សន្តិសុខ - ការពារប្រទេស ការពារប្រទេស

18/03/2024 - 08:58

ការពាររឹងមាំសន្តិសុខព្រំដែនសមុទ្រ

កងទ័ពការពារព្រំដែនខេត្តសុកត្រាំង តែងស្មោះត្រង់ចំពោះបក្ស ស្មោះត្រង់ចំពោះប្រជាជន ត្រៀមខ្លួនប្រយុទ្ធ និងលះបង់ជូនបុព្វហេតុការពារអធិបតេយ្យ និងសន្តិសុខព្រំដែននៃមាតុភូមិ។ ទន្ទឹមនឹងនោះ ផ្សារភ្ជាប់ជាមួយប្រជាជន សហការជាមួយរដ្ឋអំណាចមូលដ្ឋាន ដើម្បីពង្រីកកម្លាំងចម្រុះក្នុងការចូលរួមកសាងគ្រប់គ្រងនិងការពារព្រំដែនសមុទ្របានល្អ។

កងទ័ពការពារព្រំដែនសុកត្រាំង ប្រគល់ជូនផ្ទះមហាសាមគ្គីដល់ប្រជាជន
នៅតំបន់ព្រំដែនសមុទ្រ។

យោងតាមប្រសាសន៍វរសេនីយ៍ឯក ង្វៀងទ្រេវមេន ស្នងការនយោបាយកងទ័ពការពារព្រំដែនសុកត្រាំង បានឱ្យដឹង៖ កាលពីឆ្នាំកន្លង កងទ័ពការពារព្រំដែនខេត្តបានអនុវត្តល្អនូវការឈ្លបយកការណ៍ ក្ដាប់ស្ថានភាពនិងគ្រប់គ្រងមុខសញ្ញា; សហការជាមួយកម្លាំងឯទៀត ដើម្បីផ្សព្វផ្សាយអនុវត្តផែនការធានាសន្តិសុខ សណ្តាប់ធ្នាប់នៅតាមតំបន់សមុទ្រ។ អនុវត្តប្រកបដោយប្រសិទ្ធភាពនូវចលនាទូទាំងប្រជាជនចូលរួមការពារបូរណភាពទឹកដី និងសន្តិសុខព្រំដែនជាតិក្នុងស្ថានភាពថ្មី; គម្រោង “បង្កើនការផ្សព្វផ្សាយនិងអប់រំច្បាប់ដល់កម្មាភិបាលនិងប្រជាជននៅតាមព្រំដែនសមុទ្រនិងកោះ”; ទម្រង់ជួយប្រជាជនអភិវឌ្ឍសេដ្ឋកិច្ច ដូចជា៖ ចិញ្ចឹមពពែប្រមូលផ្តុំ; ចិញ្ចឹមគោបន្តពូជ; កម្ចីទុនផលិតកម្មនិងធ្វើអាជីវកម្ម បានរួមចំណែកកាត់បន្ថយភាពក្រីក្រ សម្រាប់ប្រជាជននៅតំបន់ព្រំដែនសមុទ្រ។ ទន្ទឹមនឹងនោះ អនុវត្តមានប្រសិទ្ធភាពកម្មវិធី៖ “កងទ័ពការពារព្រំដែនរួមកម្លាំងកសាងជនបទថ្មី”; “ជំរុញដំណើរប្អូនៗទៅសាលា”; “ជូនទង់ជាតិនិងឆាយាល័ក្ខណ៍អ៊ំហូ ដល់អ្នកនេសាទ ដែលចេញទៅនេសាទច្បាមសមុទ្រ”; “និទាឃរដូវព្រំដែនកក់ក្តៅទឹកចិត្តអ្នកភូមិ”។ល។ ឆ្លងតាមរយៈនោះ បានរួមចំណែកពង្រឹងទំនុកចិត្តរបស់ប្រជាជន ពង្រីកកម្លាំងចម្រុះក្នុងប្រជាជន ក្នុងការចូលរួមការពារអធិបតេយ្យ និងសន្តិសុខព្រំដែនតំបន់សមុទ្ររបស់ខេត្ត។

កងនាវាចរណ៍លេខ២ កងទ័ពការពារព្រំដែនសុកត្រាំង ល្បាតត្រួតពិនិត្យលើផ្ទៃសមុទ្រស្រុកត្រឹងដេ។

លើសពីនេះ កងទ័ពការពារព្រំដែនសុកត្រាំង បានសហការជាមួយផ្នែកសមត្ថកិច្ច ដើម្បីប្រគល់ជូនផ្ទះ “មហាសាមគ្គី” និងផ្ទះ “មិត្តរួមកង” ចំនួន៦២ខ្នង; ពិនិត្យជំងឺនិងផ្តល់ថ្នាំពេទ្យដោយឥតគិតថ្លៃដល់ប្រជាជន២៤.៩០២លើកនាក់; ឧបត្ថម្ភសិស្សចំនួន៣៦នាក់ (ដោយទឹកប្រាក់ ៥០០.០០០ដុង/ម្នាក់/ខែ); ជូនកង់ចំនួន៤៦គ្រឿង សៀវភៅសរសេរចំនួន២ម៉ឺនក្បាល អាហារូបករណ៍ចំនួន១២១ចំណែកដល់សិស្សានុសិស្ស ដែលមានស្ថានភាពលំបាក។ល។ ដោយទឹកប្រាក់សរុបជាង៦ពាន់លានដុង។ លោកង្វៀងទ្រុងសើុង ប្រធានគណៈកម្មាធិការប្រជាជនស្រុកត្រឹងដេ បានឱ្យដឹង៖ “កំពង់ផែ មានមធ្យោបាយចេញចូលច្រើន ម្ល៉ោះហើយកើតមានបទល្មើសនៃការរត់ពន្ធនិងគៃបន្លំពាណិជ្ជកម្ម ឧក្រិដ្ឋកម្មគ្រឿងញៀន។ល។ កម្មាភិបាល យុទ្ធជនការពារព្រំដែនតែងសហការរៀបចំដើរល្បាត និងត្រួតពិនិត្យយ៉ាងតឹងរ៉ឹងលើមនុស្ស មធ្យោបាយដែលចេញចូលនិងធ្វើអាជីវកម្មតាមផ្លូវសមុទ្រ។ ឃោសនាដល់អ្នកនេសាទទាញយកផលសមុទ្រត្រូវតាមបទប្បញ្ញត្តិ; ទៅសួរសុខទុក្ខ ជូនអំណោយដល់អ្នកក្រ ផ្តល់អាហារូបករណ៍ដល់សិស្សក្រីក្រ; ឧបត្ថម្ភគោដល់គ្រួសារខ្មែរ ដើម្បីអភិវឌ្ឍន៍សេដ្ឋកិច្ច ។ល។ រួមចំណែកអនុវត្តល្អនូវការងារសុខុមាលភាពសង្គម និងរក្សាលំនឹងសន្តិសុខសណ្តាប់ធ្នាប់នៅមូលដ្ឋាន”។

លោកវរសេនីយ៍ឯក ង្វៀងទ្រេវមេន មានប្រសាសន៍៖ “នៅពេលខាងមុខ កងទ័ពការពារព្រំដែនខេត្តនឹងបន្តសហការជាមួយភូមិភាគនានានៅតំបន់ព្រំដែនសមុទ្រ ដើម្បីក្តាប់ស្ថានភាពវាយតម្លៃនិងព្យាករណ៍ឱ្យបានត្រឹមត្រូវ ដើម្បីវិនិច្ឆ័យ ដោះស្រាយស្ថានការណ៍ មិនទុកឱ្យកើតមានស្ថានភាពបាត់ម្ចាស់ការជាយថាហេតុ រក្សាស្ថិរភាពសន្តិសុខនយោបាយសណ្តាប់ធ្នាប់ សុវត្ថិភាពសង្គមលើភូមិសាស្រ្តនិងលើផ្ទៃសមុទ្រ។ សហការជំរុញការឃោសនា ដើម្បីប្រជាជនលើកកម្ពស់ស្មារតីចូលរួមការពារអធិបតេយ្យសមុទ្រនិងកោះ; សកម្មជួយប្រជាជនអភិវឌ្ឍសេដ្ឋកិច្ច កាត់បន្ថយភាពក្រីក្រ ដោយចីរភាពនិងកសាងជនបទថ្មី; កសាងប្រព័ន្ធនយោបាយ និងកងកម្លាំងប្រដាប់អាវុធមូលដ្ឋានរឹងមាំ ”៕

យ៉ីអាញ - បកប្រែ៖ សុផន

ចែករំលែកអត្ថបទ

ពាក្យគន្លឹះ