មហាសាមគ្គីជនជាតិ គំរូក្នុងសហគមន៍

12/04/2021 - 07:51

ទម្លាប់រស់នៅនៃគ្រួសារលោកគ្រូ ថាច់វិញ

លោកគ្រូថាច់វិញ នៅភូមិតាមោង ឃុំតឹងមី ស្រុកត្រាអូង ខេត្តវិញឡុង បានមាមីងក្នុងភូមិសរសើរមិនដាច់ពីមាត់ ពីព្រោះកូនចៅរបស់គាត់ ឧស្សាហ៍ព្យាយាមរៀនសូត្រ មានការងារធ្វើលំនឹង។ ចំណែក លោកគ្រូវិញ រស់នៅជាគំរូ ស្រុះស្រួលនឹងមាមីងភូមិផង។ គំរូលេចធ្លោរបស់ប្តីប្រពន្ធលោកគ្រូថាច់វិញ ជាជំហានៗបង្កើតទម្លាប់រស់នៅសម្រាប់គ្រួសារ។

ប័ណ្ណសរសើរ លិខិតសរសើរគ្រូបង្រៀនឆ្នើមរបស់លោកគ្រូថាច់វិញ និងលិខិតទទួលស្គាល់
លិខិតសរសើរដណ្តាំស្លឆ្ងាញ់របស់អ្នកមីងថាច់ធីពុម្ព ព្យួរពេញជញ្ជាំង។

ពេលយើងខ្ញុំទៅដល់ផ្ទះ គាប់ជួនលោកគ្រូថាច់វិញ រៀបចំទៅវាលដើម្បីដាំស្មៅ។ ឃើញយើងខ្ញុំហាក់ងឿងឆ្ងល់ គាត់ក៏និយាយ៖ “ខ្ញុំមានដីស្រែត្រឹមតែ២កុង ម៉្លោះហើយនៅតាមភ្លឺប្រឡាយខ្ញុំដាំស្មៅ សម្រាប់កូនស្រីពៅ ចិញ្ចឹមគោ។ ក្រោយពីប្រមូលផលស្រូវម្តងៗ ខ្ញុំតែងកិនអង្ករចែកឱ្យកូនៗទាំង ៥ នាក់ ស្មើៗគ្នា។ ថ្វីដ្បិតតែកូនៗអាចនឹងទិញអង្ករ ហូបបានមែន ប៉ុន្តែការចែកអង្ករឱ្យកូនៗដូច្នេះ ប្តីប្រពន្ធខ្ញុំសប្បាយចិត្តណាស់ ម្យ៉ាងឃើញកូនៗចេះសាមគ្គី ស្រឡាញ់រាប់អានគ្នា។ ហេតុនេះ ខ្ញុំក៏មិនចោលទម្លាប់ដែល ធ្លាប់មានតាំងពីយូរមក”។

នៅភូមិតាមោងអំឡុងឆ្នាំ ១៩៨០ ដល់ ១៩៩០ រដូវវស្សាផ្លូវភក់ជ្រាំ ប៉ុន្តែកូនៗរបស់លោកគ្រូវិញគ្មានអ្នកណាម្នាក់ត្រូវបោះបង់ ការសិក្សាឡើយ។ អ្នកមីងថាច់ធីពុម្ព ប្រពន្ធ លោកគ្រូវិញ រៀបរាប់៖ “កាលនោះ ខ្ញុំធ្វើស្រែ២កុង ចំណែកប្ដីខ្ញុំគាត់ទៅបង្រៀនមួយពេល ធ្វើការឈ្នួលមួយពេល។ អ្នកខ្លះបបួលគាត់ឈប់ធ្វើគ្រូបង្រៀនទៅ ទៅធ្វើការឈ្នួលពេញមួយថ្ងៃរកបានប្រាក់ច្រើនជាង។ ប៉ុន្តែ គាត់ប្រាប់ថា៖ “បើខ្ញុំឈប់បង្រៀនកូនៗ ប្រហែលឈប់រៀនដែរ យើងត្រូវតែខំប្រឹងតស៊ូ ដើម្បីយឺតយោងពួកគេ ពីព្រោះគ្រួសារយើងមានតែដីស្រែ ២ កុង កូនៗឈប់រៀន ពួកគេនឹងធ្វើការរកស៊ីអ្វី ដើម្បីកសាងជីវភាពគ្រួសារទៅអនាគត”។ លៃលកពីមួយឆ្នាំទៅ មួយឆ្នាំ គ្រួសារខំប្រឹងជម្នះលំបាកដើម្បីសម្រេចទិសដៅរៀនសូត្រ។ មកទល់នឹងពេលនេះ លោកគ្រូវិញ មានកូនស្រី ៣ នាក់ បន្តអាជីពឪពុក។ កូនស្រីពៅរៀនចប់មហាវិទ្យាល័យនៅសាកលវិទ្យាល័យត្រាវិញ។ កូនប្រុស ទី ៤ កំពុងបំពេញការងារនៅនគរបាលវិញឡុង។ ពិសេសគឺកូនស្រីច្បង និងស្រីបន្ទាប់ ២ នាក់របស់គាត់ គឺជាគ្រូបង្រៀនពូកែរបស់សាលាមតេ្តយ្យតឹងមី សម្រេចកិត្តិនាមជាគ្រូបង្រៀនឆ្នើម កិត្តិនាមដីសមាស ។ល។

បង្ហាញគេហដ្ឋានយ៉ាងសមរម្យ លោកគ្រូវិញ រៀបរាប់៖ “ផ្ទះនេះមិនមែនខ្ញុំចេញប្រាក់សង់ទេ នេះបានមកពីប្រភពទុនការរួបរួម ផ្ទះមិត្តរួមកងរបស់កូនប្រុស ការឧបត្ថម្ភពីសមាគមកាកបាទក្រហម និងពីព្រះសង្ឃ មួយអង្គនៅក្រុងហូជីមិញ។ ចំណែកការរៀបចំតុបតែងក្នុងផ្ទះ គឺកូនៗចេញប្រាក់ម្នាក់បន្តិចៗ ទិញមករៀបចំតាក់តែងទើបបានដូច្នេះ”។ លោកគ្រូថាច់ង៉ុក ជាមិត្តរួមអាជីព ម្នាក់ក្នុងចំណោមមិត្តរួមអាជីពយូរឆ្នាំរបស់លោកគ្រូវិញ បច្ចុប្បន្ន ជាលេខាសាខាបក្សភូមិ តាមោង បញ្ជាក់៖ “ប្តីប្រពន្ធបងវិញរស់នៅជាគំរូ មានសណ្តាប់ធ្នាប់ត្រឹមត្រូវ ស៊ូទ្រាំនឹងការលំបាក ដើម្បីគិតគូរឱ្យកូនៗ។ ចំពោះមាមីងក្នុងភូមិផង បងវិញតែងយកចិត្តទុកដាក់ជួយឧបត្ថម្ភដោយអស់ពីចិត្ត។ រឿងភូមិផង រឿងរៀនសូត្ររបស់ក្មួយៗក្នុងភូមិ។ល។ អ្វីដែលជួយបាន គឺប្តីប្រពន្ធបងវិញជួយអស់ពីលទ្ធភាព ម៉្លោះហើយប្តីប្រពន្ធបងវិញតែងបានមាមីងក្នុងភូមិស្រឡាញ់រាប់អាន”។

សង្កេតឃើញការរស់នៅរបស់ឪពុកម្តាយ កូនៗរបស់គាត់រៀនសូត្រតាមដោយមិន ធ្វើឱ្យឪពុកម្តាយខកបំណងឡើយ។ បងស្រីសើុងធីឡាយ នៅភូមិតាមោង ឱ្យដឹង៖ “កូនៗរបស់ពូវិញ អ្នកណាក៏លុះក្នុងដំបូន្មាន សុភាពរាបសា។ ទោះបីទៅបង្រៀនទៅធ្វើការកូនៗគាត់មិនចេះឆ្មើងឆ្មៃ។ ទម្លាប់រស់នៅនិងប្រៀនប្រដៅកូនរបស់គ្រួសារពូវិញ ធ្វើឱ្យមនុស្សជាច្រើនក្នុងភូមិរៀនសូត្រតាម”៕

ហាថាញ់-មុនី

ចែករំលែកអត្ថបទ

ពាក្យគន្លឹះ