មហាសាមគ្គីជនជាតិ ភូមិស្រុកផ្លាស់ថ្មី

27/02/2023 - 16:42

កសិករខ្មែរ មោះមុតអនុវត្តបច្ចេកទេសក្នុងការដាំដំណាំ

កសិករខ្មែរនៅខេត្តសុកត្រាំង បាននិងកំពុងអនុវត្តបច្ចេកទេស ស្រោចស្រពស្វ័យប្រវត្តិ នាំមកនូវប្រសិទ្ធភាពសេដ្ឋកិច្ចសមស្រប នឹងរដូវប្រាំង។

ចម្ការដំណាំរបស់លោកពូថាច់ឡឹម បានដំឡើងប្រព័ន្ធស្រោចស្រពស្វ័យប្រវត្តិ។

លោកពូថាច់ឡឹម នៅភូមិព្រែកឈ្វេង ឃុំថាញ់ភូ ស្រុកមីស្វៀង បានដំឡើងប្រព័ន្ធស្រោចស្រពស្វ័យប្រវត្តិសម្រាប់ដីដាំដំណាំ ៣ កុង។ បើតាមលោកពូ ទម្រង់នេះ ប្រិតសំចៃបានទាំងទឹក ពេលវេលានិងកម្លាំងពលកម្ម ប៉ុន្តែដំណាំលូតលាស់ល្អ។ បច្ចុប្បន្ន លោកពូដំឡើងប្រព័ន្ធស្រោចស្រពស្វ័យប្រវត្តិលើផ្ទៃដីដាំដំណាំ ៣ កុង មាន៖ ស្ពៃក្តោប ស្ពៃផ្កា ខ្ទឹមស្លឹក ស្ពៃចង្កឹះនិងសាឡាត់។ល។ លោកពូឡឹម ឱ្យដឹង៖ “គ្រួសារមានតែពីរនាក់ប្តីប្រពន្ធ ប៉ុន្តែដាំដំណាំដល់ទៅ ៣ កុង និងធ្វើស្រែ ២០ កុង ដូច្នេះខ្ញុំដំឡើងប្រព័ន្ធស្រោចស្រពស្វ័យប្រវត្តិដើម្បីបន្ថយការនឿយហត់។ នៅពេលដែលមិនទាន់ដំឡើងប្រព័ន្ធស្រោចស្រព ប្តីប្រពន្ធចែកវេនគ្នារែកទឹកស្រោច ម៉្លោះហើយលំបាកណាស់ ហើយមួយថ្ងៃៗនៅតែវាលស្រែនិងចម្ការដំណាំប៉ុណ្ណោះ។ ប៉ុន្តែឥឡូវគឺស្រួលហើយ ទៅដល់ចម្ការបើកតែកន្លះម៉ោងគឺដីជោកស្មើ ដំណាំលាស់ល្អ។ ពិសេសអំឡុងពេលនោះខ្ញុំក៏អាចទៅមើលស្រែបានទៀត”។ តាមប្រសាសន៍លោក ពូឡឹម ការដំឡើងប្រព័ន្ធស្រោចស្រពគឺបង់តែម៉ាស៊ីនបូមទុយោនិងក្បាលបាញ់ ដូច្នេះការចំណាយមិនច្រើនទេ។ ជាពិសេស គឺរដូវប្រាំង ប្រព័ន្ធស្រោចស្រពគឺមានប្រសិទ្ធភាពណាស់ អាចរក្សាសំណើមផង ដំណាំលូតលាស់ល្អ និងប្រិតសំចៃទឹកផង។

លោកពូលីស៊ីយ៉ែន នៅភូមិតាមាឃ ឃុំថាមដូង ស្រុកមីស្វៀង មានអាយុ ៦០ ឆ្នាំ ធ្វើស្រែ ៥ ហិកតានិងដាំដំណាំ ១ កុង។ បន្ទាប់ពីចូលរួមថ្នាក់ហ្វឹកហ្វឺនពីអនុវត្តបច្ចេកវិទ្យា ក្នុងការដាំដុះ គាត់ក៏បានជ្រើសរើសបច្ចេកទេសប្រព័ន្ធស្រោចស្រពនេះ។ លោកពូយ៉ែន ឱ្យដឹង៖ “ខ្ញុំអនុវត្តបច្ចេកទេសស្រោចស្រពជាង ៣ ឆ្នាំមកហើយ គឺមិនបាច់រែកទឹកទៅស្រោចដំណាំដូចកាលពីមុនទេ។ ដាំគូឆាយក្នុងមួយកុង ខ្ញុំប្រមូលផលខួបឆ្នាំ ព្រោះពេលដែលគូឆាយបានផ្តល់ទឹកនិងដាក់ជីគ្រប់គ្រាន់គឺលូតលាស់ល្អ ផ្កាធំ ប្រមូលផលលក់បានថ្លៃ។ នៅពេលដំឡើងប្រព័ន្ធស្រោចស្រព ខ្ញុំភ្ជាប់ទៅនឹងទូរស័ព្ទដៃ ដូច្នេះនៅផ្ទះបញ្ជាពីចម្ងាយគឺប្រព័ន្ធបើកស្រោចដោយខ្លួនឯងតាមការកំណត់”។

ផ្ដើមពីប្រសិទ្ធភាពនេះ ភាគច្រើនគ្រួសារដែលមានផ្ទៃដីដាំដំណាំច្រើនៗសុទ្ធតែអនុវត្តប្រព័ន្ធស្រោចស្រពស្វ័យប្រវត្តិទាំងអស់។ ដោយប្រិតសំចៃបានពេលវេលានិងកម្លាំងពលកម្ម ហើយដំណាំក៏លូតលាស់ល្អ។ លោកពូយ៉ែន ឱ្យដឹង បន្ថែម៖ “កសិករខ្មែរឥឡូវឆាប់ចាប់យកការអនុវត្តវិទ្យាសាស្ត្របច្ចេកទេសក្នុងការដាំដុះ ដើម្បីសម្រេចបានប្រសិទ្ធភាពនិងទិន្នផលខ្ពស់។ នៅស្រុកខ្ញុំ ឥឡូវនេះមានប្រជាជនខ្មែរជាច្រើន បានវិនិយោគលើផ្ទះសំណាញ់ វិនិយោគប្រព័ន្ធស្រោចស្រពស្វ័យប្រវត្តិ ដើម្បីផលិតបានកសិផលស្អាត សុវត្ថិភាព និងលក់បានថ្លៃ។ អាស្រ័យហេតុនេះ កសិករខ្មែរឆាប់ធ្វើមានពីការដាំដំណាំ”៕

លីធាន-លេងមី

ចែករំលែកអត្ថបទ

ពាក្យគន្លឹះ