ព្រឹត្តិការណ៍ - នយោបាយ ព្រឹត្តិការណ៍

11/10/2025 - 15:15

យកចិត្តទុកដាក់លើការកសាងគោលនយោបាយដើម្បីទាក់ទាញអ្នកវិនិយោគសម្រាប់ទីក្រុង

លោក ឡេក្វាងតុង សមាជិកគណៈប្រតិបត្តិការមជ្ឈិមបក្ស លេខាបក្សទីក្រុងកឹងធើ; លោក ដុងវ៉ាំងថាញ អនុលេខាប្រចាំការនៃគណៈកម្មាធិការបក្សទីក្រុង ប្រធានក្រុមប្រឹក្សាប្រជាជនទីក្រុងកឹងធើ; លោក ត្រឿងកាញត្វៀង អនុលេខាបក្សទីក្រុង ប្រធានគណៈកម្មាធិការប្រជាជនទីក្រុងកឹងធើ ធ្វើជាអធិបតីដឹកនាំកិច្ចប្រជុំគណៈចង្អុលការ ៦៦ ស្តីពីស្ថានការណ៍អនុវត្តគម្រោងសំខាន់ៗនៅទីក្រុងកឹងធើ។

អញ្ជើញចូលរួមកិច្ចប្រជុំមានលោក ង្វៀងត្វឹងអាញ អនុលេខាបក្សទីក្រុង ប្រធានគណៈប្រតិភូរដ្ឋសភាទីក្រុងកឹងធើ; លោកស្រី ហូធីកឹមដាវ អនុលេខាបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ; លោក ត្រឹងវ៉ាំងហ្វៀង អនុលេខាបក្សទីក្រុងកឹងធើ។

តំណាងចូលរួមកិច្ចប្រជុំគណៈចង្អុលការ ៦៦ ស្តីពីស្ថានការណ៍អនុវត្តគម្រោងសំខាន់ៗនៅទីក្រុងកឹងធើ។

គណៈអចិន្ត្រៃយ៍នៃគណៈកម្មាធិការបក្សទីក្រុង បានចេញសេចក្តីសម្រេចលេខ ៦៦-QĐ/TU ចុះថ្ងៃទី ១៤ ខែកក្កដា ឆ្នាំ២០២៥ បង្កើតគណៈចង្អុលការផ្សព្វផ្សាយអនុវត្តសេចក្តីសម្រេចលេខ ៥៩-NQ/TW របស់ការិយាល័យនយោបាយ សេចក្តីសម្រេចចិត្តលេខ ៤៥/២០២២/QH១៥ របស់រដ្ឋសភា និងសេចក្តីសម្រេចលេខ ៩៨/NQ-CP របស់រដ្ឋាភិបាល និងគម្រោងសំខាន់ៗនៅក្នុងទីក្រុងកឹងធើ (គណៈចង្អុលការ៦៦)។ ទាក់ទងនឹងគម្រោងសំខាន់ៗ គណៈចង្អុលការ ៦៦ បានចេញសេចក្តីសម្រេចបង្កើតក្រុមការងារដើម្បីដឹកនាំអនុវត្តគម្រោងសំខាន់ៗនៅក្នុងទីក្រុង (រួមមាន ៦ ក្រុមការងារ); ទន្ទឹមនឹងនោះ បានចេញសេចក្តីសម្រេចធ្វើឱ្យសុក្រឹតភាពក្រុមការងារ ដើម្បីដឹកនាំការអនុវត្តគម្រោងសំខាន់ៗនៅក្នុងទីក្រុង។

ចំពោះក្រុមការងារទាំង ៦ ទទួលបន្ទុកត្រួតពិនិត្យ ដាស់តឿន និងដឹកនាំអនុវត្តគម្រោងសំខាន់ៗចំនួន ២៨ របស់ទីក្រុង។ ក្នុងនោះ មានគម្រោងសំខាន់ៗដូចជា៖ វិនិយោគកំពង់ផែត្រឹងដេ, ចូវដុក - កឹងធើ - សុកត្រាំង ដំណាក់កាលទី១, មណ្ឌលរដ្ឋបាលទីក្រុងកឹងធើ, បង្កើនកម្រិតនិងបើកទូលាយផ្លូវជាតិលេខ៩១ (km0 - km7), ផ្លូវខ្សែក្រវាត់ខាងលិចទីក្រុងកឹងធើ, មន្ទីរពេទ្យ Oncology កឹងធើ; គម្រោងមណ្ឌលបុរីក្រុង ហេដ្ឋារចនាសម្ព័ន្ធមណ្ឌលឧស្សាហកម្ម មណ្ឌលបច្ចេកវិទ្យាព័ត៌មានប្រមូលផ្តុំ ឧណ្ហអគ្គិសនី... ដើម្បីជំរុញទីក្រុងកឹងធើអភិវឌ្ឍន៍។

លោក ង្វៀង ត្វឹងអាញ អនុលេខាគណៈកម្មាធិការបក្សទីក្រុង ប្រធានគណៈប្រតិភូរដ្ឋសភាទីក្រុងកឹងធើ
ប្រធានក្រុមការងារលេខ ៣ មានប្រសាសន៍អំពីគម្រោងនានាដែលក្រុមទទួលបន្ទុក។

ក្នុងកិច្ចប្រជុំនេះ ក្រុមការងារនីមួយៗបានរាយការណ៍អំពីល្បឿននៃការអនុវត្ត និងការលំបាក ឧបសគ្គ ក៏ដូចជាដំណោះស្រាយក្នុងការអនុវត្តគម្រោងដែលក្រុមទទួលបន្ទុកនាពេលខាងមុខ។ នៅពេលខាងមុខ ក្រុមការងារនឹងយកចិត្តទុកដាក់ល្បឿនអនុវត្តនៃគម្រោងនីមួយៗដែលក្រុមទទួលបន្ទុក។ ចង្អុលការ មន្ទីរ ផ្នែក និងឃុំ សង្កាត់ ដែលពាក់ព័ន្ធ សហការស្អិតល្មួតជាមួយម្ចាស់វិនិយោគ ដើម្បីដោះស្រាយការលំបាក និងបញ្ហាជាប់ជំពាក់ ជាពិសេសគឺបញ្ហាសំណង ឧបត្ថម និងការតាំងទីលំនៅថ្មី។ ទន្ទឹមនឹងនោះ បន្តលើកកម្ពស់តួនាទីរបស់ក្រុមការងារក្នុងការដឹកនាំអនុវត្តគម្រោងសំខាន់ៗក្នុងទីក្រុង; លើកកំពស់គុណភាព និងប្រសិទ្ធភាពការត្រួតពិនិត្យ ដាស់តឿននិងដោះស្រាយការលំបាក ដែលកើតឡើងជាក់ស្តែងក្នុងការអនុវត្តរំសាយទុនវិនិយោគសាធារណៈ...

លេខាបក្សទីក្រុង ឡេក្វាងតុង ថ្លែងចង្អុលការក្នុងកិច្ចប្រជុំ។

ថ្លែងក្នុងកិច្ចប្រជុំ លោក ឡេក្វាងតុង បានសង្កត់ធ្ងន់៖ នាពេលខាងមុខ គណៈកម្មាធិការប្រជាជនទីក្រុងកឹងធើ គប្បីម្ចាស់ការសហការជាមួយនឹងក្រសួង ផ្នែកមជ្ឈិម សិក្សាស្រាវជ្រាវ ធ្វើសេនាធិការ វិសោធនកម្មនិងបំពេញបន្ថែមសេចក្តីសម្រេចចិត្តលេខ ៥៩-NQ/TW របស់ការិយាល័យនយោបាយ ស្តីពីការកសាង និងអភិវឌ្ឍន៍ទីក្រុងកឹងធើដល់ឆ្នាំ ២០៣០ ចក្ខុវិស័យដល់ឆ្នាំ២០៤៥។ ដោយផ្អែកលើមូលដ្ឋាននោះ ស្នើរដ្ឋសភាពិនិត្យ កែសម្រួលនិងបំពេញបន្ថែមសេចក្តីសម្រេចចិត្តលេខ ៤៥/២០២២/QH១៥ របស់រដ្ឋសភា ស្តីពីការសាកល្បងយន្តការ និងគោលនយោបាយពិសេសមួយចំនួនដើម្បីអភិវឌ្ឍន៍ទីក្រុងកឹងធើ។ ទន្ទឹមនឹងនោះ មានគោលនយោបាយទាក់ទាញអ្នកវិនិយោគ ជាពិសេសគោលនយោបាយដីធ្លី និងគោលនយោបាយឧបត្ថម្ភ; ប្រើប្រាស់មានប្រសិទ្ធភាពប្រភពទុនថវិកា និងមូលនិធិដីធ្លី; ផ្តុំកម្លាំងរំសាយថវិកា ពិសេសគឺគម្រោងដែលដំណើរការយឺត។ ក្រុមការងារដឹកនាំអនុវត្តគម្រោងសំខាន់ៗនៅក្នុងទីក្រុង ត្រូវឈរលើស្មារតីបាននិងកំពុងធ្វើ; យកចិត្តទុកដាក់លើកិច្ចចង្អុលការ; ធ្វើសេនាធិការនូវគោលនយោបាយដើម្បីដោះស្រាយការលំបាក និងបញ្ហាជាប់ជំពាក់ក្នុងការអនុវត្តគម្រោង។ រាយការណ៍ពីការលំបាកដែលកើតមាន ជូនគណៈប្រចាំការនៃគណៈកម្មាធិការបក្សក្រុង គណៈអចិន្ត្រៃយ៍ និងក្រុមប្រឹក្សាប្រជាជនក្រុងដើម្បីដោះស្រាយ។ គណៈកម្មាធិការរណសិរ្សមាតុភូមិវៀតណាមទីក្រុង អង្គការនយោបាយ - សង្គម ក្រុមប្រឹក្សាប្រជាជនគ្រប់លំដាប់ថ្នាក់ និងអង្គការមហាជន អនុវត្តការងារប្រជាចលនា បង្កការឯកភាពក្នុងប្រជាជន ជាពិសេសគឺការងារសំណង និងឈូសឆាយផ្ទៃដី៕

អាញខូយ - ប្រែសម្រួល៖ វ៉ាន់តឹន

ចែករំលែកអត្ថបទ

ពាក្យគន្លឹះ