អត្ថបទបញ្ចប់ៈ ក្តីរីករាយនាបច្ចុប្បន្ន - ក្តីជឿជាក់នៅអនាគត
ផ្ទះដែលបានសាងសង់ថ្មី តាមរយៈកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម គឺជារឿងរ៉ាវដ៏វិសេសនៃសេចក្តីស្រឡាញ់ជនរួមជាតិ។ ទម្រង់ដែលមានប្រសិទ្ធភាពទាំងនេះ រួមចំណែកជួយដល់គ្រួសារក្រីក្រ និងគ្រួសារក្បែរក្រជិត ១១.៤០០គ្រួសារ នៅទីក្រុងកឹងធើ មានផ្ទះសម្បែងរឹងមាំ ស្ងប់អារម្មណ៍ប្រកបការងារ រៀនសូត្រនិងបន្តចិញ្ចឹមក្តីប្រាថ្នារំដោះខ្លួនចាកភាពក្រីក្រ។ ក្តីរីករាយនាបច្ចុប្បន្ន បានបណ្ដុះពន្លកក្ដីជំនឿយ៉ាងមុតមាំចំពោះអនាគតដ៏ភ្លឺស្វាង។
ទម្រង់មានប្រសិទ្ធភាព
ទម្រង់ “សាសនាចូលរួមក្នុងការសាងសង់និងជួសជុលផ្ទះបណ្ដោះអាសន្ន ផ្ទះទ្រុឌទ្រោម” អាស្រ័យគណៈកម្មាធិការរណសិរ្សមាតុភូមិវៀតណាមឃុំសាភៀងសហការអនុវត្ត។ នេះជាកន្លែងប្រមូលផ្តុំសប្បុរសជនរបស់សាសនិកជនលើភូមិឋានឃុំ ដោយគោលបំណងរួមចំណែកជួយជនរួមជាតិ “មានផ្ទះសម្បែងនិងការងាររកស៊ីស្រួលបួល”។
ភារកិច្ចរបស់លោកយ័ញហ៊ីញ នៅភូមិទី៤ ឃុំសាភៀង និងសមាជិកទាំងឡាយនៃទម្រង់ គឺជួយរុះរើផ្ទះចាស់ដើម្បីសាងសង់ផ្ទះថ្មី។ លោកហ៊ីញ ឱ្យដឹង៖ “យើងខ្ញុំនិងគ្រួសារដែលត្រូវការជំនួយមិនមែនជាសាច់ញាតិទេ ប៉ុន្តែយើងស្ម័គ្រចិត្តជួយពួកគាត់ពេលត្រូវការ។ គ្រួសារទាំងនេះមានស្ថានភាពលំបាកខ្លាំង ដូច្នេះជួយពួកគាត់កាត់បន្ថយចំណាយបានមួយចំណែកក្នុងការសាងសង់ដែរ”។
គ្រួសាររបស់លោកយាយក្វាច់ធីឡាត នៅភូមិទី៥ ឃុំសាភៀង បានសង់ផ្ទះថ្មីតាមរយៈកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម។ អ្នកមីងឡាត មានវ័យចាស់ហើយរស់នៅតែម្នាក់ឯង។ ដោយសារការជួយសហការរបស់លោកយ័ញហ៊ីញនិងអ្នកជាច្រើនទៀត ទើបផ្ទះចាស់របស់លោកយាយរុះរើបានលឿន ដើម្បីឱ្យក្រុមការងារសាងសង់អាចធ្វើការងារបានស្រួល។ លោកយាយហ៊ីន រៀបរាប់៖ “ខ្ញុំអរគុណយ៉ាងខ្លាំងចំពោះការជួយនេះ”។
នៅឃុំវិញតឿង ទម្រង់ “រួមគ្នាបំបាត់ផ្ទះបណ្ដោះអាសន្ន ផ្ទះទ្រុឌទ្រោម” គឺជារូបភាពដ៏ថ្លៃថ្លានៃការចូលរួមរបស់ប្រជាជនក្នុងការអនុវត្តកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម។ ទម្រង់នេះ បានជួយរុះរើផ្ទះចាស់របស់គ្រួសារប្រជាជន១១គ្រួសារ ដោយកម្លាំងពលកម្មសរុបជាង១០០ថ្ងៃ។ លោកថាយវ៉ាំងអ៊ូ នៅភូមិទី៥ ឃុំវិញតឿង បានចូលរួមជាកម្លាំងពលកម្ម១០ថ្ងៃ ដើម្បីជួយរុះរើផ្ទះដល់គ្រួសារចំនួន២។ “ពេលការងារស្រែចម្ការរួចរាល់ ខ្ញុំឆ្លៀតពេលទំនេររបស់ខ្លួនដើម្បីធ្វើការងារសប្បុរស។ ពេលបានជួយរុះរើផ្ទះចាស់រួច ខ្ញុំមានអារម្មណ៍រីករាយណាស់។ អ្វីដែលគួរឱ្យរីករាយបន្ថែមទៀតនោះ គឺមានអ្នកជាច្រើនគិតនិងធ្វើដូចខ្ញុំផងដែរ” លោកថាយវ៉ាំងអ៊ូ បានឱ្យដឹងដូច្នេះ។
ការបំបាត់ផ្ទះបណ្ដោះអាសន្ន ផ្ទះទ្រុឌទ្រោម នៅទីក្រុងកឹងធើ គឺជាភស្តុតាងដ៏រស់រវើកនៃផែនមហាសាមគ្គីទូទាំងជនជាតិ។ ជាការវេញបញ្ចូលរវាងគោលការណ៍ គោលនយោបាយដ៏ត្រឹមត្រូវរបស់បក្សនិងរដ្ឋ ជាមួយនឹងស្មារតីចែករំលែក និងមនុស្សធម៌របស់សហគមន៍។
ភាពកក់ក្តៅសម្រាប់អ្នកក្រ
“សង់បានផ្ទះដូច្នេះ ខ្ញុំសប្បាយចិត្តណាស់។ ប៉ុន្មានថ្ងៃដំបូងដែលខ្ញុំចូលទៅនៅក្នុងផ្ទះថ្មី ខ្ញុំរីករាយដល់មិនអាចដេកលក់” លោកយាយត្រឹងធីឡាង នៅមណ្ឌលទី៥ សង្កាត់វ៉ីតឹង បានរៀបរាប់ទាំងអារម្មណ៍រំភើបដូច្នេះ។ ផ្ទះចាស់របស់អ្នកមីងឡាង បានសាងសង់កាលពី២៧ឆ្នាំមុន ហើយខូចទ្រុឌទ្រោមយ៉ាងខ្លាំង។ ជញ្ជាំងស្លឹកត្រូវបាំងឡើងវិញច្រើនលើកច្រើនសា ប៉ុន្តែមិនអាចទប់ទល់នឹងភ្លៀងក្ដៅបានឡើយ។ ដោយសារវ័យចាស់ គ្មានលទ្ធភាពធ្វើការងារទៀត ជីវភាពរបស់គាត់ពឹងលើប្រាក់ ១,៥លានដុងដែលកូនស្រីទៅធ្វើការឆ្ងាយផ្ញើមករៀងរាល់ខែ។ ចំនួនទឹកប្រាក់នេះ គាត់ចាយវាយយ៉ាងប្រិតប្រៀន ដើម្បីគិតគូរការចំណាយប្រចាំថ្ងៃ ដូច្នេះ ក្តីស្រមៃជួសជុលផ្ទះ ត្រូវបានពន្យារពីឆ្នាំមួយទៅឆ្នាំមួយ។
លោកយាយត្រឹងធីឡាង នៅមណ្ឌលទី៥ សង្កាត់វ៉ីតឹង មានអារម្មណ៍រីករាយយ៉ាងខ្លាំង ពីព្រោះបានទទួលការ
ជួយសាងសង់ផ្ទះថ្មី តាមកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម។
ថ្ងៃដែលដុំឥដ្ឋដំបូងបានដាក់សាងសង់ផ្ទះ លោកយាយឡាង មិនអាចលាក់បាំងអារម្មណ៍រីករាយរបស់ខ្លួនបានឡើយ។ កន្លងមួយរយៈពេល ផ្ទះដែលមានផ្ទៃ៣៦ម៉ែត្រការ៉េ បានសាងសង់រួចរាល់ តាមលក្ខណៈ “រឹង៣” គឺធារឹង ជញ្ជាំងរឹង និងដំបូលរឹង ដោយថវិកាសរុប ៦០លានដុង។ នៅក្នុងផ្ទះថ្មីពោរពេញដោយមនោសញ្ចេតនា លោកយាយឱ្យដឹងទាំងទឹកភ្នែក៖ “សូមអរគុណដល់បក្ស រដ្ឋ និងរដ្ឋអំណាចភូមិភាគ ដែលបានយកចិត្តទុកដាក់ និងជួយខ្ញុំមានផ្ទះថ្មីរស់នៅ”។
គ្រួសារពូប៊ុយវ៉ាំងជឺ នៅភូមិថុងញឹក ឃុំហៀបហឹង ចំណុះគ្រួសារក្រីក្រ រស់នៅពឹងលើការងារស៊ីឈ្នួលខួបឆ្នាំ។ ផ្ទះចាស់របស់គាត់ទ្រុឌទ្រោមយ៉ាងខ្លាំង ប៉ុន្តែគាត់ក៏មិនដឹងថា តើពេលណាអាចសង់ឡើងវិញបាន។ បន្ទាប់ពីការត្រួតពិនិត្យ វាយតម្លៃនិងជ្រើសរើសគ្រួសារពូជឺ ក៏បានឧបត្ថម្ភសាងសង់ផ្ទះថ្មីតាមកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម។ ដោយចេះជាងសំណង់ស្រាប់ ពូជឺបានជួយសាងសង់និងលាបពណ៌ជញ្ជាំងក្នុងការសង់ផ្ទះរបស់ខ្លួនផងដែរ។ នៅពេលផ្ទះថ្មីសាងសង់រួចរាល់ គាត់មានអារម្មណ៍រំភើប ឱ្យដឹង៖ “ផ្ទះនេះជាទ្រព្យសម្បត្តិនិងជាសុភមង្គលសម្រាប់គ្រួសារខ្ញុំ។ ពេលមានផ្ទះរឹងមាំដូច្នេះ គ្រួសារខ្ញុំស្ងប់អារម្មណ៍ធ្វើការរកស៊ី អភិវឌ្ឍសេដ្ឋកិច្ច”។
កម្លាំងជំរុញឈានឡើងក្នុងជីវភាព
នៅពីក្រោយផ្ទះថ្មីនីមួយៗនឹងមានច្រើនអ្នកកាត់បន្ថយភាពលំបាក និងមានគ្រួសារបានជំរុញកម្លាំងចិត្តដើម្បីចាប់ផ្តើមជីវភាពថ្មី។ ប្រសិនបើយើងគណនាជាមធ្យមថា គ្រួសារមួយមានសមាជិក៤នាក់ ដូច្នេះផ្ទះជាង ១១.៤០០ខ្នង ដែលបានសាងសង់និងជួសជុល នឹងមានប្រជាជនជាង ៤៥.៦០០នាក់បានរស់នៅក្នុងផ្ទះសម្បែងយ៉ាងសមរម្យ។ នេះមិនមែនតែជាតួលេខទេ វាគឺជាភស្តុតាងនៃអត្ថន័យមនុស្សធម៌ដ៏ជ្រាលជ្រៅ ពោរពេញដោយសេចក្តីស្រឡាញ់និងការចែករំលែក។ ពេលមានកន្លែងរស់នៅលំនឹងប្រជាជនស្ងប់អារម្មណ៍ប្រកបការងាររកទទួលទាន ផ្តោតលើការអភិវឌ្ឍសេដ្ឋកិច្ច ហើយមានឱកាសឈានឡើងក្នុងជីភាព ដើម្បីចាកផុតពីភាពក្រីក្រ។
ពីមុន គ្រួសាររបស់បងត្រឿងហុងយឺ នៅភូមិភឿងហ្វា ឃុំភឿងប៊ិញ រស់នៅក្នុងផ្ទះដែលចាស់ទ្រុឌទ្រោម ភ្លៀងខ្យល់សាចចូល ជីវភាពរស់នៅពិតជាលំបាកណាស់។ តាមរយៈកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម គ្រួសារបងយឺ បានឧបត្ថម្ភសង់ផ្ទះថ្មីប្រកបដោយភាពកក់ក្តៅ។ បងយឺ ឱ្យដឹង៖ “ផ្ទះនេះមិនត្រឹមតែជាកន្លែងរស់នៅមានស្ថិរភាពប៉ុណ្ណោះទេ វានៅទាំងនាំមកនូវក្តីរីករាយនិងជាកម្លាំងជំរុញដ៏ធំធេង ដើម្បីយើងខ្ញុំខិតខំប្រឹងប្រែងឈានឡើង ចាកផុតពីភាពក្រីក្រ។”
លោកស្រីង្វៀងធីង៉ុកឌេប អនុប្រធានគណៈកម្មាធិការប្រជាជនទីក្រុងកឹងធើ ឱ្យដឹងថា ការចូលរួមយ៉ាងសកម្មក្នុងយុទ្ធនាការប្រឡងប្រណាំងទូទៅប្រព័ន្ធនយោបាយរបស់ទីក្រុង បានចូលរួមដោយស្មារតីមុតមាំ មានទំនួលខុសត្រូវខ្ពស់និងការឯកភាពយ៉ាងពេញទំហឹង។ លទ្ធផលទូទាំងទីក្រុងបានសាងសង់និងជួសជុលផ្ទះ១១.៤៦២ខ្នង (ក្នុងនោះ មានផ្ទះសម្រាប់អ្នកមានសគុណនិងសាច់ញាតិយុទ្ធជនពលី១.៨៦០ខ្នង; ផ្ទះសម្រាប់គ្រួសារក្រីក្រ និងគ្រួសារក្បែរក្រ ៩.១៣២ខ្នង; ផ្ទះសម្រាប់គ្រួសារក្រីក្រជាជនជាតិភាគតិច៤៧០ខ្នង) ថវិកាសរុបប្រមាណជាង៦៥១ពាន់លានដុង និងមានការចូលរួមជាកម្លាំងពលកម្មស្ម័គ្រចិត្តជាង ៥៨.០០០ថ្ងៃ។
ទន្ទឹមនឹងនោះ គណៈកម្មាធិការរណសិរ្សមាតុភូមិវៀតណាមទីក្រុងនិងអង្គការមហាជននានា ចលនាកៀរគរសម្រាប់សាងសង់និងជួសជុលផ្ទះមហាសាមគ្គីបាន៨.៧៨៤ខ្នង ជូនដល់គ្រួសារក្រីក្រនិងគ្រួសារក្បែរក្រ ដោយទឹកប្រាក់ចលនាក្នុងសង្គមសរុបជាង ៤៣៩ពាន់លានដុង។
នេះមិនត្រឹមតែជាផ្ទះថ្មីដ៏រឹងមាំប៉ុណ្ណោះទេ វានៅទាំងជានិមិត្តរូបនៃស្មារតីមនុស្សធម៌ មនោសញ្ចេតនាដ៏ជ្រាលជ្រៅ និងការរួមកម្លាំងកាយចិត្តនៃសង្គមទាំងមូល រួមចំណែកបង្កើនគុណភាពរស់នៅនិងកាត់បន្ថយភាពក្រីក្រដោយចីរភាពលើភូមិឋាន។ ក្តីរីករាយនាបច្ចុប្បន្ន បានបណ្ដុះក្ដីជំនឿសម្រាប់អនាគតដ៏ភ្លឺស្វាង៕
អត្ថបទនិងរូបភាព៖ ត្រឿងស៊ើង-ពេជ្រសឿន
អគ្គនិពន្ធនាយកស្តីទី: ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ