គោលនយោបាយ -ការរស់នៅ ច្បាប់

30/06/2026 - 21:10

ឃោសនាផ្សព្វផ្សាយច្បាប់ ដាស់ស្មារតីទទួលការខុសត្រូវរបស់យុវជន

សម្ព័ន្ធយុវជនទីក្រុងកឹងធើ ទើបសហការជាមួយនឹងគណៈបញ្ជាការប៉ូលិសសមុទ្រតំបន់៤ នគរបាលទីក្រុងកឹងធើ និងមហាវិទ្យាល័យបច្ចេកទេស-បច្ចេកវិទ្យាកឹងធើ ចាត់តាំងឃោសនាផ្សព្វផ្សាយអំពីសមុទ្រ កោះ កម្លាំងប៉ូលិសសមុទ្រនិងការងារបង្ការ ទប់ស្កាត់គ្រឿងញៀនជ្រៀតចូលក្នុងស្រទាប់យុវវ័យ។ វគ្គផ្សព្វផ្សាយបន្តដាស់ស្មារតីទទួលការខុសត្រូវរបស់ប្រជាពលរដ្ឋ និងស្មារតីការពារមាតុភូមិក្នុងសម្ព័ន្ធយុវជន និងយុវជន។

និស្សិតស្វែងយល់ពីផលប៉ះពាល់ដ៏គ្រោះថ្នាក់នៃគ្រឿងញៀនតាមរយៈឯកសារផ្សព្វផ្សាយ។

ចំពោះយុវជនជាច្រើនរស់នៅតំបន់វាលរាបទន្លេគឺវឡុងនិយាយរួម និងទីក្រុងកឹងធើនិយាយដោយឡែក រូបភាពសមុទ្រនិងកោះហាក់បីដូចជាឆ្ងាយបន្តិចបើគិតតាមភូមិសាស្ត្រ ប៉ុន្តែតាមរយៈខ្សែភាពយន្តឯកសារ និងផែនទីដែលពោរពេញដោយដង្ហើមនៃមហាសមុទ្រ រួមនឹងការបកស្រាយរបស់លោកវរសេនីយ៍ឯកបម្រុង ឡេវ៉ាំងខាញ់ ប្រធានការិយាល័យបង្ការ បង្ក្រាបបទល្មើស ចំណុះគណៈបញ្ជាការប៉ូលិសសមុទ្រតំបន់៤ រូបភាពតំបន់សមុទ្រដ៏ធំល្វឹងល្វើយដែលមានផ្ទៃជាង ១ លានគីឡូម៉ែត្រការ៉េ រួមជាមួយកោះធំតូចជាង ៣.០០០ កោះ និងប្រជុំកោះទាំងពីរគឺ ហ្វាងសា និងទ្រឿងសារបស់ប្រទេសយើង បានលេចឡើងយ៉ាងរស់រវើកនិងមានភាពជិតស្និទ្ធបំផុត។

យុវវ័យទាំងឡាយសម្ដែងនូវទឹកចិត្តមោទនភាពនៅពេលយល់ច្បាស់ពីទីតាំងយុទ្ធសាស្ត្ររបស់សមុទ្រខាងកើត ដែលជាខ្សែផ្លូវនាវាចរណ៍អន្តរជាតិមានភាពអ៊ូអរលំដាប់ទីពីរនៅលើពិភពលោក ជាកន្លែងមានប្រភពធនធានជីវចម្រុះយ៉ាងសម្បូរបែបដែលមានជាង ១១.០០០ ប្រភេទ និងមានសក្តានុពលដ៏ធំធេងអំពីថាមពលកកើតឡើងវិញ ដូចជាវាយោអគ្គិសនី។ ជាពិសេស ការយល់ដឹងច្បាស់អំពីមូលដ្ឋានគតិយុត្តិ ចាប់ពីច្បាប់សមុទ្រវៀតណាមឆ្នាំ២០១២ រហូតដល់ដំណើរការចរចាកំណត់ព្រំដែនសមុទ្រត្រួតគ្នារវាងវៀតណាមនឹងបណ្តាប្រទេសជិតខាង បានជួយឱ្យយុវជនលើកកម្ពស់ការយល់ដឹងអំពីច្បាប់អន្តរជាតិ ព្រមទាំងជ្រួតជ្រាបថា ការការពារសមុទ្រនិងកោះ គឺការការពារសរសៃឈាមសេដ្ឋកិច្ចរបស់ប្រទេសជាតិ។ ទន្ទឹមនឹងនោះ រូបភាពកម្លាំងប៉ូលិសសមុទ្រវៀតណាមដែលតែងតែប្តូរផ្តាច់ល្បាត ត្រួតពិនិត្យ ប្រយុទ្ធប្រឆាំងនឹងរាល់ទង្វើល្មើសច្បាប់ និងការពារសុវត្ថិភាពជូនប្រជានេសាទនៅលើសមុទ្រ បានក្លាយជានិមិត្តរូបជំរុញទឹកចិត្ត ព្រមទាំងបំប្លែងស្មារតីស្នេហាជាតិទៅជាសកម្មភាពជាក់ស្តែង និងរស់នៅប្រកបដោយការទទួលខុសត្រូវខ្ពស់របស់ស្រទាប់យុវវ័យ។

ទន្ទឹមនឹងការឃោសនាផ្សព្វផ្សាយអំពីសមុទ្រនិងកោះ កម្លាំងសមត្ថកិច្ចក៏បានផ្តល់ព័ត៌មានរំលឹកដល់យុវជនអំពីគ្រោះថ្នាក់នៃគ្រឿងញៀន។ បច្ចុប្បន្ន មានគ្រឿងញៀនប្រភេទថ្មីៗបានកើតមានឡើងដោយល្បិចកលដ៏លម្អិត បង្កប់ខ្លួនក្នុងអាហារ ភេសជ្ជៈ និងបារីអេឡិចត្រូនិក កំពុងលុកលុយចូលក្នុងសាលារៀននិងស្រទាប់យុវវ័យ។ ខ្លឹមសារផ្សព្វផ្សាយអាស្រ័យលោកវរសេនីយ៍ឯកបម្រុង ង្វៀងថាញវ៉ូវ អនុប្រធានការិយាល័យ PC០៤ នគរបាលទីក្រុងកឹងធើ បានផ្តល់ចំណេះដឹងដល់សម្ព័ន្ធយុវជននិងនិស្សិតជាង ៣០០ នាក់អំពីជំនាញសម្គាល់ដឹងជាក់លាក់និងវិភាគយ៉ាងស៊ីជម្រៅអំពីផលប៉ះពាល់ដ៏គ្រោះថ្នាក់នៃគ្រឿងញៀនចំពោះរាងកាយ ចិត្តសាស្ត្រ និងអនាគតរបស់យុវជនយុវនារី។

ប្អូនង្វៀងហ៊ុងហ្វៀង និស្សិតវគ្គ២០២៤ ផ្នែកបច្ចេកវិទ្យាគីមីសាស្ត្រនៃមហាវិទ្យាល័យបច្ចេកទេស-បច្ចេកវិទ្យាកឹងធើ បានចែករំលែក៖ “តាមរយៈវគ្គឃោសនាផ្សព្វផ្សាយ ខ្ញុំយល់ដឹងកាន់តែច្បាស់អំពីសមុទ្រនិងកោះវៀតណាម ជាពិសេសដឹងពីភារកិច្ច និងការលះបង់ដោយស្ងៀមស្ងាត់របស់កម្លាំងប៉ូលិសសមុទ្រ។ ខ្ញុំក៏យល់ឃើញថា បធានបទស្តីពីការបង្ការនិងទប់ស្កាត់គ្រឿងញៀននេះ គឺមានប្រយោជន៍ជាក់ស្តែងណាស់ ជួយឱ្យខ្ញុំដឹងពីវិធីសាស្ត្របង្ការប្រកបដោយប្រសិទ្ធភាព និងម្ចាស់ការជៀសឆ្ងាយអំពើអបាយមុខទាំងឡាយដែលពាក់ព័ន្ធនឹងគ្រឿងញៀន ដើម្បីការពារខ្លួនឯង"។

ចំណែកយុវជន ត្រឹងឌឹកម៉ាញ់ និស្សិតវគ្គ២០២៤ ជំនាញបច្ចេកវិទ្យាជីវសាស្ត្រ ជាលេខាសម្ព័ន្ធយុវជនបច្ចេកវិទ្យាជីវសាស្ត្រ នៃមហាវិទ្យាល័យបច្ចេកទេស-បច្ចេកវិទ្យាកឹងធើ បានសម្តែងការយល់ឃើញ៖ “នេះជាវគ្គឃោសនាផ្សព្វផ្សាយដ៏មានអត្ថន័យ ជួយឱ្យយើងខ្ញុំយល់កាន់តែច្បាស់អំពីអធិបតេយ្យភាពសមុទ្រនិងកោះរបស់មាតុភូមិ ចាប់ពីពេលនោះមក ជួយលើកកម្ពស់ស្មារតីស្នេហាជាតិ និងមោទនភាពជាតិ។ ចំណេះដឹងដ៏មានសារប្រយោជន៍ទាំងនេះ ជួយឱ្យខ្ញុំមានមនសិការស៊ីជម្រៅអំពីតួនាទី និងការទទួលខុសត្រូវរបស់យុវជននាពេលបច្ចុប្បន្ន ក្នុងការចូលរួមការពារអធិបតេយ្យភាពសមុទ្រនិងកោះនៃស្រុកកំណើត ចាប់ពីសកម្មភាពតូចតាចបំផុត”។

លោកង្វៀងត្រឹងអាញ់យ្វី អនុលេខាសម្ព័ន្ធយុវជនទីក្រុងកឹងធើ មានប្រសាសន៍៖ “ការបំពាក់បំប៉នដល់យុវជននូវចំណេះដឹងច្បាប់ ការយល់ដឹងអំពីអធិបតេយ្យភាពជាតិ និងបំណិនការពារខ្លួនឯងចំពោះមុខគ្រោះថ្នាក់នៃអំពើអបាយមុខសង្គម មិនត្រឹមតែជាភារកិច្ចអប់រំប៉ុណ្ណោះទេ ថែមទាំងជាតម្រូវការជាក់ស្តែងដើម្បីកសាងស្រទាប់យុវជនឱ្យមានមនសិការរឹងមាំ ការទទួលខុសត្រូវនិងសមត្ថភាពបន្ស៊ាំទៅនឹងការផ្លាស់ប្តូររបស់សង្គម។ តាមរយៈវគ្គឃោសនាផ្សព្វផ្សាយនេះ សមាជិកសម្ព័ន្ធយុវជន យុវជន និងនិស្សិតនឹងមានចំណេះដឹងដ៏មានប្រយោជន៍បន្ថែម និងក្លាយជាអ្នកឃោសនាយ៉ាងសកម្មនៅក្នុងសាលារៀន នៅភូមិភាគ និងនៅលើលំហបណ្តាញអ៊ីនធឺណិត”៕

ភីអៀង - ថាច់ធី

ចែករំលែកអត្ថបទ

ពាក្យគន្លឹះ