រៀងរាល់ឱកាសបវេសនកាល ភាពសប្បាយរីករាយរបស់កុមារនៅតំបន់ដាច់ស្រយាល តំបន់ដែលមានជនជាតិភាគតិចរស់នៅកុះករ និងគ្រួសារដែលមានជីវភាពលំបាកនៅខេត្តកាម៉ាវ តែងលាយឡំនឹងក្តីបារម្ភអំពីសៀវភៅសិក្សា មធ្យោបាយទៅមកនិងសុវត្ថិភាពរបស់កូនចៅ។ តាមរយៈសកម្មភាពជាក់ស្តែង នគរបាលខេត្តកាម៉ាវ បានរួមដំណើរដោយការជួយឧបត្ថម្ភ សម្ភារៈ បំប៉នចំណេះដឹងនិងបំណិនជីវិត បំណិនការពារខ្លួន ព្រមទាំងបង្កើនទំនុកចិត្ត ដើម្បីឱ្យប្អូនៗអាចបន្តដំណើរទៅសាលាដោយភាពរឹងមាំ។
*ជួយជំរុញដំណើរប្អូនទៅសាលា
នៅឃុំភូមី ការិយាល័យនគរបាលចល័តនៃនគរបាលខេត្តកាម៉ាវ បានចាត់តាំងកម្មវិធីជំរុញដំណើរទៅសាលាដល់សិស្សានុសិស្សដែលមានស្ថានភាពលំបាកខ្លាំង។ តាមរយៈកម្មវិធីនេះ កម្មាភិបាល យុទ្ធជននគរបាល បានជូនអំណោយ ៤៥ ចំណែក៖ រួមមានកាបូបស្ពាយ និងសៀវភៅសរសេរ ៤៥០ ក្បាល ដល់ប្អូនៗដោយផ្ទាល់ដៃ។ អំណោយទាំងនេះ ទោះបីមានតម្លៃមិនធំដុំក៏ដោយ ប៉ុន្តែបានផ្តល់ជាកម្លាំងចិត្តដល់សិស្សឱ្យបន្តខិតខំរៀនសូត្រ ឈានឡើងក្នុងជីវភាព។ ថ្មីៗនេះ នៅសាលាបឋមសិក្សាដោទឿលួង ឃុំអ៊ូមិញ សាខាសម្ព័ន្ធយុវជននិងសមាគមនារី ការិយាល័យគ្រប់គ្រងអន្តោប្រវេសន៍នៃនគរបាលខេត្តកាម៉ាវ បានសហការជាមួយអង្គភាពពាក់ព័ន្ធនិងសប្បុរសជន ចាត់តាំងកម្មវិធី "ជំរុញដំណើរប្អូនទៅសាលា" ឆ្នាំសិក្សា ២០២៦-២០២៧។ ក្នុងឱកាសនេះ ក៏បានជូនអំណោយ ១០០ ចំណែក៖ រួមមានកាបូបស្ពាយ សៀវភៅសរសេរ សម្ភារៈសិក្សា និងសម្ភារៈចាំបាច់ជាច្រើនទៀត ជូនដល់ប្អូនដែលមានជីវភាពលំបាក។ លោកអនុសេនីយ៍ឯក ង៉ោថាញ់ធឹក លេខាសាខាសម្ព័ន្ធយុវជននៃការិយាល័យគ្រប់គ្រងអន្តោប្រវេសន៍ នគរបាលខេត្តកាម៉ាវ មានប្រសាសន៍៖ "ដោយប្រកាន់ខ្ជាប់ស្មារតី "ដើម្បីប្រជាជនស្ម័គ្រចិត្តបម្រើ" អង្គភាពមានបំណងឱ្យសកម្មភាពដែលផ្តោតលើកុមារ មិនត្រឹមតែជាការផ្តល់អំណោយប៉ុណ្ណោះទេ ថែមទាំងជួយសិស្សដែលមានជីវភាពលំបាកឱ្យមានលក្ខណៈកាន់តែល្អប្រសើរសម្រាប់ការសិក្សា មានទំនុកចិត្តឈានចូលឆ្នាំសិក្សាថ្មី និងយល់ច្បាស់ពីការយកចិត្តទុកដាក់និងការរួមដំណើរពីសហគមន៍ផង"។
ជូនអំណោយដល់សិស្សខ្មែរនៅសង្កាត់វិញត្រាច ក្នុងកម្មវិធី "រួមដំណើរជាមួយកុមារ"។
លោកយាយង្វៀងធីលី (អាយុ ៧១ ឆ្នាំ) នៅភូមិកៃបាត ឃុំហឹងមី រស់នៅតែម្នាក់ឯង និងជាអ្នកមើល ថែចៅពីរនាក់ដោយផ្ទាល់ដែលកំពុងសិក្សានៅថ្នាក់ទី៨ និងថ្នាក់ទី១។ ឪពុកម្តាយរបស់កុមារទាំងពីរនាក់ ទៅធ្វើការរកស៊ីនៅស្រុកឆ្ងាយ ប្រាក់ចំណូលទាប ដូច្នេះការចំណាយសម្រាប់ការចូលរៀននៅដើមឆ្នាំសិក្សា បានក្លាយជាបន្ទុកមួយដ៏ធ្ងន់សម្រាប់គ្រួសារ។ ដោយយល់ច្បាស់ពីស្ថានភាពរបស់លោក យាយ ង្វៀងធីលី សម្ព័ន្ធយុវជនមូលដ្ឋាននៃពន្ធនាគារលេខ១ នគរបាលខេត្ត បានសហការជាមួយសាខាសម្ព័ន្ធយុវជននៃស្ថាប័នបក្សឃុំហឹងមី ចុះសួរសុខទុក្ខ លើកទឹកចិត្តនិងផ្ដល់ជូនគ្រួសារលោកយាយ កង់មួយគ្រឿង អង្ករ មីកញ្ចប់ ព្រមទាំងសម្ភារៈប្រើប្រាស់ចាំបាច់មួយចំនួនទៀត។ ព្រមជាមួយនោះ ក្រុមការងារក៏បានផ្ដល់ជូនអំណោយ សៀវភៅសរសេរ និងសម្ភារៈសិក្សាដល់ប្អូនមួយចំនួនដែលមានជីវភាពលំបាកនៅលើភូមិឋាន។ លោកយាយលី ចែករំលែក៖ "ក្មួយៗនគរបាល បានមកសួរសុខទុក្ខ និងជូនកង់ អង្ករនិងសម្ភារៈប្រើប្រាស់ គ្រួសារខ្ញុំមានអារម្មណ៍រំភើបនិងអរគុណយ៉ាងខ្លាំង។ ដោយការជួយនេះ ចៅៗរបស់ខ្ញុំមានសៀវភៅ សម្ភារៈសិក្សានិងកាបូបដើម្បីទៅសាលា ហើយខ្ញុំក៏ស្រាលបន្ទុកបានមួយផ្នែកដែរ"។
*បំប៉នបំណិនដើម្បីកុមារចេះការពារខ្លួន
ក្រៅពីការជួយផ្នែកខាងសិក្សា នគរបាលខេត្តកាម៉ាវ ក៏យកចិត្តទុកដាក់លើការបំពាក់បំប៉នបំណិនចាំបាច់ដល់កុមារ ដើម្បីជួយឱ្យប្អូនៗចេះបង្ការហានិភ័យនិងការពារខ្លួន។ ក្នុងឱកាសវិស្សមកាល នគរបាលសង្កាត់វិញត្រាច បានសហការចាត់តាំងសកម្មភាពមានប្រយោជន៍ជាច្រើនដល់កុមារជនជាតិខ្មែរ និងកុមារដែលមានជីវភាពលំបាក។ ប្អូនៗត្រូវបានណែនាំអំពីបំណិនឌីជីថល ការប្រើប្រាស់អ៊ីនធឺណិតប្រកបដោយសុវត្ថិភាព ការសម្គាល់ហានិភ័យនៅលើបណ្តាញអ៊ីនធឺណិត ដូចជា ការឆបោកតាមប្រព័ន្ធអនឡាញ ព័ត៌មានអាក្រក់ ព្រមទាំងអំពើរំលោភបំពានលើកុមារ។ លោកថាច់កឿង ប្រធានគណៈការងាររណសិរ្សអនុសង្កាត់យ៉ាប់ណឿក សង្កាត់វិញត្រាច បានវាយតម្លៃ កម្មវិធីនេះមានអត្ថន័យជាក់ស្តែង ពិសេសសម្រាប់សិស្សជនជាតិខ្មែរ និងកុមារដែលមានស្ថានភាពលំបាក; ទន្ទឹមនឹងនោះ សង្ឃឹមថា សកម្មភាពដូច្នេះបន្តបានរៀបចំឡើងជាប្រចាំ ដើម្បីជួយឱ្យកុមារមានទំនុកចិត្ត និងមានសុវត្ថិភាពកាន់តែប្រសើរក្នុងជីវភាពរស់នៅ។
ជូនអំណោយដល់សិស្សានុសិស្សសាលាបឋមសិក្សាដោទឿលួង ឃុំអ៊ូមិញ។
ព្រមជាមួយនោះ បំណិនក្នុងការបង្ការ ទប់ស្កាត់ការលង់ទឹក ក៏បានការិយាល័យនគរបាលពន្លត់អគ្គិភ័យ សង្គ្រោះបន្ទាន់ និងសង្គ្រោះគ្រោះមហន្តរាយនៃនគរបាលខេត្ត ចាត់តាំងវគ្គបង្រៀនហែលទឹកប្រកបដោយសុវត្ថិភាព រួមនឹងផ្សព្វផ្សាយអំពីការបង្ការ និងទប់ស្កាត់ការលង់ទឹកជូនកុមារជាង ១០០ នាក់នៅទូទាំងខេត្ត។ នៅក្នុងថ្នាក់រៀន កម្មាភិបាល យុទ្ធជននគរបាល បានណែនាំកុមារឱ្យស្គាល់ពីហានិភ័យនៃការលង់ទឹក កំណត់សម្គាល់តំបន់ដែលមានគ្រោះថ្នាក់ អនុវត្តនូវគោលការណ៍សុវត្ថិភាពនៅពេលលេង ឬងូតទឹកក្នុងព្រែក ប្រឡាយ ស្រះនិងបឹងបួរ; ទន្ទឹមនឹងនោះ កុមារក៏ត្រូវបានបំពាក់បំណិនសង្គ្រោះខ្លួនឯង និងជួយអ្នកដែលជួបគ្រោះថ្នាក់ក្នុងស្ថានភាពសមស្រប។ ក្រោមការណែនាំដោយផ្ទាល់ពីកម្មាភិបាល យុទ្ធជននគរបាល ប្អូនៗចាប់ផ្តើមស្គាល់និងសម្របខ្លួនបន្តិចម្ដងៗជាមួយបរិស្ថានទឹក រៀនបច្ចេកទេសអណ្តែតខ្លួន ការដកដង្ហើម ការធាក់ជើង ដៃកកាយទឹក និងបំណិនហែលទឹកជាមូលដ្ឋាន។ ប្អូនៗក៏បានណែនាំអំពីរបៀបប្រើប្រាស់អាវពោង ឧបករណ៍ជួយសង្គ្រោះ និងខ្សែសង្គ្រោះឱ្យបានត្រឹមត្រូវ។ អ្នកមីង ទ្រិញថាញថាវ នៅសង្កាត់វិញត្រាច ឱ្យដឹង៖ "ថ្នាក់បង្រៀនហែលទឹកដោយឥតគិតថ្លៃដែលនគរបាលខេត្តរៀបចំឡើង ពិតជាមានប្រយោជន៍ណាស់ មិនត្រឹមតែជួយឱ្យកុមារចេះហែលទឹកប៉ុណ្ណោះទេ ថែមទាំងចេះបង្ការនិងដោះស្រាយនៅពេលជួបស្ថានភាពគ្រោះថ្នាក់ក្នុងទឹក។ ខ្ញុំពិតជាស្ងប់អារម្មណ៍យ៉ាងខ្លាំង នៅពេលឃើញកូនចេះហែលទឹក និងចេះបំណិនការពារខ្លួន។ ខ្ញុំសូមថ្លែងអំណរគុណដោយស្មោះ ចំពោះទឹកចិត្តនិងការយកចិត្តទុកដាក់របស់កម្មាភិបាល យុទ្ធជននគរបាល"។
តាំងពីកាបូបស្ពាយថ្មី សៀវភៅថ្មី កង់សម្រាប់ជិះទៅសាលា រហូតដល់ថ្នាក់រៀនអំពីបំណិនប្រើប្រាស់អ៊ីនធឺណិតប្រកបដោយសុវត្ថិភាព ការហែលទឹក និងការបង្ការ ទប់ស្កាត់ការលង់ទឹក សកម្មភាពទាំងអស់របស់នគរបាលខេត្តកាម៉ាវឆ្ពោះដល់ទិសដៅរួម គឺបង្កលក្ខណៈឱ្យកុមារមានឱកាសរៀនសូត្រ លេងកម្សាន្ត និងធំឡើងក្នុងបរិយាកាសប្រកបដោយសុវត្ថិភាពនិងមានសុខភាពល្អ។ តាមរយៈសកម្មភាពជាក់ស្តែងនិងពោរពេញដោយមនុស្សធម៌ កម្មាភិបាល យុទ្ធជននគរបាលកាម៉ាវ បានបន្តធ្វើឱ្យរីកសាយភាយរូបភាពរបស់នគរបាលជិតដិតនឹងប្រជាជន គោរពប្រជាជន និងដើម្បីប្រជាជនស្ម័គ្រចិត្តបម្រើ៕
យ៉ីអាញ - ពេជ្រសឿន
ពាក្យគន្លឹះ
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
