មហាសាមគ្គីជនជាតិ គំរូក្នុងសហគមន៍

02/02/2021 - 09:10

បង្កើតអាជីពនៅនឹងភូមិកំណើតមានអ្វីពិបាក!

នោះគឺការបង្ហាញពីភាពជាក់ស្ដែង ក្រោយរយៈពេល ៥ ឆ្នាំឃ្លាតឆ្ងាយពីមហាវិទ្យាល័យ យុវ ជនវ័យក្មេង ដងជីអាង សម្រេចចិត្តវិលមកស្រុកកំណើតនៅភូមិដាបាក A ឃុំខាញ់ប៊ិញតី ស្រុកត្រឹងវ៉ាន់ថើយ ខេត្តកាម៉ាវ ដើម្បីកសាងជីវភាព។

យុវជន ដងជីអាង (ខាងឆ្វេង) ជោគជ័យជាមួយនឹងទម្រង់ពហុវប្បកម្ម។

អាយុ ៣០ ឆ្នាំ សម្រាប់អាងគឺដំណើរនៅវែងឆ្ងាយខាងមុខ ប៉ុន្តែពោរពេញដោយក្ដីរីករាយ។ សម្លឹងឃើញដំណាំពោតចេញផ្លែ ននោង ចេញផ្កា និងដំណាំឆ្លាស់ជាមួយគ្នានោះដែរ គឺត្របែក ខ្នុរ កំពុងលូតលាស់ល្អ អាងជឿជាក់ថា ទម្រង់ចម្ការបន្លែ ស្រះចិញ្ចឹមត្រីរបស់គាត់ គឺសមស្របនិងពោរពេញដោយក្ដីសង្ឃឹមនៅនឹងភូមិកំណើត។

អាងរៀបរាប់៖ ថ្វីដ្បិតជាច្រើនឆ្នាំឃើញការអភិវឌ្ឍនៅកន្លែងដទៃកាលនៅរៀនមហាវិទ្យាល័យក៏ដោយ ប៉ុន្តែអាងមិនបាននឹកភ្នកថា នឹងឃ្លាតចាកពីភូមិកំណើតនោះទេ។ អាងតែងជឿជាក់ថា ភូមិកំណើតគឺកន្លែងដ៏មនោរម្យសម្រាប់បង្កើតអាជីព។ ព្រោះហេតុនោះ ក្រោយពីបញ្ចប់មហាវិទ្យាល័យនៅសាលានាយទាហានកងទ័ពជើងគោក ២ ដុងណាយ អាងបានចូលរួមសកម្មភាពសម្ព័ន្ធយុវជននៅនឹងភូមិ ហើយប្ដូរទៅបំពេញការងារនៅគណៈបញ្ជាការយោធាឃុំខាញ់ប៊ិញតី ឆ្លៀតពេលទំនេរ អាងក៏ចាប់ផ្ដើមអនុវត្តបំណងធ្វើមានលើផ្ទៃដីរបស់គ្រួសារ។ នៅតែរក្សាការផលិតស្រូវ ប៉ុន្តែអាងបានកែប្រែដី ៨ កុង ដើម្បីលើករងជីកស្រះ ដាំដំណាំ រួមផ្សំចិញ្ចឹមត្រី។ ភាពឈ្លាសវៃរបស់យុវជនរូបនេះ គឺគិតគូរយ៉ាងល្អិតល្អន់ក្នុងផលិតកម្មដើម្បីសម្រេចបានកត្តា ២ យ៉ាង៖ ប្រើប្រាស់អស់ពីលទ្ធភាពផ្ទៃដី និងកាត់បន្ថយប្រាក់ចំណាយ នាំមកប្រាក់ចំណេញខ្ពស់បំផុត។

ដងជីអាង ឱ្យដឹង៖ “រៀងរាល់ឆ្នាំក្នុងរដូវវស្សា ខ្ញុំផលិតស្រូវលើដីលើករង មិនប្រើប្រាស់ជីអ្វីទេ រហូតដល់ស្រូវមានកម្ពស់ពី ២ ទៅ ៣ តឹក ទើបដាំឆ្លាស់ត្រសក់ស្រូវ។ ការផលិតស្រូវប្រមូលផលបានប៉ុន្មាន គឺសម្រាប់ផ្គត់ផ្គង់ចិញ្ចឹមត្រី ដើម្បីសម្រាលទិញចំណី (ស្រះចិញ្ចឹមត្រីនីមួយៗ មានផ្ទៃទំហំ ២៥០ ម៉ែត្រការ៉េ ដោយការអនុវត្តរបៀបនេះ គួបផ្សំនឹងការឱ្យត្រីស៊ីបន្លែ មើមឈើដែលខូចៗ បានជាបង់តែ ១/៣ នៃប្រាក់ចំណាយប៉ុណ្ណោះ)។ ក្រោយពីប្រមូលផលស្រូវ ចំបើងនិងជញ្រ្ជាំងបង្កើនបានជីជាតិសម្រាប់ដាំដំណាំរួមផ្សំ ឈើហូបផ្លែ។ល។ អាង រ៉ាយរ៉ាប់បន្ត៖ “ធម្មតាមាមីងយើងផលិតគឺលក់ឱ្យឈ្មួញតែម្តង។ ប៉ុន្តែចំពោះខ្ញុំយល់ឃើញថា នៅជនបទឥឡូវក៏មានផ្សារ ហេតុអីក៏យើងមិនទៅលក់ខ្លួនឯងដើម្បីរកប្រាក់ចំណេញបន្ថែម។ រយៈពេល ៣ ឆ្នាំកន្លង រាល់ថ្ងៃប្រសិនបើមានបន្លែ ផ្លែឈើ ត្រីបន្តិចបន្តួចក៏ដោយ ខ្ញុំតែងឱ្យអ្នកផ្ទះយកទៅផ្សារលក់។ រៀងរាល់ថ្ងៃរកបានប្រាក់ចំណូល ពី ៣០០.០០០ ដល់ ៥០០.០០០ ដុងគឺធម្មតា”។

លេខាសម្ព័ន្ធយុវជនឃុំខាញប៊ិញតី ង្វៀងជីដែ ឱ្យដឹង៖ “មិត្តអាងគឺសមាជិកសម្ព័ន្ធយុវជន មានភាពរវៀសរវៃក្នុងការបង្កបង្កើនផល និងក្នុងចលនាសម្ព័ន្ធយុវជន។ ពីមុននេះ ខណៈពេលនៅជាលេខាសាខាសម្ព័ន្ធយុវជនភូមិអាងមានភាពស្វាហាប់ មានរបៀបធ្វើល្អៗក្នុងការកៀរគរកម្លាំងយុវជន ។ ទម្រង់ផលិតបែបពហុវប្បកម្មរបស់អាង គឺជាទម្រង់ប្រជាចលនាប៉ិនប្រសប់គំរូសម្រេចប្រសិទ្ធភាព និងត្រូវបានពង្រីកក្នុងកម្លាំងសម្ព័ន្ធយុវជនឃុំនៅ ស្រុកកំណើតរយៈពេលកន្លង”៕

យោងតាមកាសែតកាម៉ាវ -ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ