មហាសាមគ្គីជនជាតិ ភូមិស្រុកផ្លាស់ថ្មី

12/04/2022 - 10:21

មុខមាត់ជនបទថ្មីនៅបាកលីវ

អស់រយៈពេលជាង ១០ ឆ្នាំកសាងជនបទថ្មី ឃើញថាមុខមាត់ជនបទនៅខេត្តបាកលីវ បានផ្លាស់ប្ដូរយ៉ាងច្បាស់ក្រឡែត...។

ផ្លូវគមនាគមន៍ជនបទនៅឃុំហ៊ឹងហោយ ត្រូវបានចាក់បេតុងចុះទៅដល់ភូមិ។

ហ៊ឹងហោយជាឃុំតំបន់ជ្រៅលំបាកខ្លាំង មានជនរួមជាតិខ្មែររស់នៅកុះកររបស់ស្រុកវិញឡើយ។ រយៈពេលជាង ១០ឆ្នាំអនុវត្តកម្មវិធីទិសដៅជាតិកសាងជនបទថ្មី តំបន់ជនបទមួយនេះមានការផ្លាស់ប្តូរច្រើន៖ នៅតាមដងផ្លូវបេតុងក្នុងភូមិស្រុក សងខាងមានដាំផ្កាលម្អ របងត្រង់ភ្លឹងនិងផ្ទះឥដ្ឋរឹងមាំ សមរម្យ រួមចំណែកធ្វើឱ្យតំបន់ជនបទកាន់តែស្រស់ស្អាត។ លោកង្វៀងហ្វាងអែម ប្រធានគណៈកម្មាធិការប្រជាជន ឃុំហ៊ឹងហោយ ឱ្យដឹង៖ “ឃុំមានជនរួមជាតិខ្មែររស់នៅជិត ៧០%។ សម្រេចលក្ខឋាន កសាងជនបទថ្មី គឺជាការខិតខំប្រឹងប្រែងដោយឥតឈប់ឈររបស់រដ្ឋអំណាចនិងប្រជាជន។ ក្នុងនោះ ឃុំបានរួមបញ្ចូលកម្មវិធី គម្រោងនិងគោលនយោបាយវិនិយោគជាច្រើនក្នុងតំបន់ជនរួមជាតិខ្មែរមានប្រសិទ្ធភាព។ គួបផ្សំនឹងជំរុញការងារឃោសនាដើម្បីបំផុសស្មារតី ចលនាកម្លាំងប្រជាជនចូលរួម កសាងជនបទថ្មី។ ផ្តើមពីនោះ ប្រជាជនសកម្មគាំទ្រ ចូលរួមបរិច្ចាគដីធ្វើផ្លូវ សង់សាលារៀននិងអនុវត្តនូវលក្ខឋានមួយចំនួនទៀត ហេតុនោះទើបឃុំសម្រេចលក្ខឋានជនបទថ្មីបានឆាប់រហ័ស”។

កសាងជនបទថ្មីគឺជាគោលការណ៍ដ៏ត្រឹមត្រូវ ទាន់ពេលរបស់បក្ស រដ្ឋ បញ្ជាក់ពី “ឆន្ទៈបក្ស ទឹកចិត្តប្រជាជន” កំណត់ទិសដៅ អភិវឌ្ឍន៍ថ្មីសម្រាប់តំបន់ជនបទ កាត់បន្ថយគម្លាតនឹងទីក្រុងជាបណ្តើរៗ។ លោកង្វៀងហ្វាងអែម បានឧទ្ទេសនាមពីភូមិកៃយ៉ា ដើម្បីបញ្ជាក់ពីភាពផ្លាស់ប្តូរនៅតំបន់ជនបទ។ ភូមិមានគ្រួសារខ្មែររស់នៅជិត ១០០% ។ តាមបណ្ដោយដងផ្លូវដានចូលទៅកាន់ភូមិ គឺមានផ្ទះធំៗស្កឹមស្កៃ និងរបងព័ទ្ធជុំវិញ មានដើមឈើលម្អនៅតាមសងខាងផ្លូវត្រូវបានថែទាំ កាត់តម្រឹមយ៉ាងម៉ត់ចត់ បង្កើតបានជាទេសភាពបៃតង - ស្រស់ស្អាត។ កំពុងរៀបចំផ្ទះទទួលបុណ្យចូលឆ្នាំប្រពៃណី លោកសើុងយឿង បានឲ្យដឹង៖ “បើធៀបនឹង ១០ ឆ្នាំមុន ឥឡូវនេះ ភូមិកៃយ៉ាបានផ្លាស់ប្តូរមុខមាត់ថ្មី។ ពិសេសគឺផ្លូវដានតភ្ជាប់នឹងភូមិភាគជិតខាង ម៉ូតូបើកបរទៅមក ការជួញដូរនិងការធ្វើដំណើរងាយស្រួលណាស់; គ្មានផ្ទះស្លឹកទៀតទេ។ អគ្គិសនី ទឹកស្អាត សាលារៀន... មានគ្រប់សព្វ។ ក្រៅពីធ្វើស្រែ មាមីងខ្មែរនៅទាំងដាំបន្លែបង្ការ ឈើហូបផ្លែប្រមូលផលខួបឆ្នាំ ម្ល៉ោះហើយជីវភាពធូរធារ”។

មិនដោយឡែកតែភូមិកៃយ៉ានោះទេ ឃុំជនបទថ្មីវិញត្រាច់ដុង ក្រុងបាកលីវ ក៏បានផ្លាស់ប្តូរជាងមុនដែរ បច្ចុប្បន្នមិនខុសអីពីទីក្រុងឡើយ។ លោកទ្រឿងមិញបាច់ នៅភូមិបៀងដុង A ឃុំវិញត្រាច់ដុង ឱ្យដឹង៖ “តាំងពីឃុំសម្រេចបានបទដ្ឋានជនបទថ្មី គឺរថយន្តបើកបរទៅដល់មជ្ឈមណ្ឌលឃុំ អីុនធឺណិត អគ្គិសនី និងទឹកស្អាតអន្ទងដល់រាល់ភូមិស្រុក ដូច្នេះការផលិត ជួញដូរដោយផ្ទាល់និងតាមអនឡាញមានភាពងាយស្រួលណាស់។ មិនចំពោះតែរូបខ្ញុំនោះទេ ការងារលក់ដូរនៅភូមិភាគមានការអភិវឌ្ឍខ្លាំង ចំណូលគ្រួសារក៏កើនដែរ ដូច្នេះជីវភាពអ្នកណាក៏ធូរធារ ទាំងធ្វើឲ្យភូមិស្រុកកាន់តែសម្បូរសប្បាយទៀតផង”។

បច្ចុប្បន្ន ខេត្តបាកលីវមាន ៤៩/៤៩ ឃុំបានទទួលស្គាល់សម្រេចបទដ្ឋានជនបទថ្មី ក្នុងនោះ មាន ១៦ ឃុំជនបទថ្មីកម្រិតខ្ពស់និង ៣ ឃុំជនបទថ្មីគំរូ; និងមានអង្គភាពថ្នាក់ស្រុកចំនួន ៤ បានបញ្ចប់ភារកិច្ចកសាងជនបទថ្មីគឺ ស្រុកភឿកឡុង ក្រុងបាកលីវ ទីប្រជុំជនយ៉ារ៉ាយនិងស្រុកវិញឡើយ។ តាមប្រសាសន៍ លោកផាមវ៉ាន់ធេវ ប្រធានគណៈកម្មាធិការប្រជាជនខេត្តបាកលីវ៖ “ការកសាងជនបទថ្មីមានតែចំណុចចាប់ផ្តើម គ្មានចំណុចបញ្ចប់ទេ ភូមិភាគគប្បីយកចិត្តទុកដាក់នូវដំណោះស្រាយលើកកម្ពស់ប្រាក់ចំណូលឱ្យប្រជាជន បានដូច្នេះទើបជនបទថ្មីមានការផ្លាស់ប្តូរពិតប្រាកដ”៕

យ្វីអាញ-លេងមី

ចែករំលែកអត្ថបទ

ពាក្យគន្លឹះ