មហាសាមគ្គីជនជាតិ ភូមិស្រុកផ្លាស់ថ្មី

16/05/2022 - 14:23

ធ្វឹងហ្វានាបច្ចុប្បន្ន

ទន្ទឹមនឹងការអនុវត្តគួបផ្សំគោលនយោបាយជនជាតិ និងកម្មវិធីទិសដៅជាតិអំពីការកសាងជនបទថ្មី ឃុំធ្វឹងហ្វា ស្រុកចូវថាញ់ ខេត្តសុកត្រាំង មានភាពផ្លាស់ថ្មីសឹងតែរាល់ថ្ងៃ ជីវភាពរបស់ជនរួមជាតិខ្មែរត្រូវបានកើនឡើងជាលំដាប់។

ផ្លូវជនបទធ្វឹងហ្វាត្រូវបានកសាងរឹងមាំ។

តាមប្រសាសន៍លោកហ្វិញថាញឌិញ អនុប្រធានគណៈកម្មាធិការប្រជាជន ឃុំធ្វឹងហ្វា ជាឃុំក្រលំបាកខ្លាំង និងមានជនរួមជាតិខ្មែររស់នៅកុះករ ម្ល៉ោះហើយ ធ្វឹងហ្វា ត្រូវបានវិនិយោគគោលនយោបាយជនជាតិជាច្រើន។ អាស្រ័យហេតុនោះ ឃុំបានគួបផ្សំគោលនយោបាយជាច្រើនទៅក្នុងការកសាងជនបទថ្មី ទើបសម្រេចបានប្រសិទ្ធភាពខ្ពស់។ មកទល់ពេលនេះ ផ្លូវគមនាគមន៍ជនបទ ធារាសាស្ត្រ អគ្គិសនី ទឹកស្អាតប្រើប្រាស់៘ ជាសារវន្តបានឆ្លើយតបទៅនឹងតម្រូវការប្រើប្រាស់ ផលិតកម្មរបស់ប្រជាជន។ អត្រាគ្រួសារប្រើប្រាស់ទឹកស្របអនាម័យ និងអគ្គិសនីសុវត្ថិភាព សម្រេចជាង ៩៩%។ ទន្ទឹមនឹងនោះ គោលនយោបាយជនជាតិ ដូច៖ ឧបត្ថម្ភលំនៅឋាន ដើមទុន ពូជសត្វចិញ្ចឹម បណ្តុះបណ្តាលវិជ្ជាជីវៈ ឧទ្ទេសនាមការងារធ្វើ៘ បានបង្កលក្ខណសម្បត្តិសម្រាប់ជនរួមជាតិខ្មែរអភិវឌ្ឍផលិតកម្ម បង្កើនប្រាក់ចំណូល លំនឹងជីវភាព។ បច្ចុប្បន្ន ប្រាក់ចំណូលជាមធ្យមភាគក្នុងមនុស្សម្នាក់ៗ របស់ឃុំសម្រេចជាង ៣៥ លានដុង/ម្នាក់/ឆ្នាំ។ បងលីហឿង នៅភូមិសាបូវ ឱ្យដឹង៖ “កាលពីដើម គ្រួសារខ្ញុំក្រលំបាក ដោយបានរដ្ឋឧបត្ថម្ភបុលទុនអនុគ្រោះ ទើបខ្ញុំមានឱកាសដាំដំណាំរួមផ្សំ និងចិញ្ចឹមជ្រូកជាដើម។ សព្វថ្ងៃ ផ្លូវថ្នល់មានភាពងាយស្រួល មានអគ្គិសនី ទឹក ម្ល៉ោះហើយខ្ញុំដាំដំណាំខួបប្រាំងវស្សា ហើយឈ្មួញចុះមកដល់កន្លែងទិញតែម្តង។ អាស្រ័យធ្វើការរកស៊ីមានប្រសិទ្ធភាព ខ្ញុំបានចាកផុតពីភាពក្រីក្រ ជីវភាពធូរធារ”។

ប្រព័ន្ធធារាសាស្ត្រកសាងសម្រេចរួចរាល់ មានទឹកសាបប្រជាជននៅធ្វឹងហ្វាដាំដំណាំរួមផ្សំបានប្រាំងវស្សារកបានប្រាក់ចំណូលលំនឹង។

ខណៈឃុំអនុវត្តមានប្រសិទ្ធភាពនូវគោលនយោបាយវិនិយោគ និងជំរុញការងារផ្សព្វផ្សាយ ម្ល៉ោះហើយ ប្រជាជនយល់ច្បាស់និងព្រួតដៃអនុវត្តរាល់លក្ខឋានកសាងជនបទថ្មី។ អាស្រ័យហេតុនោះ សំណង់ជនបទនីមួយៗ ផ្សព្វផ្សាយអនុវត្តដល់ទីណា គឺប្រជាជនគាំទ្រ បរិច្ចាគដីកសាងទៅដល់ទីនោះ។ លោកត្រឹងវ៉ាន់ដៀង លេខាសាខាបក្សភូមិត្រាកាញ់ ឱ្យដឹង៖ “បច្ចុប្បន្ន តំបន់ជនបទត្រាកាញ់ផ្លាស់ប្ដូរច្រើនណាស់ គ្មាននៅក្រីក្រដូចមុន។ ពិសេស ផ្លូវជនបទត្រូវបានវិនិយោគកសាងយ៉ាងត្រឹមត្រូវ ប្រឡាយធារាសាស្ត្រមានទឹកសាបសម្រាប់បម្រើការបង្កបង្កើនផលស្រូវ ៣ រដូវ/ឆ្នាំ ខណៈពេលមានកម្មវិធីកសាងជនបទថ្មី ឃើញថាជីវភាពមាមីងខ្មែរមានការកើនឡើង ទូទាំងភូមិគ្មាននៅផ្ទះស្លឹកទៀតឡើយ”។

លោកហ្វិញថាញឌិញ អនុប្រធានគណៈកម្មាធិការប្រជាជនឃុំធ្វឹងហ្វា ឱ្យដឹង៖ “ធ្វឹងហ្វា បានសម្រេច ១៧/១៩ លក្ខឋានកសាងជនបទថ្មី (នៅតែលក្ខឋានគមនាគមន៍ដែលកំពុងកសាងនិងលក្ខឋានគ្រួសារក្រីក្រ)។ ចំពោះមុខ ឃុំកំពុងឆ្លៀតឱកាសនូវប្រភពទុនវិនិយោគ កសាងផ្លូវជនបទ និងឧបត្ថម្ភអភិវឌ្ឍសេដ្ឋកិច្ចដល់អ្នកក្រ ជួយប្រជាជនរកបានប្រាក់ចំណូលលំនឹង”៕

លីធាន - លីសៀ

ចែករំលែកអត្ថបទ

ពាក្យគន្លឹះ