សន្តិសុខ - ការពារប្រទេស ការពារប្រទេស

02/10/2025 - 08:23

ផ្ដល់ក្ដីសង្ឃឹមដល់សិស្សតំបន់ព្រំដែនសមុទ្រ

ដូចសិស្សដទៃទៀតដែរ សិស្សក្រីក្រនៅតំបន់ព្រំដែនសមុទ្រនៃទីក្រុងកឹងធើ ក៏ប្រាថ្នាចង់បានសម្លៀកបំពាក់ថ្មី សម្ពៀតនិងសៀវភៅសិក្សាដើម្បីទៅរៀន។ យល់ពីប្រការនេះ គណៈមេបញ្ជាការកងទ័ពការពារព្រំដែនទីក្រុងកឹងធើ បានផ្សព្វផ្សាយអនុវត្តកម្មវិធី “ជំរុញដំណើរប្អូនទៅសាលា” ដើម្បីឧបត្ថម្ភដល់សិស្សានុសិស្សក្រីក្រនៅតំបន់ព្រំដែនសមុទ្របន្តការសិក្សា។

កម្មាភិបាល យុទ្ធជនការពារព្រំដែនជូនអំណោយដល់សិស្សក្រីក្រនៅតំបន់ព្រំដែនសមុទ្រ។

វរសេនីយ៍ឯក ហ្វិញថាញហុង អគ្គស្នងការនយោបាយគណៈមេបញ្ជាការកងទ័ពការពារព្រំដែនទីក្រុងកឹងធើ ឱ្យដឹងថា កម្មវិធី “ជំរុញដំណើរប្អូនទៅសាលា” ដែលបំផុសចលនាដោយអគ្គមេបញ្ជាការដ្ឋានកងទ័ពការពារព្រំដែន គឺមានអត្ថន័យមនុស្សធម៌យ៉ាងជ្រាលជ្រៅ។ នេះជាការបញ្ជាក់ពីស្មារតី “ប៉ុស្តិ៍ជាផ្ទះព្រំដែនជាភូមិស្រុកជនជាតិភាគតិចជាបងប្អូនសាច់ញាតិ” របស់យុទ្ធជនការពារព្រំដែន។ ក្រោយរយៈពេល ១០ ឆ្នាំ អនុវត្តកម្មវិធី គណៈមេបញ្ជាការកងទ័ពការពារព្រំដែនទីក្រុងកឹងធើ បានគាំពារសិស្សដែលមានស្ថានភាពលំបាកនៅតំបន់ព្រំដែនសមុទ្រចំនួន៣៨នាក់ ក្នុងសិស្សម្នាក់ៗទទួលបានប្រាក់ឧបត្ថម្ភ ៥០០.០០០ ដុង/ខែនិងសម្ភារៈប្រើប្រាស់ចាំបាច់មួយចំនួន។ ទន្ទឹមនឹងនោះ ថែមទាំងចលនាអាជីវកម្ម អង្គការបុគ្គល និងសប្បុរសជននានា ព្រួតដៃឧបត្ថម្ភឧបករណ៍បម្រើការសិក្សាដូចជា កង់ សៀវភៅសរសេរ សៀវភៅសិក្សា សម្លៀកបំពាក់ជាដើម សរុបតម្លៃទឹកប្រាក់រាប់ពាន់លានដុង។ រៀងរាល់ឆ្នាំថែមទាំងបានសហការជាមួយនឹងសមាគមជំរុញការសិក្សាទីក្រុងកឹងធើ ជូនអាហារូបករណ៍២០០ចំណែក (ក្នុងមួយចំណែកតម្លៃ ១ លានដុង) ដល់សិស្សដែលមានស្ថានភាពលំបាកនៅតំបន់ព្រំដែនសមុទ្រនៃទីក្រុងទៀតផង។

កម្មវិធីដ៏មានអត្ថន័យនេះ បានគណៈកម្មាធិការបក្ស រដ្ឋអំណាចភូមិភាគ អង្គការមហាជនតំបន់ព្រំដែនសមុទ្រ កត់សម្គាល់និងវាយតម្លៃខ្ពស់។ កម្មវិធីជាកម្លាំងលើកទឹកចិត្តខាងស្មារតីដ៏ធំធេងសម្រាប់សិស្សានុសិស្សនៅតំបន់ព្រំដែនសមុទ្រ ដើម្បីប្អូនៗបន្តការខិតខំរៀនសូត្រ ហ្វឹកហាត់ បំពេញបំណងប្រាថ្នា និងក្លាយជាពលរដ្ឋមានប្រយោជន៍សម្រាប់សង្គម។ នេះក៏ជាការបង្ហាញនូវមនោសញ្ចេតនានិងការទទួលខុសត្រូវរបស់កម្មាភិបាល យុទ្ធជនកងទ័ពការពារព្រំដែននៃទីក្រុងកឹងធើក្នុងបុព្វហេតុយកចិត្តទុកដាក់គិតគូរ បណ្ដុះបណ្ដាលយុវវ័យជំនាន់ក្រោយ រួមចំណែកពង្រឹងពង្រីកជំហរយុទ្ធសាស្រ្តទឹកចិត្តប្រជាជននៅតំបន់ព្រំដែនសមុទ្រ។

លោកយាយឡឹមធីបាញ ជាជីដូនរបស់កុមារីថាច់ធីបែញី សិស្សថ្នាក់ទី៧ នៃអនុវិទ្យាល័យនិងវិទ្យាល័យត្រឹងដេ ចែករំលែក៖ “ក្នុងគ្រួសារមានតែពីរនាក់យាយចៅ ដ្បិតអី ចៅវាកំព្រាឪពុកម្តាយតាំងពីតូច ដូច្នោះរាល់ការចំណាយលើការរស់នៅនិងហូបចុកសុទ្ធតែពឹងលើកម្លាំងរបស់ខ្ញុំធ្វើការឈ្នួល។ ឆ្នាំនេះ ខ្ញុំអាយុ៦៣ឆ្នាំហើយ។ ឈានចូលឆ្នាំសិក្សាថ្មីម្ដងៗ គឺខ្ញុំព្រួយបារម្ភណាស់ ពីព្រោះខ្វះប្រាក់ទិញសៀវភៅ សម្លៀកបំពាក់ឱ្យចៅទៅរៀន។ អាស្រ័យបានក្មួយៗកងទ័ពការពារព្រំដែនឧបត្ថម្ភ ទើបចៅខ្ញុំបានទទួលអាហារូបករណ៍ មានសម្លៀកបំពាក់ថ្មី និងសម្ភារៈឯទៀតសម្រាប់ទៅរៀន។ នេះជាការលើកទឹកចិត្តដ៏ធំធេង ផ្តល់កម្លាំងចិត្តដល់ចៅខ្ញុំរៀនសូត្របានល្អ និងអនុវត្តក្តីស្រមៃ។ ខ្ញុំសូមអរគុណយ៉ាងស្មោះចំពោះក្មួយៗកងទ័ពការពារព្រំដែន ដែលតែងយកចិត្តទុកដាក់ជួយដល់អ្នកក្រ”។

ដើមឆ្នាំសិក្សា ២០២៥-២០២៦ គណៈមេបញ្ជាការកងទ័ពការពារព្រំដែនទីក្រុងកឹងធើ និងសមាគមជំរុញការសិក្សាទីក្រុងកឹងធើ បានរៀបចំជូនអាហារូបករណ៍ចំនួន២០០ ចំណែកដល់សិស្សក្រីក្រនៅតំបន់ព្រំដែនសមុទ្រ។ ដោយអាហារូបករណ៍នេះហើយបានបង្កភាពរីករាយ សុភមង្គល និងទំនុកចិត្តដល់សិស្សក្រីក្រឱ្យមានជំហានរឹងប៉ឹងទៅកាន់សាលា។ ប្អូនតាំងម៉ាយអាញ សិស្សអនុវិទ្យាល័យអាងថាញណាម ឱ្យដឹង៖ “ប្អូនសប្បាយចិត្តដែលបានទទួលអាហារូបករណ៍ពីពូៗកងទ័ព ពីព្រោះចំនួនប្រាក់ទាំងនេះមានប្រយោជន៍ណាស់សម្រាប់ប្អូនទិញសៀវភៅ សម្ភារៈសិក្សា និងសម្លៀកបំពាក់សម្រាប់ឆ្នាំសិក្សាថ្មី។ ប្អូនសន្យាថានឹងខិតខំរៀនសូត្រ ដើម្បីកុំឱ្យពូៗកងទ័ព និងលោកពូ អ្នកមីងនៅសមាគមជំរុញការសិក្សាដែលយកចិត្តទុកដាក់ជួយប្អូន ខកបំណងឡើយ”។

ប្រសិទ្ធភាពនៃកម្មវិធី បានរួមចំណែកដល់ការលើកកម្ពស់ប្រពៃណីសង្វាតរៀនសូត្ររបស់ប្រជាជនយើង និងរូបភាពយុទ្ធជនការពារព្រំដែននៅតំបន់ព្រំដែនសមុទ្រ។ ទន្ទឹមនឹងនោះ បានផ្ដល់ក្ដីសង្ឃឹមនិងបង្កលក្ខណៈសម្រាប់សិស្សក្រីក្របន្តការសិក្សា ឆ្លងតាមរយៈនោះ លើកទឹកចិត្តប្អូនៗសិស្សានុសិស្សឈានឡើងក្នុងការរៀនសូត្រនិងហ្វឹកហាត់ ក្លាយជាមនុស្សមានប្រយោជន៍សម្រាប់មាតុភូមិ ព្រមទាំងរួមកម្លាំងការពារយ៉ាងរឹងមាំអធិបតេយ្យ និងសន្តិសុខព្រំដែនតំបន់សមុទ្រនៃទីក្រុងក្នុងស្ថានភាពថ្មី៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ