កីឡា - ទេសចរណ៍ កីឡា

26/09/2025 - 07:24

ត្រៀមលក្ខណៈរួចរាល់សម្រាប់ការប្រណាំង

ដើម្បីត្រៀមលក្ខណៈឱ្យបានល្អសម្រាប់ពិធីបុណ្យអកអំបុក - ប្រណាំងទូក - ងប្រពៃណីឆ្នាំ ២០២៥ មានក្រុមទូក-ងជាច្រើននៃវត្តពុទ្ធសាសនាទក្ខិណនិកាយខ្មែរ នៅទីក្រុងកឹងធើ បានត្រៀមលក្ខណៈរួចរាល់។ ឆ្នាំនេះ វត្តមួយចំនួនបានបោះថ្មីជាប្រភេទទូកលុងនិងជួសជុលទូក-ងបន្ទះក្តារដោយមិនប្រើដងសន្ទូច បំផុសក្តីមោទនភាព ហើយសន្យាថា ពិធីបុណ្យអកអំបុកដិតដាមដោយអត្តសញ្ញាណជាតិជាមិនខាន។

 កីឡាករទាំងឡាយនៃវត្តបឹងក្រចាប់ថ្មី អុំហាត់សម។

ទូកលុងជាប្រភេទទូក-ងប្រពៃណីរបស់ជនរួមជាតិខ្មែរ បានដាប់ឆ្លាក់ពីដើមគគីរធំទាំងមូល ប្រវែងជាង ៣០ ម៉ែត្រ ដែលអាចចំណុះអ្នកអុំជាង ៦០ នាក់។ ដើម្បីបោះបានទូក-ងមួយៗ ជាងត្រូវចំណាយពេលចាំងលុងជាច្រើនខែ។ ការបោះទូក-ងគឺជាសិល្បៈនៃបច្ចេកទេសប្រជាប្រិយ ប្រពៃណី បូកផ្សំនឹងថ្វីដៃដ៏ប៉ិនប្រសប់ ហ្មត់ចត់របស់ជាង ដើម្បីរក្សានូវកេរដំណែលដូនតាដែលបន្សល់ទុក។

ប៉ុន្មានថ្ងៃនេះ នៅពេលរសៀល កីឡាករទូក-ងតែងជួបជុំគ្នានៅវត្តបឹងក្រចាប់ថ្មី ឃុំតឹងថាញ់ ដើម្បីហាត់សម។ បរិយាកាសហាត់សម ប្រព្រឹត្តឡើងយ៉ាងផុសផុលនិងស្វាហាប់។ ព្រះតេជព្រះគុណថាច់ធឿន ព្រះចៅអធិការវត្តបឹងក្រចាប់ថ្មី មានថេរដីកា៖ “ឆ្នាំនេះ វត្តទិញទូកលុង ម្ល៉ោះហើយអ្នកណាក៏រំភើបដែរ ហើយនាំគ្នាឈូឆរមកហាត់សមឆាប់ជាងរាល់ឆ្នាំ។ បច្ចុប្បន្ន មានកីឡាករជិត ១០០ នាក់ មកហាត់សមយ៉ាងស្វាហាប់ ដោយជឿជាក់ថានឹងទទួលលទ្ធផលល្អ បំផុតក្នុងរដូវប្រណាំងទូក-ង ឆ្នាំ ២០២៥”។ ទូកលុងវត្តបឹងក្រចាប់ថ្មី បានជាវក្នុងតម្លៃជាង ៣០០ លានដុង អាស្រ័យពុទ្ធបរិស័ទរួមវិភាគទាន។

 ទូក-ងវត្តឃ្លាំង អុំសាកល្បងលើដងព្រែក Maspero ទីក្រុងកឹងធើ។

ចំណែកវត្តឃ្លាំង នៅសង្កាត់សុកត្រាំង បរិយាកាសក៏អ៊ូអរមិនតិចដែរ ខណៈពេលមានអ្នកចេញចូលមើលជាងជួសជុលទូក-ងបន្ទះក្តារ ២ គ្រឿង ដោយមិនប្រើដងសន្ទូច គិតជាតម្លៃទឹកប្រាក់ជាង ២៥០ លានដុង។ ក្នុងនោះ ទូកមួយទុកសម្រាប់ប្រណាំង ទូកមួយទុកសម្រាប់ហាត់សម។ ក្រោយពីជួសជុលរួច វត្តនឹងធ្វើពិធីរំកិលទូកចុះទឹកអុំសាកល្បង ដោយមានកីឡាករចូលរួមហាត់សម ៨០ នាក់។ លោកលីភ័ណ្ឌ តំណាងក្រុមទូក-ងវត្តឃ្លាំង ឱ្យដឹង៖ “មុនពេលទូក-ងជួសជុលរួចរាល់ គឺបងប្អូនកីឡាករបានមកវត្តហាត់សមយ៉ាងផុសផុល។ ខណៈពេលរំកិលទូកចុះទឹកលើដងព្រែក Maspero គឺដៃច្រវាបានមកជុំគ្នាអុំសាកល្បង។ ជាមួយនឹងល្បឿនលឿនដូច្នេះ យើងខ្ញុំសង្ឃឹមថា នឹងទទួលបានលទ្ធផលខ្ពស់ក្នុងការប្រណាំងទូក-ង នៅខែវិច្ឆិកាខាងមុខនេះ”។

ការវិលមកចូលរួមប្រណាំងឡើងវិញនៃទូកលុង និងទូក-ងមិនប្រើដងសន្ទូចក្នុងពិធីបុណ្យអកអំបុក-ប្រណាំងទូក-ង ឆ្នាំ ២០២៥ មិនត្រឹមតែញុាំងពិធីប្រណាំងមានភាពជក់ចិត្តប៉ុណ្ណោះទេ ថែមទាំងកត់សម្គាល់នូវការខិតខំប្រឹងប្រែងអភិរក្សនិងពង្រីកនូវតម្លៃវប្បធម៌ដ៏ប្រពៃរបស់ជនរួមជាតិខ្មែរណាមបូដែលដូនតាបានបន្សល់ទុកមកទៀតផង៕

យ្វីអាញ-លីសៀ

ចែករំលែកអត្ថបទ

ពាក្យគន្លឹះ