សុខភាព - អប់រំ សុខភាព

25/09/2025 - 05:31

បង្កើនការថែទាំសុខភាពមនុស្សចាស់គ្មានទីពឹងនិងអ្នកពិការ

អនុវត្តគោលការណ៍ “មិនទុកចោលអ្នកណាម្នាក់នៅក្រោយគេ” គឺជាគោលការណ៍មួយក្នុងចំណោមគោលការណ៍ដ៏ធំរបស់បក្ស រដ្ឋ សម្តែងនូវស្មារតីមនុស្សធម៌ ការទទួលខុសត្រូវឆ្ពោះទៅរកសង្គម មួយដែលស្មើភាព អារ្យធម៌ អភិវឌ្ឍចីរភាព។ សំដៅធ្វើឱ្យសាយភាយស្មារតីស្រឡាញ់រាប់អានគ្នា រួមចំណែកដោះស្រាយរាល់បញ្ហាអំពីសុខុមាលភាព។ ដំណាក់សុខាភិបាលឃុំឡុងហីុប ខេត្តវិញឡុង បានអនុវត្តល្អនូវការថែទាំសុខភាពមនុស្សចាស់គ្មានទីពឹងនិងអ្នកពិការ។

កងជួរគ្រូពេទ្យ វេជ្ជបណ្ឌិតដំណាក់សុខាភិបាលឃុំឡុងហុីប ពិនិត្យព្យាបាលជំងឺ
ថែទាំសុខភាពជូនមនុស្សចាស់នៅផ្ទះ។

វេជ្ជបណ្ឌិតហ្វិញថាញតឹម ប្រធានដំណាក់សុខាភិបាលឃុំឡុងហុីប ឱ្យដឹង៖ “ឡុងហ៊ីបជាឃុំមួយដែលមានអត្រាអ្នកពិការ មនុស្សចាស់គ្មានទីពឹងច្រើន។ មូលហេតុចម្បងគឺដោយសាររងរបួសស្នាម ផ្ទុកជាតិពុលព៌ណលឿងក្រោយពីសង្គ្រាម; ផលវិបាកអំពីបញ្ហាសុខភាពសហគមន៍ក្នុងដំណាក់កាលរីកចម្រើន ដូចជាគ្រោះថ្នាក់របួសស្នាម ជំងឺមិនឆ្លងផ្សេងៗ សុខភាពសរសៃប្រាសាទជាដើម។ រៀងរាល់ឆ្នាំ ដំណាក់សុខាភិបាលតែងសហការជាមួយនឹងគណៈកម្មាធិការប្រជាជនឃុំរៀបចំសកម្មភាពសួរសុខទុក្ខ លើកទឹកចិត្តនិងជូនអំណោយដល់មនុស្សចាស់គ្មានទីពឹង អ្នកពិការ ពិសេសនាឱកាសពិធីបុណ្យផ្សេងៗ។ ថ្វីដ្បិតដូច្នោះក្តី រាល់សកម្មភាពទាំងនេះនៅមានការឆកល្វែងច្រើន មិនទាន់ឆ្លើយតបបានគ្រប់សព្វតម្រូវការរបស់មនុស្សចាស់គ្មានទីពឹងនិងអ្នកពិការលើភូមិឋាននៅឡើយ។ ស្ថិតិឆ្នាំ ២០២៥ លើភូមិឋានឃុំឡុងហ៊ីបមានមនុស្សចាស់គ្មានទីពឹង ២៤ នាក់ អ្នកពិការមានជីវភាពខ្វះខាត ៥៩ នាក់។ រាល់សប្តាហ៍ដំណាក់សុខាភិបាលចាត់កម្មាភិបាលទទួលបន្ទុកគ្រូពេទ្យ វេជ្ជបណ្ឌិតចុះទៅភូមិនីមួយៗលើភូមិឋានឃុំពិនិត្យជំងឺ ផ្តល់ថ្នាំ ពិគ្រោះជំងឺ ណែនាំមនុស្សចាស់គ្មានទីពឹងថែទាំសុខភាពដោយខ្លួនឯងនៅផ្ទះ”។

ដោះដូរជាមួយនឹងយើងខ្ញុំ លោកយាយគឹមធីចំរើន កើតឆ្នាំ១៩៥០ នៅភូមិខ្នោស ឱ្យដឹង៖ “ខ្ញុំវ័យចាស់ជីវភាពខ្វះខាត មានជំងឺលើសឈាម។ ខែកន្លងហើយ ខ្ញុំបានគ្រូពេទ្យនៅដំណាក់សុខាភិបាលឃុំមកពិនិត្យជំងឺឥតគិតថ្លៃ។ ពេលពិនិត្យជំងឺរួចស្រេច គ្រូពេទ្យណែនាំខ្ញុំអស់ពីចិត្តពីរបៀបថែទាំសុខភាព របៀបលេបថ្នាំ អាហារហូបចុក និងចលនាឱ្យបានសមស្រប ខ្ញុំត្រេកអរណាស់”។

វេជ្ជបណ្ឌិតហ្វិញថាញតឹម ប្រធានដំណាក់សុខាភិបាលឃុំឡុងហ៊ីប ឱ្យដឹងបន្ថែម៖ “តាមផែនការឆ្នាំ ២០២៥ ដំណាក់សុខាភិបាល រៀបចំពិនិត្យជំងឺ ថែទាំសុខភាពជូនមនុស្សចាស់គ្មានទីពឹងនិងអ្នកពិការបាន ៨៣ នាក់ ចាប់ពីដើមឆ្នាំមកដល់ពេលនេះ ពិនិត្យជំងឺថែទាំសុខភាពបាន ៤៥ នាក់។ ដើម្បីបង្កើនការថែទាំសុខភាពជូនមនុស្សចាស់គ្មានទីពឹង អ្នកពិការរយៈពេលខាងមុខ ដំណាក់សុខាភិបាលបន្តចាត់កម្មាភិបាល ទទួលបន្ទុកការងារគ្រប់គ្រងនិងថែទាំសុខភាពមនុស្សចាស់គ្មានទីពឹង។ ផ្សព្វផ្សាយព័ត៌មាន ដែលពាក់ព័ន្ធនឹងគោលនយោបាយ របបអាទិភាពសម្រាប់មនុស្សវ័យចាស់ គ្រួសារគ្មានទីពឹង គួបផ្សំនឹងសកម្មភាពផ្សព្វផ្សាយផ្សេងៗទៀតរបស់ដំណាក់សុខាភិបាល។ សហការជាមួយនឹងគណៈកម្មាធិការប្រជាជនឃុំ និងអង្គការ គណៈ ផ្នែកដែលពាក់ព័ន្ធរៀបចំសកម្មភាពសួរសុខទុក្ខ ជូនអំណោយ ឧបត្ថម្ភដល់គ្រួសារដែលមានមនុស្សចាស់គ្មានទីពឹង។ ផ្អែកលើលទ្ធផលពិនិត្យ ដំណាក់សុខាភិបាលនឹងផ្គត់ផ្គង់ប្រភេទថ្នាំជាចាំបាច់ ដូច៖ ថ្នាំបំប៉នវីតាមីន ថ្នាំជំនួយព្យាបាលជំងឺរុាំរ៉ៃផ្សេងៗ (ប្រសិនបើមាន) រួមចំណែកអនុវត្តល្អគោលនយោបាយសុខុមាលភាពសង្គមនៅភូមិភាគ៕

សើងម៉ាល័យ-ប្រែសម្រូល៖លីសៀ

ចែករំលែកអត្ថបទ

ពាក្យគន្លឹះ