គោលនយោបាយ -ការរស់នៅ គោលនយោបាយ

04/07/2022 - 15:43

ជួយអ្នកក្រមានផ្ទះសម្បែងស្រួលបួល

ចាប់ពីដើមឆ្នាំមកទល់ពេលនេះ គណៈកម្មាធិការរណសិរ្សមាតុភូមិវៀតណាមគ្រប់លំដាប់ថ្នាក់ នៅស្រុកថើយឡាយ ក្រុងកឹងធើ បានកៀរគររាល់ប្រភពកម្លាំងបានទឹកប្រាក់ ២,១៥ ពាន់លានដុង ឧបត្ថម្ភសាងសង់ផ្ទះមហាសាមគ្គីចំនួន ៤៣ ខ្នងជូនគ្រួសារក្រីក្រ; ក្នុងនោះ មានជនរួមជាតិខ្មែរ ៨ គ្រួសារ។

សមមិត្ត ង្វៀងវ៉ាន់ផុង សមាជិកគណៈកម្មាធិការបក្សក្រុង លេខាគណៈកម្មាធិការបក្សស្រុកថើយឡាយ ជូនសេចក្ដីសម្រេច ប្រគល់ជូនផ្ទះមហាសាមគ្គីដល់គ្រួសារក្រីក្រនៅឃុំឌិញម៉ូង។

លោកឡឹមសន នៅភូមិឌិញហ្វា A ឃុំឌិញម៉ូង ជាជនជាតិខ្មែរ។ លោកសន មានអាយុ ៦១ ឆ្នាំ ប្រពន្ធគាត់ស្លាប់ដោយសារជំងឺតម្កាត់ ចំណែកខ្លួនគាត់មានជំងឺវិបត្តិសរសៃឈាមខួរក្បាល រស់នៅជាមួយកូនប្រុសដែលរំសាយពីកងទ័ព។ គ្រួសារគ្មានស្រែចម្ការ ជីវភាពពឹងផ្អែកលើប្រាក់ធ្វើការឈ្នួលរបស់កូន។ ផ្ទះចាស់មានភាពទ្រុឌទ្រោម ប៉ុន្តែ គ្មានប្រាក់ជួសជុល។ កាលពីខែឧសភាកន្លង គណៈកម្មាធិការរណសិរ្សមាតុភូមិវៀតណាមស្រុកថើយឡាយ បានឧបត្ថម្ភ ៥០ លានដុង លោកឡឹមសន ខ្ចីសាច់ញាតិបន្ថែម ៤០ លានដុង ដើម្បីសាងសង់ផ្ទះមហាសាមគ្គី ៥៤ ម៉ែត្រការ៉េ មានភាពសមរម្យបង្គួរ។ លោកឡឹមសន ចែករំលែក៖ “ចាប់ពីថ្ងៃនេះទៅ ខ្ញុំលែងបារម្ភភ្លៀងស្រក់ ខ្យល់បក់ទៀតហើយ។ ខ្ញុំសូមអរគុណយ៉ាងជ្រាលជ្រៅចំពោះបក្ស រដ្ឋ រណសិរ្សគ្រប់លំដាប់ថ្នាក់ បានយកចិត្តទុកដាក់ ឧបត្ថម្ភគ្រួសារខ្ញុំ”។

លោកយាយដាវធីធូ គ្រួសារជនជាតិខ្មែរនៅភូមិឌិញខាញ B ឃុំឌិញម៉ូង។ យាយធូ ក៏ទើបតែបានគណៈកម្មាធិការរណសិរ្សមាតុភូមិវៀតណាមស្រុកថើយឡាយឧបត្ថម្ភ ៥០ លានដុង សង់ផ្ទះមហាសាមគ្គី។ អង្គុយក្នុងផ្ទះ ៤០ ម៉ែត្រការ៉េ ដែលនៅក្លិនថ្នាំពណ៌លាបថ្មីៗ យាយធូ រីករាយឱ្យដឹង៖ “ប្ដីខ្ញុំស្លាប់ទៅហើយ កូនៗសុទ្ធតែមានគ្រួសារនៅដោយឡែក។ ខ្ញុំមានអាយុ ៦៥ ឆ្នាំ គ្មានស្រែចម្ការ ហើយថែមទាំងមានជំងឺហឺត បានជាមិនអាចប្រកបការងារអ្វីបាន។ ផ្ទះចាស់សង់អំពីឈើនិងប្រក់ស្លឹកទ្រុឌទ្រោមណាស់ទៅហើយ តែគ្មានប្រាក់ជួសជុល។ បានរណសិរ្សគ្រប់លំដាប់ថ្នាក់ឧបត្ថម្ភ ៥០ លានដុង កូនខ្ញុំជួយបន្ថែម ៧ លានដុង ដើម្បីសង់ផ្ទះមហាសាមគ្គី”។ ស្ថានភាពគ្រួសារលោកយាយថាច់ធីសាមណេរ ជនជាតិខ្មែរនៅភូមិថើយធ្វឹង B ទីប្រជុំជនថើយឡាយ ក៏ជួបលំបាកយ៉ាងខ្លាំង។ យាយណេរ បានរ៉ាយរ៉ាប់៖ “ ខ្ញុំសប្បាយចិត្តណាស់ពេលបានរណសិរ្សនិងរដ្ឋអំណាចភូមិភាគឧបត្ថម្ភសាងសង់ផ្ទះសម្បែងសមរម្យ។ គ្រួសារខ្ញុំតែងដាស់តឿនគ្នាខិតខំរកស៊ី ឈានឡើងចាកផុតពីភាពក្រីក្រ ដើម្បីកុំឱ្យអ្នករាល់គ្នាអស់សង្ឃឹម”។

តាមប្រសាសន៍ លោកង្វៀងហ៊ឺវភុក សមាជិកអចិន្រ្តៃយ៍នៃគណៈកម្មាធិការបក្ស ប្រធានគណៈប្រជាចលនានៃគណៈកម្មាធិការបក្សស្រុក ប្រធានគណៈកម្មាធិការរណសិរ្សមាតុភូមិវៀតណាមស្រុកថើយឡាយ រយៈពេលខាងមុខ គណៈកម្មាធិការរណសិរ្សមាតុភូមិវៀតណាមគ្រប់លំដាប់ថ្នាក់ក្នុងស្រុកថើយឡាយនិងបន្តចលនារាល់ប្រភពកម្លាំង ដើម្បីឧបត្ថម្ភ សាងសង់ ជួសជុលផ្ទះមហាសាមគ្គីជូនគ្រួសារក្រីក្រ អ្នកមានស្ថានភាពលំបាក ជួយឱ្យពួកគាត់មានកន្លែងរស់នៅស្រួលបួល ឈានឡើងលំនឹងជីវភាព៕

អាញយ៉ុង - ថាច់ធី

ចែករំលែកអត្ថបទ

ពាក្យគន្លឹះ