សុខភាព - អប់រំ អប់រំ

07/05/2026 - 20:37

បង្កើនការរំលឹកមេរៀនឱ្យសិស្សថ្នាក់ទី ៩

សម័យប្រឡងជ្រើសរើសសិស្សចូលរៀនថ្នាក់ទី ១០ សាលាវិទ្យាល័យ ឆ្នាំសិក្សា ២០២៦-២០២៧ នៅទីក្រុងកឹងធើ នឹងប្រព្រឹត្តទៅនៅចុងខែមិថុនា ឆ្នាំ ២០២៦។ អំឡុងពេលនេះ បណ្តាសាលាអនុវិទ្យាល័យលើភូមិភាគទីក្រុង កំពុងឈានចូលដំណាក់កាល "មមាញឹក" បង្កើនការរំលឹកមេរៀន ពង្រឹងចំណេះដឹង និងហ្វឹកហាត់បំណិនធ្វើមេរៀន ដើម្បីជួយឱ្យសិស្សថ្នាក់ទី ៩ ទទួលបានលទ្ធផលល្អ។

ម៉ោងរៀនរបស់សិស្សថ្នាក់ទី ៩ សាលាអនុវិទ្យាល័យនៅថើយឡាយ។

នៅសាលាអនុវិទ្យាល័យ ដងធីឌីម (សង្កាត់និញកេវ) ការងាររំលឹកមេរៀនបានអនុវត្តតាំងពីមុន។ ឆ្នាំសិក្សានេះ សាលាមានសិស្សថ្នាក់ទី ៩ ចំនួន ៦៧៣ នាក់។ ចាប់តាំងពីដើមឆ្នាំ គណៈចាងហ្វាងសាលាបានរៀបចំផែនការរំលឹកមេរៀនមានរបៀបរៀបរយល្អ ច្បាមទម្រង់វិញ្ញាសាប្រឡង។ ទន្ទឹមនឹងការរំលឹកមេរៀន ការងារប្រឹក្សាណែនាំវិជ្ជាជីវៈ និងការបែងចែកចរន្តសិស្សឆាប់បានអនុវតផងដែរ។ សាលាក៏បានសហការណែនាំតម្រង់ទិសវិជ្ជាជីវៈជាមួយមូលដ្ឋានអប់រំបណ្តុះបណ្តាលវិជ្ជាជីវៈផ្សេងៗ ដើម្បីពង្រីកការជ្រើសរើសរបស់សិស្សក្រោយពីបញ្ចប់អនុវិទ្យាល័យ។

ទិសដៅរបស់ប្អូន ម៉ាយង្វៀងថាញវី សិស្សថ្នាក់ទី ៩A១ ប្រឡងចូលសាលាវិទ្យាល័យចូវវ៉ាំងលីម។ ហេតុនេះ ប្អូនបានត្រៀមខ្លួនតាំងពីដើមឆ្នាំ ដើម្បីចៀសវាងសម្ពាធខ្លាំងនៅដំណាក់កាលចុងឆ្នាំ។ ប្អូនហាត់ធ្វើវិញ្ញាសាប្រឡងតាមខេត្ត ទីក្រុងជាច្រើន ដើម្បីឱ្យស៊ាំនឹងទម្រង់ចម្រុះ និងហាត់បំណិនដោះស្រាយវិញ្ញាសានីមួយៗ។ ប្អូនថាញវី ឱ្យដឹង៖ "លោកគ្រូ អ្នកគ្រូខំយកចិត្តទុកដាក់បង្ហាត់បង្រៀនខ្លាំងណាស់ សូម្បីតែក្រៅម៉ោងរៀន បានជួយឱ្យប្អូនបង្កើនចំណេះដឹងនិងរៀនសូត្រមានប្រសិទ្ធភាពល្អជាងមុន"។

សាលាក៏បានបែងចែកសិស្សតាមសមត្ថភាព ដើម្បីរៀបចំការរំលឹកមេរៀនឱ្យសមស្រប៖ ក្រុមសិស្សរៀនល្អបង្គួរ និងពូកែ បានបំប៉នកម្រិតខ្ពស់ ចំណែកក្រុមសិស្សរៀនមធ្យម និងខ្សោយបានពង្រឹងចំណេះដឹងមូលដ្ឋាន។ អ្នកគ្រូ ទ្រឿងធ្វីថៀងហឿង ចាងហ្វាងរងសាលាអនុវិទ្យាល័យ ដងធីឌីម មានប្រសាសន៍ ៖ "ក្នុងការរំលឹកមេរៀន សាលាបានរៀបចំបង្រៀនបន្ថែមដោយឥតគិតថ្លៃសម្រាប់សិស្សខ្សោយ ចាត់តាំងគ្រូបង្រៀនឱ្យតាមជិតដិត ផ្លាស់ប្តូរវិធីសាស្ត្រ បង្កើនការហាត់ធ្វើវិញ្ញាសា ហាត់បំណិនធ្វើមេរៀននិងអនុវត្តបច្ចេកវិទ្យា។ ដំណោះស្រាយទាំងនេះជួយឱ្យសិស្សមានចំណេះដឹងរឹងមាំ ស្មារតីនឹងនរ និងជ្រើសរើសទិសដៅបានសមស្រប"។

ចំណែកសាលាអនុវិទ្យាល័យនៅថើយឡាយ ការងាររំលឹកមេរៀនត្រូវបានអនុវត្តព្រមៗគ្នាសម្រាប់សិស្សថ្នាក់ទី ៩ ចំនួន ៣៦៩ នាក់។ ចាប់តាំងពីដើមឆ្នាំសិក្សា សាលាបានបង្កើតផែនការរំលឹកមេរៀនឯកភាពគ្នាសម្រាប់វិញ្ញាសា គណិតវិទ្យា អក្សរសាស្ត្រ និងភាសាអង់គ្លេស។ គ្រូបង្រៀនមានផែនការបង្រៀនច្បាស់លាស់ និងតាមដានជិតដិតដំណើរការរៀនសូត្ររបស់សិស្ស។ ការរំលឹកមេរៀនបានរៀបចំឡើង ៣ ពេលក្នុងមួយសប្តាហ៍ តាមទម្រង់សិក្សា ២ ពេលក្នុងមួយថ្ងៃ (មួយពេលរៀន ២ ម៉ោង) និងមិនយកកម្រៃពីសិស្ស។

តាមប្រសាសន៍លោកគ្រូ ត្រឹងហ្វាងញឹក ចាងហ្វាងសាលា មានប្រសាសន៍ បន្ទាប់ពីសម្រេចរួចរាល់កម្មវិធីសិក្សាជាផ្លូវការ សាលាបង្កើនពេលវេលារំលឹកមេរៀន ព្រមទាំងណែនាំឱ្យក្រុមជំនាញជ្រើសរើសឯកសារសមស្រប ឯកភាពខ្លឹមសារបង្រៀន ផ្តោតលើការពង្រឹងចំណេះដឹង និងបំណិនធ្វើមេរៀនប្រឡង។ សាលាក៏បានសហការជិតដិតជាមួយអាណាព្យាបាលសិស្ស ដើម្បីបង្កលក្ខណៈងាយស្រួលដល់សិស្សក្នុងការរំលឹកមេរៀន។ ប្អូនត្រឹងយ៉ាតឹ្វង សិស្សថ្នាក់ទី ៩A៣ បានចែករំលែក៖ “លោកគ្រូ អ្នកគ្រូជួយឱ្យខ្ញុំយល់មេរៀនបានជ្រៅជ្រះ ច្បាស់លាស់ និងមានទំនុកចិត្តឈានចូលសម័យប្រឡងខាងមុខនេះ”។

បច្ចុប្បន្ន បណ្តាសាលាអនុវិទ្យាល័យនៅក្នុងភូមិភាគទីក្រុងកឹងធើ កំពុងជំរុញការរំលឹកមេរៀនសម្រាប់សិស្សថ្នាក់ទី ៩ ព្រមទាំងបង្កើនការសហការជាមួយអាណាព្យាបាលសិស្សដើម្បីគាំទ្រដល់ការរៀនសូត្ររបស់ប្អូនៗ។ ក្នុងឆ្នាំសិក្សានេះ ទីក្រុងមានសិស្សថ្នាក់ទី ៩ ជាង ៤៤.០០០ នាក់។ តាមការគ្រោងទុក ទូទាំងក្រុងនឹងជ្រើសរើសសិស្សថ្នាក់ទី ១០ ជាង ៣២.៣០០ នាក់ សម្រាប់ឆ្នាំសិក្សា ២០២៦-២០២៧ ចែកជា ២ ក្រុមសំខាន់។ ក្នុងនោះ ក្រុមប្រឡងជ្រើសរើសរួមមាន ៥៩ សាលា ជាមួយនឹងភាគកម្រិតជ្រើសរើសសិស្ស ២៣.១២០ នាក់ ចំណែកក្រុមពិនិត្យជ្រើសរើស (មិនបាច់ប្រឡង) រួមមាន ៣២ សាលា និងបណ្តាមជ្ឈមណ្ឌលអប់រំវិជ្ជាជីវៈ-អប់រំជាប្រចាំ ជាមួយនឹងភាគកម្រិតជ្រើសរើសសិស្ស ៩.១៨៤ នាក់។

លោកស្រី ត្រឹងធីហ្វៀង នាយិកាស្តីទីមន្ទីរអប់រំនិងបណ្តុះបណ្តាលទីក្រុងកឹងធើ មានប្រសាសន៍ សម័យប្រឡងជ្រើសរើសសិស្សចូលរៀនថ្នាក់ទី ១០ ឆ្នាំសិក្សា ២០២៦-២០២៧ ទីក្រុងនឹងអនុវត្តវិធីសាស្ត្រពីរក្នុងពេលតែមួយ គឺការប្រឡងជ្រើសរើស និងការពិនិត្យជ្រើសរើស ដើម្បីបង្កលក្ខណៈងាយស្រួលដល់សិស្សក្នុងការជ្រើសរើសឱ្យស្របតាមសមត្ថភាព។ ផ្នែកអប់រំបានណែនាំឱ្យបណ្តាសាលាអនុវិទ្យាល័យ ផ្តោតការរំលឹកមេរៀនឱ្យស្របតាមកម្មវិធីសិក្សាថ្នាក់ទី៩ ដើម្បីជួយសិស្សពង្រឹងចំណេះដឹងមុនការប្រឡង។ នៅពេលដាក់ពាក្យជម្រើសគោលបំណង សិស្សត្រូវពិចារណាឱ្យបានច្បាស់ពីសមត្ថភាព និងស្ថានភាពជាក់ស្តែង អាទិភាពជ្រើសរើសឱ្យបានសមស្រប។ ព្រមទាំងរក្សាស្មារតីឱ្យនឹងនរ និងមានទំនុកចិត្ត ដើម្បីសម្រេចបានលទ្ធផលល្អក្នុងសម័យប្រឡង៕

ដាំងង៉ុក- ត្រឹងរ៉ូន

ចែករំលែកអត្ថបទ

ពាក្យគន្លឹះ