មហាសាមគ្គីជនជាតិ ភូមិស្រុកផ្លាស់ថ្មី

16/01/2023 - 10:11

ឃុំជាយក្រុង ថើយស្វឹង

រឿងរ៉ាវអំពីភាពរីកចម្រើននៅឃុំដែលមានជនរួមជាតិខ្មែររស់នៅកុះករ នោះគឺឃុំថើយស្វឹង ស្រុកកើ-ដ ក្រុងកឹងធើ តែងទទួលបានការស្ងើចសរសើរសម្រាប់អ្នកដែលធ្លាប់ដឹងពីឃុំថើយស្វឹង ក្នុងដំណាក់កាលដ៏លំបាកកាលពីមុន។

រថយន្តដឹកកម្មកររង់ចាំនៅមជ្ឈមណ្ឌលឃុំ។

បងត្រឹងត្វឹងវៀត អនុប្រធានគណៈឃោសនាអប់រំស្រុកកើ-ដ ជូនដំណឹងល្អ៖ ឃុំថើយស្វឹង ទើបដំឡើងអំពូលភ្លើងបំភ្លឺផ្លូវសម្រេចរួចរាល់នៅតាមភូមិចំនួន ២ ដែលមានជនរួមជាតិខ្មែររស់នៅកុះករគឺ ថើយទ្រឿង១ និងថើយទ្រឿង២។ សំណង់ “ភ្លើងបំភ្លឺផ្លូវជនបទ” នៅលើភូមិសាស្រ្តភូមិទាំង២នេះ អាស្រ័យរដ្ឋ និងប្រជាជនរួមគ្នាធ្វើ មានអត្ថប្រយោជន៍យ៉ាងធំធេងសម្រាប់ការអភិវឌ្ឍសេដ្ឋកិច្ច-សង្គមតំបន់ជនជាតិ។ បងស្រីថាច់ធីជា នៅភូមិថើយទ្រឿង២ រៀបរាប់ឱ្យដឹង៖ “ពីមុន មាមីងក្នុងភូមិ បើចង់ទៅផ្សារកើ-ដ គឺត្រូវធ្វើដំណើរតាមផ្លូវ ប្របមាត់ប្រឡាយឡុងអុង ដែលមានភាពទ្រុឌទ្រោម និងតូចចង្អៀត។ បើចង់ទៅផ្សារពីព្រឹកព្រលឹម ឬមកយឺតនោះ គឺដងផ្លូវងងឹតឈឹង ងាយនឹងធ្លាក់ស្ពាន ឬធ្លាក់រណ្តៅណាស់។ ប៉ុន្តែ ឥឡូវនេះផ្សេងអស់ហើយ ចង់ទៅពេលថ្ងៃ ឬពេលយប់សុទ្ធតែងាយស្រួលទាំងអស់។ ដងផ្លូវរាបរលូន ពេលយប់ភ្លឺចិញ្ចាច”។ ដោយសារផ្ទះស្ថិតនៅមិនឆ្ងាយពីផ្សារទីប្រជុំជនកើ-ដ ហេតុនោះបងប្អូននារីភាគច្រើននៅភូមិថើយទ្រឿង១ តែងចង់ទៅផ្សារទីប្រជុំជនលក់ដូរបន្តិចបន្តួចនៅពេលយប់។ បងស្រីយ័ញធីហៀង នៅភូមិថើយទ្រឿង១ ឱ្យដឹង៖ “ខ្ញុំគិតទៅលក់នំក្រៀបឆ្អើរ និងលក់ដំឡូងដុតនៅផ្សារទីប្រជុំជនក្នុងអំឡុងប៉ុន្មានថ្ងៃជិតបុណ្យចូលឆ្នាំថ្មីវៀតណាម ពីព្រោះផ្សារទីប្រជុំជនពេលយប់ឥឡូវសប្បាយណាស់។ ហើយមិនសូវបង់ដើមទុនទៀតផង បើលក់បាន យើងក៏មានប្រាក់ចេញចូលសម្រាប់ចាយវាយដែរ”។

ថ្នាក់ដឹកនាំឃុំថើយស្វឹង ថតរូបលើដងផ្លូវដែលបានដំឡើងអំពូលភ្លើងបំភ្លឺផ្លូវ។ រូប៖ ត្វឹងវៀត

មិនត្រឹមតែគិតនោះទេ ប្តីប្រពន្ធបងស្រីយ័ញធីធ្វី នៅភូមិថើយទ្រឿង១ ពេលឃើញផ្លូវដាក់អំពូលភ្លើងបំភ្លឺតាមភូមិមានប្រយោជន៍សម្រាប់ខ្លួន។ ពីព្រោះពីមុន រៀងរាល់ពេលព្រឹកនិងពេលរសៀល បងស្រីតែងឌុបប្តីចេញទៅមជ្ឈមណ្ឌលឃុំ ដើម្បីឡើងរថយន្តដឹកកម្មករទៅធ្វើការនៅមណ្ឌលឧស្សាហកម្មត្រាណុក ឥឡូវមិនចំណាយពេលដល់ការងារនេះទៀត។ បងស្រីធ្វី រៀបរាប់៖ “ផ្ទះខ្ញុំបើកហាងលក់គ្រឿងទេស និងមានកូនតូចត្រូវជូនទៅរៀនរាល់ថ្ងៃ ម្ល៉ោះហើយការងាររវល់ណាស់។ ប្តីខ្ញុំឃើញផ្លូវមានភ្លើងអគ្គិសនីដូច្នេះ គាត់ក៏ទិញកង់ដើម្បីកូនទៅមកដោយខ្លួនឯង មិនបាច់ជូននិងទទួលដូចមុនទៀត។ អាស្រ័យហេតុនោះ ខ្ញុំមានពេលលក់ដូរនិងថែទាំកូនបានល្អជាង”។

និយាយពីភាពរីកចម្រើនរបស់ឃុំថើយស្វឹង បងឡេក្វឹកវៀត ប្រធានគណៈកម្មាធិការប្រជាជនឃុំថើយស្វឹង ឱ្យដឹងដោយក្តីរីករាយ៖ “ភូមិភាគបានអនុវត្តផ្គួបបញ្ចូលនូវកម្មវិធី គម្រោងជាច្រើនអំពីការកសាងជនបទថ្មី និងកម្មវិធី ១៣៥ ។ល។ ម្ល៉ោះហើយជនរួមជាតិខ្មែរនៅលើភូមិសាស្រ្តមានលក្ខណៈងាយស្រួលដើម្បីអនុវត្តទម្រង់រកស៊ីចិញ្ចឹមជីវិតដែលរដ្ឋឧបត្ថម្ភ។ អាស្រ័យហេតុនោះ ជីវភាពរបស់ប្រជាជននិយាយរួម និងជនរួមជាតិខ្មែរនិយាយដោយឡែកមានភាពលូតលាស់ច្រើន”៕

ហាថាញ់-វិមាន

ចែករំលែកអត្ថបទ

ពាក្យគន្លឹះ