សុខភាព - អប់រំ សុខភាព

03/03/2025 - 15:05

អនុវត្តល្អការងារថែទាំសុខភាពបឋមនៅមូលដ្ឋាន

រយៈពេលកន្លង កងជួរកម្មាភិបាលពេទ្យរបស់ដំណាក់សុខាភិបាលឃុំតាយវ៉ាន់ ស្រុកត្រឹងដេ ខេត្តសុកត្រាំង តែងបង្កើនការផ្លាស់ថ្មីដោយឥតឈប់ឈរ ដើម្បីលើកកម្ពស់គុណភាពពិនិត្យ ព្យាបាលជំងឺ។

ប្រជាជនយកកូនមកដំណាក់សុខាភិបាលឃុំតាយវ៉ាន់ ដើម្បីចាក់វ៉ាក់សាំងបង្ការជំងឺ។

ជាឃុំលំបាកខ្លាំង មានជនរួមជាតិខ្មែររស់នៅកុះករ ម្ល៉ោះហើយ ដំណាក់សុខាភិបាលឃុំតាយវ៉ាន់ ត្រូវបានយកចិត្តទុកដាក់វិនិយោគកសាងមូលដ្ឋានថ្មីធំទូលាយ ស្អាតបាត។ ដំណាក់សុខាភិបាលមានបរិក្ខារពេទ្យនិងបន្ទប់ឯកទេសគ្រប់គ្រាន់ តាមការកំណត់របស់ក្រសួងសុខាភិបាល។ បុគ្គលិកពេទ្យមានគ្រប់ចំនួននិងបានបណ្ដុះបណ្ដាលលើកកម្ពស់កម្រិតវិជ្ជាជីវៈ រួមចំណែកអនុវត្តប្រកបដោយប្រសិទ្ធភាពការងារថែទាំសុខភាពបឋមជូនប្រជាជន។ គ្រូពេទ្យ ង្វៀងថាញ់ឡឹប ប្រធានស្ដីទីដំណាក់សុខាភិបាលឃុំតាយវ៉ាន់ ឱ្យដឹង៖ “បច្ចុប្បន្ន ប្រជាជនមកពិនិត្យនិងព្យាបាលជំងឺនៅដំណាក់សុខាភិបាលកើនឡើងពីមួយថ្ងៃទៅមួយថ្ងៃ។ ជាមធ្យម រៀងរាល់ខែដំណាក់សុខាភិបាលទទួលពិនិត្យជំងឺនិងផ្ដល់ថ្នាំជូនប្រជាជនជាង ៦០០ លើកនាក់”។

គ្រូពេទ្យនៃដំណាក់សុខាភិបាលឃុំតាយវ៉ាន់ ពិនិត្យជំងឺជូនប្រជាជន។

អ្នកមីងលីធីកឹង នៅភូមិតាយកុង មកពិនិត្យជំងឺ ឱ្យដឹង៖ “ខ្ញុំមានជំងឺលើសឈាម ហើយរៀងរាល់ខែតែងមកពិនិត្យជំងឺនៅដំណាក់សុខាភិបាល ដើម្បីយកថ្នាំផឹកតាមធានារ៉ាប់រងសុខាភិបាល។ គ្រូពេទ្យនៅទីនេះ តែងយកចិត្តទុកដាក់ រួសរាយរាក់ទាក់នឹងអ្នកជំងឺណាស់ ណែនាំពីរបៀបផឹកថ្នាំ សម្រាកសម្រាន្តយ៉ាងត្រឹមត្រូវទើបសុខភាពខ្ញុំបានលំនឹង។ កាន់តែរីករាយគឺដំណាក់សុខាភិបាលមានថ្នាំពេទ្យគ្រប់គ្រាន់ ការពិនិត្យជំងឺនិងផ្ដល់ថ្នាំក៏ឆាប់ ម្ល៉ោះហើយមិនបាច់ឡើងទៅមន្ទីរពេទ្យស្រុកដែលនៅឆ្ងាយនិងខាតពេលវេលានោះទេ”។ ចំណែកអ្នកមីង ទ្រីវធីសឿង នៅភូមិចាក់ទទឹង ឱ្យដឹង៖ “រៀងរាល់ខែ ខ្ញុំតែងឌុបចៅមកដំណាក់សុខាភិបាលពិនិត្យជំងឺ និងយកថ្នាំផឹកតាមធានារ៉ាប់រងសុខាភិបាល។ គ្រូពេទ្យនៅទីនេះតែងខ្នះខ្នែងពិនិត្យជំងឺ ផ្ដល់ថ្នាំនិងពិគ្រោះយោបល់ ណែនាំហ្មត់ចត់អំពីពេលវេលាផឹកថ្នាំ។ ដ្បិតអី ចៅខ្ញុំកើតជំងឺប្រកាច់ ម្ល៉ោះហើយ តែងបានគ្រូពេទ្យណែនាំពីបំណិនគ្រប់គ្រងចៅពេលជំងឺរើម្ដងៗ”។

ដំណាក់សុខាភិបាលឃុំតាយវ៉ាន់ នៅទាំងអនុវត្តសម្រេចនិងសម្រេចលើសភាគកម្រិតផែនការនៃក្រមលក្ខឋានជាតិអំពីសុខាភិបាល។ ជាក់ស្ដែង កុមារមានអាយុពី៦-៣៦ខែ បានផឹកវីតាម៉ីន A ទាំង ១០០%; អត្រាស្រ្តីពរផ្ទៃបានពិនិត្យគភ៌តាមពេលកំណត់ និងបានចាក់វ៉ាក់សាំងបង្ការជំងឺ តេតាណូសគ្រប់ដូសទាំង ១០០% ; កុមារអាយុក្រោម ១ ឆ្នាំត្រូវបានចាក់វ៉ាក់សាំងបើកទូលាយតាមសេចក្ដីកំណត់របស់ក្រសួងសុខាភិបាលទាំង ១០០%។ ទន្ទឹមនឹងនោះ ដំណាក់សុខាភិបាលនៅទាំងសហការជាមួយនឹងសហការីជំរុញការផ្សព្វផ្សាយអំពីការបង្ការ ទប់ស្កាត់រោគឆ្លងរាលដាលផ្សេងៗទៀតផង។ អាស្រ័យហេតុនោះ ប្រជាជនបានម្ចាស់ការបង្ការ ទប់ស្កាត់រោគឆ្លងរាលដាល រួមចំណែកជួយឱ្យភូមិភាគគ្រប់គ្រងរោគឆ្លងរាលដាលបានល្អ។ ឆ្នាំ ២០២៤ ឃុំបានបើកយុទ្ធនាការកម្ចាត់ដង្កូវទឹកបាន ២ លើកនិងវិនិច្ឆ័យសម្បុករោគទាំង ១០០% ដើម្បីកុំឱ្យជំងឺឆ្លងរាលដាលជាទ្រង់ទ្រាយធំ៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ