គោលនយោបាយ -ការរស់នៅ ការរស់នៅ

06/04/2020 - 14:30

ដាំឪឡឹកលើដីស្រែផ្តល់ប្រាក់ចំណូលខ្ពស់

ជាច្រើនឆ្នាំមកនេះ ទប់ទល់នឹងធាតុអាកាសរាំងស្ងួត ជ្រាបទឹកប្រៃក្នុងរដូវបាំង កសិករជាច្រើននៅសុកត្រាំង ម្ចាស់ការបង្វែររចនាសម្ព័ន្ធដំណាំ សត្វចិញ្ចឹម។ ពិសេស ការដាំឪឡឹកលើដីស្រែកំពុងបានកសិករ ជាច្រើនអនុវត្តនិងផ្ដល់ប្រាក់ចំណូលខ្ពស់។

កសិករជាច្រើននៅសុកត្រាំង ដាំឪឡឹកនៅលើដីស្រែជំនួសឱ្យការធ្វើស្រូវរដូវទី៣។

បងថាច់ក្វឹកទ្រុង នៅភូមិកឹងឌឿក ឃុំថាញ់ភូ ស្រុកមីស្វៀង កំពុងស្រោចទឹកឪឡឹកដាំលើដីស្រែ៤,៥កុង។ បងបានឱ្យដឹង ដោយក្តីរីករាយ៖ “បច្ចុប្បន្ន ទឹកប្រៃជ្រាបចូលជុំវិញ ឃុំបិទលូឃាំងមិនឱ្យទឹកប្រៃចូល ប្រសិនធ្វើស្រែ គឺបរាជ័យហើយ ដូច្នេះខ្ញុំដាំឪឡឹក។ ឪឡឹកសមស្របនឹងរដូវប្រាំង ត្រូវការទឹកតិចនិងទិន្នផលខ្ពស់បង្គួរ។ កន្លងហើយ ខ្ញុំប្រមូលផល២កុង ទិន្នផលសម្រេចពី៣-៤តោន/កុង លក់បាន៤.០០០ដុង/គីឡូក្រាម បន្ទាប់ពីទូទាត់រួចស្រេច បងចំណេញជាង៨លានដុង/កុង។ ឥឡូវ ឪឡឹក៤,៥កុង បម្រុងនឹងប្រមូលផល ឈ្មួញមកឱ្យថ្លៃ៤.៥០០ដុង/គីឡូក្រាម ប្រាកដជាចំណេញមិនតិចជាង១០លានដុងក្នុងមួយកុងនោះទេ។ បើប្រៀបនឹងធ្វើស្រូវ ឪឡឹកចំណេញខ្ពស់ជាង”។ បងថាច់ចន្ទតារា នៅឃុំថាញ់ភូ ដាំឪឡឹក៥កុង លើដីស្រែ ឱ្យដឹង៖ “ ធ្វើស្រែបារម្ភបំផុតគឺទឹកប្រៃជ្រាបចូល។ ស្រូវត្រូវការទឹកច្រើន ចំណែកឪឡឹកស្រោចទឹកតែម្តងឬពីរដងក្នុងមួយថ្ងៃប៉ុណ្ណោះ។ ម្ល៉ោះហើយ៣ឆ្នាំមកនេះ ខ្ញុំដាំឪឡឹកផ្តល់ផលកាក់កប។ បច្ចុប្បន្ន ទោះបីទឹកព្រែកប្រឡាយក្នុងវាលមានការស្រកចុះក៏ដោយ ក៏នៅគ្រប់សម្រាប់ស្រោចស្របឪឡឹករហូតដល់ថ្ងៃប្រមូលផលដែរ។ ឪឡឹកចំនួន៥កុង កំពុងផ្តល់ផ្លែធំៗ លូតលាស់ល្អ ប្រហែលកន្លះខែទៀតនឹងប្រមូលផល ខ្ញុំនឹងកាន់ក្នុងដៃពី៣០-៤០លានដុង”។

បងថាច់ចន្ទតារា នៅឃុំថាញ់ភូ សង្ឃឹមថារដូវឱឡឹកនេះនឹងទទួលបានទិន្នផលខ្ពស់។

ខណៈដែលកសិករជាច្រើនធ្វើស្រែរដូវទី៣ កំពុងរងសម្ពាធដោយសារតែគ្រោះរាំងស្ងួត និងជ្រាបទឹកប្រៃ តែកសិករដែលដាំឪឡឹកលើដីស្រែនៅសុកត្រាំង មានការរំពឹងថា ឱឡឹករដូវនេះនឹងមានទិន្នផលកាក់កប។ នៅភូមិភាគមួយចំនួនរបស់ខេត្តសុកត្រាំង ការដាំឪឡឹកលើដីស្រែកំពុង ជំនួសឱ្យការផលិតស្រូវរដូវទី៣បណ្តើរៗ។ លោកសើុងថាយភា អនុប្រធានគណៈកម្មាធិការប្រជាជនឃុំថាញ់ភូ មានប្រសាសន៍៖ “ក្នុងប៉ុន្មានឆ្នាំថ្មីៗ នេះនៅឃុំថាញ់ភូ ឪឡឹកត្រូវបានប្រជាជនដាំច្រើន ដើម្បីជំនួសស្រូវរដូវទី៣។ ព្រោះដំណាំនេះខ្លីថ្ងៃ ត្រូវការទឹកតិច ដាំប្រមាណ៥៥ថ្ងៃគឺ បានប្រមូលផលហើយ ផ្តល់ប្រាក់ចំណេញក៏ខ្ពស់បង្គួរ។ ឆ្នាំនេះ ឃុំមានផ្ទៃដីដាំឪឡឹកលើដីស្រែជាង១៧០ហិកតា។ បច្ចុប្បន្ន ឪឡឹកមានតម្លៃ ពី៤.០០០-៤.៥០០ដុង/គីឡូក្រាម បន្ទាប់ពីទូទាត់រួចស្រេច ប្រជាជនអាចរកប្រាក់ចំណេញបានពី៨ទៅ១០លានដុងក្នុងមួយកុង ប្រសិនបើតម្លៃខ្ពស់ជាងទៀត គឺចំណេញច្រើនជាងនេះ។ ជាមួយនឹងបរិមាណទឹកសាបដែលនៅក្នុងប្រឡាយរាយរង ថាញ់ភូ អាចធានាគ្រប់ទឹកសម្រាប់ស្រោចស្រប ដំណាំឪឡឹករហូតដល់ថ្ងៃប្រមូលផល” ៕

យ្វីអាញ់-លេងមី

ចែករំលែកអត្ថបទ

ពាក្យគន្លឹះ