សុខភាព - អប់រំ អប់រំ

18/09/2026 - 09:02

បង្កទំនុកចិត្ត ជំរុញដំណើរសិស្សានុសិស្សទៅសាលារៀន

ក្នុងដំណើរទៅសាលារៀនរបស់សិស្សានុសិស្សដែលមានស្ថានភាពលំបាក អាហារូបករណ៍មួយចំណែកៗ មិនត្រឹមតែជាការឧបត្ថម្ភខាងសម្ភារៈប៉ុណ្ណោះទេ ថែមទាំងបង្កនូវទំនុកចិត្ត និងជំរុញកម្លាំងចិត្តដើម្បីប្អូនៗពុះពារក្នុងការសិក្សា។ ផ្តើមពីការរួមដំណើរនៃមូលនិធិអាហារូបករណ៍លឿងឌិញកួរ មានសិស្សានុសិស្ស ជាច្រើនដែលជួបការលំបាកនៅលើភូមិឋានទីក្រុងកឹងធើ មានឱកាសបន្ថែមចាប់យកចំណេះដឹងនិងចិញ្ចឹមក្តីប្រាថ្នា។

ជូនអាហារូបករណ៍ លឿងឌិញកួរ ដល់សិស្សក្រីក្រសង្វាតរៀនសូត្រនៅលើភូមិឋានទីក្រុងកឹងធើ។

ដើមឆ្នាំសិក្សា ២០២៦-២០២៧ សមាគមជំរុញការសិក្សាទីក្រុងកឹងធើ ផ្ដល់អាហា រូបករណ៍លឿងឌិញកួរ ៣២១ ចំណែក ជូនសិស្សានុសិស្សជម្នះការលំបាក រៀនពូកែ សរុបជាទឹកប្រាក់ ៤៨១,៥ លានដុង ក្នុងមួយចំណែកៗមានតម្លៃ ១,៥ លានដុង។ អាហារូបករណ៍ទាំងនេះ បង្ហាញពីការចែករំលែករបស់អាជីវកម្មនិងសហគមន៍ ជួយប្អូនៗកាត់បន្ថយការលំបាកក្នុងការសិក្សា។ ប្អូនស្រី យ័ញង៉ុកម៉ាយ សិស្សថ្នាក់ទី ១២A៣ នៃអនុវិទ្យាល័យនិងវិទ្យាល័យវ៉ាំងង៉ុកជិញ ឃុំញូយ៉ា ឱ្យដឹងទាំងក្ដីរំភើប៖ “ស្ថានភាពគ្រួសារប្អូននៅមានការលំបាកណាស់ ដូច្នេះការយកចិត្តទុកដាក់ និងលើកទឹកចិត្តនេះ គឺជាប្រភពជំរុញទឹកចិត្តដ៏ធំធេង។ អាហារូប ករណ៍បានជួយប្អូនមានថវិកាទិញខោអាវ កាតាប និងសិក្ខូបករណ៍សម្រាប់ឆ្នាំសិក្សាថ្មី។ នេះជាលើកទីពីរហើយដែលប្អូនបានទទួលអាហារូបករណ៍ ដូច្នេះ ប្អូននឹងខិតខំរៀនសូត្រឱ្យបានល្អ ដើម្បីកុំឱ្យខកបំណងលោកគ្រូអ្នកគ្រូ ឪពុកម្តាយ និងអាជីវកម្មដែលបានជួយឧបត្ថម្ភ”។

រួមដំណើរជាមួយមូលនិធិអាហារូបករណ៍ លឿងឌិញកួរ តាំងពីឆ្នាំ ២០០៤ មកទល់ពេលនេះ ក្រុមហ៊ុនទទួលខុសត្រូវមានកម្រិតសមាជិកមួយឆ្នោតជាតិសុកត្រាំង គឺជាអង្គភាពឧបត្ថម្ភចម្បង។ ឆ្លងកាត់រយៈពេលជាងពីរទសវត្សរ៍ផ្សារភ្ជាប់ជាមួយនឹងការងារជំរុញការសិក្សា ជំរុញបញ្ញាអាជីវកម្មបានរួមវិភាគទានថវិកាជាង ៤៥ ពាន់លានដុង និងជូនអាហារូបករណ៍ជិត ៣០.០០០ ចំណែកដល់សិស្ស និស្សិត។ លោកអូវវ៉ាំងយឺ នាយកក្រុមហ៊ុនទទួលខុសត្រូវមានកម្រិតសមាជិកមួយឆ្នោតជាតិសុកត្រាំង ឱ្យដឹង៖ “អាជីវកម្មបានកំណត់ថា ការរួមដំណើរជាមួយបុព្វហេតុអប់រំ គឺជាករណីយកិច្ចចំពោះសហគមន៍។ អាហារូបករណ៍មួយចំណែកៗ គឺជាការរំលែកនិងជាការផ្ញើនូវក្តីជំនឿ ជួយសិស្សានុសិស្សបន្ថយការលំបាក មានកម្លាំងចិត្តបន្ថែមដើម្បីឈានឡើង និងចិញ្ចឹមក្តីប្រាថ្នា។ តាមរយៈនោះ រួមចំណែកធ្វើឱ្យសាយភាយនូវមនោសញ្ចេតនា ពូនជ្រំប្រពៃណី សង្វាត់សិក្សា មិនទុកឱ្យសិស្សណាម្នាក់បោះបង់ការសិក្សាដោយសារស្ថានភាពលំបាកឡើយ”។

ស្មារតីចូលរួមពីសង្គមក្នុងការអប់រំ ជំរុញការសិក្សា ជំរុញបញ្ញា កាន់តែរីកសាយភាយទូលំទូលាយនៅលើភូមិឋានទីក្រុងកឹងធើ។ ក្នុង ៦ ខែដើមឆ្នាំ ២០២៦ ទូទាំងទីក្រុង ចលនាថវិកាបានជាង ២៤ ពាន់លានដុង ជូនអាហារូបករណ៍ និងអំណោយ ១៤.៥៦២ ចំណែកដល់សិស្ស និស្សិតក្រជួបការលំបាក និងសិស្សដែលទទួលបានលទ្ធផលខ្ពស់ក្នុងការប្រឡង។ លោកស្រី ង្វៀងធីង៉ុកឌេប អនុប្រធានគណៈកម្មាធិការប្រជាជនទីក្រុងកឹងធើ បានសង្កត់ធ្ងន់៖ បក្សនិងរដ្ឋ តែងកំណត់ថា ការអប់រំនិងបណ្តុះបណ្តាលគឺជាភារកិច្ចគោលនយោបាយជាតិដ៏សំខាន់។ ដូច្នេះ ការកសាងសង្គមរៀនសូត្រ ជំរុញការសិក្សា ជំរុញបញ្ញា ចាំបាច់មានការរួមកម្លាំងពីទូទាំងប្រព័ន្ធនយោបាយ និងទូទាំងសង្គម។ ប្អូនៗដែលទទួលបានអាហារូបករណ៍ សុទ្ធតែមានស្ថានភាពលំបាកនិងចំណុចចាប់ផ្តើមខុសៗគ្នា ប៉ុន្តែមានចំណុចរួមមួយ គឺការខិតខំប្រឹងប្រែងឈានឡើង។ សង្ឃឹមថា ប្អូនៗនឹងបន្តបណ្តុះឆន្ទៈ ខិតខំរៀនសូត្រ និងហ្វឹកហាត់មិនឈប់ឈរ ដើម្បីក្លាយជាពលរដ្ឋដែលមានប្រយោជន៍ រួមចំណែកកសាងស្រុកភូមិឱ្យកាន់តែសម្បូរសប្បាយ និងស៊ីវិល័យ។

រាល់អាហារូបករណ៍ដែលបានប្រគល់ជូន គឺជាក្តីជំនឿមួយបានអុជបំភ្លឺឡើង។ ការរួមដំណើររបស់រដ្ឋអំណាច អាជីវកម្មនិងសហគមន៍ នឹងផ្តល់កម្លាំងចិត្ត បន្ថែមដើម្បីសិស្សានុសិស្សក្រលំបាក ឈានឡើងយ៉ាងរឹងមាំលើវិថីសិក្សា៕

យ្វីអាញ-មេងលី

ចែករំលែកអត្ថបទ

ពាក្យគន្លឹះ