្អប្រសើរជាងទៀត”។

ទ្រីតូងគឺជាស្រុកព្រំដែន មានជនជាតិភាគតិចជាង៣៥%; ជនរួមជាតិខ្មែរស្រូបអត្រាប្រមាណ៣៤%។ ជីវភាពជនរួមជាតិខ្មែរភាគច្រើននៅមានការលំបាក។ អាស្រ័យហេតុនោះ ទោះបីរវល់នឹងការងារមុខជំនាញ និងការងារដឹកនាំយ៉ាងណាក៏ដោយ ប៉ុន្តែវេជ្ជបណ្ឌិត ចៅសើុងខាញ់ នៅតែឆ្លៀតពេលដើម្បីអ្នកជំងឺក្រីក្រជានិច្ច។ វេជ្ជបណ្ឌិតចូវចន្ថា អនុប្រធានផ្នែកសង្គ្រោះបន្ទាន់នៃមជ្ឈមណ្ឌលសុខាភិបាលស្រុកទ្រីតូង ឱ្យដឹង៖ វេជ្ជបណ្ឌិតខាញ់ មានមុខវិជ្ជាឯកទេសពូកែ មានភាពស្វាហាប់ក្នុងការងារនិងអស់ពីចិត្តណែនាំ មិត្តរួមអាជីព ពិសេសគឺណែនាំវេជ្ជបណ្ឌិតក្មេងៗ។ ក្នុងនាមជាថ្នាក់ដឹកនាំ គាត់តែងស្តាប់បំណងប្រាថ្នាថ្នាក់ក្រោមឱវាទ; ផ្តោតទៅលើការលើកកម្ពស់បច្ចេកទេសមុខជំនាញ កសាងគម្រោងផែនការព្យាបាលថ្មីៗ មានប្រសិទ្ធភាព ។ល។ ជាពិសេស គាត់តែងយកចិត្តទុកដាក់ ចង្អុលការអនុវត្តល្អនូវការងារពិនិត្យ ព្យាបាលជំងឺជូនអ្នកក្រ ពិសេសគឺជនរួមជាតិខ្មែរ។ មិនត្រឹមតែប៉ុណ្ណោះ វេជ្ជបណ្ឌិតចៅសើុងខាញ់ តែងសកម្មចូលរួមជាមួយក្លឹបគ្រូពេទ្យ វេជ្ជបណ្ឌិត វ័យក្មេងរៀបចំពិនិត្យជំងឺ ផ្តល់ថ្នាំដោយឥតគិតថ្លៃជូនអ្នកក្រ និងជនជាតិភាគតិចនៅតំបន់ដាច់ស្រយាលរបស់ស្រុកទ្រីតូង។

វ័យ៤២ឆ្នាំ ប្រកបអាជីពបាន១៧ឆ្នាំ-លទ្ធផល ដ៏ធំបំផុតដែលវេជ្ជបណ្ឌិតចៅសើុងខាញ់សម្រេចបាន ដូចដែលគាត់ចែករំលែក៖ “ខ្ញុំបានក្លាយជាវេជ្ជបណ្ឌិតឯកទេស១ នៅឆ្នាំ២០១០។ ពោលគឺខ្ញុំបានអនុវត្តក្តីប្រាថ្នាកាលពីកុមារភាព អស់ពីចិត្តបម្រើការថែទាំសុខភាពជូនជនរួមជាតិខ្មែរ”។ ជាងនោះទៅទៀត គាត់ត្រូវបានប្រជាជនទុកចិត្ត មិត្តរួមអាជីពស្រឡាញ់រាប់អាន៕

ហាត្រេវ-លីសៀ

ចែករំលែកអត្ថបទ

ពាក្យគន្លឹះ