សុខភាព - អប់រំ សុខភាព

19/09/2026 - 08:15

ពិនិត្យ ផ្តល់ថ្នាំដោយឥតគិតថ្លៃជូនព្រះសង្ឃ និងជនរួមជាតិខ្មែរនៅវត្តអូរក្តារ

គាំទ្រយុទ្ធនាការ ៩០ ថ្ងៃយប់ ពិនិត្យសុខភាពជូនប្រជាជន និងកម្មវិធីពិនិត្យភ្នែកដោយឥតគិតថ្លៃ នៅថ្ងៃទី ១៨ ខែកញ្ញា ឆ្នាំ ២០២៦ នៅវត្តអូរក្តារ ភូមិអូរក្តារ ឃុំហ៊ឹងមី ខេត្តវិញឡុង កងជួរគ្រូពេទ្យ វេជ្ជបណ្ឌិតមន្ទីរពេទ្យភ្នែកសាយហ្គង - ត្រាវិញ សហការជាមួយភូមិភាគ ចាត់តាំងពិនិត្យសុខភាព ពិនិត្យភ្នែក និងផ្តល់ថ្នាំដោយឥតគិតថ្លៃជូនព្រះសង្ឃ ព្រមទាំងមាមីងខ្មែរលើភូមិឋាន។

ជ្រុងមួយនៃការពិនិត្យសុខភាពជូនព្រះសង្ឃ និងមាមីងខ្មែរនៅវត្តអូរក្តារ។

ភូមិអូរក្តារ ឃុំហ៊ឹងមី ខេត្តវិញឡុង មាន ២១១ គ្រួសារ ដោយមានប្រជាជន ៨៩២ នាក់ ជាជនរួមជាតិខ្មែរ១០០%។ ក្នុងកម្មវិធី ប្រជាជនបានពិនិត្យសុខភាព ឆាប់រកឃើញជំងឺផ្សេងៗអំពីភ្នែកនិងបញ្ហាសុខភាពមួយចំនួន ដើម្បីមានទិសដៅព្យាបាលបានទាន់ពេល។ ទន្ទឹនឹងនោះ ព័ត៌មានពិនិត្យ ព្យាបាលជំងឺរបស់ប្រជាជន បានបញ្ចូលទៅក្នុងសៀវភៅពិនិត្យជំងឺអេឡិចត្រូនិក ជួយសម្រួលដល់ការតាមដានសុខភាព និងដំណាក់កាលក្នុងពេលពិនិត្យលើកក្រោយៗទៀត។

ព្រះចៅអធិការវត្តអូរក្តារទទួលថ្នាំបន្ទាប់ពីពិនិត្យរួច។

ចំពោះអ្នកវ័យចាស់ កម្មវិធីពិនិត្យភ្នែកដោយឥតគិតថ្លៃនៅនឹងភូមិភាគបាននាំមកក្តីរីករាយ ជួយមាមីងមានឱកាសបន្ថែមរកឃើញ និងព្យាបាលជំងឺផ្សេងៗអំពីភ្នែក។ លោកយាយ ថាច់ធីខូយ កើតឆ្នាំ ១៩៥០ នៅភូមិអូរក្តារ រៀបរាប់៖ “ភ្នែកខ្ញុំស្រវាំង មើលមិនច្បាស់ ប៉ុន្តែមិនដឹងថាជាជំងឺអ្វី ហើយគ្មានលទ្ធភាពទៅពិនិត្យទេ។ ឥឡូវបានរដ្ឋអំណាចឃុំហ៊ឹងមី សហការជាមួយមន្ទីរពេទ្យភ្នែកសាយហ្គង - ត្រាវិញ ចាត់តាំងពិនិត្យភ្នែក ពិនិត្យជំងឺ ទើបខ្ញុំបានមកពិនិត្យ”។ រីឯអ្នកមីង ថាច់ធីហ៊ើយ កើតឆ្នាំ ១៩៦១ ឱ្យដឹង៖ ភ្នែករបស់គាត់ឡើងបាយច្រើនឆ្នាំហើយ មើលមិនច្បាស់ ប៉ុន្តែកាលពីមុនគ្មានលទ្ធភាពទៅវះទេ។ នៅពេលភូមិភាគចលនាប្រជាជនមកពិនិត្យនៅវត្តអូរក្តារ និងផ្តល់ព័ត៌មានថាមានកម្មវិធីគាំទ្រវះភ្នែកដោយឥតគិតថ្លៃ គាត់សប្បាយចិត្តណាស់ហើយក៏មកពិនិត្យ។ តាមការលើកឡើងរបស់អ្នកមីងហ៊ើយ នេះគឺជាឱកាសដើម្បីឱ្យអ្នកវ័យចាស់ដែលមានជីវភាពលំបាក បានពិនិត្យភ្នែក និងមានទិសដៅព្យាបាលសមស្រប។

ព្រះសង្ឃនិងមាមីងខ្មែរពិនិត្យសុខភាព។

រួមដំណើរជាមួយកម្មវិធី លោក តាភឿកហៀង នាយកមន្ទីរពេទ្យភ្នែកសាយហ្គង - ត្រាវិញ ឱ្យដឹង៖ កងជួរគ្រូពេទ្យវេជ្ជបណ្ឌិតទាំងអស់របស់អង្គភាពបានកំណត់ច្បាស់ថា នេះគឺជា “យុទ្ធនាការចេញដំណើរដើម្បីសុខភាពប្រជាជន”។ ដើម្បីត្រៀមដល់កម្មវិធី បុគ្គលិកពេទ្យជាច្រើននាក់បានក្រោកតាំងពីម៉ោង ៤ ព្រឹក ដើម្បីរៀបចំអីវ៉ាន់ និងចេញដំណើរទៅជួបមាមីង។ ម្យ៉ាងទៀត លោក ហៀង បានផ្តល់អនុសាសន៍ ឱ្យប្រជាជនម្ចាស់ការថែទាំសុខភាពជាប្រចាំ ជាបន្តបន្ទាប់ មិនត្រឹមតែក្នុងអំឡុងពេលប្រព្រឹត្តឡើងយុទ្ធនាការ ៩០ ថ្ងៃយប់នោះឡើយ។ ពិសេស អ្នកវ័យចាស់គួរតែម្ចាស់ការពិនិត្យភ្នែកតាមពេលកំណត់ចាប់ពី ៣ ទៅ ៦ខែ/ម្តង សូម្បីតែមិនទាន់មានសញ្ញាមិនប្រក្រតីក៏ដោយ ដើម្បីឆាប់រកឃើញជំងឺផ្សេងៗអំពីភ្នែក និងមានទិសដៅព្យាបាលសមស្រប។ លោក ហៀង បានរំឮក៖ ប្រជាជនមិនគួរចាំរហូតដល់ជំងឺបង្ហាញរោគសញ្ញាច្បាស់ទើបទៅពិនិត្យនោះទេ ប៉ុន្តែត្រូវពិនិត្យសុខភាពតាមកាលកំណត់។

ព្រះសង្ឃនិងមាមីងខ្មែរពិនិត្យភ្នែកបន្ទាប់ពីពិនិត្យសុខភាព។

ក្នុងឱកាសនេះ មន្ទីរពេទ្យភ្នែកសាយហ្គង - ត្រាវិញ បានគាំទ្រវះភ្នែកដោយឥតគិតថ្លៃចំនួន ១០ នាក់ ជូនមាមីងខ្មែរក្នុងភូមិអូរក្តារ តម្លៃប្រហែល ៨ លានដុង/នាក់។ ប្រជាជនស្ថិតក្នុងក្របខណ្ឌទទួលបានឧបត្ថម្ភ នឹងបានរៀបចំរថយន្តជូនដំណើរទៅដល់ទីកន្លែង បង្កលក្ខណៈងាយស្រួលដើម្បីឱ្យករណីដែលត្រូវវះអាចនឹងទទួលបានការព្យាបាល។

លោក ថាច់ជោតិ៍ ប្រធានគណៈប្រជាជនភូមិអូរក្តារ ឱ្យដឹង៖ “មាមីងរីករាយណាស់នៅពេលបានពិនិត្យសុខភាពជម្រើសដោយឥតគិតថ្លៃ ផ្តល់ថ្នាំ និងបញ្ចូលសៀវភៅសុខភាពអេឡិចត្រូនិក។ ពេលក្រោយមកពិនិត្យសុខភាពនៅមន្ទីរពេទ្យនឹងមានភាពងាយស្រួលជាង ពីព្រោះព័ត៌មានអំពីជំងឺ និងដំណាក់កាលពិនិត្យ ព្យាបាល សុទ្ធតែបានរក្សាទុកក្នុងសៀវភៅអេឡិចត្រូនិក”។ កម្មវិធីរួមចំណែកជួយជនរួមជាតិខ្មែរលើភូមិឋាន កៀកជិតសេវាថែទាំសុខភាពនៅនឹងភូមិភាគ ព្រមទាំងលើកកម្ពស់ស្មារតីម្ចាស់ការពិនិត្យ សុខភាព និងព្យាបាលជំងឺ ពិសេសគឺជំងឺផ្សេងៗអំពីភ្នែកចំពោះអ្នកវ័យចាស់៕

ទីទុយ - លីសៀ

ចែករំលែកអត្ថបទ

ពាក្យគន្លឹះ