សុខភាព - អប់រំ សុខភាព

11/06/2024 - 09:26

ក្តីរីករាយពីធានារ៉ាប់រងសុខាភិបាល

ឃុំថាញ់ភូ ស្រុកមីស្វៀង ខេត្តសុកត្រាំង បានទទួលរបបផ្តល់ជូនប័ណ្ណធានារ៉ាប់រងសុខាភិបាលដល់ជនរួមជាតិភាគតិចតាមអនុក្រឹត្យលេខ ៧៥/២០២៣/NĐ-CP ចុះថ្ងៃទី ១៩ ខែតុលា ឆ្នាំ២០២៣ របស់រដ្ឋាភិបាល។ អាស្រ័យហេតុនោះ គ្រួសារជនរួមជាតិខ្មែរជាច្រើនកាត់បន្ថយបានការចំណាយក្នុងការពិនិត្យ ព្យាបាលជំងឺ។

មានប័ណ្ណធានារ៉ាប់រងសុខាភិបាល មាមីងខ្មែរមានលក្ខណៈកៀកជិតសេវាកម្មទំនើប
ក្នុងការពិនិត្យព្យាបាលជំងឺ។

តាមប្រសាសន៍លោក ត្រឿងវ៉ាន់តឹង ប្រធានគណៈកម្មាធិការប្រជាជនឃុំថាញ់ភូ ពេលទទួលបានដំណឹងរបស់អង្គភាពធានារ៉ាប់រងសង្គមស្រុក អំពីការបន្តផ្តល់ជូនប័ណ្ណធានារ៉ាប់រងសុខាភិបាលពីប្រភពថវិការដ្ឋដល់ជនរួមជាតិភាគតិច ឃុំបានសហការជាមួយអង្គការមហាជនភូមិ ដើម្បីឃោសនាផ្សព្វផ្សាយដល់ប្រជាជនដែលមិនទាន់មានប័ណ្ណធានារ៉ាប់រង ធ្វើបែបបទដើម្បីបានផ្តល់ជូនប័ណ្ណធានារ៉ាប់រងសុខាភិបាល។ មកទល់ពេលនេះ គ្រួសារជនរួមជាតិភាគតិចស្ទើរតែទាំងអស់ បំផុតគឺគ្រួសារខ្មែរ សុទ្ធតែមានប័ណ្ណធានារ៉ាប់រងសុខាភិបាល។ ប្រការនេះបាននាំមកនូវក្ដីរីករាយដល់មាមីងខ្មែរ បំផុតគឺគ្រួសារក្រីក្រ គ្រួសារប្រកៀកបន្ទាត់ក្រ និងអ្នកមានវ័យចំណាស់គ្មានទីពឹង មានលក្ខណៈពិនិត្យ ព្យាបាលជំងឺ ធានាការថែទាំសុខភាពបានល្អប្រសើរ។

លោកថាច់អ៊ុយ លេខាសាខាបក្សភូមិព្រែកឆ្វេង ឃុំថាញ់ភូ ឱ្យដឹង៖ “មាមីងខ្មែរភាគច្រើនប្រកបរបរធ្វើស្រែ ដាំដំណាំរួមផ្សំ ចិញ្ចឹមសត្វ និងមួយចំនួនតូចលក់ដូរ ម្ល៉ោះហើយការទិញប័ណ្ណធានារ៉ាប់រងសុខាភិបាលដល់សមាជិកក្នុងគ្រួសារមានចំនួនតិចណាស់ ពេលណាមានជំងឺទើបទៅទិញ។ ចំណែកគ្រួសារក្រីក្រ គ្រួសារប្រកៀកបន្ទាត់ក្រវិញ គឺកាន់តែលំបាកទិញថែមទៀត ពេលរដ្ឋមានគោលនយោបាយផ្តល់ជូនប័ណ្ណធានារ៉ាប់រងសុខាភិបាលដោយឥតគិតថ្លៃ មាមីងត្រេកអរគ្រប់គ្នា”។

ដោយបានរដ្ឋផ្ដល់ជូនប័ណ្ណធានារ៉ាប់រងសុខាភិបាល បងថាច់ហ្វាងដែប មិនបារម្ភពីការរកប្រាក់ទៅពិនិត្យជំងឺទៀត។ បងដែប ឱ្យដឹង៖ “គ្រួសាររស់នៅដោយរបរដាំដំណាំរួមផ្សំលើផ្ទៃដី២កុង ហេតុនោះគ្រាន់តែគ្រប់គិតគូរជីវភាពប្រចាំថ្ងៃប៉ុណ្ណោះ។ ថ្មីៗនេះ ខ្ញុំត្រូវដេកពេទ្យព្យាបាលជំងឺចម្លែកទៀត គឺមានមេរោគក្នុងឈាមខ្ពស់ ត្រូវព្យាបាលជិត១ខែ វេជ្ជបណ្ឌិតប្រាប់ថាបង់ប្រាក់ច្រើនណាស់។ ដោយសារមានប័ណ្ណធានារ៉ាប់រងសុខាភិបាល បានរដ្ឋផ្តល់ជូនដោយឥតគិតថ្លៃ ទើបគ្រួសារខ្ញុំមិនសូវបង់ថ្លៃព្យាបាលជំងឺ”។ ចំណែកបងស្រី តូធីធឿន ឱ្យដឹង៖ “ដើមឆ្នាំនេះ បានរដ្ឋផ្តល់ជូនប័ណ្ណធានារ៉ាប់រងសុខាភិបាលដោយឥតគិតថ្លៃ ខ្ញុំមានក្តីត្រេកអរក្រៃលែង។ ពីព្រោះខ្ញុំទើបតែសម្រាលកូនក្នុងខែឧសភានេះ ហេតុនោះ កាត់បន្ថយការចំណាយបានច្រើនដល់គ្រួសារនិងបានគ្រូពេទ្យនៅមន្ទីរពេទ្យសម្ភពនិងកុមារខេត្តសុកត្រាំង យកចិត្តទុកដាក់ថែទាំសុខភាព ណែនាំពីរបៀបថែទាំកូនដោយទឹកដោះម្តាយ និងរបបហូបចុកសម្រាប់អ្នកកូនខ្ចី”។

គោលនយោបាយផ្តល់ជូនប័ណ្ណធានារ៉ាប់រងសុខាភិបាលដល់ជនរួមជាតិភាគតិច ពិសេស គឺគ្រួសារខ្មែរនៅឃុំថាញ់ភូ បានរួមចំណែកយ៉ាងច្រើនក្នុងការថែទាំសុខភាពជូនប្រជាជន បង្កើនអត្រាប្រជាជនចូលរួមធានារ៉ាប់រងសុខាភិបាល និងលើកកម្ពស់សុខភាពជនរួមជាតិខ្មែរផងដែរ។ ទន្ទឹមនឹងនោះ នេះជាគោលនយោបាយស្របទឹកចិត្តប្រជាជន បង្ហាញពីការយកចិត្តទុកដាក់បានទាន់ពេលរបស់បក្ស រដ្ឋចំពោះជនរួមជាតិខ្មែរ ដើម្បីជួយជនរួមជាតិបានកៀកជិតនឹងសេវាកម្មថែទាំសុខភាពកាន់តែល្អពីមួយថ្ងៃទៅមួយថ្ងៃ៕

យ្វីអាញ-វិមាន

ចែករំលែកអត្ថបទ

ពាក្យគន្លឹះ