កីឡា - ទេសចរណ៍ ទេសចរណ៍

24/09/2026 - 19:33

នារីទីក្រុងកឹងធើអភិវឌ្ឍសេដ្ឋកិច្ចផ្តើមពីទេសចរណ៍បៃតង

ពង្រីកស្មារតីម្ចាស់ការ ច្នៃប្រតិដ្ឋក្នុងការអភិវឌ្ឍសេដ្ឋកិច្ចគ្រួសារ នារីទីក្រុងកឹងធើ កំពុងសកម្មចូលរួមក្នុងទម្រង់ទេសចរណ៍អេកូឡូស៊ី ទេសចរណ៍សហគមន៍ ផ្សារភ្ជាប់ជាមួយការពារបរិស្ថាន ហើយសមស្របទៅនឹងការប្រែប្រួលអាកាសធាតុ ជាជំហានលើកកម្ពស់ជីវភាព និងអភិរក្សអត្តសញ្ញាណវប្បធម៌ភូមិស្រុក។

នារីឃុំកូវឡាវយុងនិងឃុំអាងថាញ់ ចូលរួមកម្មវិធីអភិវឌ្ឍទេសចរណ៍អេកូឡូស៊ី ទេសចរណ៍សហគមន៍។

រយៈពេលកន្លង សមាគមសហព័ន្ធនារីឃុំកូវឡាវយុង និងសមាគមសហព័ន្ធនារីឃុំអាងថាញ់ ទីក្រុងកឹងធើ បានរួមគ្នាចូលរួមកម្មវិធីផ្សព្វផ្សាយ “បង្កើនល្បឿនរួមជាមួយអាជីវកម្ម សហករណ៍ និងមូលដ្ឋានអាជីវកម្មទេសចរណ៍ដែលនារីធ្វើម្ចាស់ ដើម្បីគាំទ្រអភិវឌ្ឍដោយចីរភាពទេសចរណ៍អេកូឡូស៊ី ទេសចរណ៍សហគមន៍”។ កម្មវិធីស្ថិតក្នុងក្របខណ្ឌនៃគម្រោង BOLDA ស្តីពីបង្កើនសមត្ថភាពធន់នឹងការប្រែប្រួលអាកាសធាតុនៅសុកត្រាំង ដំណាក់កាល ២០២៣ - ២០២៧ អាស្រ័យដោយអង្គការសម្ព័ន្ធន័រវែសប្រចាំវៀតណាមធ្វើហិរញ្ញប្បទាន។ នេះគឺជាឱកាសជាក់ស្តែងមួយជួយដល់មូលដ្ឋានផលិត គ្រួសារអាជីវកម្មដែលនារីធ្វើម្ចាស់ កៀកជិតនឹងវិធីសាស្ត្រគ្រប់គ្រងទំនើប ជាជំហានផ្លាស់ប្តូរពីវិធីសាស្ត្រផលិតកសិកម្មសុទ្ធសាធ ទៅជាអាជីវកម្មសេវាកម្មទេសចរណ៍ជំនាញ ឆ្លើយតបទៅនឹងបទដ្ឋានតឹងរ៉ឹងពីការអភិវឌ្ឍដោយចីរភាព។

កម្មវិធីបានកត់សម្គាល់គ្រួសារអាជីវកម្មចំនួន ១៦ ដែលចូលរួមបង្ហាញគំនិត រួមមាន ៩ គ្រួសារ ចំណុះឃុំកូវឡាយុង និង ៧ គ្រួសារមកពីឃុំអាងថាញ់។ ក្រោមការណែនាំ ពិគ្រោះផ្ទាល់ពីអ្នកជំនាញ សមាជិកានារីបានបង្ហើយគម្រោងបច្ចេកទេសធានាតម្រូវការខាងជំនាញ ផ្ញើទៅអ្នកធ្វើហិរញ្ញប្បទាន និងគណៈគ្រប់គ្រងគម្រោង។ ចំណុចលេចធ្លោនៃទម្រង់ទាំងនេះ គឺភាពប៉ិនប្រសប់ក្នុងការដាស់ភ្ញោកសក្តានុភាពក្នុងស្រុក គួបផ្សំនឹងការរួមបញ្ចូលទេសភាពព្រៃកោងកាងការពារច្រាំងដីដុះឆ្នេរសមុទ្រ ជាមួយភូមិរបរចងច្រាសប្រពៃណី និងម្ហូបអាហារប្រជាប្រិយណាមបូ ជាជំហានបង្កើតបាននូវផលិតផលទេសចរណ៍ប្លែកៗ ដិតដាមដោយស្លាកស្នាមនៃតំបន់ចម្ការព្រែកទន្លេ។

ពិសេស ការអភិវឌ្ឍទេសចរណ៍អេកូឡូស៊ីនៅភូមិភាគ មិនត្រឹមតែបញ្ឈប់លើការទាញយកផលទេសភាពធម្មជាតិប៉ុណ្ណោះទេ ថែមទាំងផ្សារភ្ជាប់យ៉ាងជិតស្និទ្ធជាមួយភារកិច្ចអភិរក្ស ពង្រីកតម្លៃវប្បធម៌ប្រពៃណីរបស់ជនរួមជាតិខ្មែរទៀតផង។ អ្នកស្រី ឡឹមថាញហ្វា ប្រធានក្លឹបរបាំខ្មែរ សមាជិកាសមាគមនារីភូមិវ៉ថាញ់វ៉ាំង ចែករំលែកដោយរីករាយ៖ “តាមរយៈកម្មវិធី យើងខ្ញុំយល់ឃើញថា ការអភិវឌ្ឍទេសចរណ៍សហគមន៍ផ្សារភ្ជាប់ជាមួយអភិរក្សវប្បធម៌ជនជាតិ គឺជាទិសដៅសមស្រប។ ក្លឹបរបាំខ្មែរនឹងសកម្មចូលរួមបម្រើភ្ញៀវទេសចរ តាមរយៈនោះរួមចំណែកអភិរក្ស ពង្រីកអត្តសញ្ញាណវប្បធម៌ប្រពៃណី ព្រមទាំងបង្កប្រាក់ចំណូលបន្ថែមសម្រាប់សមាជិកា”។

បណ្តាទម្រង់ទេសចរណ៍ដែលនារីធ្វើម្ចាស់ រួមចំណែកបង្កើតមុខរបរចិញ្ចឹមជីវិតបង្កើនប្រាក់ចំណូលហើយសមស្របនឹងការប្រែប្រួលអាកាសធាតុ។

ទន្ទឹមនឹងការកំណត់ជារូបរាងផលិតផល កម្មវិធីក៏ផ្តោតលើការបំប៉នគ្រប់ជ្រុងជ្រោយដល់បងប្អូននារីនូវចំណេះដឹងមូលដ្ឋានអំពីគ្រប់គ្រងអាជីវកម្ម បំណិនរៀបចំផែនការហិរញ្ញវត្ថុ គ្រប់គ្រងចរន្តសាច់ប្រាក់ អនុវត្តក្រមបទដ្ឋានទេសចរណ៍បៃតង។ ផ្តើមពីនោះ ជួយនារីជនបទមានភាពជឿជាក់ដោះស្រាយឧបសគ្គអំពីសមត្ថភាពគ្រប់គ្រង ជាជំហាននាំយកមូលដ្ឋានអាជីវកម្មចូលទៅក្នុងសកម្មភាពរៀបរយ និងមានសមត្ថភាពទប់ទល់បានល្អចំពោះការប្រែប្រួលនៃទីផ្សារ ក៏ដូចជាគ្រោះធម្មជាតិ រាំងស្ងួតជ្រាបប្រៃ។

តាមប្រសាសន៍អ្នកស្រី ង្វៀងធីទើយ ប្រធានសមាគមសហព័ន្ធនារីឃុំកូវឡាវយុង រយៈពេលកន្លង សមាគមសហព័ន្ធនារីឃុំតែងយកចិត្តទុកដាក់ រួមដំណើរជាមួយសមាជិកាក្នុងការអភិវឌ្ឍសេដ្ឋកិច្ច។ តាមរយៈកម្មវិធី គម្រោងផ្សេងៗ សមាគមបន្តបង្កលក្ខណៈដើម្បីនារីទទួលបានចំណេះដឹង លើកកម្ពស់សមត្ថភាពគ្រប់គ្រង ក្លាហានចូលរួមក្នុងទម្រង់ទេសចរណ៍អេកូឡូស៊ី ទេសចរណ៍ សហគមន៍សមស្របទៅនឹងលក្ខណៈជាក់ស្តែងរបស់ភូមិភាគ។ សមាគមនឹងបន្តជំរុញការងារឃោសនា ចលនាសមាជិកឱ្យសកម្មចូលរួមក្នុងទម្រង់ផ្តើមអាជីពបៃតង; ព្រមទាំងបង្កើនការតភ្ជាប់ជាមួយអង្គការ អាជីវកម្មនានា ដើម្បីកៀរគរប្រភពធនធានគាំទ្រផ្នែកបច្ចេកទេស ទុន និងផ្សព្វផ្សាយផលិតផល តាមរយៈនោះ រួមចំណែកលើកកម្ពស់ប្រាក់ចំណូល លើកស្ទួយជីវភាពដល់សមាជិកានារី ដែលរួមចំណែកយ៉ាងសកម្មដល់ការអភិវឌ្ឍរួមរបស់ភូមិភាគ។

ផ្តើមពីសក្តានុភាពដែលមានស្រាប់អំពីធម្មជាតិ វប្បធម៌ និងជីវភាពសហគមន៍ នារីទីក្រុងកឹងធើ កំពុងជាជំហានបង្កើតបាននូវផលិតផលទេសចរណ៍ដែលមានសញ្ញាសម្គាល់ដោយឡែក។ ភាពម្ចាស់ការ ច្នៃប្រតិដ្ឋរបស់សមាជិកា ព្រមទាំងការរួមដំណើររបស់សមាគមគ្រប់ថ្នាក់ និងកម្មវិធីគាំទ្រ បង្កជាកម្លាំងចលករបន្ថែម ដើម្បីទម្រង់ទេសចរណ៍បៃតងរីកចម្រើន លើកកម្ពស់ប្រាក់ចំណូលផង រួមចំណែកការពារបរិស្ថាន សមស្របទៅនឹងការប្រែប្រួលអាកាសធាតុ និងកសាងភូមិស្រុកឱ្យកាន់តែរីកចម្រើនដោយចីរភាពផង៕

ហុងទើ - លីសៀ

ចែករំលែកអត្ថបទ

ពាក្យគន្លឹះ