កម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម មិនត្រឹមតែជាការអនុវត្តជាក់ស្តែងនូវគោលនយោបាយដ៏ធំរបស់បក្សនិងរដ្ឋ ស្តីពីសុខុមាលភាពសង្គមប៉ុណ្ណោះទេ ថែមទាំងរីកសាយភាយស្មារតីសាមគ្គី និងការចែករំលែកក្នុងសហគមន៍ទៀតផង។ ផ្ដើមពីកិច្ចចង្អុលការយ៉ាងម៉ឺងម៉ាត់របស់មជ្ឈិមរហូតដល់ការចូលរួមព្រមៗគ្នានៃទូទាំងប្រព័ន្ធនយោបាយ និងប្រជាជនទីក្រុងកឹងធើ ផ្ទះជាង១១.៤០០ខ្នង បានសាងសង់និងជួសជុល ផ្ដល់សេចក្ដីសុខដល់ប្រជាជនក្នុងការរស់នៅ បញ្ជាក់ពីសេចក្តីស្រឡាញ់ជនរួមជាតិ មនោសញ្ចេតនាជនជាតិ។
អត្ថបទទី ១ ឈានដល់គោលដៅមុន
ទីក្រុងកឹងធើ បាន “ឈានដល់គោលដៅមុនកំណត់” ក្នុងកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម បង្ហាញពីស្មារតីទទួលខុសត្រូវ និងមនោសញ្ចេតនាដ៏ជ្រាលជ្រៅចំពោះប្រជាជន។ មានអង្គការ សហគ្រាសនិងបុគ្គលជាច្រើន បានព្រួតដៃគ្នាដើម្បីក្ដីស្រមៃមានផ្ទះសម្បែងរស់នៅត្រឹមត្រូវរាប់ម៉ឺនគ្រួសារក្លាយជាការពិត។
ស្មារតីប្តូរផ្ដាច់ និងការទទួលខុសត្រូវ
កម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម មានអត្ថន័យដ៏សំខាន់ និងមនុស្សធម៌ដ៏ខ្ពង់ខ្ពស់ ដូច្នេះ គណៈកម្មាធិការបក្ស និងរដ្ឋអំណាចគ្រប់លំដាប់លើភូមិឋានទីក្រុងកឹងធើ បានផ្សព្វផ្សាយអនុវត្តជាមួយនឹងស្មារតីប្រញឹកនិងប្តូរផ្ដាច់បំផុត។ ជាមួយគ្នានេះ ក៏បានខិតខំប្រមូលផ្ដុំធនធានពីថវិកា និងអំពាវនាវការរួមចំណែករបស់សហគ្រាស អង្គការនយោបាយ - សង្គម និងសប្បុរសជនទាំងក្នុងនិងក្រៅទីក្រុង ដើម្បីព្រួតដៃអនុវត្តកម្មវិធីនេះឱ្យបានជោគជ័យ។
សមាជិកក្លឹបជួសជុលផ្ទះជូនគ្រួសារក្រីក្រ នៅឃុំថាញ់ស្វឹង បានជួយប្រជាជនក្នុងការសង់ផ្ទះថ្មី។
គណៈកម្មាធិការបក្សគ្រប់លំដាប់ថ្នាក់ ចាប់ពីទីក្រុងរហូតដល់ឃុំ សង្កាត់ បានចូលរួមយ៉ាងសកម្ម មិនត្រឹមតែបញ្ឈប់ត្រង់ការប្រកាសដាក់ចេញឯកសារចង្អុលការនោះទេ ថែមទាំងចុះត្រួតពិនិត្យផ្ទាល់ ស្វែងយល់អំពីស្ថានភាពគ្រួសារនីមួយៗ ពិនិត្យអង្កេតតម្រូវការនិងលក្ខខណ្ឌនៃការសាងសង់ ហើយចលនាប្រភពធនធានដើម្បីឧបត្ថម្ភ។ ស្មារតីប្តូរផ្តាច់និងការទទួលខុសត្រូវរបស់គណៈកម្មាធិការបក្ស និងរដ្ឋអំណាចគ្រប់លំដាប់ថ្នាក់នៅទីក្រុងកឹងធើ បានបង្ហាញច្បាស់តាមរយៈសកម្មភាពជាក់លាក់ និងច្នៃប្រតិដ្ឋ។
តាមរយៈការពិនិត្យអង្កេត និងត្រួតពិនិត្យ ឃុំតឹងហ្វាមានរាប់សិបគ្រួសារគ្រប់លក្ខណៈទទួលបានការជំនួយសាងសង់ផ្ទះ។ ក្នុងដំណើរការអនុវត្ត ថ្នាក់ដឹកនាំគណៈកម្មាធិការបក្ស និងរដ្ឋអំណាចភូមិភាគ បានចុះទៅផ្ទាល់ដល់គ្រួសារនីមួយៗ ដើម្បីតាមដានល្បឿនដំណើរការ ក្រើនរំលឹកនិងជួយដោះស្រាយបញ្ហាលំបាកដែលប្រជាជនជួបប្រទះ; បញ្ជូនកម្លាំងប្រជាការពារ ក្រុមយុវជន និងសមាគមផ្សេងៗ មកជួយប្រជាជនក្នុងការរុះរើ សាងសង់និងជួសជុលផ្ទះ។ រដ្ឋអំណាចភូមិភាគ បានម្ចាស់ការជួបធ្វើការជាមួយហាងលក់សម្ភារៈសំណង់ ដើម្បីធានាការទិញសម្ភារៈសម្រាប់ប្រជាជនសង់ផ្ទះ។
បងស្រីង្វៀងធីថាញហឿង នៅឃុំតឹងហ្វា រៀបរាប់ដោយការកោតសរសើរ៖ “អាស្រ័យបានថ្នាក់ដឹកនាំភូមិភាគ ជួយធានាការទិញសម្ភារៈសំណង់ ហើយបានបងប្អូនក្នុងគ្រួសារឱ្យខ្ញុំខ្ចីប្រាក់បន្ថែម ទើបប្ដីប្រពន្ធខ្ញុំអាចសង់បានផ្ទះថ្មីនេះ។ ពីមុនផ្ទះតូច ភ្លៀងស្រក់ពេលភ្លៀងខ្យល់ម្ដងៗ ធារផ្ទះទឹកលេចប៉ប៉ិកប៉ប៉ាក់ណាស់។ ឥឡូវនេះ មានផ្ទះថ្មី ខ្ញុំស្ងប់អារម្មណ៍ទៅធ្វើការងារ ហើយផ្តោតអារម្មណ៍អភិវឌ្ឍសេដ្ឋកិច្ច”។
លើភូមិឋាន ភូមិ២ ឃុំវីថាញ១ មាន៤គ្រួសារត្រូវការជំនួយសាងសង់និងជួសជុលផ្ទះ។ លោកវ៉ថាញឡែ ប្រធានគណៈប្រជាជនភូមិ២ ឱ្យដឹង៖ “ក្រៅពីប្រភពថវិកាជំនួយពីរដ្ឋ យើងខ្ញុំក៏បានចលនាសាច់ញាតិ ឬមិត្តភក្ដិរបស់គ្រួសារដែលទទួលបានជំនួយពីកម្មវិធី ប្រសិនបើមានលទ្ធភាពនឹងជំនួយថវិកាបន្ថែម មិនដូច្នោះទេ ក៏អាចចូលរួមជាកម្លាំងពលកម្ម។ ផ្ទះទាំង ៤ ខ្នង សុទ្ធតែទទួលបានការឧបត្ថម្ភពីសាច់ញាតិ ទាំងទឹកប្រាក់ និងកម្លាំងពលកម្ម”។
ព្រួតដៃ រួមកម្លាំងដើម្បីឈានដល់គោលដៅមុនកំណត់
មានផ្ទះសម្បែងរឹងមាំ គឺជាក្ដីស្រមៃរបស់គ្រួសារអ្នកមីងត្រឹងង៉ុកណឿ នៅភូមិសាងម៉ើយC ឃុំថាញ់ស្វឹង។ ផ្ទះចាស់របស់គាត់ទ្រុឌទ្រោមខ្លាំង រដូវភ្លៀងទឹកស្រក់ ហើយធារផ្ទះក៏សើម។ ពេលទទួលបានជំនួយ ៦០លានដុងសម្រាប់សង់ផ្ទះថ្មី តាមកម្មវិធីលុបបំបាត់ផ្ទះបណ្ដោះអាសន្ន និងផ្ទះទ្រុឌទ្រោម អ្នកមីងមានអារម្មណ៍រីករាយណាស់ ប៉ុន្តែក៏បារម្ភណាស់ដែរ។ រីករាយព្រោះនឹងមានផ្ទះថ្មីរឹងមាំនៅឆាប់ៗនេះ។ តែព្រួយបារម្ភព្រោះផ្លូវដឹកសម្ភារៈសំណង់ពីផ្លូវធំទៅដល់ផ្ទះចម្ងាយប្រហែល៣០០-៤០០ម៉ែត្រ ត្រូវឆ្លងកាត់ស្ពានតូចៗ ខណៈដែលគ្រួសារមានតែប្តីប្រពន្ធចាស់ៗពីរនាក់ប៉ុណ្ណោះ បើត្រូវជួលកម្មករដឹកសម្ភារៈវិញ ក៏ត្រូវចំណាយច្រើនផងដែរ។
ដោយបានសមាជិកក្លឹបជួសជុលផ្ទះជូនគ្រួសារក្រីក្ររបស់ឃុំថាញ់ស្វឹង ជួយរុះរើផ្ទះចាស់ ដឹកជញ្ជូនសម្ភារៈសំណង់ និងសង់ផ្ទះថ្មី អ្នកមីងណឿ បាននិយាយដោយក្តីរំភើប៖ “បើគ្មានការជួយពីពួកគាត់ទេ យើងត្រូវចំណាយថវិកាច្រើនណាស់ ដើម្បីជួលកម្មករនិងជួលអ្នកដឹកសម្ភារៈសំណង់ ខណៈដែលគ្រួសារយើងក្រីក្រ មិនអាចបន្ថែមលើប្រាក់ជំនួយ៦០លានដុងដែលរដ្ឋជំនួយនោះទេ”។
សមាជិកក្លឹបជួសជុលផ្ទះជូនគ្រួសារក្រីក្រឃុំថាញ់ស្វឹង បានចូលរួមទាំងធនធាននិងកម្លាំងពលកម្ម ដើម្បីជួយសង់និងជួសជុលផ្ទះបាន១៣ខ្នង។ ជាសមាជិកម្នាក់នៃក្លឹបនេះ លោកផាមវ៉ាំងតឺ ឱ្យដឹង៖ “ដោយផ្អែកលើស្មារតី “អ្នកណាមានអ្វី ក៏ចូលរួមហ្នឹង” យើងខ្ញុំបានជួយទាំងធនធាននិងកម្លាំងពលកម្ម ដោយគោលបំណងចង់ឱ្យប្រជាជនឆាប់មានផ្ទះសម្បែងរស់នៅស្រួលបួល ចំណែកភូមិភាគក៏សម្រេចការបំបាត់ផ្ទះបណ្ដោះអាសន្ន ផ្ទះទ្រុឌទ្រោមបានលឿនផងដែរ”។
* * *
ដោយស្មារតីប្ដូរផ្ដាច់ ការទទួលខុសត្រូវនិងការរួមកម្លាំងកាយចិត្តរបស់គ្រប់គ្នា ទីក្រុងកឹងធើ បានសម្រេចការសាងសង់និងជួសជុលផ្ទះជាង ១១.៤០០ខ្នង បានមុនពេលកំណត់របស់រដ្ឋាភិបាល ប្រហែល៣ខែ។ ភាពជោគជ័យនោះ មិនត្រឹមតែជាតួលេខចំនួនផ្ទះថ្មីដែលបានសាងសង់ឡើងនោះទេ ថែមទាំងជាស្មារតីសាមគ្គី និងមនុស្សធម៌ដែលបានបំផុស រីកសាយភាយក្នុងសហគមន៍ផងដែរ។ នេះគឺជាតម្លៃស្នូល និងជាភស្តុតាងដ៏រស់រវើក បង្ហាញពីទិសស្លោក “យកប្រជាជនជាស្នូល” បញ្ជាក់ពីទិសដៅគិតគូរដល់សុភមង្គល និងការរស់នៅសុខសាន្តរបស់ប្រជាជនត្រូវបានចាប់អារម្មណ៍ជាចម្បង។
“ផ្ទះមួយខ្នងៗ គឺជាអំណោយមួយ គឺជាកន្លែងរស់នៅកក់ក្តៅមួយ ដែលបង្ហាញពីការទទួលខុសត្រូវ សេចក្តីស្រឡាញ់ មនោសញ្ចេតនាជនជាតិ និងស្មារតីចែករំលែករបស់សហគមន៍ទាំងមូល” នេះជាការបញ្ជាក់របស់នាយករដ្ឋមន្ត្រីនៃរដ្ឋាភិបាល ផាមមិញជិញ ពេលលើកឡើងអំពីអត្ថន័យនៃកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម។ កម្មវិធីនេះ មិនត្រឹមតែជាគោលនយោបាយធំមួយទេ ថែមទាំងជាដំណើរនៃមនុស្សធម៌ បង្ហាញពីអត្ថន័យជ្រាលជ្រៅនៃគុណធម៌របស់បក្ស និងមនោសញ្ចេតនារបស់ប្រជាជន។ ដោយផ្អែកលើស្មារតី “កម្លាំងជំរុញពិសេស ខិតខំប្រឹងប្រែងពិសេស លទ្ធផលពិសេស” និង “ល្បឿនលឿននិងស្វាហាប់ជាងមុន” កម្មវិធីបានអនុវត្តព្រមៗគ្នា ប្ដូរផ្ដាច់ ជួយដល់គ្រួសារក្រីក្រ និងគ្រួសារក្បែរក្ររាប់ម៉ឺនគ្រួសារនៅទីក្រុងកឹងធើ មានផ្ទះសម្បែងស្នាក់នៅពោរពេញដោយសេចក្តីស្រឡាញ់ ហើយមិនទុកចោលនរណាម្នាក់នៅក្រោយគេឡើយ៕
អត្ថបទនិងរូបថតៈ ទ្រឿងស៊ើង - ពេជ្រសឿន
អគ្គនិពន្ធនាយកស្តីទី: ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ