សុខភាព - អប់រំ សុខភាព

23/12/2024 - 15:04

ផ្ដល់អនុសាសន៍បង្កើនការចាក់វ៉ាក់សាំងដើម្បីម្ចាស់ការបង្ការទប់ស្កាត់ជំងឺឆ្លងរាលដាល

យោងតាមនាយកដ្ឋានសុខាភិបាលបង្ការ (ក្រសួងសុខាភិបាល) ក្នុងរយៈពេល ១១ ខែ ឆ្នាំ ២០២៤ ស្ថានភាពជំងឺឆ្លងរាលដាលលើពិភពលោកនៅតែមានការវិវត្តយ៉ាងស្មុគស្មាញ។ ក្នុងនោះ មានជំងឺមួយចំនួនដូចជា អុតស្វា គ្រុនឈាម គ្រុនចាញ់ និងជំងឺដែលមានវ៉ាក់សាំងបង្ការដូចជា កញ្ជ្រឹល ក្អកមាន់ជាដើម គឺមាននិន្នាការកើនឡើងនៅប្រទេសជាច្រើន។

បុគ្គលិកសុខាភិបាល ចាក់វ៉ាក់សាំងបង្ការជំងឺកញ្ជ្រឹលដល់កុមារនៅតាមសាលារៀន។
រូបថតជាឧទាហរណ៍

អង្គការសុខភាពពិភពលោក (WHO) បានចេញសេចក្ដីប្រកាសក្រើនរំលឹកអំពីការកើនឡើងនៃជំងឺកញ្ជ្រឹល និងហានិភ័យផ្ទុះរាលដាលជំងឺកញ្ជ្រឹលនៅតំបន់ជាច្រើន។ នៅវៀតណាម ស្ថានភាពជំងឺឆ្លងរាលដាលជាមូលដ្ឋានត្រូវបានគ្រប់គ្រង ករណីអ្នកកើតជំងឺនិងស្លាប់ដោយសារជំងឺឆ្លងផ្សេងៗដូចជា គ្រុនឈាមពងដៃ ជើង មាត់ជាដើម គឺមានការថយចុះបើប្រៀបនឹងរយៈពេលដូចគ្នាកាលពីឆ្នាំកន្លង។ ទោះបីដូច្នោះក្ដី ចំពោះជំងឺឆ្កែឆ្កួតនិងជំងឺដែលបង្ការដោយវ៉ាក់សាំង (កញ្ជ្រឹល ក្អកមាន់) តាមការកត់សម្គាល់គឺមានចំនួនកើនឡើងខ្ពស់។ ជាក់ស្ដែង ចាប់ពីដើមឆ្នាំ ២០២៤ ដល់ថ្ងៃទី២៨ ខែវិច្ឆកា ទូទាំងប្រទេសបានកត់ត្រា២០.៤៦៩ករណីសង្ស័យកើតជំងឺកញ្ជ្រឹល ក្នុងនោះ វិជ្ជមាន ៤.៩១៨ ករណី ស្លាប់ ៥ ករណីដែលពាក់ព័ន្ធនឹងជំងឺកញ្ជ្រឹលនៅក្រុងហូជីមិញ (៣ ករណី) ខេត្តបេនត្រែ (១ ករណី) និងខេត្តប៊ិញយឿង (១ ករណី)។ បើប្រៀបនឹងរយៈពេលដូចគ្នាកាលពីឆ្នាំ ២០២៣ ចំនួនករណី សង្ស័យកើតជំងឺកញ្ជ្រឹលខ្ពស់ជាង ៥៣ ដង ករណីជំងឺកញ្ជ្រឹលវិជ្ជមានគឺខ្ពស់ជាង ១១១ដង។

ទន្ទឹមនឹងជំងឺកញ្ជ្រឹល ជំងឺក្អកមាន់ក៏ត្រូវបានកត់សម្គាល់ ១.០៥៣ ករណី ស្លាប់១ករណី; បើប្រៀបនឹងរយៈពេលដូចគ្នាកាលពីឆ្នាំ ២០២៣ ករណីកើតជំងឺខ្ពស់ជាង ២៣ ដង ចំនួនស្លាប់ប្រហាក់ប្រហែលគ្នា។ ជំងឺខាន់ស្លាក់ មាន ១១ ករណី (ក្នុងនោះ ស្លាប់២ករណី) ជាក់ស្ដែងនៅខេត្ត ហាយ៉ាង ៤ ករណី ខេត្តថាញហ្វា៣ករណី ខេត្តបាក់យ៉ាង ២ ករណី ខេត្តង៉ែអាង ១ ករណី និងខេត្តកាវបាំង ១ ករណី។ ជំងឺអុតស្វា មាន ៧៤ ករណីដែលរាយប៉ាយនៅតាមភូមិភាគនានា ភាគច្រើនគឺនៅក្រុងហូជីមិញនិងបណ្ដាខេត្តនៅភូមិភាគខាងត្បូង។ ជំងឺឆ្កែឆ្កួតបណ្ដាលឱ្យមនុស្សស្លាប់ ៧៨ នាក់នៅតាមខេត្ត ក្រុងចំនួន ៣២។ ជំងឺគ្រុនផ្ដាសាយបក្សីដែលបង្កជំងឺខ្ពស់ (H៥N១, H៩N២)៖ តាមការកត់សម្គាល់ គឺមាន ២ ករណី កើតជំងឺគ្រុនផ្ដាសាយ A (H៥N១) នៅខេត្តខាញ់ហ្វានិងខេត្តឡុងអាង ក្នុងនោះ ស្លាប់ ១ ករណី; ចំណែកករណីគ្រុនផ្ដាសាយ A(H៩N២) គឺកើតនៅខេត្តតៀងយ៉ាង។

ចំពោះមុខស្ថានភាពជំងឺឆ្លងរាលដាល នាយកដ្ឋានសុខាភិបាលបង្ការបានសំណូមពរដល់ភូមិភាគទាំងឡាយ គប្បីបន្តវាយតម្លៃពីហានិភ័យ ដើម្បីស្នើវិធានការបង្ការ ប្រឆាំងជំងឺសមស្រប។ មិនទុកឱ្យជំងឺកើតឡើងនិងផ្ទុះរាលដាល; បង្កើនការរៀបចំហ្វឹកហាត់ បង្កើនសមត្ថភាពត្រួតពិនិត្យ ព្យាបាលនៅតាមមន្ទីរពេទ្យគ្រប់កម្រិត។ ទន្ទឹមនឹងនោះ ប្រញាប់ពិនិត្យឡើងវិញនូវមុខសញ្ញា និងរៀបចំចាក់វ៉ាក់សាំងបង្រ្គប់ ឬចាក់វ៉ាក់សាំងបន្ថែមដល់កុមារដែលមិនទាន់ចាក់វ៉ាក់សាំងបង្ការជំងឺកញ្ជ្រឹលឬចាក់វ៉ាក់សាំងមិនទាន់គ្រប់ដូស; ផ្សព្វផ្សាយ ចលនាប្រជាជនម្ចាស់ការអនុវត្តវិធានការបង្ការ ប្រឆាំងជំងឺឆ្លងរាលដាល។ ធ្វើការណែនាំដល់មូលដ្ឋានអប់រំ ពិសេសគឺនៅតាមសាលាមត្តេយ្យ ដើម្បីអនុវត្តសកម្មភាពបង្ការ ប្រឆាំងជំងឺឆ្លងរាលដាល។ បង្កើនការវិនិយោគ ជំនួយប្រភពធនធានដល់ប្រព័ន្ធសុខាភិបាលដើម្បីធានាអំពីមូលដ្ឋានសម្ភារៈ ថវិកានិងបរិក្ខារ។ល។ សម្រាប់បម្រើការចាក់វ៉ាក់សាំងបើកទូលាយលើភូមិសាស្រ្តតាមសេចក្ដីកំណត់៕

ដងលី - ថាច់ធី

ចែករំលែកអត្ថបទ

ពាក្យគន្លឹះ