ព្រឹត្តិការណ៍ - នយោបាយ ព្រឹត្តិការណ៍

27/06/2026 - 21:30

កឹងធើ បង្កើនការតភ្ជាប់ប្រើប្រាស់កសិផលតាមរយៈប្រព័ន្ធលក់រាយទំនើប

(អ.ឡ) - ព្រឹកថ្ងៃទី២៧ ខែមិថុនា មន្ទីរពាណិជ្ជកម្មទីក្រុងកឹងធើ បានរៀបចំសន្និសីទក្រោមប្រធានបទ "តថភាព និងដំណោះស្រាយក្នុងការតភ្ជាប់ការផ្គត់ផ្គង់ - តម្រូវការ និងការប្រើប្រាស់កសិផលនៅលើភូមិឋានទីក្រុង ឆ្នាំ២០២៦"។ សន្និសីទនេះ សំដៅតភ្ជាប់ការប្រើប្រាស់ផលិតផលកសិកម្ម និងផលិតផលពិសេសរបស់ភូមិភាគ តាមរយៈប្រព័ន្ធចែកចាយរបស់ក្រុមហ៊ុនភាគហ៊ុនពាណិជ្ជកម្មបាច់ហ្វាសាញ់។

លោកដូវញឺអាញ់ នាយកផ្នែកប្រមូលទិញបន្លែ ផ្លែឈើនិងកសិផលរបស់ក្រុមហ៊ុនភាគហ៊ុនពាណិជ្ជកម្មបាច់ហ្វាសាញ់ បានឱ្យដឹង បច្ចុប្បន្នប្រព័ន្ធលក់រាយរបស់ក្រុមហ៊ុនមានប្រមាណ ៣.៤០០ ទីតាំងនៅទូទាំងប្រទេស បម្រើអតិថិជនជាង ២ លាននាក់ក្នុងមួយថ្ងៃ ហើយមានគោលដៅពង្រីកដល់ប្រមាណ ១០.០០០ ទីតាំងនៅឆ្នាំ ២០៣០ ដោយឆ្ពោះដល់ប្រាក់ចំណូលប្រមាណ ១០ ពាន់លានដុល្លារអាមេរិក។ ជារៀងរាល់ខែ ក្រុមហ៊ុនបាច់ហ្វាសាញ់ លក់ចេញកសិផលរាប់ពាន់តោន ក្នុងនោះផ្លែឈើតែមួយមុខមានបរិមាណប្រមាណ ១០.០០០ តោន។

លោកដូវញឺអាញ់ នាយកផ្នែកប្រមូលទិញបន្លែ ផ្លែឈើនិងកសិផលរបស់ក្រុមហ៊ុនភាគហ៊ុនពាណិជ្ជកម្មបាច់ហ្វាសាញ់ បង្ហាញអំពីទំហំប្រតិបត្តិការនិងលក្ខខណ្ឌនៃកិច្ចសហប្រតិបត្តិការជាមួយប្រព័ន្ធលក់រាយរបស់បាច់ហ្វាសាញ់។

តាមការលើកឡើងរបស់លោក ដូវញឺអាញ់ ជាមួយនឹងសក្តានុភាពដ៏ធំរបស់ទីក្រុងកឹងធើ និងតំបន់វាលរាបទន្លេគឺវឡុង រួមនឹងការគាំទ្រពីមន្ទីរ ផ្នែកនានានៅភូមិភាគ ក្រុមហ៊ុនបាច់ហ្វាសាញ់ រំពឹងថា នឹងពង្រីកកិច្ចសហប្រតិបត្តិការជាមួយអាជីវកម្ម សហករណ៍និងកសិករ ដើម្បីកសាងខ្សែសង្វាក់តភ្ជាប់ការផលិតនិងការប្រើប្រាស់ប្រកបដោយចីរភាព និងរួមចំណែកលើកកម្ពស់តម្លៃកសិផលរបស់វៀតណាម។ អាជីវកម្មតែងប្រកាន់ខ្ជាប់នូវទស្សនវិជ្ជាសហប្រតិបត្តិការ "ភាគីទាំង ៣ ទទួលបានផលប្រយោជន៍រួម" (អតិថិជន - អ្នកផ្គត់ផ្គង់ - បាច់ហ្វាសាញ់)។ ទន្ទឹមនឹងនោះ ក៏រំពឹងដៃគូសហការឆ្លើយតបនូវលក្ខខណ្ឌសំខាន់ៗចំនួន ៤ គឺ៖ តម្លាភាពអំពីប្រភពផលិតផល ធានាសមត្ថភាពផ្គត់ផ្គង់ទៀងទាត់ ចូលរួមកម្មវិធី "ស្លាកបៃតងទទួលខុសត្រូវ" និងជាជំហានៗធ្វើឱ្យកាន់តែជំនាញក្នុងការគ្រប់គ្រង គណនេយ្យ និងព័ន្ធដារ។

លោកហាវ៉ូវស៊ើង នាយកមន្ទីរឧស្សាហពាណិជ្ជកម្មទីក្រុងកឹងធើ ថ្លែងការណ៍នៅក្នុងសន្និសីទ។

ថ្លែងក្នុងសន្និសីទ លោកហាវ៉ូវស៊ើង នាយកមន្ទីរឧស្សាហពាណិជ្ជកម្មទីក្រុងកឹងធើ បានឱ្យដឹង ទីក្រុងមានប្រភពផ្គត់ផ្គង់កសិផលយ៉ាងសម្បូរបែប ដោយទិន្នផលស្រូវ-អង្ករជាង ៤,៦៥ លានតោនក្នុងមួយឆ្នាំ ផ្លែឈើជាង ១,២៣ លានតោន ក្នុងនោះមានផ្លែឈើដែលមានតម្លៃសេដ្ឋកិច្ចខ្ពស់ ដូចជា ទុរេនជាង ១០៤.០០០ តោន ខ្នុរជាង ២៧៣.០០០ តោន និងចេកជាង ១៩១.០០០ តោន; ចំណែកបន្លែនិងដំណាំរយៈពេលខ្លីមានទិន្នផលជិត ២ លានតោនក្នុងមួយឆ្នាំ។ ព្រមជាមួយនោះ ទីក្រុងបច្ចុប្បន្នមានផលិតផល OCOP ៩០៣ មុខ សម្រេចគុណភាពលំដាប់ផ្កាយ ៣ ដល់ ផ្កាយ ៥ ដែលជាមូលដ្ឋានដ៏សំខាន់សម្រាប់អភិវឌ្ឍន៍ទីក្រុងឱ្យក្លាយជាមជ្ឈមណ្ឌលផ្គត់ផ្គង់កសិផល ដែលមានគុណភាពខ្ពស់របស់តំបន់វាលរាបទន្លេគឺវឡុង។

តំណាងអាជីវកម្មនិងសហករណ៍ ផ្លាស់ប្តូរអំពីតម្រូវការសហប្រតិបត្តិការជាមួយប្រព័ន្ធចែកចាយ។

នៅក្នុងសន្និសីទ តំណាងផ្នែកកសិកម្មនិងបរិស្ថាន គណៈកម្មាធិការប្រជាជនឃុំ សង្កាត់នានា អាជីវកម្ម សហករណ៍ បានផ្លាស់ប្តូរយោបល់អំពីតម្រូវការសហប្រតិបត្តិការ ព្រមទាំងឧទ្ទេសនាមផលិតផលសំខាន់ៗ ផលិតផល OCOP និងសមត្ថភាពផ្គត់ផ្គង់ផលិតផលចូលទៅក្នុងប្រព័ន្ធលក់រាយបាច់ហ្វាសាញ់។

ពិធីចុះហត្ថលេខាលើកិច្ចសហប្រតិបត្តិការនៅក្នុងព្រឹត្តិការណ៍។

ក្នុងឱកាសនេះ អាជីវកម្មនិងសហករណ៍នានានៅលើភូមិឋានទីក្រុងកឹងធើ រួមជាមួយក្រុមហ៊ុនភាគហ៊ុនពាណិជ្ជកម្មបាច់ហ្វាសាញ់ បានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការ បង្កមូលដ្ឋានគ្រឹះសម្រាប់ពង្រីកការតភ្ជាប់ការប្រើប្រាស់កសិផលរបស់ទីក្រុងកឹងធើ តាមរយៈប្រព័ន្ធលក់រាយរបស់អង្គភាពនៅទូទាំងប្រទេស៕

ណាមហឿង - ពេជ្រសឿន

ចែករំលែកអត្ថបទ

ពាក្យគន្លឹះ