មហាសាមគ្គីជនជាតិ គំរូក្នុងសហគមន៍

20/10/2020 - 09:08

លោកគឹមតឺ ធ្វើសេដ្ឋកិច្ចពូកែ

លោកគឹមតឺ កើតឆ្នាំ១៩៦៥ នៅភូមិឥដ្ឋ ឃុំហ្វៀងហោយ ស្រុកកាងឡុង ខេត្តត្រាវិញ ឈានឡើងចាកភាពក្រីក្រ អាស្រ័យបង្វែរផ្ទៃដីធ្វើស្រូវផ្ដល់ទិន្នផលទាប មកដាំដើមឈើហូបផ្លែ។

ទម្រង់ដាំក្រូចថ្លុងរបស់លោកគឹមតឺ (អ្នកឈរខាងស្តាំ)។

គ្រួសារលោកគឹមតឺ មានផ្ទៃដីធ្វើស្រែជាង ១២ កុង ផ្តល់ទិន្នផលទាប ម្ល៉ោះហើយចំណេញបានតិចតួច។ អាស្រ័យហេតុនោះ គ្រួសារលោកជួបលំបាកច្រើន។ លុះដល់ឆ្នាំ ២០១០ គាត់ក៏បង្វែរមកដាំក្រូចថ្លុងនិងក្រូចពោធិ៍សាត់វិញ។

លោកគឹមតឺ ឱ្យដឹង៖ “ភូមិឥដ្ឋ គឺជាតំបន់ដីខ្សាច់ ម្ល៉ោះហើយប្រជាជនច្រើនតែដាំឫស្សី។ ថ្វីដ្បិតដូច្នោះក្តី ប៉ុន្មានឆ្នាំជិតៗនេះ តម្លៃសេដ្ឋកិច្ចពីដើមឫស្សីទាប ម្ល៉ោះហើយខ្ញុំក៏បង្វែរមកដាំដើមឈើហូបផ្លែវិញ”។ ពេលឃើញគ្រួសារមួយចំនួនហៅលក់ដីចម្ការឫស្សីដោយតម្លៃសមរម្យ លោកគឹមតឺ ក៏លក់ដីស្រែ រួចទិញដីចម្ការឫស្សីវិញ។ ក្រោយមក គាត់កាប់គាស់ដើមឫស្សីចេញ ដើម្បីដាំដើមដូង ដាំក្រូចថ្លុង និងក្រូចពោធិ៍សាត់។ល។ ក្នុងដំណាក់កាលដាំដើមឈើហូបផ្លែ គាត់តែងចូលរួមទៅទស្សនាទម្រង់រកស៊ីមានប្រសិទ្ធភាព អាស្រ័យរដ្ឋអំណាចភូមិភាគចាត់តាំងឡើង។ ក្រៅពីនោះ គាត់នៅទាំងសកម្មចូលរួមវគ្គហ្វឹកហ្វឺនណែនាំអនុវត្តវិទ្យាសាស្រ្តបច្ចេកទេស បង្វែររចនាសម្ព័ន្ធពូជដំណាំ សត្វចិញ្ចឹម ព្រមទាំងរៀនសូត្របទពិសោធន៍តាមរយៈកាសែត ទូរទស្សន៍ ពីទម្រង់បង្វែរផ្ទៃដីធ្វើស្រែមិនសូវបានផលមកទម្រង់ផ្សេងៗ ផ្ដល់តម្លៃសេដ្ឋកិច្ចខ្ពស់។

ការខ្នះខ្នែងបង្វែរទម្រង់រកស៊ីរបស់លោកតឺ បាននាំមកនូវប្រសិទ្ធភាព។ ជាមួយនឹងផ្ទៃដីដាំក្រូចថ្លុង ក្រូចពោធិ៍សាត់ ១២ កុង រៀងរាល់ឆ្នាំលោករកបានប្រាក់ចំណូលប្រមាណ ២០០ លានដុង ក្រោយពីទូទាត់រួចស្រេចនៅចំណេញជាង ១៥០ លានដុង កើនច្រើនដងបើប្រៀបនឹងធ្វើស្រែ។

លោកថាច់បាំង លេខាសាខាបក្សភូមិឥដ្ឋ ឱ្យដឹង៖ “លោកគឹមតឺ គឺជាកសិករគំរូផលិតពូកែម្នាក់របស់ភូមិភាគ។ អាស្រ័យគម្រោងអភិវឌ្ឍផលិតកម្មសម្រាប់ជនរួមជាតិភាគតិចជួយឧបត្ថម្ភ គាត់ក៏អនុវត្តជោគជ័យទម្រង់ “បង្វែរពីផ្ទៃដីដាំឫស្សី ធ្វើស្រូវផ្ដល់ទិន្នផលទាប មកដាំដើមឈើហូបផ្លែមានតម្លៃសេដ្ឋកិច្ចខ្ពស់”។ ភូមិភាគបានស្នើឡើងថ្នាក់លើពង្រីកទម្រង់នេះ ដើម្បីរួមចំណែកបង្កើនប្រាក់ចំណូលជូនជនរួមជាតិខ្មែរ”៕

សើុងម៉ាល័យ-វិមាន

ចែករំលែកអត្ថបទ

ពាក្យគន្លឹះ