មហាសាមគ្គីជនជាតិ គំរូក្នុងសហគមន៍

09/05/2022 - 14:25

អស់​ពីចិត្ត​ជាមួយ​អ្នក​ជំងឺ​ COVID-១៩

ចាប់​តាំង​ពីជំងឺ​រាត​ត្បាត​ COVID -១៩ ផ្ទុះ​ឡើង​លើកទី ៤ ប្រ​ធាន​គិលា​នុបដ្ឋា​យិកា​ លីធីគឹម​ហាញ់ បាន​ចូល​រួម​ព្យា​បាល​នៅ​ផ្នែក​ប្រ​ពោធ​កម្ម​វិជ្ជមាន​-ប្រ​ឆាំង​ជាតិ​ពុល​ នៅ​មន្ទីរ​ពេទ្យ​ព្យា​បាល​ជំងឺ​ COVID-១៩ ខេត្ត​សុក​ត្រាំង​រហូត​មក​ដល់​បច្ចុប្បន្ន​។​  ក្នុង​អំ​ឡុង​ពេល​ចូល​រួម​ការ​ងារ​ព្យា​បាល​ គិលា​នុបដ្ឋា​យិកា​ តែង​ចាត់​ទុក​អ្នក​ជំងឺ​ដូច​ជា​សាច់​ញាតិ​ក្នុង​គ្រួ​សារ​ ខ្នះ​ខ្នែង​ជួយ​ដោយ​អស់​ពីចិត្ត​ និង​លើក​ទឹក​ចិត្ត​អ្នក​ជំងឺ​ ដើម្បី​ឱ្យ​អ្នក​ជំងឺ​ស្ងប់​អា​រម្មណ៍​ក្នុង​ការ​ព្យា​បាល​។​

 ប្រ​ធាន​គិលា​នុបដ្ឋាយិកា​ លីធី​គឹម​ហាញ់ ។​

បងស្រី​លីធីគឹម​ហាញ់ បម្រើ​ការ​នៅ​ផ្នែក​ប្រ​ពោធ​កម្ម​វិជ្ជមាន​-ប្រ​ឆាំង​ជាតិ​ពុល​ មន្ទីរ​ពេទ្យ​ពហុ​ព្យា​បាល​ខេត្ត​សុក​ត្រាំង​ ខណៈ​ពេល​ដែល​បង​ស្រី​ទទួល​ដំណឹង​ថា​ មន្ទីរ​ពេទ្យ​ត្រូវ​ការ​អ្នក​ចូល​រួម​ក្នុង​ការ​ព្យា​បាល​នៅ​មន្ទីរ​ពេទ្យ​ COVID-១៩ គឹម​ហាញ់ ក៏​ចុះ​ឈ្មោះ​ចូល​រួម​ភ្លាម​ ។​ ដោយ​យល់​ពីអា​រម្មណ៍​អ្នក​ជំងឺ​ បង​គឹម​ហាញ់​កាន់​តែ​យក​ចិត្ត​ទុក​ដាក់​ជាង​ទៀត​ តែង​តែ​សួរ​សាក​អំ​ពី​សុខ​ភាព​លើក​ទឹក​ចិត្ត​ ដើម្បី​ឱ្យ​អ្នក​ជំងឺ​បាន​ស្ងប់​ចិត្ត​។​ បង​គឹម​ហាញ់ ឱ្យ​ដឹង​៖ “អ្នក​ជំងឺ​ COVID-១៩ គ្មាន​សាច់​ញាតិ​នៅ​មើល​ថែ ម៉្លោះ​ហើយ​បុគ្គ​លិក​ពេទ្យ​ត្រូវ​មាន​សុទិដ្ឋិ​និយម​ សំ​ដី​សំ​ដៅ​ទន់​ភ្លន់​ ដើម្បី​ជាទីបង្អែក​ស្មារតី​ជួយ​ឱ្យ​អ្នក​ជំងឺ​ឆ្លង​ផុត​ការ​លំ​បាក​”។​

បន្ទាប់​ពីចេញ​វេន​ម្តង​ៗ​ បង​ហាញ់ ទើប​មាន​ពេល​ទូរ​ស័ព្ទ​ទៅ​សួរ​សុខ​ទុក្ខ​គ្រួ​សារ​ ហើយ​តែង​ទទួល​បាន​ការ​លើក​ទឹក​ចិត្ត​ពីឪ​ពុក​ម្តាយ​ ម៉្លោះ​ហើយ​គាត់​រឹតតែ​មាន​កម្លាំង​ចិត្ត​បន្ថែម​ក្នុង​ការ​ថែទាំ​អ្នក​ជំងឺ​បាន​ល្អ​ជាង​។​ អស់​រយៈ​ពេល​ជាច្រើន​ខែ​មក​នេះ​ នៅ​ក្នុង​មន្ទីពេទ្យ​មាន​តែ​អ្នក​ជំងឺ​ និង​គ្រូ​ពេទ្យ​ ហេតុ​នោះ​ ភារ​កិច្ច​របស់​បុគ្គ​លិកពេទ្យ​ និង​វេជ្ជ​បណ្ឌិត​ គឺ​ព្យា​បាល​ផង​ ថែទាំ​ផង​ ជួយ​អ្នក​ជំងឺ​ចាប់​តាំង​ពីរឿង​តូចបំ​ផុត​។​ នេះ​គឺ​ជាអំ​ឡុង​ពេល​ដែល​មិន​អាច​បំ​ភ្លេច​បាន​របស់​គិលានុ​បដ្ឋាយិកា​គឹម​ហាញ់ ។​ បង​ស្រី​ហាញ់ ឱ្យ​ដឹង​៖ “មន្ទីរ​ពេទ្យ​ខ្វះ​ធន​ធាន​មនុស្ស​ បរិក្ខារ​ពេទ្យ​ មាន​ពេល​ខ្វះ​អុក​ស៊ី​ហ្សែន​ អ្នក​ជំងឺ​មិន​អាច​ដក​ដង្ហើម​បាន​អាច​ស្លាប់​ក្នុង​មួយ​ប៉ប្រិចភ្នែក​ ទោះ​ជាបុគ្គ​លិក​ពេទ្យ​រលឹក​ពេញ​មួយ​យប់​ដើម្បី​ព្យា​បាល​ក៏​ដោយ​។​ ឃើញ​សេចក្ដី​ស្លាប់​នៅ​កៀក​ជិត​អ្នក​ណាក៏​ភ័យ​ខ្លាច​ ប៉ុន្តែ​គ្រូ​ពេទ្យ​ដូច​ជា​យើង​ខ្ញុំ​គិត​តែថា​ ត្រូវ​តែខិត​ខំ​ឱ្យ​អស់​ពីសមត្ថ​ភាព​ដើម្បី​ជួយ​អ្នក​ជំងឺ​បាន​ឆ្លង​ផុត​“ ។​ បើ​តាម​បង​គឹម​ហាញ់ ទោះ​ជា​ខិត​ខំ​ក្នុង​ការ​ព្យា​បាល​ក៏​ដោយ​ ប៉ុន្តែ​នៅ​តែ​ជៀស​មិន​ផុត​ពីការ​សោក​ស្តាយ​ នៅ​ពេល​ឃើញ​អ្នក​ជំងឺ​ចូល​មន្ទីរ​ពេទ្យ​និយាយ​គ្នា​ជា​ធម្ម​តា​ ពីរ​បី​ថ្ងៃ​ក្រោយ​មក​ក៏​បាន​លាចាក​លោក​នេះ​។​ មាន​អ្នក​ជំងឺ​ជា​សះ​ស្បើយ សប្បាយ​រីក​រាយ​វិលត្រ​ឡប់​ទៅ​ផ្ទះ​ បង​គឹម​ហាញ់ និង​បុគ្គ​លិក​ពេទ្យ​ក៏​សប្បាយ​ចិត្ត​ជា​មួយ​ដែរ​ ហើយ​យក​ក្តី​រីក​រាយ​នោះ​ផ្តល់​ជា​កម្លាំង​ចិត្ត​ដើម្បី​ថែទាំ​អ្នក​ជំងឺ​កំ​ពុង​ស្នាក់​នៅ​ក្នុង​មន្ទីរ​ពេទ្យ​ជា​បន្ត​ទៀត​។​

ចំ​ពោះ​គឹម​ហាញ់ មិន​ថា​ធ្វើ​ការ​នៅ​ទីណា​នោះ​ទេ បង​ស្រី​តែង​អស់​ពីចិត្ត​ថែទាំ​អ្នក​ជំងឺ​ ព្រោះ​ថា​បង​ស្រឡាញ់​ចូល​ចិត្ត​ និង​ខិត​ខំ​រៀន​សូត្រ​ដើម្បី​បាន​ក្លាយ​ជាគិលា​នុបដ្ឋា​យិកា​។​ ពីមុន​ស្ថាន​ភាព​គ្រួ​សារ​មាន​ភាព​លំ​បាក​ ម៉្លោះ​ហើយ​រៀន​ចប់​កម្រិត​អនុ​វិទ្យា​ល័យ​ បង​ក៏​ទៅ​ធ្វើ​កម្ម​ករ​កាត់​ដេរ​នៅ​ទីក្រុង​ហូជី​មិញ​ ដើម្បី​ជួយ​គ្រួ​សារ​។​ ថ្វី​ដ្បិត​តែដូច្នោះ​ បង​ស្រី​គឹម​ហាញ់ ក៏​មិន​បោះ​បង់​ក្តី​ស្រមៃ​របស់​ខ្លួន​ដែរ​ បង​រៀន​បណ្តើរ​ធ្វើ​ការ​បណ្តើរ​ ហើយ​បាន​ប្រ​ឡង​ជាប់​ចូល​អនុមហា​វិទ្យា​ល័យ​វេជ្ជ​សាស្ត្រ​ បាច់​វៀត​ ផ្នែក​ជំនាញ​គិលា​នុបដ្ឋាក ។​ ឆ្នាំ​ ២០១៦ ប្រ​ឡង​បញ្ចប់​ បង​គឹម​ហាញ់ បាន​ដាក់​ពាក្យ​សូម​ចូល​មន្ទីរ​ពេទ្យ​ពហុ​ព្យា​បាល​ខេត្ត​សុក​ត្រាំង​ បង​បាន​ចាត់​ឱ្យ​ធ្វើ​ការ​នៅ​ផ្នែក​ប្រ​ពោធ​កម្ម​វិជ្ជមាន​-ប្រ​ឆាំង​ជាតិ​ពុល​។​ បង​គឹម​ហាញ់ ឱ្យ​ដឹង​៖ “អ្នក​ជំងឺ​ដេក​នៅ​ផ្នែក​ប្រ​ពោធ​កម្ម​វិជ្ជមាន​-ប្រ​ឆាំង​ជាតិ​ពុល​ ភាគ​ច្រើន​គឺ​ជំងឺ​ឈឺ​ធ្ងន់​ ត្រូវ​ប្រើ​ម៉ាស៊ីន​ទំ​នើប​ៗ​ជាច្រើន​ ម៉្លោះ​ហើយ​នៅ​ពេល​ចូល​បម្រើ​ការ​នៅ​មន្ទីរ​ពេទ្យ​ព្យា​បាល​ជំងឺ​ COVID -១៩ ខ្ញុំ​ធ្លាប់​ស្រាប់​ហើយ​ ខុស​ប្លែក​ត្រង់​ថា​អ្នក​ជំងឺ​ COVID-១៩ គ្មាន​សាច់​ញាតិ​នៅ​មើល​ថែ ហេតុ​នោះ​ខ្ញុំ​ត្រូវ​ធ្វើ​ទាំង​ការ​ងារ​ជា​អ្នក​ផ្ទះ​គ្រួ​សារ​ អ្នក​ជំងឺ​ ។​ ទោះ​ហត់​នឿយ​យ៉ាង​ណា​ក៏​ដោយ​ខ្ញុំ​ក៏​មិន​ខ្លាច​ ឱ្យ​តែឃើញ​អ្នក​ជំងឺ​បាន​ជា​សះ​ស្បើយ វិល​ត្រ​ឡប់​ទៅ​ជួប​ជុំ​គ្រួ​សារ​វិញ​គឺ​ខ្ញុំ​សប្បាយ​ចិត្ត​ហើយ​”៕​

                                  យ្វីអាញ-វ៉ាន់​តឹន

ចែករំលែកអត្ថបទ