មហាសាមគ្គីជនជាតិ ភូមិស្រុកផ្លាស់ថ្មី

29/06/2021 - 09:06

ជីវភាពធូរធារផ្ដើមពីចិញ្ចឹមគោទឹកដោះ

មកកាន់ភូមិបើដឹប ឃុំវៀងអាង ស្រុកត្រឹងដេ ខេត្តសុកត្រាំង សួររកលោកលីវវ៉ាន់ឌើ មាមីងខ្មែរនៅទីនេះនរណាក៏ស្គាល់ទាំងអស់។ ផ្ដើមពីការចិញ្ចឹមគោទឹកដោះ បានជួយគ្រួសារគាត់ចាកផុតពីភាពក្រីក្រ ឈានឡើងធូរធារនៅភូមិភាគ។

លោកលីវវ៉ាន់ឌើ កំពុងឱ្យចំណីគោ។

ឆ្នាំ ២០០៣ លោកឌើ បានរដ្ឋអំណាចភូមិភាគបញ្ជូនទៅរៀនវគ្គហ្វឹកហាត់ និងទស្សនកិច្ចទម្រង់ចិញ្ចឹមគោទឹកដោះនៅដាឡាក។ ដឹងថានេះជាទម្រង់នាំមកប្រាក់ចំណេញខ្ពស់ សមស្របនឹងលក្ខណសេដ្ឋកិច្ចគ្រួសារ ម្ល៉ោះហើយនៅពេលបានឧបត្ថម្ភគោពូជ និងផ្ដល់បុលទុនអាទិភាពសម្រាប់សង់ក្រោលគោ គាត់រីករាយខ្លាំងណាស់។ បំផុតគឺនៅពេលបានឧទ្ទេសនាមចូលសហករណ៍គោទឹកដោះ គាត់កាន់តែនឹងនរចិត្ត ដ្បិតទឹកដោះគោធានាបានច្រកចេញ។

លោកឌើ ឱ្យដឹង៖ "ចិញ្ចឹមគោទឹកដោះហត់នឿយមែន ប៉ុន្តែនៅពេលគោផ្ដល់ទឹកដោះ គឺថ្ងៃណាក៏មានទឹកដោះលក់ក្នុងតម្លៃពី ១៥.០០០ ដុង/គីឡូក្រាមឡើងទៅ។ ខ្ញុំចិញ្ចឹមគោទឹកដោះ F1 ម្ល៉ោះហើយជាមធ្យមប្រមាណ ១០ ខែ គោផ្ដល់ទឹកដោះប្រហែល ១,៥ តោន"។ តាមប្រសាសន៍លោកឌើ ស្ថិតក្នុងដំណាក់កាល "មាស" ទឹកដោះគោនិងគោពូជថ្លៃខ្លាំងណាស់ កូនគោញីទើបកើតមួយសប្ដាហ៍លក់ក្នុងតម្លៃ ១០ លានដុង/ក្បាល និងគោធំលក់ក្នុងតម្លៃជាង ៥០ លានដុង/ក្បាល។ លោកឌើ រក្សាហ្វូងគោរបស់គ្រួសារចំនួន ៨ ក្បាល/ឆ្នាំ ក្រៅពីនោះគាត់លក់គោពូជ។ ផ្ដើមពីប្រាក់លក់ទឹកដោះគោនិងគោពូជ លោកឌើ សង់បានផ្ទះឥដ្ឋសមរម្យនិងលោះបានដីដែលបញ្ចាំពីមុនចំនួន ១២ កុង។ “ចង់ឱ្យគោធាត់ធំ ផ្ដល់ទឹកដោះច្រើន គឺត្រូវជ្រើសរើសពូជគោល្អ (ពូជគោ F1 កាន់តែល្អ) ក្រោលគោត្រូវតែជ្រះស្អាត ផ្ដល់ស្មៅគ្រប់គ្រាន់និងចំណីច្របល់ត្រឹមល្មមធានាទឹកដោះគ្រប់ជីវជាតិបំប៉ន។ មុនពេលច្របាច់យកទឹកដោះ ត្រូវអនាម័យក្រោលគោឱ្យស្អាត ប្រើកន្សែងជ្រះជ្រលក់ទឹកក្ដៅឧណ្ហៗជូតដោះគោឱ្យស្អាត។ ដ្បិតអី បើទឹកដោះគោមិនជ្រះស្អាត សហករណ៍មិនទិញ" លោកឌើ បានចែករំលែកដូច្នោះ។ ដើម្បីធានាមានប្រភពចំណីឱ្យគោស៊ី លោកឌើ បានប្រើប្រាស់ដីស្រែ ៤ កុងសម្រាប់ដាំស្មៅ។ នៅសល់ ៨ កុងគាត់ផលិតស្រូវ ST ពណ៌ស្វាយ ដើម្បីយកចំបើងធ្វើជាចំណីឱ្យគោ។

លោក ថាច់សុធា ប្រធានសមាគមកសិករឃុំវៀងអាង ឱ្យដឹង៖ "លោកលីវវ៉ាន់ឌើ គឺកសិករផលិតពូកែ មានបច្ចេកទេសនិងបទពិសោធន៍ចិញ្ចឹមគោទឹកដោះនិងជាអ្នកឈានមុខក្នុងការផលិតពូជស្រូវ ST ពណ៌ស្វាយ ចុះកិច្ចសន្យាជាមួយអាជីវកម្មធានាទិញផលិតផល។ លោកឌើ គឺជាកសិករគំរូចាកផុតពីភាពក្រីក្រ ឈានឡើងធូរធារ។ ជាពិសេស កូនៗរបស់គាត់ក៏មានជីវភាពធូរធារផ្ដើមពីការចិញ្ចឹមគោទឹកដោះដែរ ម្ល៉ោះហើយមាមីងក្នុងភូមិស្រុកនរណាក៏ស្ងើចសរសើរដែរ"៕

លីធាន - ថាច់ធី

ចែករំលែកអត្ថបទ

ពាក្យគន្លឹះ