កំសាន្ត រឿងពីនេះពីនោះ

11/09/2026 - 05:54

តើទទួលទានអាហារពេលព្រឹកបែបណា ដើម្បីជួយរក្សាថាមពលបានពេញមួយថ្ងៃ

អ្នកជំនាញផ្នែកអាហារូបត្ថម្ភបានលើកឡើងថា ការរក្សាថាមពលឱ្យបានយូរអង្វែង គឺកើតចេញពីការទទួលទានអាហារពេលព្រឹកដែលមានតុល្យភាព ការផឹកទឹកឱ្យបានគ្រប់គ្រាន់និងរក្សាទម្លាប់ទទួលទានអាហារសមស្រប ជាជាងពឹងលើជាតិកាហ្វេអ៊ីន។ ខាងក្រោមនេះ គឺជាចំណុចសំខាន់ៗមួយចំនួនក្នុងអាហារពេលព្រឹក ដែលអ្នកជំនាញផ្នែកអាហារូបត្ថម្ភបានណែនាំ ដើម្បីជួយរក្សាកម្រិតថាមពលឱ្យលំនឹងពេញមួយថ្ងៃ។

 រូបថតជាឧទាហរណ៍។

ផឹកកាហ្វេឱ្យបានសមស្រប

យោងតាមអ្នកជំនាញផ្នែកអាហារូបត្ថម្ភជនជាតិអាមេរិក លោកស្រី Valerie Agyeman រាងកាយទទួលយកថាមពលពីសារធាតុចិញ្ចឹម មិនមែនពីជាតិកាហ្វេអ៊ីននោះទេ។

កាហ្វេអាចធ្វើឱ្យមានអារម្មណ៍ស្វាហាប់ភ្លាមៗ ប៉ុន្តែអាហារដូចជា សាវ័ន (ស្រូវសាឡីម្យ៉ាង) ស៊ុត ទឹកដោះគោជូរ ឬផ្លែឈើដែលទទួលទាននៅពេលព្រឹក ទើបជាប្រភពផ្តល់សារធាតុចិញ្ចឹម និងកាឡូរីដែលជួយរក្សាថាមពលបានយូរអង្វែង។

ដូច្នេះ កាហ្វេគួរតែទទួលទានជាមួយអាហារពេលព្រឹកដែលតុល្យភាព ហើយមិនគួរទទួលទានជំនួសអាហារពេលព្រឹកនោះទេ។

លើសពីនេះ កាហ្វេនិងតែដែលមិនដាក់ស្ករ ក៏អាចជាផ្នែកមួយនៃរបបអាហារដែលល្អផងដែរ។ ប្រសិនបើមានអារម្មណ៍ហត់បន្ទាប់ពីផឹកកាហ្វេ មូលហេតុភាគច្រើនអាចបណ្តាលមកពីការគេងមិនបានគ្រប់គ្រាន់ ការទទួលទានអាហារមិនបានគ្រប់គ្រាន់ ឬពឹងផ្អែកខ្លាំងពេកលើជាតិកាហ្វេអ៊ីន មិនមែនបណ្តាលមកពីការខ្វះជាតិទឹក ដូចដែលអ្នកជាច្រើនតែងគិតនោះទេ។

ត្រូវប្រាកដថា អាហារពេលព្រឹកសម្បូរទៅដោយប្រូតេអ៊ីន

អ្នកជំនាញបានណែនាំថា គួរចាប់ផ្តើមថ្ងៃថ្មីដោយអាហារពេលព្រឹកដែលមានតុល្យភាព សម្បូរទៅដោយប្រូតេអ៊ីន ដើម្បីជួយរក្សាថាមពលឱ្យមានលំនឹង។ អាហារដំបូងក្នុងថ្ងៃមានសារធាតុចិញ្ចឹមគ្រប់គ្រាន់ កាន់តែជួយឱ្យមានអារម្មណ៍ឆ្អែតបានយូរ និងបង្កជាមូលដ្ឋានសម្រាប់ការជ្រើសរើសការហូបចុក ល្អប្រសើរជាងមុនពេញមួយថ្ងៃ។

អាហារពេលព្រឹកមួយពេល គួររួមបញ្ចូលប្រូតេអ៊ីន កាបូអ៊ីដ្រាត និងជាតិខ្លាញ់ដែលមានប្រយោជន៍។ ជម្រើសដែលសមស្រប រួមមាន ស៊ុត ទឹកដោះគោជូរក្រិក ទទួលទានជាមួយផ្លែឈើ នំប៉័ងធ្វើពីគ្រាប់ធញ្ញជាតិពេញលេញ ឬសាវ័ន (ស្រូវសាឡីម្យ៉ាង) ផ្សំជាមួយគ្រាប់ធញ្ញជាតិផ្សេងៗ ឬប៊័រគ្រាប់ធញ្ញជាតិ។

សម្រាប់អ្នកដែលមិនសូវមានទម្លាប់ទទួលទានអាហារពេលព្រឹក អាចបែងចែកជាពីរពេលតូចៗ។ ឧទាហរណ៍ អាចទទួលទានចេកមួយផ្លែ និងកាហ្វេ ទឹកដោះគោមួយកែវដែលរៀបចំនៅផ្ទះ បន្ទាប់មកទទួលទានបន្ថែមនំប៉័ងលាបប៊ឺរសណ្ដែកដី ឬអាហារដែលសម្បូរទៅដោយប្រូតេអ៊ីន នៅពេលទៅដល់កន្លែងធ្វើការ។

អាហារសម្រន់ជួយការពារការធ្លាក់ចុះថាមពល

ភាគច្រើនមានអារម្មណ៍ថា រាងកាយមានសុខភាពល្អនិងស្វាហាប់បំផុតនៅពេលទទួលទានអាហារចន្លោះពី ៣ ទៅ ៤ ម៉ោងម្តង។ ការទុកពេលយូរពេកដោយមិនទទួលទានអាហារ អាចធ្វើឱ្យរាងកាយអស់កម្លាំង ឃ្លាននិងបែរមករកអាហារដែលមានជាតិស្ករខ្ពស់ ដែលអាចបង្កើនថាមពលបានតែក្នុងរយៈពេលខ្លីប៉ុណ្ណោះ។

អាហារដែលមានកាបូអ៊ីដ្រាតចម្រាញ់ ឬជាតិស្ករបន្ថែមខ្ពស់ ដូចជា នំបារាំង ឬដំឡូងបារាំងបំពង អាចធ្វើឱ្យមានអារម្មណ៍ស្វាហាប់ភ្លាមៗ ប៉ុន្តែបន្ទាប់មកនឹងធ្វើឱ្យរាងកាយឃ្លាន និងអស់កម្លាំងឡើងវិញយ៉ាងឆាប់រហ័ស។

ផ្ទុយទៅវិញ អ្នកជំនាញបានណែនាំឱ្យជ្រើសរើសអាហារសម្រន់ ដូចជា ទឹកដោះគោជូរក្រិកមិនដាក់ស្ករឈីសជាមួយផ្លែឈើ ឬនំប៉័ងធ្វើពីគ្រាប់ធញ្ញជាតិពេញលេញ។ ជាទូទៅ គួររួមបញ្ចូលប្រូតេអ៊ីន ជាតិសរសៃ និងជាតិខ្លាញ់ដែលមានប្រយោជន៍ ដើម្បីជួយរក្សាថាមពលបានយូរ។

រក្សារាងកាយឱ្យមានជាតិទឹកគ្រប់គ្រាន់ពេញមួយថ្ងៃ

ការខ្វះជាតិទឹកក្នុងកម្រិតស្រាល ក៏អាចបណ្តាលឱ្យមានអារម្មណ៍ហេវហត់ និងបន្ថយសមត្ថភាពផ្ចង់អារម្មណ៍។ ក្រៅពីការផឹកទឹកឱ្យបានគ្រប់គ្រាន់ អាហារដែលមានជាតិទឹកច្រើន ដូចជា ផ្លែឈើ បន្លែ ទឹកដោះគោនិងទឹកដោះគោជូរ ក៏រួមចំណែកជួយរក្សាជាតិទឹកក្នុងរាងកាយឱ្យបានគ្រប់គ្រាន់។

មិនគួរទទួលទានភេសជ្ជៈសម្បូរអេឡិចត្រូលីត ឬភេសជ្ជៈកីឡាដែលមានជាតិស្ករខ្ពស់ជាញឹកញាប់នោះទេ លើកលែងតែត្រូវធ្វើចលនារាងកាយមានកម្រិតខ្លាំង និងមានរយៈពេលលើសពី ៦០-៩០ នាទី ពិសេសនៅក្នុងលក្ខណៈអាកាសធាតុក្តៅនិងសំណើមខ្ពស់។

ផ្តោតលើអាហារពេលល្ងាចដែលមានតុល្យភាព

អាហារពេលល្ងាចដែលខ្វះប្រូតេអ៊ីន ជាតិសរសៃ ឬជាតិខ្លាញ់ដែលមានប្រយោជន៍ អាចធ្វើឱ្យរាងកាយឆាប់ឃ្លាននិងខ្វះថាមពល។ ដូច្នេះ គួរផ្តោតលើអាហារដែលមានបន្លែនិងផ្លែឈើច្រើន គ្រាប់ធញ្ញជាតិពេញលេញ គ្រាប់ធញ្ញជាតិផ្សេងៗ ព្រមទាំងប្រភពប្រូតេអ៊ីនពីសត្វ ឬពីរុក្ខជាតិ៕

ប្រភពៈ tuoitre.vn - ពេជ្រសឿន

ចែករំលែកអត្ថបទ

ពាក្យគន្លឹះ