មហាសាមគ្គីជនជាតិ គំរូក្នុងសហគមន៍

27/12/2021 - 10:11

កម្មាភិបាលជិតស្និទ្ធនឹងជនរួមជាតិភាគតិច

អស់រយៈកាលជាច្រើនឆ្នាំបម្រើការនៅការិយាល័យជនជាតិស្រុកហ្គក្វាវ ខេត្តគៀងយ៉ាង បានជួយឱ្យបងង្វៀងត្រុងថឿង យល់ដឹងច្រើនអំពីទំនៀមទម្លាប់របស់មាមីងជនជាតិភាគតិចលើភូមិសាស្ត្រ។

ថតរូបជាមួយ ចឿងធីកេវ ជនជាតិខ្មែរ ជាខ្សែការពារក្រុមបាល់ទាត់នារីវៀតណាម (រូបថតមុនពេលជំងឺ COVID-១៩ មិនទាន់ផ្ទុះរាលដាល)។

ក្រោយពីរំសាយការិយាល័យជនជាតិស្រុក បងថឿង ក៏បានបញ្ជូនមកបម្រើការនៅមជ្ឈមណ្ឌលវប្បធម៌កីឡាស្រុកហ្គក្វាវវិញ។ បម្រើការនៅអង្គភាពថ្មី បងកាន់តែពង្រីកចំណេះដឹងខាងជនជាតិដែលខ្លួនបានរៀនសូត្រតាមរយៈការសំណេះសំណាល ជិតស្និទ្ធជាមួយមាមីងក្នុងឱកាសចុះមូលដ្ឋានផ្សព្វផ្សាយអនុវត្តនូវគោលនយោបាយជនជាតិ។ បងចូលរួមធ្វើភាពយន្តឯកសារអំពីសិប្បករឆ្នើមយ័ញបេ និងយ័ញតៀងជាដើម។ ឆ្លងតាមរយៈនោះ ហាក់ដូចជួយបង្កាត់ភ្លើងបន្ថែម ធ្វើឱ្យបងកាន់តែយល់ច្បាស់អំពីវប្បធម៌ប្រពៃណីរបស់ជនជាតិខ្លួន។ បងថឿង ឱ្យដឹង៖ “មកដល់ផ្ទះសិប្បករយ័ញបេ ខ្ញុំឃើញ ៣ ជំនាន់មនុស្សដែលចូលរួមសកម្មភាពវប្បធម៌។ មិនត្រឹមតែជាអ្នកបង្រៀនដល់សិល្បករ-ការិនីជាច្រើនប៉ុណ្ណោះទេ សិប្បករយ័ញបេ ខ្លួនគាត់ផ្ទាល់ក៏បានបង្កើតក្រុមល្ខោនយូរកេរដែលសមាជិកគឺជាកូនចៅ និងសិស្សដើម្បីទៅសម្តែងនាឱកាសបុណ្យផ្សេងៗរបស់ជនរួមជាតិខ្មែរទៀតផង។ ខ្ញុំតែងពេញចិត្តនឹងការជួបសិប្បករឆ្នើមយ័ញតៀង និងយ័ញបេណាស់ ពីព្រោះលោកទាំង ២ នាក់ តែងបង្ហាត់បង្ហាញដល់ខ្ញុំនូវចំណេះដឹងពីវប្បធម៌ប្រពៃណីរបស់ជនរួមជាតិខ្មែរ”។

បងថឿង បានថ្នាក់ដឹកនាំប្រគល់ឱ្យចូលរួមជាច្រើនសកម្មភាពវប្បធម៌ កីឡារបស់ជនជាតិភាគតិចលើភូមិសាស្ត្រស្រុក។ មានពេលខ្លះ បងថឿងធ្វើជាអាជ្ញាកណ្ដាលក្នុងការប្រកួតបាល់ទះ រុញឈើ ទាញព្រ័ត្រ; ពេលខ្លះឱ្យពិន្ទុ ក្នុងពិធីប្រណាំងទូក-ងក៏សឹងមាន។ បើតាមសិប្បករឆ្នើម យ័ញតៀង បងថឿងតែងយកចិត្តទុកដាក់ដល់ជនរួមជាតិខ្មែរខ្លាំងណាស់ ម្ល៉ោះហើយភាគច្រើនបងតែងស្វែងយល់ពីទំនៀមទម្លាប់របស់ជនរួមជាតិខ្មែរ។ ផ្តើមពីភាពជិតស្និទ្ធរបស់បង ទើបសិប្បករទាំងឡាយតែងអស់ពីចិត្តជួយបង្ហាត់បង្ហាញឱ្យបងកាន់តែយល់ច្បាស់ពីលក្ខណៈសម្បូរបែបនៃវប្បធម៌ ប្រពៃណីដែលជនរួមជាតិខ្មែរកំពុងអភិរក្សនិងពង្រីក។

មានថ្ងៃមួយនោះ បងថឿងបានជូនដំណឹងដល់ខ្ញុំថា លោកពូលឿងចៀង ទទួលមរណភាពដោយចៃដន្យ។ លោកពូចៀង ជាមនុស្សដែលបងថឿងបម្រុងនឹងសរសេរអត្ថបទចុះផ្សាយទស្សនាវដ្ដីចូលឆ្នាំថ្មីឆ្នាំ ២០២២ នៃកាសែតកឹងធើភាសាខ្មែរ។ លោកពូ បានបង្រៀនភ្លេងពិណពាទ្យដល់តន្រី្តករជាច្រើន ខ្ញុំយល់ឃើញថាបងពិតជាគោរពរាប់អាននូវសិប្បករជនជាតិខ្មែរខ្លាំងណាស់៕

ហាថាញ-លីសៀ

ចែករំលែកអត្ថបទ

ពាក្យគន្លឹះ