| នៅថ្ងៃទី ១០ ខែមករា ឆ្នាំ២០១៨ គណៈលេខាមជ្ឈិមបក្ស បានចេញបទបញ្ជាលេខ ១៩- CT/TW ស្តីពីការពង្រឹងការងារនៅតំបន់ជនរួមជាតិខ្មែរក្នុងស្ថានភាពថ្មី (បទបញ្ជាលេខ១៩)។ ក្រោយរយៈពេលជាង ៥ ឆ្នាំអនុវត្តជាក់ស្ដែង បទបញ្ជាលេខ ១៩ បានក្លាយជាការកំណត់គោលនយោបាយ បង្កជាកម្លាំងចលករជំរុញការអភិវឌ្ឍតំបន់ជនរួមជាតិខ្មែរនៅណាមបូ សមស្របនឹងការរំពឹងទុក។ |
បទបញ្ជាលេខ ១៩ - កំណត់គោលនយោបាយផ្តើមពីការស្នងបន្តនិងអភិវឌ្ឍន៍
លោក ផាមវ៉ាន់ហេវ អនុលេខាប្រចាំការនៃគណៈកម្មាធិការបក្សក្រុង ប្រធានក្រុមប្រឹក្សាប្រជាជនក្រុងកឹងធើ អញ្ជើញទៅសួរសុខទុក្ខ និងប្រសិទ្ធពរដល់ព្រះសង្ឃ អាចារ្យ បងប្អូនជនរួមជាតិខ្មែរ នៅវត្តពោធិ៍សំរោង (ខណ្ឌអូម៉ូង) ក្នុងឱកាសបុណ្យចូលឆ្នាំថ្មីប្រពៃណីរបស់ជនរួមជាតិខ្មែរ។ រូបថត៖ ង៉ុកក្វៀង
រួមជាមួយបណ្តាជនជាតិភាគតិចដទៃទៀត ជនរួមជាតិខ្មែរតែងបានគណៈកម្មាធិការបក្សគ្រប់លំដាប់ថ្នាក់ រដ្ឋអំណាចរណសិរ្សមាតុភូមិនិងអង្គការមហាជននានាពីមជ្ឈិមដល់មូលដ្ឋាន យកចិត្តទុកដាក់ បង្កលក្ខណសម្បត្តិដើម្បីពង្រីកលទ្ធភាពផ្ទាល់ខ្លួន សមាហរណកម្មនិងអភិវឌ្ឍ។ ក្នុងនោះ បទបញ្ជាលេខ ១៩ ត្រូវបានចាត់ជាការកំណត់គោលនយោបាយប្រកបដោយលក្ខណៈស្នងបន្ត ធ្វើបច្ចុប្បន្នភាពនិងបំពេញនូវខ្លឹមសារសំខាន់ៗនៃបទបញ្ជាលេខ ៦៨-CT/TW ចុះថ្ងៃទី១៨ ខែមេសា ឆ្នាំ១៩៩១ របស់គណៈលេខា ស្តីពីការងារនៅតំបន់ជនរួមជាតិខ្មែរ(បទបញ្ជាលេខ៦៨)…។
* បទបញ្ជាផ្តើមពីការស្នងបន្ត បង្កសម្ទុះថ្មី
តំបន់ណាមបូមានជនជាតិភាគតិចរស់នៅ ៥៣ ជនជាតិ ដោយមានមនុស្សជាង ២,៣ លាននាក់។ ក្នុងនោះ ជនរួមជាតិខ្មែរច្រើនបំផុត ដោយមានមនុស្សប្រមាណ ១,៣៦ លាននាក់ ស្រូបអត្រាប្រមាណ៤,៤៥% នៃចំនួនប្រជាជនក្នុងទូទាំងតំបន់ណាមបូ។
លោក សើុងភឿកហ្វាង អតីតអនុរដ្ឋមន្ត្រី អនុប្រធានគណៈកម្មាធិការជនជាតិ ឱ្យដឹង៖ ការដែលគណៈលេខាមជ្ឈិមបក្ស បានដាក់ចេញបទបញ្ជាលេខ ៦៨ និងបទបញ្ជាលេខ ១៩ នៅពីរដំណាក់កាលផ្សេងគ្នា មានអត្ថន័យសំខាន់ណាស់សម្រាប់តំបន់ជនរួមជាតិខ្មែរណាមបូ។ បទបញ្ជាលេខ ៦៨ មានសារៈសំខាន់ពិសេសក្នុងការជម្នះចំណុចអវិជ្ជមាន ការខ្វះចន្លោះរបស់ភូមិភាគមួយចំនួនក្នុងការអនុវត្តគោលនយោបាយជនជាតិ គោលនយោបាយសាសនាសម្រាប់ជនរួមជាតិខ្មែរនិងពុទ្ធសាសនាទក្ខិណនិកាយខ្មែរ នៅដើមទសវត្សរ៍ ៨០ នៃសតវត្សរ៍ទី ២០ ។ បទបញ្ជាលេខ ៦៨ បានដោះស្រាយមួយជំហានៗ នៅរាល់បញ្ហាលំបាក កង្វល់ជាប់ទាក់ទិន និងពង្រឹងទំនុកចិត្តក្នុងជនរួមជាតិលើការដឹកនាំរបស់បក្សនិងរដ្ឋ ចំពោះតំបន់ជនជាតិខ្មែរ។ ពង្រឹងផែនមហាសាមគ្គីជនជាតិ សាសនា ពូនផ្តុំមនោសញ្ចេតនាភូមិផងរបងជាមួយ និងស្មារតីជាតិ ជនជាតិរបស់ជនរួមជាតិខ្មែរណាមបូ។ លទ្ធផលនៃការអនុវត្តបទបញ្ជាបានរួមចំណែកជាវិជ្ជមានក្នុងការដោះស្រាយការលំបាកជាបន្ទាន់ ជម្នះបន្តិចម្តងៗភាពខ្វះចន្លោះក្នុងដំណាក់ការអភិវឌ្ឍសេដ្ឋកិច្ច-សង្គម បង្វែរពីដំណាក់កាលផ្គត់ផ្គង់ទៅជាសម័យផ្លាស់ថ្មីរបស់ប្រទេសជាតិ។ “គោលការណ៍ គោលនយោបាយអំពីជនជាតិ សាសនារបស់បក្ស រដ្ឋ ក្នុងបទបញ្ជាលេខ ៦៨ ដែលបានបទបញ្ជាលេខ ១៩ ស្នងបន្តនិងធ្វើបច្ចុប្បន្នភាពបន្ថែមពីទស្សនៈផ្លាស់ថ្មី យោងតាមសេចក្តីសម្រេចរបស់បក្សនៅរាល់មហាសន្និបាត។ ខ្លឹមសារគោលនយោបាយនៃបទបញ្ជាលេខ១៩ គ្រប់ជ្រុងជ្រោយ ព្រមៗគ្នា គ្របដណ្តប់លើគ្រប់វិស័យនៃភូមិសាស្ត្រតំបន់ជនរួមជាតិខ្មែរណាមបូ។ គោលនយោបាយអមដោយការរៀបចំប្រភពកម្លាំងរបស់មជ្ឈិម ភូមិភាគ ផ្គួបបញ្ចូលគោលនយោបាយជនជាតិរួម និងកម្មវិធីគម្រោងជាមួយដំណោះស្រាយ ភាគកម្រិតជាក់ស្តែង។ នៅក្នុងបទបញ្ជាលេខ ១៩ សកម្មភាពសាសនាផ្សារភ្ជាប់នឹងជនជាតិ ត្រូវបានអនុវត្តប្រកបដោយភាពឈ្លាសវៃនិងមានលក្ខណៈពិសេសដោយឡែកផ្អែកតាមទ្រឹស្តីពុទ្ធសាសនា ផ្សារភ្ជាប់នឹងលក្ខណៈពិសេសរបស់ជនជាតិខ្មែរ។ល។ ការងារត្រួតពិនិត្យ ដាស់តឿន សរុបបណ្តោះអាសន្ន បូកសរុបវាយតម្លៃការរៀបចំអនុវត្តគោលនយោបាយ បានមជ្ឈិមនិងភូមិភាគនានាអនុវត្តយ៉ាងហ្មត់ចត់ បង្កសម្ទុះថ្មីសម្រាប់តំបន់ជនរួមជាតិខ្មែរអភិវឌ្ឍគ្រប់ជ្រុងជ្រោយ”-លោក សើុងភឿកហ្វាង បានចែករំលែកដូច្នេះ។
* ការប្តេជ្ញាចិត្តថ្មី
ជនរួមជាតិខ្មែរនៅណាមបូ រស់នៅជាសហគមន៍ លាយឡំជាមួយនឹងជនជាតិកិញ ជនជាតិចិន និងជនជាតិផ្សេងៗមួយចំនួនទៀតរស់នៅប្រមូលផ្តុំសំខាន់នៅខេត្ត ក្រុងទាំង ៩ តំបន់និរតីទិស (សុកត្រាំង ត្រាវិញ គៀងយ៉ាង អាងយ៉ាង បាកលីវ កាម៉ាវ វិញឡុង ហូវយ៉ាងនិងក្រុងកឹងធើ)។ មួយចំនួនរស់នៅក្រុងហូជីមិញ និងបណ្តាខេត្តតំបន់ភូមិភាគអាគ្នេយ៍។ ក្នុងនោះ ជនរួមជាតិខ្មែរភាគច្រើនរស់នៅតំបន់ភ្នំ តំបន់ដាច់ស្រយាល ប្រកបរបរកសិកម្មជាចម្បង ជីវភាពនៅជួបការលំបាកច្រើន។ អាស្រ័យហេតុនេះ ការផ្សព្វផ្សាយបទបញ្ជាលេខ១៩ ត្រូវបានភូមិភាគជាច្រើនយកចិត្តទុកដាក់ពិសេស បង្ហាញច្បាស់ពីការប្តេជ្ញាចិត្តអនុវត្ត។
នៅខេត្តត្រាវិញ មានជនរួមជាតិខ្មែររស់នៅជាង ៣១៨ ពាន់នាក់ ស្រូបអត្រាជាង ២៤% នៃចំនួនប្រជាជនទូទាំងខេត្ត។ ការផ្សព្វផ្សាយបញ្ជ្រាបបទបញ្ជាលេខ១៩ គណៈអចិន្ត្រៃយ៍នៃគណៈកម្មាធិការបក្សខេត្តត្រាវិញ បានកសាងផែនការលេខ៨១-KH/TU ចុះថ្ងៃទី ២៣ ខែមេសា ឆ្នាំ២០១៨ ស្តីពីការអនុវត្តបទបញ្ជាលេខ ១៩ ។ ទន្ទឹមនឹងនោះ គណៈកម្មាធិការបក្សខេត្តត្រាវិញ ក៏បានចេញសេចក្តីសម្រេចលេខ ០៦-NQ/TU ចុះ ថ្ងៃទី ៨ ខែតុលា ឆ្នាំ២០២១ ស្តីពីការបន្តអភិវឌ្ឍន៍គ្រប់ជ្រុងជ្រោយនៅតំបន់ជនរួមជាតិខ្មែរត្រាវិញ ដំណាក់កាល ២០២១ - ២០២៥ កំណត់ទិសដៅដល់ឆ្នាំ២០៣០។ល។ ក្រុមប្រឹក្សាប្រជាជន គណៈកម្មាធិការប្រជាជន គណៈកម្មាធិការរណសិរ្សមាតុភូមិ អង្គការនយោបាយ- សង្គមខេត្តត្រាវិញ និងមូលដ្ឋាននានាក្នុងខេត្ត ក៏បានរៀបចំផ្សព្វផ្សាយបញ្ជ្រាបនិងអនុវត្តយ៉ាងមានប្រសិទ្ធភាពពីគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ អំពីការងារជនជាតិ ព្រមទាំងកសាងនិងចែងជាធរមានឯកសារបញ្ជាក់ពីការអនុវត្តការងារជនជាតិលើភូមិសាស្ត្រខេត្ត ផ្សារភ្ជាប់នឹងការអនុវត្តបទបញ្ជាលេខ ១៩ និងភារកិច្ចនយោបាយគ្រប់ស្ថាប័ននិងអង្គភាពនីមួយៗ។
លោក ផាមវ៉ាន់ហេវ អនុលេខាប្រចាំការនៃគណៈកម្មាធិការបក្សក្រុង ប្រធានក្រុមប្រឹក្សាប្រជាជនក្រុងកឹងធើ ឱ្យដឹង៖ “បន្ទាប់ពីបទបញ្ជាលេខ១៩ ប្រកាសដាក់ចេញជាធរមាន គណៈអចិន្ត្រៃយ៍នៃគណៈកម្មាធិការបក្សក្រុងកឹងធើ បានចេញសារលិខិតជាផ្លូវការ សំណូមពរដល់គណៈកម្មាធិការបក្ស គ្រប់លំដាប់ថ្នាក់ អង្គការបក្ស រដ្ឋអំណាច រណសិរ្សមាតុភូមិនិងអង្គការមហាជននានា ក្នុងក្រុង អនុវត្តល្អនូវខ្លឹមសារសំខាន់ៗក្នុងបទបញ្ជា។ យោងតាមរយៈនោះ គណៈកម្មាធិការបក្សគ្រប់លំដាប់ថ្នាក់ រដ្ឋអំណាច រណសិរ្សមាតុភូមិនិងអង្គការនយោបាយ-សង្គមគ្រប់ថ្នាក់ តែងយកចិត្តទុកដាក់ដឹកនាំផ្សព្វផ្សាយអនុវត្តល្អនូវគោលការណ៍ សេចក្តីសម្រេចរបស់បក្ស ច្បាប់របស់រដ្ឋ គោលនយោបាយ កម្មវិធីនិងគម្រោងអភិវឌ្ឍសេដ្ឋកិច្ច-សង្គមនៅតំបន់ជនរួមជាតិខ្មែរ។ ទន្ទឹមនឹងនោះ បង្កលក្ខណសម្បត្តិដល់ជនរួមជាតិភាគតិចនិយាយរួម ជនរួមជាតិខ្មែរនិយាយដោយឡែក ជាជំហានៗលើកកម្ពស់ជីវភាពសម្ភារៈ ស្មារតី។ល។ សកម្មភាពអភិរក្ស ថែរក្សានិងពង្រីកអត្តសញ្ញាណវប្បធម៌ប្រពៃណីរបស់ជនរួមជាតិខ្មែរ ត្រូវបានក្រុងយកចិត្តទុកដាក់អនុវត្ត ការងារថែទាំសុខភាពជនរួមជាតិត្រូវបានអនុវត្តល្អ។ល។ អំពីការអនុវត្តបទបញ្ជាលេខ ១៩ ក្នុងរយៈពេលកន្លង លោក ណុងក្វឹកត្វឹង អនុប្រធានគណៈកម្មការជំនាញការបក្សនៃគណៈកម្មាធិការជនជាតិ វាយតម្លៃ៖ គ្រប់ក្រសួង គណៈ ផ្នែក មជ្ឈិម គណៈកម្មាធិការបក្សគ្រប់លំដាប់ថ្នាក់ រដ្ឋអំណាចភូមិភាគនានា តែងផ្សព្វផ្សាយ បញ្ជ្រាបស៊ីជម្រៅពីគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ អំពីការងារជនជាតិនិយាយរួម និងការងារជនជាតិតំបន់ជនរួមជាតិខ្មែរនិយាយដោយឡែក។ ផ្តើមពីគោលការណ៍ គោលមាគ៌ា គោលនយោបាយជាក់ស្តែង បានបង្ហាញពីការយកចិត្តទុកដាក់របស់បក្ស រដ្ឋ គ្រប់ថ្នាក់ គ្រប់ផ្នែកចំពោះជនរួមជាតិខ្មែរ ជនរួមជាតិជឿជាក់លើការដឹកនាំរបស់បក្ស និងការគ្រប់គ្រងរបស់រដ្ឋ ត្រូវបានពង្រឹងពង្រីកជាបន្ត។ ជនរួមជាតិអនុវត្តល្អនូវគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ លើកកម្ពស់ឆន្ទៈខ្លួនទីពឹងខ្លួន ខ្នះខ្នែងច្នៃប្រតិដ្ឋក្នុងការពលកម្មផលិត ធ្វើអាជីវកម្ម សាមគ្គី ផ្សារភ្ជាប់នឹងបណ្តាជនជាតិលើភូមិសាស្ត្រ ខិតខំរួមជាមួយជនរួមជាតិបណ្តាជនជាតិ គ្រប់ថ្នាក់ គ្រប់ផ្នែកអនុវត្តជោគជ័យទិសដៅ ភារកិច្ចអភិវឌ្ឍសេដ្ឋកិច្ច-សង្គមនៅភូមិភាគ៕
តំបន់ជនរួមជាតិខ្មែរ បាននិងកំពុងអភិវឌ្ឍគ្រប់ជ្រុងជ្រោយ
ឥឡូវបើបានមកកាន់តំបន់ជនរួមជាតិខ្មែរ ឬក៏តំបន់ជនរួមជាតិភាគតិចនៅណាមបូ ទើបឃើញច្បាស់ពីភាពផ្លាស់ថ្មី។ មិនត្រឹមតែភូមិស្រុកស៊ីវិល័យទំនើបទាន់សម័យប៉ុណ្ណោះទេ ជីវភាពសម្ភារៈ ស្មារតីរបស់ជនរួមជាតិខ្មែរក៏បានលើកកម្ពស់ផងដែរ។ នោះជាលទ្ធផលនៃការអនុវត្តគោលនយោបាយជនជាតិ ពិសេសក្នុងនោះគឺមានការចូលរួមក្នុងទូទាំងប្រព័ន្ធនយោបាយដែលនាំយកបទបញ្ជាលេខ ១៩ ចូលក្នុងជីវភាព។
កសិករចំណាស់ ហ្វិញម៉ាក ជាជនជាតិខ្មែរនៅភូមិកិញដឹង B ឃុំខាញ់ហឹង ស្រុកត្រឹងវ៉ាន់ថើយ ខេត្តកាម៉ាវ ជាមួយផ្ទះដ៏ធំទូលាយដែលប្ដីប្រពន្ធលោកសន្សែសន្សំសាងសង់។
* ភូមិស្រុកកាន់តែស៊ីវិល័យ ទំនើបពីមួយថ្ងៃទៅមួយថ្ងៃ
ឈានចូលវ័យ ៧០ ឆ្នាំ កសិករចំណាស់ ហ្វិញម៉ាក ជាជនជាតិខ្មែរនៅភូមិកិញដឹង B ឃុំខាញ់ហឹង ស្រុកត្រឹងវ៉ាន់ថើយ ខេត្តកាម៉ាវ បានឃើញផ្ទាល់ភ្នែកពីភាពវិវឌ្ឍនៃតំបន់ជនបទមិនដឹងជាប៉ុន្មានលើកន្លងនោះទេ។ អ៊ំបានឱ្យដឹង៖ កាលពីមុននៅទីនេះធ្វើស្រូវតែមួយមុខ។ ឆ្នាំខ្លះបានផលតែស្រូវចុះថ្ងៃ ឆ្នាំខ្លះបានថ្លៃ តែស្រូវខុស។ ផ្លូវថ្នល់ពិបាក ធ្វើដំណើរទៅមក ការដោះដូរមិនអំណោយផល ម្ល៉ោះហើយទូទាំងភូមិដែលមាមីងខ្មែររស់នៅ សង់ផ្ទះស្លឹកស្ទើរទាំងអស់។ល។ ក្រោយពីបានរដ្ឋជីកប្រឡាយ ពង្រីកផ្លូវជនបទដោយចាក់បេតុង។ ចំណែកកសិករបានហ្វឹកហាត់បច្ចេកទេសដាំដុះ ចិញ្ចឹមសត្វ ដើម្បីអនុវត្តទៅលើវាលស្រែឱ្យមានប្រសិទ្ធភាព។ អាស្រ័យហេតុនោះ ជីវភាពរបស់ជនរួមជាតិខ្មែរនៅទីនេះមានការរីកចម្រើនពីមួយថ្ងៃទៅមួយថ្ងៃ។ មានផ្ទះឥដ្ឋរឹងមាំ ទំនើប បានសង់ឡើងកាន់តែច្រើនឡើងៗ។ សម្លឹងឃើញតំបន់ជនបទឥឡូវដូចជាបានផ្លាស់អាវថ្មីអ៊ីចឹង។ “ខ្ញុំមានកូន ២ នាក់ ម្នាក់ទៅធ្វើការនៅស្រុកឆ្ងាយ ឯម្នាក់ទៀតកំពុងសិក្សានៅហាណូយ។ ពេលនឹកកូនៗ ខ្ញុំក៏ហៅទូរស័ព្ទតាមបណ្តាញ zalo គឺជួបគ្នាភ្លាម។ល។ សុខភាពខ្ញុំមិនដូចមុនទៀត ប៉ុន្តែការងារស្រែចម្ការ សុទ្ធតែមានម៉ាស៊ីនជំនួយទាំងអស់។ បានដូច្នោះ ទើបខ្ញុំរ៉ាប់រងបានការងារស្រែចម្ការ។ តំបន់ជនបទសព្វថ្ងៃកាន់តែទំនើបពីមួយថ្ងៃទៅមួយថ្ងៃ” អ៊ំហ្វិញម៉ាក បានចែករំលែកដូច្នោះ។
រឿងរ៉ាវរបស់កសិករចំណាស់ ហ្វិញម៉ាក នៅដល់ខេត្តកាម៉ាវដាច់ស្រយាល បានបញ្ជាក់មួយផ្នែកណាពីភាពរីកចម្រើននៅតំបន់ជនរួមជាតិភាគតិចនិយាយរួម តំបន់ជនរួមជាតិខ្មែរនិយាយដោយឡែក។ ហើយតាមប្រសាសន៍លោក ចៅអាន អនុប្រធានគណៈជនជាតិខេត្តអាងយ៉ាង៖ “នោះអាស្រ័យទូទាំងប្រព័ន្ធនយោបាយបានចូលរួមព្រមគ្នាអនុវត្តគោលនយោបាយជនជាតិ ក្នុងនោះមានអនុវត្តបទបញ្ជាលេខ ១៩ ម្ល៉ោះហើយហេដ្ឋារចនាសម្ព័ន្ធសេដ្ឋកិច្ច- សង្គមតំបន់មានជនរួមជាតិខ្មែររស់នៅកុះករ ឃុំ តំបន់ព្រំដែន។ល។ បានវិនិយោគនិងអភិវឌ្ឍន៍ ឆ្លើយតបតម្រូវការផលិតកម្មនិងជីវភាពរបស់ប្រជាជនកាន់តែល្អប្រសើរពីមួយថ្ងៃទៅមួយថ្ងៃ”។ នៅខេត្តអាងយ៉ាង មានប្រជាជនជាជនជាតិភាគតិចចំនួន ៥,២៦% ក្នុងនោះជនរួមជាតិខ្មែរស្រូបអត្រាដល់ទៅ៤,២% ។ លោកចៅអាន ចែករំលែក៖ “មកទល់សព្វថ្ងៃ តំបន់ជនបទដែលមានជនរួមជាតិខ្មែររស់នៅកុះករ គឺមានជំហានវិវឌ្ឍន៍ច្បាស់ក្រឡែត ជាក់ស្ដែង ចំនួនឃុំដែលមានផ្លូវចាក់កៅស៊ូ បេតុងចុះដល់មជ្ឈមណ្ឌលឃុំ អនុសង្កាត់ ភូមិជិត ១០០%។ ឃុំទាំង ១០០% មានដំណាក់សុខាភិបាល សំណង់ ធារាសាស្រ្ត ស្ថានីយផ្សាយសំឡេង បណ្ដាញអគ្គិសនីជាតិឬអគ្គិសនីជនបទ (គ្រួសារ១០០% មានអគ្គិសនីប្រើប្រាស់) ចំនួន គ្រួសារប្រើប្រាស់ទឹកស្អាតស្របអនាម័យ កើនឡើងពីមួយថ្ងៃទៅមួយថ្ងៃសម្រេចអត្រា ៩៨% ”។
យោងតាមគណៈកម្មការជំនាញការបក្សនៃគណៈជនជាតិ ការអភិវឌ្ឍសេដ្ឋកិច្ច លើកកម្ពស់ជីវភាពរបស់ជនរួមជាតិខ្មែរ តាមបទបញ្ជាលេខ ១៩ ត្រូវបានគ្រប់ថ្នាក់ គ្រប់ផ្នែក ភូមិភាគយកចិត្តទុកដាក់អនុវត្តរួមចំណែកលើកកម្ពស់ជីវភាពរបស់ជនរួមជាតិ។ ជាពិសេស ចំនួនគ្រួសារខ្មែរដែលខ្វះដីសង់ផ្ទះ ដីផលិតកម្ម ទឹកស្អាតប្រើប្រាស់និងចំនួនពលករមិនទាន់ឆ្លងកាត់បណ្តុះបណ្ដាលមុខរបរ គឺថយចុះជាលំដាប់ពីមួយថ្ងៃទៅមួយថ្ងៃ; អត្រាគ្រួសារជនជាតិខ្មែរក្រីក្រដំណាក់កាល ២០១៨- ២០២៣ ថយចុះមធ្យមភាគពី២- ៤%/ឆ្នាំ។ ឆ្នាំ២០១៨ ប្រាក់ចំណូលមធ្យមភាគលើមនុស្សម្នាក់ក្នុងជនរួមជាតិខ្មែរគឺ ២១ លានដុង/ម្នាក់/ឆ្នាំ។ រហូតដល់ឆ្នាំ ២០២៣ ចំនួនតួលេខនេះសម្រេចដល់២៥លានដុង/ម្នាក់/ឆ្នាំ។ នៅភូមិភាគមួយចំនួនដូចគៀងយ៉ាង សុកត្រាំង កាម៉ាវ ប្រាក់ចំណូលមធ្យមភាគលើមនុស្សម្នាក់ក្នុងជនរួមជាតិខ្មែរគឺជាង៥០លានដុង/ម្នាក់/ឆ្នាំ។ ទន្ទឹមនឹងនោះ ការងារអប់រំ-បណ្តុះបណ្ដាលនិងថែទាំសុខភាពប្រជាជននៅតំបន់ជនរួមជាតិខ្មែរមានភាពជឿនលឿនយ៉ាងច្រើន; សិទ្ធិស្មើភាពរវាងបណ្ដាជនជាតិជាមូលដ្ឋាន ត្រូវបានធានា; សាមគ្គីភាពរវាងបណ្ដាជនជាតិបន្តបានពង្រឹងនិងពង្រីក។ ប្រព័ន្ធនយោបាយមូលដ្ឋាននៅតំបន់ជនជាតិត្រូវបានពង្រឹង កងជួរកម្មាភិបាលត្រូវបានបង្រ្គប់កម្លាំងបន្តិចម្តងៗ ឆ្លើយតបនឹងតម្រូវការ ភារកិច្ចកាន់តែល្អប្រសើរ។ល។ ។
* គិតគូរបានល្អខាងជីវភាពស្មារតី
ជនរួមជាតិខ្មែរណាមបូមានជីវភាពវប្បធម៌ស្មារតីយ៉ាងសម្បូរបែប ជាមួយនឹងពិធីបុណ្យល្អប្រណីតជាច្រើន មានដូច៖ បុណ្យចូលឆ្នាំថ្មី បុណ្យសែនដូនតាដំណាលពេលជាមួយនឹងពិធីប្រណាំងគោនៅតំបន់បៃណុយ (ស្រុកទ្រីតូង ទិញបៀង ខេត្តអាងយ៉ាង) ពិធីបុណ្យអកអំបុក រួមមានពិធីប្រណាំងទូក-ង រវាងស្រុកភូមិឯទៀតៗ។
ព្រះតេជព្រះគុណ លីហ៊ុង អនុប្រធានគណៈអភិបាលសមាគមពុទ្ធសាសនាវៀតណាមក្រុងកឹងធើ ព្រះចៅអធិការវត្តពិទូឃោសរង្សី មានថេរដីកា៖ រយៈពេលកន្លង ការងារអភិរក្សនិងពង្រីកវប្បធម៌ជនរួមជាតិខ្មែរ ត្រូវបានគណៈ ផ្នែក គ្រប់លំដាប់ថ្នាក់បន្តការថែរក្សានិងអភិវឌ្ឍន៍។ ពិធីបុណ្យវប្បធម៌ ប្រវេណីយ៉ាងល្អប្រសើររបស់ជនរួមជាតិ តែងបានរដ្ឋអំណាចគ្រប់លំដាប់ថ្នាក់យកចិត្តទុកដាក់ និងបង្កលក្ខណសម្បត្តិ រៀបចំ។ រៀងរាល់ឆ្នាំ ក្នុងឱកាសបុណ្យចូលឆ្នាំថ្មី បុណ្យសែនដូនតារបស់ជនរួមជាតិខ្មែរ គណៈកម្មាធិការបក្ស រដ្ឋអំណាចគ្រប់លំដាប់ថ្នាក់ បានរៀបចំសកម្មភាពជាក់ស្ដែង និងមានអត្ថន័យជាច្រើន; ពិធីជួបជុំប្រវេណី សួរសុខទុក្ខ ប្រសិទ្ធពរ ប្រគេននិងជូនអំណោយដល់សមាគមព្រះសង្ឃសាមគ្គីស្នេហាជាតិនៅតាមវត្តខ្មែរ អ្នកមុខអ្នកការ អ្នកមានប្រជាប្រិយ គ្រួសារគោលនយោបាយគំរូ គ្រួសារជនជាតិខ្មែរក្រីក្រ។ល។
សកម្មភាពវប្បធម៌របស់ជនរួមជាតិខ្មែរ ត្រូវបានភូមិភាគនានាក្នុងតំបន់ណាមបូ យកចិត្តទុកដាក់ជាពិសេស។ យោងតាមនោះ ទិវាវប្បធម៌ កីឡានិងទេសចរណ៍ជនរួមជាតិខ្មែរ ត្រូវបានប្រារព្ធធ្វើឡើង ៣ ឆ្នាំម្តង និងតាមកាលកំណត់ប្ដូរវេននៅតាមខេត្ត ក្រុងដែលមានជនរួមជាតិខ្មែររស់នៅកុះករ។ ពិធីបុណ្យអកអំបុក-ប្រណាំងទូក-ងខេត្តសុកត្រាំង ត្រួវបានក្រសួងវប្បធម៌ កីឡា និងទេសចរណ៍ ទទួលស្គាល់រៀបចំដោយទ្រង់ទ្រាយធំនៅតំបន់វាលរាបទន្លេគឺវឡុងរៀងរាល់២ឆ្នាំម្ដង។ ទិវាវប្បធម៌ កីឡានិងទេសចរណ៍ជនរួមជាតិខ្មែរនៅខេត្តគៀងយ៉ាង អាងយ៉ាង វិញឡុង; សមោសរសិល្បៈ មហាជនខ្មែរនិងប្រឡងបង្ហាញម៉ូដសម្លៀកបំពាក់ប្រពៃណីខ្មែរខេត្តសុកត្រាំង ត្រាវិញ ត្រូវបានប្រារព្ធធ្វើឡើងជារៀងរាល់ឆ្នាំ។ល។ ទាំងអស់នេះកាន់តែធ្វើឱ្យសម្បូរបែបជីវភាពរបស់ជនរួមជាតិ។
ជនរួមជាតិខ្មែរភាគច្រើនកាន់ពុទ្ធសាសនា ទក្ខិណនិកាយខ្មែរ។ វត្តអារាមនិងសហគមន៍ជនជាតិខ្មែរ មានទំនាក់ទំនងជិតសិ្នទ្ធជាមួយគ្នា។ ជនជាតិខ្មែរចាត់ទុកព្រះសង្ឃជា “គ្រូ” ផ្ដល់ចំណេះដឹងសិក្សាខាងជីវភាព ស្មារតី និងជាស្រែបុណ្យដ៏ប្រសើរដែលអាចជួយចម្លងបុណ្យកុសលតាមរយៈការធ្វើបុណ្យទាន។ល។ ព្រោះហេតុនោះ ការងារបណ្តុះបណ្ដាល បំពាក់បំប៉ននិងអភិវឌ្ឍកងជួរអ្នកមុខអ្នកការសាសនា ក៏បានផ្ដោតការយកចិត្តទុកដាក់។ ការបួសរៀនរបស់ព្រះសង្ឃ បោះពុម្ពសៀវភៅ ជាវព្រះត្រៃបិដកសម្រាប់បម្រើការសិក្សាស្រាវជ្រាវ ត្រូវបានគណៈកម្មាធិការបក្ស រដ្ឋអំណាចយកចិត្តទុកដាក់ចង្អុលការ ណែនាំ បង្កលក្ខណៈដើម្បីព្រះសង្ឃខ្មែររៀនសូត្របង្កើនចំណេះដឹងលើគ្រប់វិស័យ។ អាស្រ័យហេតុនេះហើយ ទើបមានមតិជាច្រើនយល់ស្របថា បទបញ្ជាលេខ១៩ គឺសមស្របជាមួយនឹងឆន្ទៈបក្សនិងទឹកចិត្តប្រជាជន ក្នុងការបណ្តុះបណ្ដាលបញ្ញវន្តសង្ឃ បរិញ្ញាបត្រពុទ្ធិកសិក្សាផ្នែកទក្ខិណនិកាយខ្មែរ។ នេះជាបធានបទសំខាន់សម្រាប់អនុវត្ត ទិសដៅលើកកម្ពស់ប្រជាបញ្ញា បំពាក់បំប៉នប្រភពធនធាន រួមចំណែកបម្រើប្រទេសជាតិ។ ហើយសំខាន់ជាងទៀត ប្រការនេះឆ្លើយតបបានបំណងព្រះសង្ឃនិងជនរួមជាតិខ្មែរនៅតំបន់ណាមបូ។ ផ្ដើមពីនោះ រួមចំណែកធ្វើឱ្យជាក់ស្ដែងនូវគោលការណ៍ គោលនយោបាយរបស់បក្ស ច្បាប់របស់រដ្ឋ សំដៅផ្សព្វផ្សាយ កៀរគរព្រះសង្ឃ ជនរួមជាតិខ្មែរសកម្មចូលរួមអភិរក្ស ពង្រីកអត្តសញ្ញាណវប្បធម៌ជនជាតិ។ល។ រួមចំណែកកសាងជីវភាពវប្បធម៌នៅតំបន់តាំងទីលំនៅ កសាងជបទថ្មីក្រុងស៊ីវិល័យ; រួមចំណែកធ្វើឱ្យកាន់តែសម្បូរបែបខាងជីវភាពស្មារតីរបស់ជនរួមជាតិខ្មែរក្នុងស្ថានភាពថ្មី៕
ក្រុមអ្នកយកព័ត៌មានកាសែតកឹងធើភាសាខ្មែរ
ពាក្យគន្លឹះ
អគ្គនិពន្ធនាយក: ត្រឿងវ៉ាំងច្វៀន អគ្គនិពន្ធនាយករងទទួលបន្ទុកភាសាខ្មែរ: ង្វៀងថាញត្វឹង
លិខិតអនុញាតលេខ៧៨៩/GP-BTTTT អាស្រ័យក្រសួងពត៌មាននិងសារគមនាគមន៍ផ្តល់ថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ ទីក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម : quangcao@baocantho.com.vn
សរសេរច្បាស់ប្រភព"សារព័ត៌មានអេឡិចត្រូនិកកឹងធើ" នៅពេលផ្សាយបន្តពីwebsite នេះ។
អភិវឌ្ឍន៍ដោយ:
