មហាសាមគ្គីជនជាតិ ភូមិស្រុកផ្លាស់ថ្មី

12/07/2021 - 13:16

ទម្រង់ដាំឆ្លាស់ដើមខ្នុរ ដើម្បី "ចិញ្ចឹម" ដើមទុរេន

ដើម្បីមានប្រភពចំណូលវិនិយោគឱ្យការ “ចិញ្ចឹម” ដើមទុរេន ក្នុងរយៈពេលរង់ចាំទុរេនផ្តល់ផ្លែ គ្រួសារលោកដាវហ្វីឡឹក នៅភូមិឌិញខាញ់A ឃុំឌិញម៉ូង ស្រុកថើយឡាយ ក្រុងកឹងធើ បានដាំឆ្លាស់ទុរេនជាមួយខ្នុរឆាប់ផ្តល់ផ្លែ (ខ្នុរថៃ) ។

លោកដាវហ្វីឡឹក ប្រមូលផលខ្នុរ។

បច្ចុប្បន្ន គ្រួសារលោក ដាវហ្វីឡឹក មានផ្ទៃដីដាំទុរេន ៧ ហិកតា គាត់ដាំឆ្លាស់ជាមួយពូជខ្នុរថៃ។ នេះជាដីធ្វើស្រែ មិនអំណោយផល ដូច្នេះគ្រួសារគាត់បានលើកចម្ការដើម្បីដាំឈើហូបផ្លែ។ បន្ទាប់ពីដាំបាន ១២ ខែ គឺខ្នុរអាចប្រមូលផល គ្រួសារលោកក៏មានប្រាក់ចំណូលពីចម្ការឈើហូបផ្លែ ទោះបីទើបតែឡើងចម្ការបាន ២ ឆ្នាំក៏ដោយ។ លោកដាវហ្វីឡឹក បានឱ្យដឹង៖ “ដើម្បីឱ្យដើមឈើឆាប់ចេញផ្លែ ហើយផ្លែមានគុណភាពល្អនិងសុវត្ថិភាព ខ្ញុំបានអនុវត្តបច្ចេកទេសជឿនលឿនជាច្រើនទៅក្នុងការដាំ។ ពិសេស ខ្ញុំប្រើប្រាស់ជីសរីរាង្គនិងឡើងប្លង់ចម្ការប្រកបដោយលក្ខណៈវិទ្យាសាស្ត្រ ដោយលើកភ្លឺសម្រាប់ដាំប្រហែល ៨ ម៉ែត្រ និងជីកអណ្តូងទទឹងប្រហែល ៥ ម៉ែត្រ ដើម្បីងាយស្រួលក្នុងការស្រោចទឹកនិងថែទាំដើមឈើ។ ដូច្នេះខ្នុរនៅចម្ការខ្ញុំផ្តល់ផ្លែធំណាស់ ហើយភាគច្រើនជាប្រភេទផ្លែលេខ ១ លក់បានថ្លៃ។

លោកដាវហ្វីឡឹក ប្រើទូកម៉ាស៊ីនសម្រាប់ស្រោចស្រពចម្ការឈើហូបផ្លែ។

មកដល់ពេលនេះ លោកហ្វីឡឹក ប្រមូលផលខ្នុរបានរាប់សិបតោន។ ក្នុងរយៈពេលប៉ុន្មានខែចុងឆ្នាំ ២០២០ និងនៅដើមឆ្នាំ ២០២១ ផ្លែខ្នុរថៃមានពេលខ្លះលក់បានតម្លៃរហូតដល់ ៤០.០០០-៥០.០០០ ដុង/គីឡូក្រាម។ និយាយរួមប្រាក់ចំណូលពីដើមខ្នុរគឺ គ្រប់គ្រាន់ដើម្បី "ចិញ្ចឹម" ដើមទុរេន។ ពូជទុរេនដែលគ្រួសារលោកឡឹក បានជ្រើសដាំ ជាប្រភេទពូជទុរេនមានគ្រាប់សំប៉ែត លក់បានថ្លៃខ្ពស់នៅលើទីផ្សារ គឺពូជ Ri ៦ និង ម៉ងថង។ ដោយការដាំដើមឈើតាមទិសដៅគ្មានជាតិគីមី លោកឡឹក នៅទាំងឆ្លៀតចិញ្ចឹមត្រីក្នុងអណ្តូង ដើម្បីបង្កើនប្រាក់ចំណូល។ លោកឡឹក ឱ្យដឹង ការជ្រើសយកដើមខ្នុរថៃឆាប់ផ្តល់ផ្លែសម្រាប់ដាំ គឺសំដៅ "យកដំណាំរយៈពេលខ្លីចិញ្ចឹមវែង" ម៉្យាងដោយឃើញខ្នុរងាយដាំងាយថែទាំនិងប្រមូលផល ទាំងការលក់ចេញរយៈពេលកន្លង ក៏ងាយស្រួល។ តាមការគ្រោងទុក នៅពេលទុរេនផ្តល់ផ្លែ លោកនឹងកាប់រំលោះដើមខ្នុរនៅក្បែរដើមទុរេនឱ្យស្រឡះ ដើម្បីដើមទុរេនលូតលាស់ល្អ៕

អត្ថបទនិងរូប៖ វាំងកុង-ប្រែ៖ សុផន

ចែករំលែកអត្ថបទ

ពាក្យគន្លឹះ