មហាសាមគ្គីជនជាតិ ភូមិស្រុកផ្លាស់ថ្មី

29/10/2025 - 09:08

អ្នករក្សាព្រលឹងវប្បធម៌ខ្មែរណាមបូ

សិប្បករឆ្នើមឡឹមផែន កើតឆ្នាំ ១៩៥១ នៅភូមិបារស្រែ A ឃុំលឿងហ្វា ស្រុកចូវថាញ់ ខេត្តត្រាវិញ (បច្ចុប្បន្ន ឃុំសុងឡុក ខេត្តវិញឡុង) បានចាត់ទុកជាបុគ្គលគំរូក្នុងការអភិរក្សនិងពង្រីកបេតិកភណ្ឌវប្បធម៌ខ្មែរណាមបូ។ ផ្ដើមពីចំណូលចិត្តតន្ត្រីប្រពៃណីនិងជាងឈើ ក្នុងឆាកជីវិតគាត់គឺផ្ដោតលើការច្នៃឧបករណ៍ភ្លេង ស្តារឡើងវិញនូវវត្ថុតាំងនិងបង្ហាត់បង្រៀនដល់យុវវ័យជំនាន់ក្រោយ។

សិប្បករឡឹមផែន។

តាំងពីក្មេង ឡឹមផែន តែងទៅតាមឪពុកធ្វើជាងនៅតាមវត្តខ្មែរជាច្រើនកន្លែង ទន្ទឹមនឹងនោះឡឹមផែនក៏បានរៀនធ្វើឧបករណ៍ភ្លេងផងដែរ។ ពេលទៅបំពេញភារកិច្ចកងទ័ពនៅប្រទេសកម្ពុជា បានជំរុញឱ្យគាត់បន្តអាជីព ហើយមានឱកាសរៀនសូត្រពីសិប្បករនៅទីនោះ។ ពេលត្រឡប់មកមាតុភូមិ គាត់នៅតែបន្តបំណងប្រាថ្នា ហើយក៏បានបញ្ជាក់ពីស្នាដៃដ៏ប៉ុនប្រសប់តាមរយៈឧបករណ៍ភ្លេងប្រពៃណី ដូចជា៖ ភ្លេងពិណពាទ្យ ទ្រ ស្គរដៃ តាខេ។ល។ ឆ្នាំ ១៩៩០ គាត់ “ចាប់ផ្ដើមអាជីព” ហើយផលិតផលរបស់គាត់ក៏ល្បីល្បាញនៅក្នុងតំបន់។ ជាងនេះ ទៅទៀត ឡឹមផែន ថែមទាំងចេះលេងឧបករណ៍ភ្លេងប្រពៃណីជាច្រើនប្រភេទយ៉ាងស្ទាត់ជំនាញ បានមាមីងខ្មែរក្នុងភូមិអញ្ជើញសម្តែងនៅក្នុងឱកាសពិធីបុណ្យទានផ្រេងៗ។

ពិសេស ចាប់តាំងពីសារមន្ទីរវប្បធម៌ជនរួមជាតិខ្មែរត្រាវិញ (ចាស់) បានកសាង គាត់បានអញ្ជើញឱ្យចូលរួម កែច្នៃ ធ្វើឡើងវិញនូវវត្ថុតាំងជាច្រើនដូច៖ ផ្ទះរត សាលា ឧបករណ៍កសិកម្ម មកុដ របាំងមុខ។ល។ រហូតដល់ទម្រង់ព្រះវិហារវត្តខ្មែរ។ ដោយមានការប៉ិនប្រសប់និងការយល់ដឹងពីវប្បធម៌ប្រជាប្រិយ វណ្ណកម្មរបស់គាត់បានទទួលស្គាល់ដូចនឹងគំរូដើម រួមចំណែកយ៉ាងសំខាន់ក្នុងការអភិរក្សវប្បធម៌រូបីរបស់ខ្មែរណាមបូ។

សិប្បករឡឹមផែន (ខាងឆ្វេងទី ២) ប្រគំភ្លេងប្រពៃណី។

មិនឈប់ត្រឹមនោះ សិប្បករឆ្នើមឡឹមផែន បានធ្វើដំណើរសព្វភូមិស្រុកដើម្បីស្រាវជ្រាវនិងស្ដារឡើងវិញនូវតម្លៃអរូបីដែលមានហានិភ័យគ្មានអ្នកស្នងបន្ត។ គាត់ចូលរួមស្តារឡើងវិញនូវភ្លេងប្រពៃណីខ្មែរនិងបើកថ្នាក់បង្ហាត់បង្រៀនដល់យុវវ័យដោយឥតគិតថ្លៃ។ បច្ចុប្បន្ន គាត់បានបង្ហាត់បង្រៀនសិស្សរាប់រយនាក់ ក្នុងនោះ ភាគច្រើនបានក្លាយជាបុគ្គលស្នូលរបស់ក្រុមសិល្បៈខ្មែរ។

ក្នុងវ័យជាង ៧០ ឆ្នាំ សិប្បករឡឹមផែន នៅតែខិតខំព្យាយាមកែច្នៃ ស្តារឡើងវិញនិងបង្ហាត់បង្រៀន។ ឆ្នាំ ២០១៥ គាត់បានរដ្ឋប្រទានកិត្តិនាម សិប្បករឆ្នើម ប្រភេទចំណេះដឹងប្រជាប្រិយ និងសិល្បៈសម្តែងប្រជាប្រិយ។ គាត់មិនត្រឹមតែជាសិប្បករប៉ិនប្រសប់ប៉ុណ្ណោះទេ ថែមទាំងជា “អ្នករក្សាព្រលឹង” វប្បធម៌ខ្មែរ រួមចំណែកធ្វើឱ្យសម្បូរបែបនូវអត្តសញ្ញាណជាតិនិងផ្សព្វផ្សាយតម្លៃប្រពៃណីទៅអនាគត៕

អត្ថបទនិងរូប៖ ទីទុយ

ចែករំលែកអត្ថបទ

ពាក្យគន្លឹះ